ត្រឡប់ទៅបញ្ជីសៀវភៅវិញ

ទំនុកតម្កើងលេខ ៨៦ (៨៥) បទព្រហ្មគីតិ

១ឱព្រះអម្ចាស់អើយកុំកន្តើយផ្ទៀងព្រះកាណ៌​
ស្តាប់ស័ព្ទខ្ញុំវាចាហើយមេត្តាតបវិញផង។
ដ្បិតខ្ញុំជាមនុស្សកម្សត់ខុសគេទាំងពួង
ទុរគតពេកកន្លងតោកយ៉ាកផងរាល់វេលា។
២សូមរក្សាជីវិតឱ្យខ្ញុំស្ថិតផុតគ្រាំគ្រា
ដ្បិតខ្ញុំត្រង់ល្អជាស្ម័គ្រគ្រប់គ្រាគ្មានគេចកែ។
សូមមេត្តាសង្គ្រោះដ្បិតខ្ញុំស្មោះឥតប្រួលប្រែ
ជាបម្រើនៅក្បែរពឹងផ្អែកតែលើម្ចាស់ថ្លៃ។
៣ឱ! ព្រះអម្ចាស់អើយអាណិតហើយសូមប្រណី
ខ្ញុំស្រែកទូលរាល់ថ្ងៃរកព្រះអង្គមិនឈប់ឈរ។
៤ឱព្រះអម្ចាស់អើយសូមប្រោសឱ្យបម្រើល្អ
មានសប្បាយអំណរតម្រង់រកព្រះអម្ចាស់។
៥បពិត្រព្រះម្ចាស់ខ្ញុំព្រះឧត្តមសប្បុរសណាស់
អត់ឱនមិនថ្កោលទោសតែងសន្តោសខ្ញុំបរិបូណ៌។
ព្រះអង្គតែងអាណិតអ្នកផ្តេកផ្តិតទ្រង់អាសូរ
អ្នកដែលដង្ហោយថ្ងូរហៅព្រះអង្គមកសង្គ្រោះ។
៦ឱព្រះអម្ចាស់អើយទ្រង់ផ្ទៀងហើយសូមសន្តោស
ពាក្យខ្ញុំស្រែករកនោះសូមទ្រង់ប្រោសរូបខ្ញុំផង។
៧នៅថ្ងៃមានអាសន្នខ្ញុំបែរបន់មិនរំលង
អង្វររកព្រះអង្គទ្រង់ឆ្លើយត្រង់តបមកខ្ញុំ។
៨ឱព្រះជាអម្ចាស់ទ្រង់ជាព្រះដ៏ឧត្តម
ព្រះអង្គសែនសក្តិសមគ្មានព្រះធំដូចទ្រង់ឡើយ។
៩បពិត្រព្រះអម្ចាស់គ្រប់ជាតិសាសន៍ដែលកើតហើយ
គេនឹងមិនកន្តើយតម្កើងកើយនាមព្រះអង្គ។
១០ព្រោះដ្បិតទ្រង់ជាព្រះដ៏ខ្ពង់ខ្ពស់អស្ចារ្យផ្ចង់
នោះគឺមានតែទ្រង់ដែលជាអង្គលើលោកា។
១១ឱ! ព្រះអម្ចាស់ខ្ញុំមេត្តាសូមប្រាប់មាគ៌ា
ឱ្យខ្ញុំស្គាល់គ្រប់គ្រានឹងយាត្រាចេញដើរតាម។
យើងខ្ញុំនឹងប្រព្រឹត្តតាមសុចរិតមាគ៌ាស្នាម
ឱ្យខ្ញុំចេះប្រណម្យកោតឧត្តមបរមនាម។
១២បពិត្រព្រះម្ចាស់ខ្ញុំទូលបង្គំមិនទីមទាម
ថ្លែងអរព្រះគុណភ្លាមឥតលាក់លៀមពីដួងចិត្ត។
ខ្ញុំនឹងលើកតម្កើងព្រះនាមឡើងអស់កល្បពិត
ថ្កើងថ្កានខ្ពស់ប្រណីតរៀងស្ថេរស្ថិតជាប់រហូត។
១៣ដ្បិតទ្រង់មានព្រះទ័យករុណាក្រៃមិនរលត់
ជួយរំដោះជីវិតខ្ញុំឱ្យផុតពីក្សិណក្ស័យ។
១៤បពិត្រព្រះជាម្ចាស់ពួកមនុស្សច្រើនពេកក្រៃ
ព្រហើនមិនយល់អ្វីគេពួតដៃប្រឆាំងខ្ញុំ។
មានអ្នកខ្លាំងពូកែបានប្រមែប្រមូលផ្តុំ
ចង់ដកជីវិតខ្ញុំមិនបារម្ភព្រះអង្គសោះ។
១៥បពិត្រព្រះម្ចាស់អើយព្រះអង្គហើយព្រះទ័យស្មោះ
ករុណាទ្រង់សន្តោសសប្បុរសមានមេត្តា។
១៦សូមទ្រង់បែរព្រះភក្ត្រទតឱ្យជាក់ខ្ញុំនេះណា
សូមអាណិតមេត្តាខ្ញុំគ្រប់គ្រាកុំបីខាន។
សង្គ្រោះខ្ញុំជាអ្នកបម្រើស្ម័គ្រសូមឱ្យមាន
កម្លាំងខ្លាំងក្លាហានសូមផ្ញើប្រាណនឹងព្រះអង្គ។
១៧សូមមេត្តាសម្តែងការស្ញប់ស្ញែងគេឃើញផង
អ្នកស្អប់ខ្ញុំកន្លងឃើញព្រះអង្គប្រោសសង្គ្រោះ។
សូមឱ្យខ្មាំងសត្រូវវាអស់ផ្លូវត្រូវអាម៉ាស់
នៅពេលដែលទ្រង់ត្រាស់ប្រោសសង្គ្រោះការពារខ្ញុំ។