ជំពូក ១១៩
វិន័យរបស់ព្រះអម្ចាស់
1 អ្នកណាមានកិរិយាមារយាទ
ល្អត្រឹមត្រូវឥតខ្ចោះ
ហើយប្រតិបត្តិតាមវិន័យរបស់ព្រះអម្ចាស់
អ្នកនោះមានសុភមង្គលហើយ!។
2 អ្នកណាប្រតិបត្តិតាមដំបូន្មានរបស់ព្រះអង្គ
ហើយស្វែងរកព្រះអង្គអស់ពីចិត្ត
អ្នកនោះមានសុភមង្គលហើយ!
3 អ្នកទាំងនោះមិនប្រព្រឹត្តអំពើទុច្ចរិតទេ
គេដើរតាមមាគ៌ារបស់ព្រះអង្គ។
4 ព្រះអង្គបានចេញច្បាប់មក
ដើម្បីឲ្យយើងខ្ញុំយកចិត្តទុកដាក់ប្រតិបត្តិតាម។
5 សូមជួយទូលបង្គំឲ្យចេះប្រព្រឹត្តត្រឹមត្រូវ
ដោយប្រតិបត្តិតាមវិន័យរបស់ព្រះអង្គ។
6 ដូច្នេះ ពេលណាទូលបង្គំពិនិត្យមើល
វិន័យទាំងប៉ុន្មានរបស់ព្រះអង្គ
នោះទូលបង្គំនឹងមិនត្រូវអាម៉ាស់ឡើយ។
7 ទូលបង្គំសូមលើកតម្កើងព្រះអង្គ
ដោយចិត្តទៀងត្រង់
ហើយពិចារណាមើលព្រះបន្ទូលដ៏សុចរិត
ដែលព្រះអង្គបានបង្គាប់មក។
8 ទូលបង្គំចង់ប្រតិបត្តិតាម
វិន័យរបស់ព្រះអង្គ
សូមកុំបោះបង់ចោលទូលបង្គំសោះឡើយ!
9 តើមនុស្សកំលោះត្រូវធ្វើយ៉ាងណា
ដើម្បីឲ្យកិរិយាមារយាទរបស់ខ្លួន
បានល្អត្រឹមត្រូវ?
គឺដោយប្រតិបត្តិតាមព្រះបន្ទូលរបស់ព្រះអង្គ។
10 ទូលបង្គំស្វែងរកព្រះអង្គយ៉ាងអស់ពីចិត្ត
សូមកុំបណ្តោយឲ្យទូលបង្គំងាកចេញ
ពីវិន័យរបស់ព្រះអង្គឡើយ!
11 ទូលបង្គំរក្សាព្រះបន្ទូលរបស់ព្រះអង្គ
ទុកនៅក្នុងចិត្ត ដើម្បីកុំឲ្យប្រព្រឹត្តអំពើបាប
ទាស់នឹងព្រះហឫទ័យព្រះអង្គ។
12 ព្រះអម្ចាស់អើយ ទូលបង្គំសូមលើកតម្កើងព្រះអង្គ
សូមបង្រៀនឲ្យទូលបង្គំ
ស្គាល់វិន័យរបស់ព្រះអង្គ!
13 ទូលបង្គំរៀបរាប់អំពីព្រះបន្ទូលទាំងប៉ុន្មាន
ដែលព្រះអង្គបានបង្គាប់មក។
14 ទូលបង្គំសប្បាយចិត្តនឹងអនុវត្តតាម
ដំបូន្មានរបស់ព្រះអង្គ
ដូចជាទូលបង្គំសប្បាយចិត្ត
នឹងមានសម្បត្តិដ៏ស្តុកស្តម្ភ។
15 ទូលបង្គំនឹងពិចារណាពីច្បាប់របស់ព្រះអង្គ
ទូលបង្គំសញ្ជឹងគិតអំពីមាគ៌ារបស់ព្រះអង្គជានិច្ច។
16 ទូលបង្គំពេញចិត្តនឹងវិន័យ
របស់ព្រះអង្គខ្លាំងណាស់
ទូលបង្គំមិនភ្លេចព្រះបន្ទូលរបស់ព្រះអង្គឡើយ។
17 សូមប្រណីសន្ដោសទូលបង្គំ
ជាអ្នកបម្រើរបស់ព្រះអង្គ
ដើម្បីឲ្យទូលបង្គំមានជីវិត
ហើយប្រតិបត្តិតាមព្រះបន្ទូលរបស់ព្រះអង្គ។
18 សូមបើកភ្នែកទូលបង្គំ
ដើម្បីឲ្យទូលបង្គំមើលឃើញភាពថ្លៃថ្នូរ
ដ៏អស្ចារ្យនៃវិន័យរបស់ព្រះអង្គ។
19 ទូលបង្គំគ្រាន់តែស្នាក់នៅជាបណ្តោះអាសន្ន
លើផែនដីនេះប៉ុណ្ណោះ
សូមកុំលាក់វិន័យរបស់ព្រះអង្គ
នឹងទូលបង្គំឡើយ។
20 ចិត្តទូលបង្គំតែងតែផ្តោតទៅរកព្រះបន្ទូល
ដែលព្រះអង្គបង្គាប់មកជានិច្ច។
21 ព្រះអង្គគំរាមកំហែងមនុស្សអួតបំប៉ោង
ដែលជាជនត្រូវបណ្ដាសា
វង្វេងចេញឆ្ងាយពីវិន័យរបស់ព្រះអង្គ។
22 សូមដកយកការអាម៉ាស់ចេញពីទូលបង្គំ
កុំឲ្យមាននរណាមើលងាយទូលបង្គំឡើយ
ដ្បិតទូលបង្គំកាន់តាមដំបូន្មាន
របស់ព្រះអង្គហើយ។
23 ទោះបីពួកមេដឹកនាំឃុបឃិតគ្នា
ប្រឆាំងនឹងទូលបង្គំក៏ដោយ
ទូលបង្គំដែលជាអ្នកបម្រើរបស់ព្រះអង្គ
នៅតែសញ្ជឹងគិតពីវិន័យរបស់ព្រះអង្គជានិច្ច។
24 ទូលបង្គំពេញចិត្តនឹងដំបូន្មានរបស់ព្រះអង្គណាស់
ដំបូន្មានព្រះអង្គជួយជាគំនិតដល់ទូលបង្គំ។
25 ទូលបង្គំបានធ្លាក់ខ្លួនដុនដាបយ៉ាងខ្លាំង
សូមប្រោសឲ្យទូលបង្គំបានរស់
ស្របតាមព្រះបន្ទូលរបស់ព្រះអង្គផង។
26 ទូលបង្គំរៀបរាប់អំពីដំណើរជីវិតរបស់ទូលបង្គំ
ហើយព្រះអង្គក៏ឆ្លើយតបមកទូលបង្គំ
សូមបង្រៀនឲ្យទូលបង្គំស្គាល់វិន័យ
របស់ព្រះអង្គ!។
27 សូមជួយទូលបង្គំឲ្យយល់អំពីអត្ថន័យ
នៃច្បាប់របស់ព្រះអង្គ
ដើម្បីឲ្យទូលបង្គំអាចសញ្ជឹងគិតពីការអស្ចារ្យ
ទាំងប៉ុន្មានដែលព្រះអង្គបានសម្ដែង!។
28 ទូលបង្គំមានទុក្ខសោកសង្រេង
សូមលើកទឹកចិត្តទូលបង្គំឡើងវិញ
ដូចព្រះអង្គបានសន្យា។
29 សូមនាំទូលបង្គំចេញឆ្ងាយពីផ្លូវខុសឆ្គង
ហើយជួយឲ្យទូលបង្គំប្រតិបត្តិតាម
វិន័យរបស់ព្រះអង្គ!
30 ទូលបង្គំប្ដេជ្ញាចិត្តស្មោះត្រង់នឹងព្រះអង្គ
ទូលបង្គំសុខចិត្តធ្វើតាមព្រះបន្ទូល
ដែលព្រះអង្គបង្គាប់មក។
31 ទូលបង្គំជំពាក់ចិត្តនឹងដំបូន្មានរបស់ព្រះអង្គ
ព្រះអម្ចាស់អើយ
សូមកុំឲ្យទូលបង្គំត្រូវអាម៉ាស់ឡើយ!
32 ទូលបង្គំសប្បាយចិត្តនឹងដើរ
តាមមាគ៌ារបស់ព្រះអង្គ
ដ្បិតព្រះអង្គធ្វើឲ្យចិត្តទូលបង្គំបានភ្លឺស្វាង។
33 ព្រះអម្ចាស់អើយ សូមបង្រៀនឲ្យទូលបង្គំ
ស្គាល់វិន័យរបស់ព្រះអង្គ
ដើម្បីឲ្យទូលបង្គំកាន់តាម
រហូតដល់ទីបញ្ចប់!។
34 សូមប្រទានឲ្យទូលបង្គំមានប្រាជ្ញា
ដើម្បីរក្សាវិន័យរបស់ព្រះអង្គ
ហើយប្រតិបត្តិតាមយ៉ាងអស់ពីចិត្ត!។
35 សូមនាំទូលបង្គំដើរតាមមាគ៌ា
នៃវិន័យរបស់ព្រះអង្គ
ដ្បិតទូលបង្គំពេញចិត្តនឹងវិន័យ
ទាំងនេះណាស់។
36 សូមទាក់ទាញចិត្តទូលបង្គំ
ឲ្យធ្វើតាមដំបូន្មានរបស់ព្រះអង្គ
គឺមិនមែនឲ្យរកកម្រៃឡើយ!
37 សូមទាញអារម្មណ៍ទូលបង្គំ
ឲ្យបែរចេញពីអ្វីៗដែលឥតខ្លឹមសារ
ហើយឲ្យទូលបង្គំមានជីវិតរស់នៅ
តាមមាគ៌ារបស់ព្រះអង្គ!
38 សូមសម្រេចតាមព្រះបន្ទូលដែលព្រះអង្គបានសន្យា
ជាមួយទូលបង្គំជាអ្នកបម្រើរបស់ព្រះអង្គ
គឺព្រះបន្ទូលដែលព្រះអង្គបានសន្យា
ចំពោះអស់អ្នកគោរពកោតខ្លាចព្រះអង្គ។
39 សូមយកសេចក្ដីអាម៉ាស់ដែលទូលបង្គំ
ខ្លាចរអែងនេះ ចេញឲ្យឆ្ងាយពីទូលបង្គំទៅ
ដ្បិតការសម្រេចរបស់ព្រះអង្គសុទ្ធតែល្អទាំងអស់។
40 ទូលបង្គំប្រាថ្នាចង់ធ្វើតាមច្បាប់របស់ព្រះអង្គ
សូមប្រទានឲ្យទូលបង្គំមានជីវិតឡើងវិញ
ដោយសេចក្ដីសុចរិតរបស់ព្រះអង្គ!
41 ព្រះអម្ចាស់អើយ សូមសម្ដែងព្រះហឫទ័យ
មេត្តាករុណាចំពោះទូលបង្គំ សូមសង្គ្រោះ
ទូលបង្គំតាមព្រះបន្ទូលសន្យារបស់ព្រះអង្គ!
42 សូមជួយឲ្យទូលបង្គំអាចឆ្លើយតប
នឹងអ្នកដែលជេរប្រមាថទូលបង្គំ
ដ្បិតទូលបង្គំផ្ញើជីវិតលើព្រះបន្ទូលរបស់ព្រះអង្គ។
43 សូមកុំឲ្យទូលបង្គំនិយាយអ្វីប្រាសចាក
ពីសេចក្ដីពិតឡើយ
ដ្បិតទូលបង្គំសង្ឃឹមលើការសម្រេចរបស់ព្រះអង្គ។
44 ទូលបង្គំនឹងគោរពតាមវិន័យរបស់ព្រះអង្គ
ជានិច្ចនិរន្តរ៍រហូតតរៀងទៅ។
45 ទូលបង្គំចង់រស់នៅដោយមានសេរីភាពពេញទី
ដ្បិតទូលបង្គំស្វែងរកច្បាប់របស់ព្រះអង្គ។
46 ទូលបង្គំនឹងថ្លែងអំពីដំបូន្មានរបស់ព្រះអង្គ
ប្រាប់ស្តេចនានា
ទូលបង្គំនឹងមិនខ្មាសសោះឡើយ។
47 ទូលបង្គំពេញចិត្តនឹងវិន័យរបស់ព្រះអង្គ
ទូលបង្គំស្រឡាញ់វិន័យនេះណាស់។
48 ទូលបង្គំលើកដៃប្រណម្យគោរព
វិន័យរបស់ព្រះអង្គ
ព្រោះទូលបង្គំស្រឡាញ់វិន័យនេះ
ទូលបង្គំចង់សញ្ជឹងគិតអំពីវិន័យរបស់ព្រះអង្គ។
49 សូមនឹកដល់ព្រះបន្ទូលដែលព្រះអង្គបានសន្យា
ជាមួយទូលបង្គំ
ដ្បិតព្រះអង្គបានធ្វើឲ្យទូលបង្គំមានសង្ឃឹម!
50 នៅពេលទូលបង្គំមានទុក្ខវេទនា
ព្រះបន្ទូលនេះធ្វើឲ្យចិត្តទូលបង្គំបានធូរស្បើយ
ព្រះបន្ទូលសន្យារបស់ព្រះអង្គ
បានធ្វើឲ្យទូលបង្គំមានជីវិតឡើងវិញ។
51 មនុស្សអួតបំប៉ោងនាំគ្នាចំអកឲ្យទូលបង្គំ
តែទូលបង្គំមិនឃ្លាតចាកពីវិន័យ
របស់ព្រះអង្គឡើយ។
52 ព្រះអម្ចាស់អើយ ទូលបង្គំនឹកដល់
ការសម្រេចរបស់ព្រះអង្គ កាលពីអតីតកាល
ហើយចិត្តទូលបង្គំក៏បានធូរស្បើយ។
53 មនុស្សពាលបានធ្វើឲ្យទូលបង្គំ
ក្ដៅក្រហាយយ៉ាងខ្លាំង
ព្រោះពួកគេបោះបង់ចោលវិន័យ
របស់ព្រះអង្គ។
54 ពេលដែលទូលបង្គំស្នាក់អាស្រ័យ
ជាបណ្តោះអាសន្នក្នុងលោកនេះ
ទូលបង្គំបានយកវិន័យរបស់ព្រះអង្គ
មកធ្វើជាទំនុកតម្កើង។
55 ឱព្រះអម្ចាស់អើយ នៅពេលយប់ទូលបង្គំនឹកដល់
ព្រះនាមរបស់ព្រះអង្គ ហើយទូលបង្គំ
ប្រតិបត្តិតាមវិន័យរបស់ព្រះអង្គ។
56 ទូលបង្គំរកឃើញសុភមង្គល
ដោយអនុវត្តតាមច្បាប់របស់ព្រះអង្គ។
57 ឱព្រះអម្ចាស់អើយ ទូលបង្គំសូមទូលព្រះអង្គថា
ការប្រតិបត្តិតាមព្រះបន្ទូលព្រះអង្គ
ជាចំណែកមត៌ករបស់ទូលបង្គំ។
58 ទូលបង្គំសូមអង្វរករព្រះអង្គយ៉ាងអស់ពីចិត្តថា
សូមប្រណីសន្ដោសទូលបង្គំ
តាមព្រះបន្ទូលសន្យារបស់ព្រះអង្គផង!
59 ទូលបង្គំរិះគិតអំពីកិរិយាមារយាទរបស់ទូលបង្គំ
ហើយទូលបង្គំក៏បោះជំហានមករកដំបូន្មាន
របស់ព្រះអង្គវិញ។
60 ទូលបង្គំប្រញាប់ប្រញាល់ប្រតិបត្តិ
តាមវិន័យរបស់ព្រះអង្គ
ឥតធ្វេសប្រហែសសោះឡើយ។
61 មនុស្សអាក្រក់បានធ្វើឲ្យទូលបង្គំ
ជាប់អន្ទាក់របស់គេ
តែទូលបង្គំឥតភ្លេចវិន័យរបស់ព្រះអង្គទេ។
62 នៅពាក់កណ្ដាលអធ្រាត្រ ទូលបង្គំក្រោកឡើង
ដើម្បីលើកតម្កើងព្រះអង្គ
ព្រោះតែការសម្រេចដ៏ត្រឹមត្រូវរបស់ព្រះអង្គ។
63 ទូលបង្គំជាមិត្តរបស់អស់អ្នក
ដែលគោរពកោតខ្លាចព្រះអង្គ
និងអស់អ្នកដែលប្រតិបត្តិតាម
ច្បាប់របស់ព្រះអង្គ។
64 ឱព្រះអម្ចាស់អើយ ផែនដីពេញទៅដោយ
ព្រះហឫទ័យមេត្តាករុណារបស់ព្រះអង្គ
សូមបង្រៀនឲ្យទូលបង្គំស្គាល់វិន័យ
របស់ព្រះអង្គ!
65 ឱព្រះអម្ចាស់អើយ សូមប្រណីសន្ដោសទូលបង្គំ
ជាអ្នកបម្រើរបស់ព្រះអង្គ
តាមព្រះបន្ទូលរបស់ព្រះអង្គផង។
66 សូមបង្រៀនទូលបង្គំឲ្យដឹងខុសត្រូវ មានប្រាជ្ញា
ដ្បិតទូលបង្គំទុកចិត្តលើវិន័យរបស់ព្រះអង្គ។
67 ពីមុនទូលបង្គំបានវង្វេង ហើយរងទុក្ខវេទនា
ឥឡូវនេះ ទូលបង្គំប្រតិបត្តិតាមព្រះបន្ទូល
របស់ព្រះអង្គហើយ។
68 ព្រះអង្គមានព្រះហឫទ័យល្អសប្បុរស
សូមបង្រៀនឲ្យទូលបង្គំស្គាល់វិន័យ
របស់ព្រះអង្គ!
69 មនុស្សអួតបំប៉ោងនាំគ្នាបង្ខូចកេរ្តិ៍ឈ្មោះទូលបង្គំ
តែទូលបង្គំនៅតែយកចិត្តទុកដាក់ធ្វើតាម
ច្បាប់របស់ព្រះអង្គជានិច្ច។
70 អ្នកទាំងនោះជាមនុស្សអត់ចិត្ត
រីឯទូលបង្គំវិញ ទូលបង្គំពេញចិត្តនឹងវិន័យ
របស់ព្រះអង្គណាស់។
71 ទូលបង្គំរងទុក្ខវេទនាដូច្នេះ ក៏ប្រពៃម្យ៉ាងដែរ
ព្រោះទូលបង្គំអាចរៀនក្រឹត្យវិន័យរបស់ព្រះអង្គ។
72 ចំពោះទូលបង្គំ ទោះបីមាសប្រាក់
ច្រើនយ៉ាងណាក៏ដោយ
ក៏គ្មានតម្លៃស្មើនឹងវិន័យរបស់ព្រះអង្គដែរ។
73 ព្រះអង្គបានបង្កើតទូលបង្គំមក
ហើយប្រទានឲ្យទូលបង្គំបានមាំមួនឡើង
ដូច្នេះ សូមប្រទានឲ្យទូលបង្គំ
មានប្រាជ្ញាសិក្សាវិន័យរបស់ព្រះអង្គ។
74 ពេលអស់អ្នកគោរពកោតខ្លាចព្រះអង្គ
ឃើញទូលបង្គំ គេនឹងមានអំណរ
ដ្បិតទូលបង្គំផ្ញើជីវិតលើព្រះបន្ទូលរបស់ព្រះអង្គ។
75 ឱព្រះអម្ចាស់អើយ ទូលបង្គំដឹងថាការអ្វី
ដែលព្រះអង្គសម្រេចសុទ្ធតែត្រឹមត្រូវទាំងអស់
ហើយព្រះអង្គដាក់ទោសទូលបង្គំក៏ត្រឹមត្រូវដែរ។
76 សូមសម្រាលទុក្ខទូលបង្គំ
ដោយសារព្រះហឫទ័យស្មោះស្ម័គ្ររបស់ព្រះអង្គ
តាមព្រះបន្ទូលដែលព្រះអង្គបានសន្យា
ជាមួយទូលបង្គំជាអ្នកបម្រើរបស់ព្រះអង្គ។
77 សូមសម្ដែងព្រះហឫទ័យមេត្តាករុណាមកលើ
ទូលបង្គំ ដើម្បីឲ្យទូលបង្គំមានជីវិតឡើងវិញ
ដ្បិតទូលបង្គំពេញចិត្តនឹងវិន័យ
របស់ព្រះអង្គណាស់។
78 សូមឲ្យមនុស្សអួតបំប៉ោងត្រូវអាម៉ាស់
ដ្បិតពួកគេនិយាយកុហកមួលបង្កាច់ទូលបង្គំ
រីឯទូលបង្គំវិញ
ទូលបង្គំសញ្ជឹងគិតពីច្បាប់របស់ព្រះអង្គ។
79 សូមឲ្យអស់អ្នកដែលគោរពកោត
ខ្លាចព្រះអង្គ នាំគ្នាមករកទូលបង្គំ
ដើម្បីឲ្យបានស្គាល់ដំបូន្មានរបស់ព្រះអង្គ។
80 សូមជួយឲ្យទូលបង្គំប្រព្រឹត្តតាមវិន័យ
របស់ព្រះអង្គឥតខ្ចោះ
កុំឲ្យទូលបង្គំត្រូវខ្មាសឡើយ។
81 ទូលបង្គំទន្ទឹងរង់ចាំមើលព្រះអង្គសង្គ្រោះទូលបង្គំ
ទូលបង្គំរង់ចាំព្រះអង្គមានព្រះបន្ទូល។
82 ទូលបង្គំខំប្រឹងរង់ចាំមើលព្រះបន្ទូលសន្យា
របស់ព្រះអង្គ ទូលបង្គំពោលថា «តើដល់ពេលណា
ទើបព្រះអង្គសម្រាលទុក្ខទូលបង្គំ?»។
83 ទូលបង្គំជាមនុស្សដែលគ្មាននរណារាប់រកទៀតទេ
តែទូលបង្គំមិនបំភ្លេចក្រឹត្យវិន័យ
របស់ព្រះអង្គឡើយ។
84 តើទូលបង្គំដែលជាអ្នកបម្រើរបស់ព្រះអង្គ
ត្រូវរង់ចាំដល់ពេលណាទៀត
ទើបព្រះអង្គវិនិច្ឆ័យទោសអស់អ្នក
ដែលបៀតបៀនទូលបង្គំ?
85 មនុស្សអួតបំប៉ោងមិនគោរពតាមវិន័យ
របស់ព្រះអង្គទេ
គេនាំគ្នាជីករណ្ដៅ ដើម្បីឲ្យទូលបង្គំធ្លាក់។
86 វិន័យរបស់ព្រះអង្គទាំងប៉ុន្មាន
សុទ្ធតែពិតទាំងអស់
សូមជួយទូលបង្គំផង
ដ្បិតគេបៀតបៀនទូលបង្គំដោយឥតហេតុផល។
87 នៅតែបន្តិចប៉ុណ្ណោះ
គេនឹងប្រហារទូលបង្គំឲ្យវិនាសសូន្យ
ប៉ុន្តែ ទូលបង្គំមិនបោះបង់ចោលច្បាប់
របស់ព្រះអង្គឡើយ។
88 សូមប្រទានឲ្យទូលបង្គំមានជីវិតឡើងវិញ
ដោយព្រះហឫទ័យមេត្តាករុណា
ទូលបង្គំនឹងប្រតិបត្តិតាមដំបូន្មាន
ដែលព្រះអង្គបង្គាប់មក។
89 ឱព្រះអម្ចាស់អើយ ព្រះបន្ទូលរបស់ព្រះអង្គ
ស្ថិតស្ថេររហូតតទៅ នៅក្នុងស្ថានបរមសុខ។
90 ព្រះហឫទ័យស្មោះស្ម័គ្ររបស់ព្រះអង្គ
នៅស្ថិតស្ថេរអស់កល្បជាអង្វែងតរៀងទៅ
ព្រះអង្គបានធ្វើឲ្យផែនដីរឹងមាំ
ហើយផែនដីក៏នៅស្ថិតស្ថេរដែរ។
91 អ្វីៗសព្វសារពើនៅស្ថិតស្ថេររហូតមកដល់សព្វថ្ងៃ
ដោយសារព្រះបញ្ជារបស់ព្រះអង្គ
ដ្បិតអ្វីៗទាំងអស់សុទ្ធតែនៅក្រោម
អំណាចរបស់ព្រះអង្គ។
92 ប្រសិនបើទូលបង្គំមិនពេញចិត្តនឹងវិន័យ
របស់ព្រះអង្គទេ ទូលបង្គំមុខជារងទុក្ខវេទនា
ហើយវិនាសអន្តរាយជាមិនខាន។
93 ទូលបង្គំនឹងមិនភ្លេចច្បាប់
របស់ព្រះអង្គសោះឡើយ
ដ្បិតព្រះអង្គធ្វើឲ្យទូលបង្គំមានជីវិតឡើងវិញ
ដោយសារច្បាប់ទាំងនេះ។
94 ទូលបង្គំនៅក្រោមឱវាទរបស់ព្រះអង្គហើយ
សូមសង្គ្រោះទូលបង្គំផង!
ដ្បិតទូលបង្គំយកចិត្តទុកដាក់
នឹងច្បាប់របស់ព្រះអង្គ។
95 មនុស្សអាក្រក់រង់ចាំប្រហារជីវិតទូលបង្គំ
តែទូលបង្គំចាប់ចិត្តនឹងដំបូន្មានរបស់ព្រះអង្គ។
96 ទូលបង្គំឃើញថា
សូម្បីអ្វីៗដ៏ល្អឥតខ្ចោះក៏នឹងមានទីបញ្ចប់ដែរ
ប៉ុន្តែ វិន័យរបស់ព្រះអង្គទូលំទូលាយ
ឥតមានព្រំដែនសោះឡើយ។
97 ទូលបង្គំស្រឡាញ់វិន័យ
របស់ព្រះអង្គខ្លាំងណាស់
ទូលបង្គំសញ្ជឹងគិតអំពីវិន័យនេះ
ជារៀងរាល់ថ្ងៃ។
98 វិន័យរបស់ព្រះអង្គធ្វើឲ្យទូលបង្គំ
មានប្រាជ្ញាវាងវៃជាងខ្មាំងសត្រូវ
ដ្បិតទូលបង្គំរិះគិតពីវិន័យនេះជានិច្ច។
99 ទូលបង្គំចេះដឹងជាងគ្រូៗទាំងប៉ុន្មាន
របស់ទូលបង្គំទៅទៀត ដ្បិតទូលបង្គំ
យកដំបូន្មានទាំងប៉ុន្មាន មកសញ្ជឹងគិត។
100 ទូលបង្គំដឹងខុសត្រូវជាងចាស់ៗទៅទៀត
ដ្បិតទូលបង្គំប្រព្រឹត្តតាមច្បាប់របស់ព្រះអង្គ។
101 ទូលបង្គំចៀសចេញឆ្ងាយពីផ្លូវអាក្រក់ទាំងប៉ុន្មាន
ដើម្បីប្រតិបត្តិតាមព្រះបន្ទូលរបស់ព្រះអង្គ។
102 ទូលបង្គំមិនងាកចេញពីសេចក្ដី
ដែលព្រះអង្គបង្គាប់មកទូលបង្គំឡើយ
ដ្បិតព្រះអង្គប្រៀនប្រដៅទូលបង្គំដូច្នេះ។
103 ព្រះបន្ទូលរបស់ព្រះអង្គប្រៀបបាននឹងអាហារ
ដ៏ឆ្ងាញ់ពិសេស សម្រាប់ទូលបង្គំ
ហើយក៏មានរសជាតិផ្អែមជាងទឹកឃ្មុំទៅទៀត។
104 ច្បាប់របស់ព្រះអង្គបានធ្វើឲ្យទូលបង្គំ
ដឹងខុសត្រូវ ហេតុនេះហើយបានជា
ទូលបង្គំស្អប់ការវៀចវេរ។
105 ព្រះបន្ទូលរបស់ព្រះអង្គជាចង្កៀងបំភ្លឺជំហាន
ទូលបង្គំ និងជាពន្លឺបំភ្លឺផ្លូវរបស់ទូលបង្គំ។
106 ទូលបង្គំសូមសន្យាដោយឥតងាករេថា
ទូលបង្គំនឹងប្រតិបត្តិតាមព្រះបន្ទូល
ដ៏សុចរិតដែលព្រះអង្គបង្គាប់មក។
107 ឱព្រះអម្ចាស់អើយ
ទូលបង្គំរងទុក្ខវេទនាខ្លាំងណាស់
សូមប្រោសប្រទានឲ្យទូលបង្គំមានជីវិត
ឡើងវិញ ស្របតាមព្រះបន្ទូលរបស់ព្រះអង្គផង!
108 ឱព្រះអម្ចាស់អើយ
សូមទទួលយកពាក្យទូលអង្វររបស់ទូលបង្គំ
ទុកជាតង្វាយ ហើយសូមបង្រៀនឲ្យទូលបង្គំ
ស្គាល់វិន័យរបស់ព្រះអង្គ!
109 ជីវិតទូលបង្គំប្រឈមមុខទល់នឹងអន្តរាយជានិច្ច
ប៉ុន្តែ ទូលបង្គំមិនភ្លេចវិន័យរបស់ព្រះអង្គទេ។
110 មនុស្សអាក្រក់នាំគ្នាដាក់អន្ទាក់ចាំចាប់ទូលបង្គំ
តែទូលបង្គំមិនវង្វេងចេញឆ្ងាយ
ពីច្បាប់របស់ព្រះអង្គឡើយ។
111 ដំបូន្មានរបស់ព្រះអង្គជាកេរមត៌ករបស់ទូលបង្គំ
ដ្បិតដំបូន្មានទាំងនេះធ្វើឲ្យទូលបង្គំ
មានអំណរនៅក្នុងចិត្ត។
112 ទូលបង្គំប្ដេជ្ញាចិត្តធ្វើតាមវិន័យ
របស់ព្រះអង្គរហូតដល់ទីបំផុត។
113 ទូលបង្គំស្អប់មនុស្សដែលមានចិត្តពីរ
តែទូលបង្គំស្រឡាញ់វិន័យរបស់ព្រះអង្គ។
114 ព្រះអង្គជាជម្រក និងជាខែលការពារទូលបង្គំ
ទូលបង្គំផ្ញើជីវិតលើព្រះបន្ទូល
របស់ព្រះអង្គជានិច្ច។
115 មនុស្សអាក្រក់អើយ
ចូរនាំគ្នាចេញឲ្យឆ្ងាយពីខ្ញុំទៅ!
ទុកឲ្យខ្ញុំប្រតិបត្តិតាមវិន័យនៃព្រះរបស់ខ្ញុំ!
116 សូមជួយគាំទ្រទូលបង្គំ
តាមព្រះបន្ទូលសន្យារបស់ព្រះអង្គ
ដើម្បីឲ្យទូលបង្គំមានជីវិត
សូមកុំឲ្យសេចក្ដីសង្ឃឹម
របស់ទូលបង្គំប្រែទៅជាខកចិត្តឡើយ។
117 សូមធ្វើជាបង្អែករបស់ទូលបង្គំ
ដើម្បីឲ្យទូលបង្គំបានរួចជីវិត
ហើយផ្ចង់ចិត្តទៅរកវិន័យរបស់ព្រះអង្គជានិច្ច។
118 ព្រះអង្គមិនរាប់រកអស់អ្នកដែលវង្វេង
ចេញឆ្ងាយពីក្រឹត្យវិន័យរបស់ព្រះអង្គឡើយ
ដ្បិតអ្វីៗដែលពួកគេធ្វើសុទ្ធតែ
ជាការបោកបញ្ឆោត។
119 ព្រះអង្គផាត់មនុស្សអាក្រក់ទាំងប៉ុន្មាន
នៅលើផែនដីចោល ដូចកម្ទេចសំរាម
ហេតុនេះហើយបានជាទូលបង្គំស្រឡាញ់
ដំបូន្មានរបស់ព្រះអង្គ។
120 រូបកាយទូលបង្គំភ័យញាប់ញ័រ
ដោយកោតខ្លាចព្រះអង្គ
ទូលបង្គំភ័យខ្លាចការសម្រេចរបស់ព្រះអង្គ។
121 ទូលបង្គំប្រព្រឹត្តអំពើសុចរិត យុត្តិធម៌
សូមកុំឲ្យទូលបង្គំធ្លាក់ទៅក្នុងកណ្ដាប់ដៃ
របស់អស់អ្នកដែលសង្កត់សង្កិនទូលបង្គំឡើយ។
122 សូមធានាឲ្យទូលបង្គំ
ដែលជាអ្នកបម្រើព្រះអង្គបានសុខសាន្តផង
សូមកុំទុកឲ្យមនុស្សអួតបំប៉ោង
សង្កត់សង្កិនទូលបង្គំឡើយ។
123 ទូលបង្គំទន្ទឹងរង់ចាំមើលព្រះអង្គសង្គ្រោះទូលបង្គំ
ទូលបង្គំរង់ចាំព្រះបន្ទូលសន្យាដ៏សុចរិត
របស់ព្រះអង្គ។
124 សូមប្រព្រឹត្តចំពោះទូលបង្គំដែលជាអ្នកបម្រើ
របស់ព្រះអង្គ ដោយព្រះហឫទ័យមេត្តាករុណា
សូមបង្រៀនឲ្យទូលបង្គំស្គាល់វិន័យ
របស់ព្រះអង្គ!
125 ទូលបង្គំជាអ្នកបម្រើរបស់ព្រះអង្គ
សូមប្រទានប្រាជ្ញាមកទូលបង្គំផង
ដើម្បីឲ្យទូលបង្គំស្គាល់ដំបូន្មានរបស់ព្រះអង្គ។
126 ព្រះអម្ចាស់អើយ ដល់ពេលធ្វើអន្តរាគមន៍ហើយ
ដ្បិតគេបានរំលោភលើវិន័យរបស់ព្រះអង្គ។
127 ទូលបង្គំស្រឡាញ់វិន័យរបស់ព្រះអង្គ
លើសអ្វីៗទាំងអស់ គឺលើសមាសសុទ្ធទៅទៀត។
128 ទូលបង្គំយល់ឃើញថាច្បាប់ទាំងប៉ុន្មាន
របស់ព្រះអង្គសុទ្ធតែត្រឹមត្រូវទាំងអស់
ទូលបង្គំស្អប់ការអាក្រក់គ្រប់យ៉ាង។
129 ដំបូន្មានរបស់ព្រះអង្គល្អវិសេសណាស់
ហេតុនេះហើយបានជាទូលបង្គំខំប្រឹងធ្វើតាម។
130 ការស្វែងយល់ព្រះបន្ទូលរបស់ព្រះអង្គ
ធ្វើឲ្យមនុស្សភ្លឺស្វាង
ហើយធ្វើឲ្យអ្នកទន់ទាបមានប្រាជ្ញា។
131 ទូលបង្គំត្រងត្រាប់ស្ដាប់ព្រះបន្ទូល
របស់ព្រះអង្គដោយយកចិត្តទុកដាក់
ដ្បិតទូលបង្គំចង់ស្គាល់វិន័យ
របស់ព្រះអង្គណាស់។
132 សូមបែរព្រះភ័ក្ត្រទតមកទូលបង្គំ
សូមប្រណីសន្ដោសទូលបង្គំ
ដូចព្រះអង្គធ្លាប់ប្រណីសន្ដោសអស់អ្នក
ដែលស្រឡាញ់ព្រះនាមរបស់ព្រះអង្គ។
133 សូមពង្រឹងទូលបង្គំឲ្យបានមាំមួន
តាមព្រះបន្ទូលសន្យារបស់ព្រះអង្គ
ហើយកុំបណ្តោយឲ្យទូលបង្គំធ្លាក់ទៅក្នុង
អំណាចរបស់អំពើទុច្ចរិតណាមួយឡើយ!។
134 សូមរំដោះទូលបង្គំឲ្យរួចផុតពីការ
ជិះជាន់របស់មនុស្ស ដើម្បីឲ្យទូលបង្គំ
ប្រតិបត្តិតាមច្បាប់របស់ព្រះអង្គ។
135 សូមសម្ដែងព្រះហឫទ័យអាណិតមេត្តា
ដល់ទូលបង្គំជាអ្នកបម្រើរបស់ព្រះអង្គ
ហើយសូមបង្រៀនទូលបង្គំឲ្យស្គាល់
វិន័យរបស់ព្រះអង្គផង!។
136 ទូលបង្គំបង្ហូរទឹកភ្នែកឥតស្រាកស្រាន្ត
ដោយឃើញគេមិនគោរព
តាមវិន័យរបស់ព្រះអង្គ។
137 ឱព្រះអម្ចាស់អើយ ព្រះអង្គសុចរិត
ការវិនិច្ឆ័យរបស់ព្រះអង្គសុទ្ធតែត្រឹមត្រូវ!
138 ព្រះអង្គប្រទានដំបូន្មានមកដោយសុចរិត
និងត្រឹមត្រូវបំផុត។
139 ទូលបង្គំក្ដៅក្រហាយយ៉ាងខ្លាំង
ដោយឃើញបច្ចាមិត្តរបស់ទូលបង្គំ
បំភ្លេចព្រះបន្ទូលរបស់ព្រះអង្គ។
140 ព្រះបន្ទូលសន្យារបស់ព្រះអង្គ
សម្រេចជាក់ស្តែងហើយ
ទូលបង្គំជាអ្នកបម្រើរបស់ព្រះអង្គ
ស្រឡាញ់ព្រះបន្ទូលនេះណាស់។
141 ទូលបង្គំជាមនុស្សតូចតាច
ហើយត្រូវគេមើលងាយទៀតផង
តែទូលបង្គំមិនភ្លេចច្បាប់របស់ព្រះអង្គឡើយ។
142 សេចក្ដីសុចរិតរបស់ព្រះអង្គនៅ
ស្ថិតស្ថេរអស់កល្បជានិច្ច
ហើយវិន័យរបស់ព្រះអង្គជាសេចក្ដីពិត។
143 ទូលបង្គំកើតទុក្ខអន្ទះអន្ទែងជាខ្លាំង
តែវិន័យរបស់ព្រះអង្គ
ធ្វើឲ្យទូលបង្គំមានអំណរ។
144 ដំបូន្មានរបស់ព្រះអង្គសុចរិតជានិច្ច
សូមប្រទានប្រាជ្ញាមកទូលបង្គំ
ដើម្បីឲ្យទូលបង្គំមានជីវិត!
145 ឱព្រះអម្ចាស់អើយ
ទូលបង្គំអង្វរព្រះអង្គយ៉ាងអស់ពីចិត្ត
សូមឆ្លើយតបមកទូលបង្គំផង ដើម្បីឲ្យទូលបង្គំ
ប្រតិបត្តិតាមវិន័យរបស់ព្រះអង្គ!
146 ទូលបង្គំអង្វរព្រះអង្គ
សូមសង្គ្រោះទូលបង្គំផង
ដើម្បីឲ្យទូលបង្គំប្រព្រឹត្តតាមដំបូន្មាន
របស់ព្រះអង្គ!
147 ទូលបង្គំស្រែកអង្វរព្រះអង្គ
តាំងពីមុនថ្ងៃរះទៅទៀត
ទូលបង្គំទន្ទឹងរង់ចាំព្រះអង្គមានព្រះបន្ទូល។
148 ទូលបង្គំសញ្ជឹងគិតអំពីព្រះបន្ទូលសន្យា
របស់ព្រះអង្គមួយយប់ទល់ភ្លឺ។
149 សូមស្ដាប់ពាក្យទូលអង្វររបស់ទូលបង្គំ
ដោយព្រះហឫទ័យមេត្តាករុណា
ឱព្រះអម្ចាស់អើយ សូមជួយទូលបង្គំ
ឲ្យរស់នៅតាមការសម្រេចរបស់ព្រះអង្គ។
150 អស់អ្នកដែលតាមព្យាបាទទូលបង្គំ
នាំគ្នាចូលមកជិតទូលបង្គំ
អ្នកទាំងនោះឃ្លាតចេញឆ្ងាយ
ពីវិន័យរបស់ព្រះអង្គ។
151 ឱព្រះអម្ចាស់អើយ ព្រះអង្គនៅជិតទូលបង្គំ
វិន័យទាំងប៉ុន្មានរបស់ព្រះអង្គ
សុទ្ធតែត្រឹមត្រូវទាំងអស់
152 តាំងពីយូរយារណាស់មកហើយ
ទូលបង្គំបានដឹងថា
ព្រះអង្គប្រទានដំបូន្មានរបស់ព្រះអង្គមក
ដើម្បីឲ្យនៅស្ថិតស្ថេរអស់កល្បជានិច្ច។
153 សូមទតមើលទុក្ខវេទនារបស់ទូលបង្គំ
សូមរំដោះទូលបង្គំផង!
ដ្បិតទូលបង្គំមិនភ្លេចវិន័យរបស់ព្រះអង្គទេ។
154 សូមរកយុត្តិធម៌ឲ្យទូលបង្គំ
ហើយរំដោះទូលបង្គំឲ្យមានសេរីភាពផង
សូមប្រទានឲ្យទូលបង្គំមានជីវិតឡើងវិញ
តាមព្រះបន្ទូលសន្យារបស់ព្រះអង្គ!
155 មនុស្សអាក្រក់ពុំអាចទទួលការសង្គ្រោះឡើយ
ដ្បិតពួកគេមិនស្វែងរកវិន័យរបស់ព្រះអង្គទេ។
156 ឱព្រះអម្ចាស់អើយ ព្រះអង្គតែងតែ
មានព្រះហឫទ័យអាណិតមេត្តាជានិច្ច
សូមប្រទានឲ្យទូលបង្គំមានជីវិតឡើងវិញ
តាមព្រះបន្ទូលដែលព្រះអង្គបានបង្គាប់មក។
157 អស់អ្នកដែលបៀតបៀនទូលបង្គំ
និងបច្ចាមិត្តរបស់ទូលបង្គំមានគ្នាច្រើនណាស់
តែទូលបង្គំមិនងាកចេញពីដំបូន្មាន
របស់ព្រះអង្គឡើយ។
158 ពេលទូលបង្គំឃើញមនុស្សក្បត់
ទូលបង្គំទាស់ចិត្តខ្លាំងណាស់
ដ្បិតពួកគេមិនប្រព្រឹត្តតាមព្រះបន្ទូល
របស់ព្រះអង្គទេ។
159 ឱព្រះអម្ចាស់អើយ សូមជ្រាបថា
ទូលបង្គំស្រឡាញ់ច្បាប់របស់ព្រះអង្គ
សូមប្រទានឲ្យទូលបង្គំមានជីវិតឡើងវិញ
ដោយព្រះហឫទ័យមេត្តាករុណារបស់ព្រះអង្គ។
160 គោលការណ៍នៃព្រះបន្ទូលរបស់ព្រះអង្គ
ជាសេចក្ដីពិត
ហើយការទាំងប៉ុន្មានដែលព្រះអង្គសម្រេច
ដោយសុចរិតនៅស្ថិតស្ថេររហូតតទៅ។
161 ពួកមេដឹកនាំបៀតបៀនទូលបង្គំ
ដោយឥតមូលហេតុ
ប៉ុន្តែ មានតែព្រះបន្ទូលរបស់ព្រះអង្គប៉ុណ្ណោះ
ដែលធ្វើឲ្យទូលបង្គំភ័យខ្លាច!។
162 ទូលបង្គំរីករាយនឹងព្រះបន្ទូលសន្យារបស់ព្រះអង្គ
ដូចជាគេរកឃើញកំណប់
ដ៏មានតម្លៃលើសលប់ដែរ។
163 ទូលបង្គំស្អប់ខ្ពើមការកុហកណាស់
តែទូលបង្គំស្រឡាញ់វិន័យរបស់ព្រះអង្គ។
164 ទូលបង្គំសរសើរតម្កើងព្រះអង្គមួយថ្ងៃប្រាំពីរដង
ព្រោះតែការសម្រេចដ៏សុចរិតរបស់ព្រះអង្គ។
165 អស់អ្នកដែលស្រឡាញ់វិន័យរបស់ព្រះអង្គ
នឹងបានសុខក្សេមក្សាន្ត
គ្មានអ្វីអាចធ្វើឲ្យគេជំពប់ដួលសោះឡើយ។
166 ឱព្រះអម្ចាស់អើយ ទូលបង្គំសង្ឃឹមរង់ចាំ
ព្រះអង្គសង្គ្រោះទូលបង្គំ
ទូលបង្គំប្រតិបត្តិតាមវិន័យរបស់ព្រះអង្គ។
167 ទូលបង្គំប្រព្រឹត្តតាមដំបូន្មានរបស់ព្រះអង្គ
ហើយទូលបង្គំស្រឡាញ់ដំបូន្មាននេះណាស់។
168 ទូលបង្គំប្រព្រឹត្តតាមច្បាប់
និងដំបូន្មានរបស់ព្រះអង្គ
ដ្បិតអ្វីៗដែលទូលបង្គំធ្វើ
ព្រះអង្គជ្រាបសព្វគ្រប់ទាំងអស់។
169 សូមឲ្យសម្រែករបស់ទូលបង្គំ
បានឮទៅដល់ព្រះអង្គ
សូមប្រទានប្រាជ្ញាមកទូលបង្គំ
តាមព្រះបន្ទូលសន្យារបស់ព្រះអង្គ។
170 សូមឲ្យពាក្យទទូចអង្វររបស់ទូលបង្គំ
បានឮទៅដល់ព្រះអង្គ សូមរំដោះទូលបង្គំ
តាមព្រះបន្ទូលសន្យារបស់ព្រះអង្គផង!។
171 ទូលបង្គំនឹងពោលពាក្យសរសើរតម្កើង
ព្រះអង្គឥតឈប់ឡើយ
ដ្បិតព្រះអង្គបានបង្រៀនទូលបង្គំ
ឲ្យស្គាល់វិន័យរបស់ព្រះអង្គ។
172 ទូលបង្គំនឹងបន្លឺសំឡេងច្រៀងតម្កើង
ព្រះបន្ទូលសន្យារបស់ព្រះអង្គ
ដ្បិតវិន័យទាំងប៉ុន្មានរបស់
ព្រះអង្គសុទ្ធតែសុចរិត។
173 សូមសម្ដែងព្រះបារមីសង្គ្រោះទូលបង្គំ
ដ្បិតទូលបង្គំបានសម្រេចចិត្តធ្វើតាមច្បាប់
របស់ព្រះអង្គហើយ។
174 ឱព្រះអម្ចាស់អើយ
ទូលបង្គំប្រាថ្នាចង់ឃើញព្រះអង្គ
សង្គ្រោះទូលបង្គំណាស់
ទូលបង្គំពេញចិត្តនឹងវិន័យ
របស់ព្រះអង្គជាខ្លាំង។
175 សូមឲ្យទូលបង្គំរស់រានមានជីវិត
ដើម្បីសរសើរតម្កើងព្រះអង្គ!
សូមឲ្យព្រះបន្ទូលរបស់ព្រះអង្គ
ជួយលើកទឹកចិត្តទូលបង្គំ។
176 ទូលបង្គំនៅវិលវល់ប្រៀបបាននឹងចៀមវង្វេង
សូមយាងមករកទូលបង្គំ
ដែលជាអ្នកបម្រើរបស់ព្រះអង្គផង!
ដ្បិតទូលបង្គំមិនភ្លេចវិន័យ
របស់ព្រះអង្គឡើយ!
