ពាក្យអធិដ្ឋានពេលចូល

បពិត្រព្រះអម្ចាស់ជាព្រះបិតា! ព្រះអង្គពិតជាប្រភពនៃជីវិតគ្រប់យ៉ាង។ ព្រះអង្គក៏ជាព្រះបិតាដែលសព្វព្រះហប្ញទ័យណែនាំមនុស្សទាំងអស់ ឱ្យបានសុភមង្គលដ៏ពេញលេញគ្រប់ៗគ្នា សូមទ្រង់ព្រះមេត្តាប្រោសយើងខ្ញុំឱ្យមានជំនឿ សេចក្តីសង្ឃឹម និងសេចក្តី ស្រឡាញ់កាន់តែខ្លាំងឡើងៗផង។

អត្ថបទទី១៖​ សូមថ្លែងព្រះគម្ពីរព្យាការីយេរេមី យរ ២៣,១-៦

ព្រះអម្ចាស់មានព្រះបន្ទូលថា៖ «អ្នករាល់គ្នាជាគង្វាលដែលបោះបង់ហ្វូងចៀមរបស់យើងឱ្យខ្ចាត់ខ្ចាយ មុខជាត្រូវវេទនាពុំខាន!»។ នេះជាព្រះបន្ទូលរបស់ព្រះអម្ចាស់។ ព្រះអម្ចាស់ជាព្រះនៃជនជាតិអ៊ីស្រាអែលមានព្រះបន្ទូលអំពីពួកមេដឹកនាំដែលឃ្វាលប្រជារាស្រ្តរបស់ព្រះអង្គថា៖ «អ្នករាល់គ្នាបានបោះបង់ចោលកូនចៀមរបស់យើងឱ្យខ្ចាត់ខ្ចាយ ហើយអ្នករាល់គ្នាមិនបានយកចិត្តទុកដាក់នឹងពួកគេទេ។ ឥឡូវនេះ យើងយកចិត្តទុកដាក់នឹងអ្នករាល់គ្នា គឺដាក់ទោសតាមអំពើអាក្រក់ដែលអ្នករាល់គ្នាបានប្រព្រឹត្ត»។ នេះជាព្រះបន្ទូលរបស់ព្រះអម្ចាស់។ «យើងនឹងប្រមូលកូនចៀមរបស់យើងដែលនៅសេសសល់ពីគ្រប់ស្រុក ដែលយើងបានកម្ចាត់កម្ចាយទៅនោះ ឱ្យត្រឡប់មកវិញ។ យើងនឹងកៀងពួកគេចូលវាលស្មៅរបស់ខ្លួន ហើយឱ្យពួកគេបង្កើតកូនចៅ និងកើនចំនួនឡើងជាច្រើន។ យើងនឹងតែងតាំងពួកគង្វាលឱ្យដឹកនាំពួកគេ។ ពេលនោះ ចៀមលែងភ័យខ្លាច ឬញ័ររន្ធត់ទៀតឡើយ ហើយក៏គ្មានចៀមណាមួយបាត់បង់ដែរ»។ នេះជាព្រះបន្ទូលរបស់ព្រះអម្ចាស់។ ព្រះអម្ចាស់មានព្រះបន្ទូលថា៖ «នៅគ្រាខាងមុខ យើងនឹងធ្វើឱ្យមានស្តេចមួយអង្គដ៏សុចរិតកើតចេញពីពូជពង្សរបស់ដាវីឌ។ ស្តេចនោះនឹងគ្រងរាជ្យប្រកបដោយប្រាជ្ញា ព្រមទាំងគ្រប់គ្រងស្រុកដោយសុចរិតនិងយុត្តិធម៌។ នៅរជ្ជកាលរបស់ស្តេចនោះ ជនជាតិយូដានឹងទទួលការសង្គ្រោះ ជនជាតិអុីស្រាអែលនឹងរស់យ៉ាងសុខសាន្ត។ គេថ្វាយព្រះនាមស្តេចនោះថា “ព្រះអម្ចាស់ជាសេចក្តីសុចរិតរបស់យើង”»។

ទំនុកតម្កើងលេខ ២៣ (២២), ១-៦ បទពាក្យ ៧

អត្ថបទទី​២៖ សូមថ្លែងលិខិតរបស់គ្រីស្តទូតប៉ូលផ្ញើជូនគ្រីស្តបរិស័ទក្រុងអេភេសូ អភ ២,១៣-១៨

បងប្អូនជាទីស្រឡាញ់!
កាលពីដើម បងប្អូននៅឆ្ងាយពីព្រះជាម្ចាស់ ក៏ប៉ុន្តែឥឡូវនេះ ដោយបងប្អូនរួមក្នុងអង្គព្រះយេស៊ូគ្រីស្ត បងប្អូនបានមកនៅជិត ដោយសារព្រះ លោហិតរបស់ព្រះគ្រីស្ត។ គឺព្រះគ្រីស្តហើយដែលជាសន្តិភាពរបស់យើង ព្រះអង្គបាន ប្រមូលសាសន៍អុីស្រាអែល និងសាសន៍ដទៃ ឱ្យរួមគ្នាមកជាប្រជារាស្រ្តតែមួយ។ ព្រះអង្គបានបូជាព្រះកាយរបស់ព្រះអង្គ ដើម្បីរំលំជញ្ជាំងដែលធ្វើឱ្យសាសន៍ទាំងពីរ នៅដាច់ពីគ្នា ហើយជាបច្ចាមិត្តនឹងគ្នា។ ព្រះអង្គបានលុបបំបាត់វិន័យ ដែលមានបទ បញ្ញត្តិនិងបទបញ្ជារផ្សេងៗចោល ដើម្បីបង្រួបបង្រួមសាសន៍ទាំងពីរឱ្យទៅជា មនុស្សថ្មីតែមួយ ក្នុងព្រះអង្គផ្ទាល់ ព្រមទាំងនាំសន្តិភាពមកផង។ ដោយព្រះ អង្គសោយទិវង្គត នៅលើឈើឆ្កាង ទ្រង់បានផ្សះផ្សាសាសន៍ទាំងពីរឱ្យរួមគ្នាជា រូបកាយតែមួយ និងធ្វើឱ្យគេផ្សះផ្សារជាមួយព្រះជាម្ចាស់វិញ ទាំងកម្ចាត់ការស្អប់ គ្នាចោលផង។ ព្រះអង្គបានយាងមកទាំងនាំដំណឹងល្អអំពីសន្តិភាព មកឱ្យបងប្អូន ដែលនៅឆ្ងាយ និងនាំសន្តិភាព មកឱ្យអស់អ្នកដែលនៅជិតដែរ។ ដោយសារព្រះ គ្រីស្តនេះហើយ ដែលយើងទាំងពីរសាសន៍ មានផ្លូវចូលទៅរកព្រះបិតា ដោយរួមក្នុង ព្រះវិញ្ញាណតែមួយ»។

ពិធីអបអរសាទរព្រះគម្ពីរដំណឹងល្អតាម យហ ១០,១៤-១៥

អាលេលូយ៉ា! អាលេលូយ៉ា!
ព្រះយេស៊ូជាគង្វាលដ៏ល្អប្រសើរ ព្រះអង្គស្គាល់ចៀមរបស់ព្រះអង្គ ចៀមរបស់ព្រះអង្គក៏ស្គាល់ព្រះអង្គដែរ។ ព្រះយេស៊ូបានប្តូរជីវិតដើម្បីចៀមរបស់ព្រះអង្គ។ អាលេលូយ៉ា!

សូមថ្លែងព្រះគម្ពីរដំណឹងល្អតាមសន្តម៉ាកុស មក ៦,៣០-៣៤

ក្រុមគ្រីស្តទូតវិលត្រឡប់ពីប្រកាសដំណឹងល្អមកគាល់ព្រះយេស៊ូវិញ រៀបរាប់ទូលព្រះអង្គអំពីកិច្ចការទាំងប៉ុន្មានដែលគេបានធ្វើ និងសេចក្តីទាំងអស់ដែលគេបានបង្រៀន។ មនុស្សជាច្រើនធ្វើដំណើរទៅមក ធ្វើឱ្យព្រះយេស៊ូ និងក្រុមសាវ័ករកពេលបរិភោគពុំបាន​សោះ។ ព្រះយេស៊ូមានព្រះបន្ទូលទៅកាន់ក្រុមសាវ័កថា៖ «ចូរនាំគ្នាមករកកន្លែងមួយស្ងាត់ដាច់ឡែកពីបណ្តាជន សម្រាកបន្តិច​សិន»។ ព្រះយេស៊ូក៏យាងចុះទូកជាមួយក្រុមសាវ័កឆ្ពោះទៅកាន់កន្លែងមួយស្ងាត់ដាច់ឡែកពីបណ្តាជន។ ប៉ុន្តែ មានមនុស្សជាច្រើន បានឃើញព្រះយេស៊ូ និងក្រុមសាវ័កចេញដំណើរទៅ គេក៏ស្គាល់ព្រះអង្គ និងសាវ័ក ហើយនាំគ្នារត់ចេញពីទីក្រុងនានាទៅមុន។
កាលព្រះយេស៊ូយាងឡើងពីទូកមក ទ្រង់ទតឃើញមហាជនច្រើនយ៉ាងនេះ ព្រះអង្គមានព្រះហឫទ័យអាណិតអាសូរគេពន់ពេកណាស់ ព្រោះអ្នកទាំងនោះប្រៀបបីដូចជាចៀមដែលគ្មានគង្វាលថែទាំ។ ព្រះអង្គក៏បង្រៀនគេអំពីសេចក្តីផ្សេងៗជាច្រើន។

ពាក្យថ្វាយតង្វាយ

បពិត្រព្រះអម្ចាស់ជាព្រះបិតា! ពេលព្រះបុត្រាបានបូជាព្រះជន្មនៅលើឈើឆ្កាង ទ្រង់បានថ្វាយសក្ការបូជាដ៏ល្អឥតខ្ចោះ ប្រសើរជាងសក្ការបូជាឯទៀតៗទាំងអស់។ យើងខ្ញុំសូមថ្វាយកាយ វាចា ចិត្ត សូមទ្រង់ព្រះមេត្តាប្រោសយើងខ្ញុំឱ្យចូលរួមក្នុងសក្ការបូជារបស់ព្រះបុត្រាព្រះអង្គ ដែលមានព្រះជន្មគង់នៅ និងសោយរាជ្យអស់កល្បជាអង្វែងតរៀងទៅ។

ពាក្យអរព្រះគុណ

ឱព្រះបិតាប្រកបដោយធម៌មេត្តាករុណាយ៉ាងក្រៃលែងអើយ! សូមព្រះអង្គទ្រង់ព្រះមេត្តាគង់នៅជាមួយយើងខ្ញុំជានិច្ច! បើព្រះអង្គមិនគង់នៅជាមួយទេ យើងខ្ញុំមុខជាត្រូវវិនាសអន្តរាយពុំខាន។ សូមទ្រង់ព្រះមេត្តាប្រោសយើងខ្ញុំដែលទទួលព្រះកាយព្រះគ្រីស្តក្នុងអភិបូជានេះ បានរស់នៅតាមរបៀបថ្មី ស្របតាមព្រះអំណោយទានរបស់ព្រះអង្គផង។