អគ្គរាជទូតសន្តអាសនៈប្រចាំព្រះរាជាណាចក្រកម្ពុជា លោកអគ្គអភិបាល សិលា ប្រាយអិន វែលស៍ បានចួបប្រជុំជាមួយ ប្រធាននិងអនុប្រធានការិយាល័យនៃព្រះសហគមន៍កាតូលិកក្នុងភូមិភាគភ្នំពេញចំនួន១៧នាក់ ដែលសម្របសម្រួលដោយលោក អូលីវីយ៉េ ជ្មីតហស្លេ អភិបាលព្រះសហគមន៍កាតូលិកភូមិភាគភ្នំពេញ នារសៀលថ្ងៃទី២៤ ខែឧសភា នៅមណ្ឌលសកម្មភាពភ្នំពេញថ្មី។
ក្រោយស្តាប់បទបង្ហាញរបស់ការិយាល័យនីមួយៗ អំពីកិច្ចការងារ បេសកកកម្ម និងកិច្ចប្រឈម លោកអគ្គអភិបាលវែលស៍ មានប្រសាសន៍ថា ការិយាល័យនីមូយៗប្រៀបដូចជាបេះដូងដែលនាំឱ្យឈាមទៅកាន់ចំណុចនីមួយៗនៃសរីរាង្គ។ លោកសូមអរគុណដល់កិច្ចការងារទាំងនោះ។
លោកបន្ថែមថា ការិយាល័យនីមួយៗបានយកចិត្តទុកដាក់ចូលក្នុង៣ចំណុចសំខាន់ គឺ «អប់រំទាំងចំណេះដឹង សុខភាព និងផ្លូវវិញ្ញាណ» ហើយនេះជាទស្សនៈរបស់ព្រះសហគមន៍កាតូលិក ដែលយើងត្រូវតែបញ្ចូលរូបកាយ ខួរក្បាល និងផ្លូវវិញ្ញាណរួមគ្នា។
ការិយាល័យរបស់ព្រះសហគមន៍កាតូលិកភូមិភាគភ្នំពេញមានចំនួន៩ គឺការិយាល័យអប់រំជំនឿ ការិយាល័យសុខភាព ការិយាល័យផ្សព្វផ្សាយព័ត៌មាន ការិយាល័យសហគ្រិនសង្គម ការិយាល័យលោកអភិបាល ការិយាល័យស្វាគមន៍ ការិយាល័យសិល្បៈ ការិយាល័យសិក្សាអប់រំ និងការិយាល័យយុវជន។
លោកអភិបាលអូលីវីយ៉េ មានប្រសាសន៍ថា ការិយាល័យទាំងនេះ បង្កើតឡើងដើម្បីជួយភូមិភាគភ្នំពេញឱ្យមានជីវិត ហើយអ្នកទទួលខុសត្រូវគឺជាគ្រហស្ថទាំងអស់។
ជាមួយគ្នានេះដែរ លោកអគ្គរាជទូតបានបន្ថែមថា ព្រះសហគមន៍ភូមិភាគភ្នំពេញបានទទួលអស់អ្នកតូចតាចដែលគ្មានក្ដីសង្ឃឹម ឱ្យគេរកឃើញក្ដីសង្ឃឹមនៅក្នុងជីវិតរបស់ពួកគេ។ លោកសូមអរគុណដល់ការិយាល័យទាំងអស់ដែលបានធ្វើឱ្យព្រះសហគមន៍ភូមមិភាគភ្នំពេញមានជីវិតដ៏បរិបូណ៌។
ជាមួយគ្នានេះដែរលោក សាត ភារម្យ វ័យ៣៤ឆ្នាំជាអ្នកសម្របសម្រួលការងារនៅសិប្បកម្មដូងតាកែវបានឱ្យដឹងថា ពាក្យលើកទឹកចិត្តរបស់លោកអគ្គរាជទូត បាបជួយដល់ពួកយើងកាន់តែខ្លាំងក្នុងការខិតខំប្រឹងប្រែងធ្វើការបន្ថែម។
លោកភារម្យបានសង្កត់ធ្ងន់ថា ការិយាល័យរបស់លោក នឹងខិតខំធ្វើយ៉ាងណារួមបញ្ចូលបងប្អូនដែលមានពិការភាព និងអ្នកក្រលំបាកកក្នុងផ្នែសិប្បកម្មសូត្រអាចធ្វើការងាររបស់ពួកគាត់ឲ្យមានប្រសិទ្ធភាពនិងគុណភាព ដើម្បីលើកស្ទួយជីវភាពគ្រួសាររបស់ពួគាត់ផង និង បម្រើទៅលើទីផ្សារសម្រាប់ ភ្ញៀវទេសចរណ៍ផង។
លោកអគ្គអភិបាលវែលស៍ ត្រូវបានតែងតាំងជាអគ្គរាជទូតសន្តអាសនៈប្រចាំប្រទេសកម្ពុជាកាលពីខែកុម្ភៈឆ្នាំ២០២៣។ លោកបានអញ្ជើញមកទស្សនកិច្ចជាផ្លូវការណ៍នៅក្នុងប្រទេសកម្ពុជាកាលពីថ្ងៃទី ២១-២៨ ខែឧសភា ឆ្នាំ២០២៣។ ក្នុងអំឡុងពេលនោះ លោកបានចូលគាល់ព្រះមហក្សត្រដើម្បីថ្វាយសាតាំងក្នុងនាមជាអង្គទូតរបស់សន្តអាសនៈប្រចាំព្រះរាជាណាចក្រកម្ពុជា និងបានចូលគាល់សម្តេចសង្ឃរាជទេពវង្សនៅវត្តឧណ្ណាឡោម ហើយបានធ្វើទស្សនកិច្ចឈ្វេងយល់អំពីសកម្មភាពនិងបេសកកម្មក្នុងព្រះសហគមន៍កាតូលិកក្នុងភូមិភាគភ្នំពេញមួយចំនួនផងដែរ៕
ដោយដាលីស
