ពាក្យលំនាំ
នាងយូឌីត
អ្នកស្រីយូឌីតជាស្រ្តីមេម៉ាយម្នាក់ ដែលមានរូបសម្ផស្សល្អស្រស់លើសគេ គួរជាទីចាប់ចិត្តរបស់បុរសទាំងឡាយ។ អ្នកស្រីតែងតែគោរពបម្រើព្រះជាម្ចាស់ដោយចិត្តស្មោះ។ នៅពេលកងទ័ពខ្មាំងសត្រូវចូលមកលុកលុយស្រុកយូដា ក្នុងគោលបំណងបំផ្លាញស្រុក និងសម្លាប់ប្រជាជនឲ្យវិនាសអន្តរាយ អ្នកស្រីយូឌីតជឿសង្ឃឹមលើព្រះជាម្ចាស់ ហ៊ានចេញទៅជួបមេទ័ពរបស់ខ្មាំងតែម្នាក់ឯង ហើយកាត់កមេទ័ពនោះទៀតផង។ ដូច្នេះ នាងបានសង្រ្គោះប្រជាជនរបស់ព្រះអង្គ។ អ្នកស្រីយូឌីត ក៏ដូចព្យាការីនីដេបូរា (វរ ៤‑៥) ឬព្រះនាងអេសធែរដែរ។
អ្នកនិពន្ធរឿងនេះមិនមែននិពន្ធតាមប្រវត្តិសាស្រ្តទេ! ឧប.ថា គេហៅព្រះចៅនេប៊ូកានេសារ ជាព្រះមហាក្សត្រស្រុកបាប៊ីឡូនថា «ព្រះមហាក្សត្រស្រុកអាស្ស៊ីរី!» ព្រឹត្តិការណ៍ខ្លះបញ្ជាក់ថាជនជាតិយូដាដែលជាប់ជាឈ្លើយ ធ្វើមាតុភូមិនិវត្តន៍រួចហើយ (៤,៣; ៥,១១)។ ប៉ុន្តែ តាមប្រវត្តិសាស្រ្ត ព្រះចៅនេប៊ូកានេសារនេះបានកៀរពួកគេទៅធ្វើជាឈ្លើយ! គ្មាននរណាស្គាល់ក្រុងបេតធូលី និងកន្លែងផ្សេងៗទៀតឡើយ (៤,៧; ៦,១១‑១២; ៧,១២។ ល។)។
ដូច្នេះ អ្នកវិភាគតែងសន្និដ្ឋានថា ប្រហែលមានព្រឹត្តិការណ៍បែបនេះកើតឡើងនៅជំនាន់ជនជាតិពែរ្សគ្រប់គ្រងមជ្ឈិមបូព៌ា កណ្ឌនេះជារឿងនិទានដែលគេប្រឌិតឡើង ប៉ុន្តែ នៅពេលក្រោយគេកែច្នៃ និងបន្ថែមសេចក្តីឯទៀតៗ ប្រឌិតឡើងតាមរបៀបជនជាតិយូដា ហៅថា «មីត្រាស់» ដើម្បីដាស់តឿនជនជាតិយូដាដែលជួបឧបសគ្គជាច្រើន ឲ្យជឿសង្ឃឹមលើព្រះជាម្ចាស់ជានិច្ច! ព្រះអង្គតាមថែរក្សាការពារប្រជារាស្រ្តរបស់ព្រះអង្គ!។
គេនិពន្ធនៅជំនាន់ព្រះបាទ អន់ទីយ៉ូគូស អេភីផាន (១៧៥-១៦៤ មុនគ.ស) ធ្វើបាបប្រជាជន។ ដូច្នេះ អ្នកនិពន្ធមានគោលបំណង ប្រហាក់ប្រហែលនឹងគោលបំណងរបស់អ្នកនិពន្ធកណ្ឌ ដានីអែល។ ឈ្មោះ «យូឌីត» មានអត្ថន័យថា «ស្រ្តីជនជាតិយូដា» គឺជារូបតំណាងប្រជារាស្រ្តរបស់ព្រះជាម្ចាស់។ ព្រះអង្គមិនលះបង់ចោលប្រជារាស្រ្តរបស់ព្រះអង្គឡើយ!។
