លោកម៉ាថាយ លោកយ៉ាកុប និងលោកលូកា ជាអ្នកនិពន្ធគម្ពីរដំណឹងល្អ តែងតំណាលអំពីគ្រីស្តទូតម្នាក់ឈ្មោះថូម៉ាស់។ រឺឯសន្ត យ៉ូហានហៅលោកថូម៉ាស់នេះថា “ឌីឌីម” ដែរ ឈ្មោះនេះមានន័យថា “កូនភ្លោះ” ។ តាមគម្ពីរដំណឹងល្អលោកថូម៉ាសយល់ច្បាស់អំពីព្រះយេស៊ូត្រូវតែគេធ្វើគុត។ (“មក! យើងនាំគ្នាទៅរួមស្លាប់ជាមួយព្រះអង្គដែរ យហ ១១,១៦”)។ លោកស្វែងរកសេចក្តីពិតដោយស្មោះអស់ពីចិត្ត ហើយមិនខ្មាសនឹងប្រកាសថា គាត់មិនស្គាល់ផ្លូវ (យហ ១៤,៥៦)។ ពេលព្រះយេស៊ូទទួលព្រះជន្មដ៏រុងរឿង លោកចង់ឃើញសញ្ញាសម្គាល់យ៉ាងច្បាស់ថា ព្រះអង្គមានព្រះជន្មពិតមែន (យហ ២០,២៤-២៩)។
ពាក្យអធិដ្ឋានពេលចូល
បពិត្រព្រះជាម្ចាស់ដ៏មានតេជានុភាពសព្វប្រការ! ព្រះអង្គសព្វព្រះហឫទ័យជ្រើសរើសសន្តថូម៉ាសឱ្យធ្វើជាគ្រីស្តទូត។ សូមទ្រង់មេត្តាជួយយើងខ្ញុំដែលជាអ្នកមិនជឿផង! សូមប្រោសប្រទានឱ្យយើងខ្ញុំជឿជាក់ថា ព្រះយេស៊ូពិតជាព្រះគ្រីស្ត និងជាព្រះអម្ចាស់យើងខ្ញុំ ដែលគង់នៅជាមួយយើងខ្ញុំសព្វថ្ងៃនេះ ហើយដែលសោយរាជ្យជាមួយព្រះបិតា និងព្រះវិញ្ញាណដ៏វិសុទ្ធអស់កល្បជាអង្វែងតរៀងទៅ។
សូមថ្លែងលិខិតរបស់គ្រីស្ដទូតប៉ូលផ្ញើជូនគ្រីស្ដបរិស័ទក្រុងអេភេសូ អភ ២,១៩-២២
បងប្អូនជាទីស្រឡាញ់!
ដោយបងប្អូនរួមក្នុងអង្គព្រះគ្រីស្ត បងប្អូនលែងជាជនបរទេស ឬជាអាណិជជនទៀតហើយ គឺបងប្អូនជាប្រជាជនរបស់ព្រះជាម្ចាស់រួមជាមួយអ្នកបរិសុទ្ធ ហើយក៏ជាក្រុមគ្រួសាររបស់ព្រះជាម្ចាស់។ ព្រះអង្គបានកសាងបងប្អូនឡើយជាសំណង់ ដោយមានក្រុមគ្រីស្តទូត និងពួកព្យាការីជាគ្រឹះ និងមានព្រះគ្រីស្តយេស៊ូផ្ទាល់ជាថ្មគ្រឹះដ៏សំខាន់។ ព្រះគ្រីស្តហ្នឹងហើយ ដែលធ្វើឱ្យសំណង់ទាំងមូលភ្ជាប់គ្នាយ៉ាង មាំ និងធ្វើឱ្យចម្រើនឡើងទៅជាព្រះវិហារដ៏វិសុទ្ធមួយរួមជាមួយព្រះជាម្ចាស់។ រីឯបងប្អូនក៏ដូច្នោះដែរ ដោយបងប្អូនរួមជាមួយព្រះអង្គ បងប្អូនបានផ្តុំគ្នាឡើងសង់ជាព្រះតំណាក់របស់ព្រះជាម្ចាស់តាមរយៈព្រះវិញ្ញាណ។
ទំនុកតម្កើងលេខ ១១៧ (១១៦), ១-២ បទពាក្យ ៧
| ១ | ឱ! ប្រជាជនទាំងឡាយអើយ | ចូរសរសើរហើយលើកម្កើង | |
| អស់ប្រជារាស្រ្តឆ្មៃឆ្មើង | តម្កើងសិរីនៃព្រះអង្គ | ។ | |
| ២ | ដ្បិតព្រះអង្គមានហឫទ័យ | ករុណាប្រណីពេកកន្លង | |
| សប្បុរសស្មោះស្ម័គ្រឥតមានហ្មង | នឹងយើងរហូតតរៀងទៅ | ។ |
ពិធីអបអរសាទរព្រះគម្ពីរដំណឹងល្អតាម យហ ២០,២៩
អាលេលូយ៉ា! អាលេលូយ៉ា!
លោកថូម៉ាស់ឃើញព្រះអម្ចាស់ ហើយមានជំនឿ។ អ្នកណាជឿដោយមិនបានឃើញ អ្នកនោះមានសុភមង្គលហើយ! អាលេលូយ៉ា!
សូមថ្លែងព្រះគម្ពីរដំណឹងល្អតាមសន្តយ៉ូហាន យហ ២០,២៤-២៩
កាលព្រះយេស៊ូយាងមកនោះ លោកថូម៉ាស ហៅឌីឌីម ជាសាវ័កម្នាក់ក្នុងចំណោមសាវ័កទាំងដប់ពីរ មិនបាននៅជាមួយពួកគេទេ។សាវ័កឯទៀតៗប្រាប់គាត់ថា៖ «យើងបានឃើញព្រះអម្ចាស់»។ ប៉ុន្តែ គាត់និយាយទៅពួកគេវិញថា៖ «បើខ្ញុំមិនឃើញស្នាមដែកគោលនៅបាតដៃ មិនបានដាក់ម្រាមដៃក្នុងស្នាមដែកគោល ហើយបើខ្ញុំមិនបានដាក់ដៃត្រង់ឆ្អឹងជំនីររបស់លោកទេ ខ្ញុំមិនជឿជាដាច់ខាត»។ប្រាំបីថ្ងៃក្រោយមក ពួកសាវ័កជួបជុំគ្នានៅក្នុងផ្ទះសាជាថ្មី លោកថូម៉ាស់ក៏នៅជាមួយដែរ។ ពេលនោះ ទ្វារផ្ទះនៅខ្ទាស់ជាប់ ព្រះយេស៊ូយាងមកឈរនៅកណ្ដាលចំណោមពួកគេ ទាំងមានព្រះបន្ទូលថា៖ «សូមឱ្យអ្នករាល់គ្នាបានប្រកបដោយសេចក្ដីសុខសាន្ត!»។ បន្ទាប់មក ព្រះអង្គមានព្រះបន្ទូលទៅលោកថូម៉ាស់ថា៖ «មើលដៃខ្ញុំនេះ ចូរដាក់ម្រាមដៃអ្នកមក ហើយដាក់ដៃអ្នកត្រង់ឆ្អឹងជំនីរខ្ញុំ។ ចូរជឿទៅ! កុំរឹងរូសមិនព្រមជឿដូច្នេះ!»។ លោកថូម៉ាស់ទូលព្រះអង្គថា៖ «ព្រះអង្គពិតជាព្រះអម្ចាស់ និងជាព្រះរបស់ទូលបង្គំមែន!»។ ព្រះយេស៊ូមានព្រះបន្ទូលទៅគាត់ថា៖ «អ្នកជឿមកពីអ្នកបានឃើញខ្ញុំ អ្នកណាជឿ ដោយឥតបានឃើញសោះ អ្នកនោះមានសុភមង្គលហើយ!»។
ពាក្យថ្វាយតង្វាយ
បពិត្រព្រះជាម្ចាស់ជាព្រះបិតា! ក្នុងអភិបូជានេះ យើងខ្ញុំជាអ្នកបម្រើព្រះអង្គ នាំគ្នាថ្វាយខ្លួនទាំងស្រុងទៅលើព្រះអង្គទុកជាសក្ការបូជាដែលមកពីជំនឿ សូមទ្រង់ព្រះមេត្តាពង្រឹងជំនឿរបស់យើងខ្ញុំផង។
ធម៌លើកតម្កើង
បពិត្រព្រះបិតាដ៏វសុទ្ធបំផុត ជាព្រះអម្ចាស់ប្រកបដោយតេជានុភាពសព្វប្រការ ហើយដែលមានព្រះជន្មគង់នៅអស់កល្បជានិច្ច! យើងខ្ញុំសូមលើកតម្កើង និងអរព្រះគុណព្រះអង្គជានិច្ច ដោយរួមជាមួយព្រះគ្រីស្តជាព្រះអម្ចាស់យើងខ្ញុំ ។ ព្រះអង្គបានចាក់ឫសនៃព្រះសហគមន៍របស់ព្រះបុត្រាលើក្រុមគ្រីស្តទូតជាគ្រឹះ ដើម្បីឱ្យព្រះសហគមន៍ទៅជាសញ្ញាសម្គាល់បង្ហាញភាពដ៏វិសុទ្ធរបស់ព្រះអង្គក្នុងលោកនេះ។ ព្រះសហគមន៍ក៏មានភារកិច្ចនាំដំណឹងល្អអំពីព្រះរាជ្យព្រះអង្គដល់មនុស្សគ្រប់ជាតិសាសន៍ផង ។ អាស្រ័យហេតុនេះហើយ បានជានៅលើលោកនេះ យើងខ្ញុំសូមចូលរួមជាមួយទេវទូត និងសន្តបុគ្គល សូមលើកតម្កើងព្រះអង្គ ដោយប្រកាសថា៖ ” ព្រះដ៏វិសុទ្ធ ” ។
ពាក្យអរព្រះគុណ
បពិត្រព្រះជាម្ចាស់ជាព្រះបិតា! ព្រះអង្គបានប្រទានឱ្យយើងខ្ញុំទទួលព្រះកាយនៃព្រះបុត្រាព្រះអង្គក្នុងអភិបូជានេះពិតមែនហើយ។ យើងខ្ញុំសូមចូលរួមជាមួយគ្រីស្តទូតថូម៉ាស និងប្រកាសថា ព្រះយេស៊ូពិតជាព្រះអម្ចាស់ និងជាព្រះរបស់យើងខ្ញុំមែន។ សូមទ្រង់ព្រះមេត្តាប្រោសប្រទានឱ្យយើងខ្ញុំប្រកាសជំនឿនេះ តាមរបៀបរស់នៅរបស់យើងខ្ញុំផង។
