អត្ថបទទី១៖ សូមថ្លែងព្រះគម្ពីរកំណើត កណ ២,៤-៩,១៥-១៧

ពេលព្រះជាអម្ចាស់ប្រតិស្ឋានផែនដី និងផ្ទៃមេឃ នៅលើផែនដីពុំទាន់មានកូនឈើដុះតាមទីវាលនៅឡើយទេ សូម្បីតែស្មៅមួយទង ក៏ពុំទាន់មានពន្លកចេញមកដែរ ដ្បិត​ព្រះជាអម្ចាស់ពុំទាន់បានធ្វើឱ្យមានភ្លៀងធ្លាក់មកផែនដីនៅឡើយ ហើយក៏ពុំមាន​មនុស្សភ្ជួររាស់ដីដែរ។ ប៉ុន្តែ មានទឹកហូរចេញពីដីមកស្រោចស្រពផ្ទៃដីទាំងមូល។ ព្រះជាអម្ចាស់យកធូលីដីម​​​​កសូនធ្វើជារូបមនុស្ស រួចព្រះអង្គផ្លុំដង្ហើមជីវិតតាមរន្ធច្រមុះ ស្រាប់តែមនុស្សមានជីវិតឡើង។ ព្រះជាអម្ចាស់ដាំដំណាំធ្វើជាសួនឧទ្យានមួយនៅ​ខាងកើតស្រុកអេដែន រួចព្រះអង្គយកមនុស្សដែលទ្រង់បានសូនទៅដាក់នៅទីនោះ។ ព្រះជាអម្ចាស់ធ្វើឱ្យដើមឈឺគ្រប់មុខដុះចេញពីដីមក មានសម្រស់គួរឱ្យទាក់ចិត្ត និង​មានផ្លែឆ្ងាញ់ពិសាផង នៅកណ្តា​លសួនឧទ្យានក៏មានដើមឈើដែលផ្តល់ជីវិត និង​​ដើមឈើដែលនាំឱ្យស្គាល់អ្វីដែលផ្តល់សុខ និងអ្វីដែលផ្តល់ទុក្ខដែរ ។
ព្រះជាអម្ចាស់យកមនុស្សទៅដាក់ក្នុងសួនអេដែន ដើម្បីឱ្យភ្ជួររាស់ និងថែរក្សា​សួននោះ។ ព្រះជាអម្ចាស់បានបញ្ជមនុស្សថា៖ «អ្នកអាចបរិភោគផ្លែឈើទាំងប៉ុន្មាននៅក្នុងសួនឧទ្យាននេះបាន ប៉ុន្តែ ដើមឈើដែលនាំឱ្យស្គាល់អ្វីដែលផ្តល់សុខ និង​អ្វីដែលផ្តល់ទុក្ខ អ្នកមិនត្រូវបេះផ្លែបរិភោគជាដាច់ខាត! ថ្ងៃណាអ្នកបរិភោគផ្លែនោះ​អ្នកមុខជាស្លាប់ពុំខាន»។

ទំនុកតម្កើងលេខ ១០៤ (១០៣),១-២,២៧-៣០ បទពាក្យ ៧

ពិធីអបអរសាទរព្រះគម្ពីរដំណឹងល្អ ១​សម ១៦,៧

អាលេលូយ៉ា! អាលេលូយ៉ា!
ព្រះជាម្ចាស់ពុំឈ្វេងយល់ប្ញកពាខាងក្រៅដូចមនុស្សលោកទេ ព្រះអង្គស្ទង់ចិត្តគំនិតគេវិញ!។ អាលេលូយ៉ា!

សូមថ្លែងព្រះគម្ពីរដំណឹងល្អតាមសន្តម៉ាកុស មក ៧,១៤-២៣

ព្រះយេស៊ូត្រាស់ហៅបណ្តាជនមក រួចទ្រង់មានព្រះបន្ទូលទៅគេថា៖ «ចូរស្តាប់ខ្ញុំ​ទាំងអស់គ្នា ហើយយល់ឱ្យច្បាស់ថា អ្វីៗពីខាងក្រៅចូលទៅក្នុងមនុស្ស ពុំអាចធ្វើឱ្យមនុស្សត្រឡប់ទៅជាមិនបរិសុទ្ធបានឡើយ។ ផ្ទុយទៅវិញ មានតែអ្វីៗចេញពីមនុស្សប៉ុណ្ណោះដែលធ្វើឱ្យមិនបរិសុទ្ធ»។
កាលព្រះយេស៊ូយាងចេញពីបណ្តាជនចូលទៅក្នុងផ្ទះ ក្រុមសាវ័កនាំគ្នាទូលសួរ​ព្រះអង្គអំពីប្រស្នានេះ។ ព្រះអង្គមានព្រះបន្ទូលទៅគេថា៖ «អ្នករាល់គ្នាក៏គ្មានប្រាជ្ញាដូចពួកគេដែរឬ? អ្នករាល់គ្នាត្រូវយល់ថា អ្វីៗពីខាងក្រៅចូលទៅក្នុងមនុស្ស ពុំអាចធ្វើឱ្យគេត្រឡប់ទៅជាមិនបរិសុទ្ធបានឡើយ ដ្បិតអ្វីៗទាំងនោះមិនចូលទៅក្នុងចិត្តទេ គឺចូលទៅក្នុងពោះវិញ រួចចេញមកធ្លាក់ទៅទីបន្ទោរបង់»។ ដូច្នេះ ព្រះអង្គបញ្ជាក់ថាគ្រប់អាហារសុទ្ធតែបរិសុទ្ធទាំងអស់»។ ព្រះអង្គមានព្រះបន្ទូលទៀតថា៖ «មានតែ​អ្វីៗចេញពីមនុស្សប៉ុណ្ណោះ ដែលធ្វើឱ្យគេមិនបរិសុទ្ធ ដ្បិតគំនិតអាក្រក់ទាំងប៉ុន្មាន​​សុទ្ធតែចេញមកពីខាងក្នុងចិត្តរបស់មនុស្ស គឺគំនិតដែលនាំឱ្យប្រព្រឹត្តកាមគុណថោកទាប លួចប្លន់ កាប់សម្លាប់ ផិតក្បត់ លោភលន់ចង់បានទ្រព្យគេ កាចសាហាវ បោក​ប្រាសគេ ប្រព្រឹត្តអបាយមុខ ច្រណែនឈ្នានីស អំនួត និងគំនិតលេលា ការអាក្រក់​ទាំងនេះហើយដែលចេញពីខាងក្នុងមនុស្សមក ធ្វើឱ្យគេក្លាយទៅជាមិនបរិសុទ្ធ»។