ជំពូក ៥
1 ឥឡូវនេះ សូមលោកស្រែកចុះ
ក្រែងលោមាននរណាម្នាក់
ឆ្លើយតបមកលោក។
តើលោកអាចហៅទេវទូតណាមួយ
ឲ្យមកជួយបាន?
2 ការមួម៉ៅរមែងសម្លាប់មនុស្សល្ងីល្ងើ
ការក្ដៅក្រហាយក៏រមែងធ្វើឲ្យ
មនុស្សចោលម្សៀតបាត់បង់ជីវិតដែរ។
3 ខ្ញុំធ្លាប់ឃើញមនុស្សល្ងីល្ងើចម្រុងចម្រើន
ប៉ុន្តែ រំពេចនោះ ខ្ញុំក៏ដាក់បណ្ដាសា
ផ្ទះរបស់គេថា:
4 សូមកុំឲ្យកូនចៅរបស់គេមានទីពឹងពាក់
ហើយកុំឲ្យមាននរណាការពារគេ
នៅពេលចៅក្រមដាក់ទោស។
5 សូមឲ្យមនុស្សអត់បាយនាំគ្នាមក
ដណ្ដើមយកភោគផលរបស់គេ
ទោះបីមានបន្លាជុំវិញចម្ការក៏ដោយ។
សូមឲ្យមនុស្សស្រេកឃ្លាននាំគ្នាមក
រឹបអូសយកទ្រព្យសម្បត្តិរបស់គេ។
6 អំពើទុច្ចរិតមិនមែនដុះចេញពីធូលីដីទេ
ហើយទុក្ខវេទនាក៏មិនមែនដុះចេញពីដីដែរ។
7 មនុស្សកើតមក ដើម្បីរងទុក្ខវេទនា
ដូចផ្កាភ្លើងខ្ទាតឡើងទៅក្នុង
លំហអាកាសដែរ។
8 ប្រសិនបើខ្ញុំមានទុក្ខដូចលោកវិញ
ខ្ញុំនឹងស្រែកអង្វរព្រះជាម្ចាស់
ខ្ញុំលើកយករឿងហេតុរបស់ខ្ញុំ
មកទូលថ្វាយព្រះអង្គ។
9 ព្រះអង្គធ្វើការដ៏អស្ចារ្យ រកស្វែងយល់មិនបាន
ស្នាព្រះហស្ដដ៏អស្ចារ្យរបស់ព្រះអង្គ
មានចំនួនច្រើនឥតគណនា។
10 ព្រះអង្គធ្វើឲ្យភ្លៀងបង្អុរមកលើផែនដី
និងប្រទានឲ្យមានទឹកស្រោចស្រពស្រែចម្ការ។
11 ព្រះអង្គលើកមនុស្សទន់ទាបឡើង
ហើយជួយសង្គ្រោះអ្នកដែលកាន់ទុក្ខ។
12 ព្រះអង្គរំលាយគម្រោងការមនុស្សមានល្បិច
មិនឲ្យគេសម្រេចគម្រោងការរបស់ខ្លួនបានឡើយ។
13 ព្រះអង្គធ្វើឲ្យអ្នកប្រាជ្ញ
ធ្លាក់ក្នុងល្បិចកិច្ចកលរបស់ខ្លួន
ហើយធ្វើឲ្យយោបល់ដ៏ប៉ិនប្រសប់
របស់ពួកគេ ប្រែជាឥតបានការ។
14 នៅពេលថ្ងៃ ពួកគេជំពប់ជើង
ដូចដើរនៅពេលយប់ងងឹត
ហើយពួកគេដើរស្ទាបៗ
នៅកណ្ដាលថ្ងៃត្រង់
ដូចដើរនៅពេលយប់ដែរ។
15 ប៉ុន្តែ ព្រះអង្គសង្គ្រោះជនទុរគត
ឲ្យរួចផុតពីមុខដាវ ពីចង្កូម
និងពីកណ្ដាប់ដៃដ៏ខ្លាំងពូកែរបស់ពួកគេ។
16 ព្រះអង្គប្រទានសេចក្ដីសង្ឃឹម
ដល់មនុស្សទន់ខ្សោយ
តែព្រះអង្គបំបិទមាត់មនុស្សទុច្ចរិត។
17 ហេតុនេះ អ្នកដែលត្រូវព្រះជាម្ចាស់ស្តីប្រដៅ
ពិតជាមានសុភមង្គលមិនខាន។
មិនត្រូវមាក់ងាយការស្តីបន្ទោសរបស់ព្រះ
ដែលប្រកបដោយឫទ្ធានុភាពឡើយ។
18 ព្រះជាម្ចាស់ធ្វើឲ្យឈឺចាប់
តែព្រះអង្គនឹងព្យាបាលឡើងវិញ
ព្រះអង្គធ្វើឲ្យរបួស
តែព្រះអង្គនឹងព្យាបាលមុខរបួសនេះ
ដោយព្រះហស្ដរបស់ព្រះអង្គផ្ទាល់។
19 ព្រះអង្គជួយលោកឲ្យរួចពីទុក្ខកង្វល់
ចំនួនប្រាំមួយដង
តែនៅគ្រាទីប្រាំពីរ ការអាក្រក់នឹងពុំអាច
កើតមានដល់លោកទេ។
20 នៅពេលកើតទុរ្ភិក្ស
ព្រះអង្គរំដោះលោកពីសេចក្ដីស្លាប់
ហើយនៅពេលកើតសង្គ្រាម
ព្រះអង្គរំដោះលោកពីមុខដាវ។
21 ព្រះអង្គនឹងការពារលោកពីពាក្យ
បរិហាររបស់អ្នកដទៃ
ហើយលោកក៏នឹងមិនភ័យខ្លាចមហន្តរាយ
ដែលកើតឡើងដែរ។
22 លោកនឹងមិនញញើតនៅចំពោះមុខ
មហន្តរាយ ការអត់ឃ្លាន
សត្វសាហាវមិនធ្វើឲ្យលោកភ័យខ្លាច។
23 ស្រែចម្ការរបស់លោកនឹងគ្មានដុំថ្ម
ហើយគ្មានសត្វសាហាវមកយាយីលោកទេ។
24 លោកនឹងបានសុខសាន្តនៅក្នុង
ទីលំនៅរបស់លោក
ហើយពេលលោកមើលទៅហ្វូងសត្វ
ក៏មិនឃើញមានបាត់បង់ដែរ។
25 លោកនឹងឃើញពូជពង្សរបស់លោក
កើនចំនួនច្រើនឡើង
កូនចៅរបស់លោកកើនចំនួន
ដូចស្មៅដុះនៅតាមទីវាល។
26 លោករស់បានអាយុវែង ស្កប់ស្កល់
ហើយលាចាកលោកនេះទៅ
ដូចស្រូវទុំនៅរដូវចម្រូត។
27 យើងបានសង្កេតមើលហេតុការណ៍ទាំងនេះ
ហើយឃើញថាពិតជាកើតមានដូច្នេះមែន។
ហេតុនេះ ចូរត្រងត្រាប់ស្ដាប់
ហើយយកជាមេរៀនចុះ!»។
