ជំពូក ៥
កុលសម្ព័ន្ធរូបេន
1 នេះជាកូនចៅរបស់លោករូបេន ជាកូនច្បងរបស់លោកអ៊ីស្រាអែល -លោករូបេននេះជាកូនច្បងមែន តែដោយគាត់បានលួចរួមដំណេកជាមួយប្រពន្ធចុងរបស់ឪពុក សិទ្ធិជាកូនច្បងត្រូវបានផ្ទេរទៅឲ្យកូនៗរបស់លោកយ៉ូសែប ជាកូនរបស់លោកអ៊ីស្រាអែល។ ដូច្នេះ គេមិនអាចរាប់លោករូបេន ជាកូនច្បងបានទេ។ 2 រីឯលោកយូដាវិញ គាត់មានអំណាចជាងបងប្អូនទាំងប៉ុន្មានរបស់គាត់មែន ដ្បិតស្តេចដែលគ្រប់គ្រងលើជនជាតិអ៊ីស្រាអែលកើតចេញពីគាត់ តែសិទ្ធិជាកូនច្បង នៅតែបានទៅលើលោកយ៉ូសែបដដែល។
3 កូនរបស់លោករូបេន ដែលត្រូវជាកូនច្បងរបស់លោកអ៊ីស្រាអែល មានហេណុក ប៉ាល់លូ ហេស្រន និងការមី។
4 រីឯកូនចៅរបស់លោកយ៉ូអែលមានរាយនាមតាមតំណវង្សត្រកូល ជាបន្តបន្ទាប់គ្នា ដូចតទៅ: គឺសេម៉ាយ៉ា កុក ស៊ីម៉ាយ 5 មីកា រេអាយ៉ា បាល 6 និងបេរ៉ាដែលត្រូវព្រះចៅទីកឡាត-ពីលេស៊ែរ ជាស្តេចស្រុកអាស្ស៊ីរី នាំទៅជាឈ្លើយ។ លោកបេរ៉ាជាមេដឹកនាំកុលសម្ព័ន្ធរូបេន។ 7 បងប្អូនរបស់គាត់មានឈ្មោះក្នុងបញ្ជីរាយនាម តាមអំបូរ តាមវង្សត្រកូល ដូចតទៅ: អ្នកទីមួយគឺលោកយីអែល បន្ទាប់មក លោកសាការី 8 លោកបេឡាជាកូនរបស់លោកអសាស ជាចៅរបស់លោកសេម៉ា និងជាចៅទួតរបស់លោកយ៉ូអែល។
កុលសម្ព័ន្ធរូបេនរស់នៅក្នុងតំបន់ ដែលគិតចាប់ពីក្រុងអារ៉ូអ៊ែរ រហូតដល់ក្រុងនេបូ និងបាល-មេអូន។ 9 នៅទិសខាងកើត ពួកគេលាតសន្ធឹងចាប់តាំងពីទន្លេអឺប្រាត រហូតដល់វាលរហោស្ថាន ដ្បិតគេមានហ្វូងសត្វជាច្រើននៅស្រុកកាឡាដ។ 10 នៅរជ្ជកាលរបស់ព្រះបាទសាអ៊ូល កូនចៅរូបេនបានច្បាំងនឹងជនជាតិហាការេន ហើយគ្រប់គ្រងលើជនជាតិនោះ ព្រមទាំងរស់នៅក្នុងជំរំរបស់ពួកគេ ក្នុងតំបន់ប៉ែកខាងកើតស្រុកកាឡាដទាំងមូល។
កុលសម្ព័ន្ធកាដ
11 ពូជពង្សរបស់លោកកាដរស់នៅក្បែរពូជពង្សរបស់រូបេន ក្នុងស្រុកបាសាន និងរហូតដល់សាលកា។ 12 លោកយ៉ូអែលជាមេដឹកនាំរបស់ពួកគេ អ្នកបន្ទាប់គឺលោកសាផាម រួចហើយមានលោកយ៉ាណាយ និងលោកសាផាត់ នៅស្រុកបាសាន។ 13 បងប្អូនពួកគេប្រាំពីរនាក់ទៀតមានឈ្មោះតាមក្រុមគ្រួសារ ដូចតទៅ: មីកាអែល ស៊ូឡាម សេបា យ៉ូរ៉ា យេកាន ស៊ីអា និងអេប៊ែរ។ 14 អ្នកទាំងនោះសុទ្ធតែជាកូនចៅរបស់លោកអប៊ីហែល។ លោកអប៊ីហែលជាកូនរបស់លោកហ៊ូរី លោកហ៊ូរីជាកូនរបស់លោកយ៉ារ៉ូអា លោកយ៉ារ៉ូអាជាកូនរបស់លោកកាឡាដ លោកកាឡាដជាកូនរបស់លោកមីកាអែល លោកមីកាអែលជាកូនរបស់លោកយេស៊ីសាយ លោកយេស៊ីសាយ ជាកូនរបស់លោកយ៉ាដូ លោកយ៉ាដូជាកូនរបស់លោកប៊ូស។ 15 លោកអហ៊ីជាកូនរបស់លោកអាប់ឌីអែល និងជាចៅរបស់លោកគូនី ជាមេដឹកនាំលើក្រុមគ្រួសាររបស់គេ។ 16 អ្នកទាំងនោះរស់នៅក្នុងស្រុកកាឡាដ ស្រុកបាសាន ព្រមទាំងស្រុកភូមិទាំងប៉ុន្មាន ដែលនៅជុំវិញតំបន់នោះ និងវាលស្មៅដែលនៅជុំវិញក្រុងសារ៉ូន រហូតដល់ព្រំប្រទល់ស្រុករបស់គេ។ 17 អ្នកទាំងនោះមានឈ្មោះក្នុងបញ្ជីជំរឿនប្រជាជន នៅរជ្ជកាលព្រះបាទយ៉ូថាម ជាស្តេចស្រុកយូដា និងរជ្ជកាលព្រះបាទយេរ៉ូបោម ជាស្តេចស្រុកអ៊ីស្រាអែល។
កងទ័ពរបស់កុលសម្ព័ន្ធខាងកើត
18 កុលសម្ព័ន្ធរូបេន កុលសម្ព័ន្ធកាដ និងកុលសម្ព័ន្ធម៉ាណាសេចំនួនពាក់កណ្ដាល មានទាហានចំនួន ៤៤៧៦០នាក់ ដែលអាចចេញទៅធ្វើសឹកសង្គ្រាមបាន ហើយសុទ្ធតែជាមនុស្សអង់អាចក្លាហាន ពូកែប្រើខែល ប្រើដាវ បាញ់ធ្នូ និងថ្នឹកខាងចម្បាំង។ 19 ពួកគេលើកគ្នាទៅច្បាំងនឹងជនជាតិហាការេន យេទួរ ណាភីស និងណូដាប់។ 20 នៅពេលច្បាំង ពួកគេបានទូលអង្វរសូមព្រះជាម្ចាស់ជួយ ហើយដោយពួកគេទុកចិត្តលើព្រះអង្គនោះ ព្រះអង្គក៏ជួយពួកគេឲ្យមានជ័យជម្នះលើកងទ័ពហាការេន និងបក្សពួក។ 21 ពួកគេរឹបអូសយកបានហ្វូងសត្វរបស់ខ្មាំង គឺមានអូដ្ឋ៥០ ០០០ ក្បាល ចៀម ២៥០ ០០០ ក្បាល និងលា២ ០០០ ក្បាល ព្រមទាំងចាប់បានមនុស្សមួយសែននាក់។ 22 ខ្មាំងសត្រូវក៏ខាតបង់ជីវិតមនុស្សជាច្រើននាក់ដែរ ដ្បិតចម្បាំងនោះកើតពីព្រះជាម្ចាស់។ ពួកគេតាំងទីលំនៅលើទឹកដីរបស់ខ្មាំង រហូតដល់គ្រាដែលពួកគេជាប់ជាឈ្លើយសឹក។
កុលសម្ព័ន្ធម៉ាណាសេចំនួនពាក់កណ្ដាល ដែលនៅត្រើយខាងកើតទន្លេយ័រដាន់
23 កុលសម្ព័ន្ធម៉ាណាសេចំនួនពាក់កណ្ដាលតាំងទីលំនៅលើទឹកដីនោះ ចាប់តាំងពីស្រុកបាសានរហូតដល់ស្រុកបាល-ហ៊ែរម៉ូន ភ្នំស៊ីនៀរ និងភ្នំហ៊ែរម៉ូន ហើយពួកគេកើនចំនួនឡើងជាច្រើន។ 24 រីឯមេដឹកនាំលើក្រុមគ្រួសាររបស់ពួកគេមានលោកអេភែរ លោកយីសៃ លោកអេលីអែល លោកអាសរីអែល លោកយេរេមី លោកហូដាវីយ៉ា និងលោកយ៉ាឌីអែល។ អ្នកទាំងនោះសុទ្ធតែជាមនុស្សខ្លាំងពូកែ និងមានឈ្មោះល្បី ហើយជាមេដឹកនាំលើក្រុមគ្រួសាររបស់គេ។
25 ប៉ុន្តែ ពួកគេពុំបានស្មោះត្រង់នឹងព្រះនៃដូនតារបស់ពួកគេទេ ពួកគេបែរទៅគោរពបម្រើព្រះរបស់ជាតិសាសន៍ទាំងឡាយ នៅក្នុងស្រុកនោះ គឺជាតិសាសន៍ដែលព្រះជាម្ចាស់បានបំផ្លាញចេញពីមុខពួកគេ។ 26 ហេតុនេះ ព្រះរបស់ជនជាតិអ៊ីស្រាអែលបានបណ្តាលចិត្តព្រះបាទពូល និងព្រះបាទទីកឡាត-ពីលេស៊ែរ ជាស្តេចស្រុកអាស្ស៊ីរី ឲ្យវាយលុកទឹកដីរបស់ពួកគេ។ ព្រះបាទទីកឡាត-ពីលេស៊ែរក៏បានកៀរកុលសម្ព័ន្ធរូបេន កុលសម្ព័ន្ធកាដ និងកុលសម្ព័ន្ធម៉ាណាសេចំនួនពាក់កណ្ដាល ទៅជាឈ្លើយសឹក នៅតំបន់ហាឡា ហាប៊រ និងហារ៉ា ដែលនៅក្បែរទន្លេនៃស្រុកកូសាន ហើយពួកគេរស់នៅទីនោះរហូតដល់សព្វថ្ងៃ។
កុលសម្ព័ន្ធលេវី
27 កូនរបស់លោកលេវីមាន គែរសូន គើហាត់ និងមេរ៉ារី។ 28 កូនរបស់លោកគើហាត់មាន អាំរ៉ាម យីសារ ហេប្រូន និងអ៊ូស៊ីអែល។ 29 កូនរបស់លោកអាំរ៉ាមមាន អរ៉ុន ម៉ូសេ និងមៀរីយ៉ាម។ កូនរបស់លោកអរ៉ុនមាន ណាដាប អប៊ីហ៊ូ អេឡាសារ និងអ៊ីតាម៉ារ។ 30 លោកអេឡាសារជាឪពុករបស់លោកភីនេអាស លោកភីនេអាសជាឪពុករបស់លោកអប៊ីសួ 31 លោកអប៊ីសួជាឪពុករបស់លោកប៊ូគី លោកប៊ូគីជាឪពុករបស់លោកអ៊ូស៊ី 32 លោកអ៊ូស៊ីជាឪពុករបស់លោកសេរ៉ាយ៉ា លោកសេរ៉ាយ៉ាជាឪពុករបស់លោកមេរ៉ាយ៉ូត 33 លោកមេរ៉ាយ៉ូតជាឪពុករបស់លោកអម៉ារីយ៉ា លោកអម៉ារីយ៉ាជាឪពុករបស់លោកអហ៊ីទូប 34 លោកអហ៊ីទូបជាឪពុករបស់លោកសាដុក លោកសាដុកជាឪពុករបស់លោកអហ៊ីម៉ាស 35 លោកអហ៊ីម៉ាសជាឪពុករបស់លោកអសារីយ៉ា លោកអសារីយ៉ាជាឪពុករបស់លោកយ៉ូហាណន 36 លោកយ៉ូហាណនជាឪពុករបស់លោកអសារីយ៉ា ជាបូជាចារ្យបំពេញមុខងារក្នុងព្រះវិហារ ដែលព្រះបាទសាឡូម៉ូនបានសង់ នៅក្រុងយេរូសាឡឹម។ 37 លោកអសារីយ៉ាជាឪពុករបស់លោកអម៉ារីយ៉ា លោកអម៉ារីយ៉ាជាឪពុករបស់លោកអហ៊ីទូប 38 លោកអហ៊ីទូបជាឪពុករបស់លោកសាដុក លោកសាដុកជាឪពុករបស់លោកសាលូម 39 លោកសាលូមជាឪពុករបស់លោកហ៊ីលគីយ៉ា លោកហ៊ីលគីយ៉ាជាឪពុករបស់លោកអសារីយ៉ា 40 លោកអសារីយ៉ាជាឪពុករបស់លោកសេរ៉ាយ៉ា លោកសេរ៉ាយ៉ាជាឪពុករបស់លោកយេហូសាដាក។ 41 នៅគ្រាដែលព្រះអម្ចាស់ឲ្យព្រះបាទនេប៊ូកានេសារ កៀរអ្នកស្រុកយូដា និងអ្នកក្រុងយេរូសាឡឹមទៅជាឈ្លើយ នោះលោកយេហូសាដាក ក៏ត្រូវគេនាំយកទៅដែរ។