ត្រឡប់ទៅបញ្ជីសៀវភៅវិញ

ទំនុកតម្កើងលេខ ៤៣ (៤២) បទពាក្យ ៧

១ឱព្រះជាអម្ចាស់ខ្ញុំអើយសូមកុំកន្តើយរកយុត្តិធម៌
សូមជួយកាន់ក្តីទល់តបតពួកមនុស្សមិនល្អមនុស្សទុច្ចរិត។
២បពិត្រព្រះជាអម្ចាស់អើយព្រះអង្គនេះហើយជួយជីវិត
ទ្រង់ជាកំពែងបាំងជុំជិតសូមទ្រង់អាណិតកុំបោះបង់។
៣សូមផ្តល់ពន្លឺនិងក្តីពិតឱ្យនៅស្ថេរស្ថិតហើយតម្រង់
ទៅភ្នំវិសុទ្ធដ៏ផូរផង់ដំណាក់ព្រះអង្គសមសព្វគ្រប់។
៤ខ្ញុំនឹងឆ្ពោះទៅទីអាសនៈព្រះអង្គឥតអាក់ជាប្រភព
នៃក្តីអំណរដ៏លើសលប់តម្កើងមិនឈប់ដោយតន្ត្រី។
៥ខ្ញុំតែងតែនឹកគិតឥតភ្លេច«តើខ្ញុំស្រយុតចិត្តធ្វើអ្វី
ចូរផ្ញើជីវិតកុំសោកស្តាយផ្ញើទាំងរូបកាយនឹងទ្រង់ទៅ »។
ខ្ញុំមុខជានឹងលើកតម្កើងព្រះអង្គខ្ពស់ឡើងមិនអាស្រូវ
ជាព្រះសង្គ្រោះល្អត្រឹមត្រូវឈ្នះអស់សត្រូវគ្រប់ទិសទី។