ត្រឡប់ទៅបញ្ជីសៀវភៅវិញ

ទំនុកតម្កើងលេខ ១៣៩ (១៣៨) បទពាក្យ ៧

១បពិត្រព្រះម្ចាស់ដ៏សប្បុរសទ្រង់ឈ្វេងយល់អស់ជម្រៅចិត្ត
នៃទូលបង្គំដែលមានពិតព្រះអង្គស្គាល់ឥតសល់ចន្លោះ។
២ទ្រង់ជ្រាបឥតបីមានសង្ស័យក្រោកឈរអង្គុយគ្រប់ទាំងអស់
ឈ្វេងយល់គំនិតខ្ញុំឥតខ្ចោះពីមុនទាំងអស់ស្រេចទៅហើយ។
៣ទោះបីដើរដេកធ្វើកិច្ចការតិចច្រើនម្តេចម្តាមិនបាត់ឡើយ
ព្រះអង្គទ្រង់ជ្រាបអស់ទៅហើយសម្រាកក៏ដោយមិនកំបាំង។
៤ទោះជាពាក្យពេចន៍ប្រុងនឹងស្តីទ្រង់យល់អត្ថន័យអស់តែម្តង
សព្វទាំងសេចក្តីដែលបម្រុងទុកក្នុងចិត្តផងក៏មិនសល់។
៥ព្រះអង្គនៅពាំងទាំងមុខក្រោយការពារមិនឱ្យមានកង្វល់
មិនឱ្យខ្ញុំជួបគ្រោះអំពល់ព្រោះតែទ្រង់ផ្តល់បារមីថ្លៃ។
៦នេះគឺព្រះអង្គទ្រង់ត្រាស់ញាណទើបទ្រង់ជ្រាបបានមិនសល់អ្វី
អស្ចារ្យពេកណាស់គួរស្ញែងក្រៃខ្ញុំមិនយល់ន័យដូចម្តេចសោះ។
៧តើទូលបង្គំអាចទៅណាឆ្ងាយពីភក្ត្រាព្រះអង្គនោះ
គេចទៅទីណាមិនផុតសោះព្រះអង្គជ្រាបអស់សព្វទិសា។
៨បើខ្ញុំនឹងឡើងទៅលើមេឃក៏មិនផុតភ្នែកផុតនេត្រា
បើទៅនៅស្ថានមនុស្សមរណាក៏ជួបភក្ត្រាទ្រង់ជានិច្ច។
៩ទោះបីជាខ្ញុំពាក់ស្លាបហោះទៅកន្លែងរះព្រះអាទិត្យ
ឬទោះបីខ្ញុំចង់រត់គេចទៅរស់ឯលិចនាយសមុទ្រ។
១០ក៏ព្រះអង្គគង់នៅទីនោះឥតមានចន្លោះឬគេចផុត
ជួយដឹកនាំខ្ញុំលែងតក់ស្លុតដោយបារមីឫទ្ធិដ៏ឧត្តម។
១១ប្រសិនបើខ្ញុំពោលឡើងថាសូមឱ្យអន្ធិកាគ្របលើខ្ញុំ
ពន្លឺថ្ងៃដែលនៅជិតជុំប្រែក្លាយយប់ផ្តុំឥតពន្លឺ។
១២ទោះបីងងឹតយ៉ាងណាក្តីព្រះអម្ចាស់ថ្លៃនៅតែភ្លឺ
ពេលយប់ដូចថ្ងៃជះរន្ទឺងងឹតប្រែភ្លឺមានរស្មី។
១៣ព្រះអង្គបង្កើតខ្ញុំបានសុខហើយទ្រង់បានទុកខ្ញុំក្នុងផ្ទៃ
អ្នកម្តាយមានគុណយូរខែថ្ងៃសន្តោសប្រណីគ្រប់កាយា។
១៤ខ្ញុំសូមលើកតម្កើងព្រះអង្គស្នាព្រះហស្តទ្រង់ក៏អស្ចារ្យ
ខ្ញុំដឹងថាអ្វីគ្រប់ប្រការសុទ្ធតែអស្ចារ្យកើតពីទ្រង់។
១៥ពេលទូលបង្គំចាប់កំណើតនៅក្នុងទីស្ងាត់លាក់កំបាំង
ក៏មិនអាចពួននឹងព្រះអង្គអ្វីៗក៏ទ្រង់ជ្រាបទាំងអស់។
១៦កាលទូលបង្គំមិនមានខ្លួនរូបកាយមាំមួនសាច់ឈាមស្រស់
ព្រះអង្គទតឃើញខ្ញុំទាំងអស់ឥតមានចន្លោះត្រង់ណាឡើយ។
ព្រះអង្គកំណត់ពេលផងណាអាយុសង្ខារខ្ញុំរួចហើយ
កត់ទុកជាស្រេចមិនកន្តើយមុននឹងដល់ថ្ងៃនោះមកទៀត។
១៧បពិត្រព្រះម្ចាស់ព្រះតម្រិះព្រះអង្គជ្រៅជ្រះជាងសមុទ្រ
ខ្ពស់ហួសអាកាសវេហាស៍ផុតមិនអាចកំណត់ដឹងប៉ុន្មាន។
១៨ប្រសិនបើចិត្តខ្ញុំចង់រាប់ក៏មិនអាចគ្រប់ទាំងអស់បាន
ពីការអស្ចារ្យទាំងប៉ុន្មានមានចំនួនច្រើនជាងគ្រាប់ខ្សាច់។
១៩បពិត្រព្រះម្ចាស់ទ្រង់គួរតែប្រហារពួកគេឱ្យខ្ទីខ្ទេច
ទាំងពួកឃាតករសូមក្រញិចឱ្យគេរត់គេចឆ្ងាយពីខ្ញុំ។
២០សត្រូវព្រះអង្គនាំគ្នាយកនាមព្រះអង្គមកបោកបន្លំ
គេពោលព្រះនាមទ្រង់ជាធំដើម្បីបន្លំធ្វើអាក្រក់។
២១បពិត្រព្រះម្ចាស់អើយខ្ញុំស្អប់អ្នកធ្វើមិនគាប់ចិត្តគម្រក់
ចង់ចងគំនុំព្រះសង្គ្រោះបះបោរទុយ៌សប៉ងប្រឆាំង។
២២ខ្ញុំស្អប់ពួកគេខ្លាំងបំផុតពួកអ្នកមានចិត្តហ៊ានប្រណាំង
ខ្ញុំបានចាត់ទុកគេជាខ្មាំងតែងតែប្រឆាំងរូបខ្ញុំផ្ទាល់។
២៣ឱ! ព្រះម្ចាស់អើយសូមពិនិត្យឱ្យបានស្គាល់ចិត្តផុតកង្វល់
ទាំងល្បងមើលខ្ញុំឱ្យអស់ខ្វល់ដើម្បីបានយល់អ្វីខ្ញុំគិត។
២៤សូមព្រះជាម្ចាស់ទតមើលតើខ្ញុំមិនបានដើរខុសពីក្រឹត្យ
ជួយដឹកនាំខ្ញុំឱ្យជួបជិតមាគ៌ាប្រណីតនៅអស់កល្ប។