ប្រជាជនក្នុងភូមិឈើទាល បានស្គាល់ព្រះវិហារសន្តីតេរេសានៃព្រះកុមារយេស៊ូរបស់ព្រះសហគមន៍ព្រៃកប្បាស តាមរយៈកសិកម្មដែលព្រះសហគមន៍បានបង្កើតឡើង។ គម្រោងកសិកម្មនេះ បានជួយដល់កិច្ចការផ្សព្វផ្សាយដំណឹងល្អក្នុងភូមិបានមួយចំណែក។
លោកបូជាចារ្យ ចន ពេញ ជាបូជាចារ្យទទួលខុសត្រូវ ព្រះវិហារសន្តីតេរេសានៃព្រះកុមារយេស៊ូ ព្រៃកប្បាស បានឱ្យដឹងបន្តថា វិស័យកសិកម្មនេះជាចំណែកមួយដើម្បីជួយឱ្យព្រះសហគមន៍មានទំនាក់ទំនងជាមួយបងប្អូនបងប្អូនក្រីក្រ ស្រ្តីមានផ្ទៃពោះ និងចាស់ជរា តាមរយៈការលក់និងការចែករំលែកត្រី បន្លែ និង ផ្លែឈើដូចជាស្វាយនិងដូង។
ជាមួយគ្នានេះដែរ កិច្ចការនេះបានជំរុញឲ្យប្រជាជនក្នុងភូមិ និងបុគ្គលិកព្រះសហគមន៍ ប្រែចិត្តគំនិតមកឈ្វេងយល់ជំនឿនិងបានទទួលជំហានទីមួយកាលពីខែមុន។ នេះបើតាមលោកបូជាចារ្យចន។
លោកកឹម ដារ៉ូ ដែលទើបតែទទួលពិធីជំហានទីមួយ បានឱ្យដឹងថា ដោយសារគម្រោងកសិកម្មរបស់ព្រះសហគមន៍ បានជួយឱ្យលោកមានភាពជិតស្និទ្ធជាមួយព្រះសហគមន៍ និងចាប់អារម្មណ៍មកអប់រំជំនឿ។
ដារ៉ូបន្ថែមថា «មានយាយៗតាៗខ្លះទៀតក៏បានស្គាល់ព្រះសហគមន៍តាមរយៈកសិកម្មនេះដូចខ្ញុំដែរ ដោយសារពួកយើងបានជួយចែកជាស្ពៃ ជាត្រីដល់ពួកគាត់និងក្រោយមកពួកគាត់បានមកព្រះវិហារបានស្គាល់លោកឪពុក និងបានចូលអប់រំជំនឿដូចខ្ញុំដែរ»។
គម្រោងកសិកម្មរបស់ព្រះសគមន៍បានបង្កើតឡើងកាលពីឆ្នាំ២០១៩ លើផ្ទៃដី៤ហិចតា ស្ថិតនៅក្នុងភូមិឈើទាល ឃុំព្រៃផ្ដៅ ស្រុកព្រៃកប្បាស ខេត្តតាកែវ ហើយវាមិនត្រឹមតែអាចជួយដល់អ្នកក្រីក្រក្នុងភូមិនិងប្រកាសដំណឹងល្អនោះទេ ថែមទាំងអាចរកប្រាក់ចំណូលបានបន្តិចបន្តួចដើម្បីជួយដល់ការចំណាយរបស់ព្រះសហគមន៍នេះផងដែរ។
«បច្ចុប្បន្នយើងមានស្រែ មានសួនបន្លែ កសិដ្ឋានចិញ្ចឹមគោនិងត្រី ព្រមទាំងមានដំណាំដូង ដែលសុទ្ធតែបានផ្ដល់ប្រាក់ចំណូលដល់ព្រះសហគមន៍។» លោកបូជាចារ្យ ចនបញ្ជាក់។
ដូចគ្នានេះដែរ លោកឡុច តុងណៃ ជាប្រធានផ្នែកកសិកម្មនេះ បានឱ្យដឹងថា បច្ចុប្បន្នដោយមានតម្រូវការកាន់តែច្រើនឡើងៗ ព្រះសហគមន៍នឹងមានគម្រោងពង្រីកបន្ថែមខាងផ្នែកកសិដ្ឋាន រីឯបន្លែសរីរាង្គដែលយើងដាំក្នុងទឹក ឥលូវនេះយើងពិបាករកទីផ្សារបន្តិច។
ទោះជាយ៉ាងណាក៏ដោយ សួនបន្លែលើទឹកនេះនៅតែអាចរកប្រាក់ចំណូលសម្រាប់ព្រះសហគមន៍ដោយអាចផ្ដល់ផលលក់ចេញបានចាប់ពី ៣៥០គីឡូទៅ៤០០គីឡូក្នុងមួយខែ។ នេះជាការបញ្ជាក់ពីលោកតុងណៃ។
លោកឡុច តុងណៃឱ្យដឹងទៀតថា វិស័យកសិកម្មនៅក្នុងព្រះសហគមន៍ព្រៃកប្បាស បានជួយឱ្យលោកមានចំណេះដឹងបន្ថែមលើការដាំដុះ ចិញ្ចឹមត្រីនិងសត្វផ្សេងៗ លើសពីនេះទៅទៀតក៏អាចផ្តល់ការងារមួយដល់ពួកគាត់ដើម្បីផ្គត់ផ្គង់ជីវិតគ្រួសារ។
ក្រៅពីវិស័យកសិកម្មនេះ ព្រះសហគមន៍ព្រៃកប្បាសក៏មានផ្ទះទទួលស្វាគមន៍ភ្ញៀវសម្រាប់គ្រីស្តបរិស័ទដែលចង់រកកន្លែងអធិដ្ឋាននិងស្ងៀមស្ងាត់សំណាក់ធម៌ផងដែរ។
ព្រះសហគមន៍ព្រៃកប្បាសបានចាប់ផ្ដើមឡើងក្នុងឆ្នាំ២០១០ដោយមានគ្រីស្តបរិស័ទម្នាក់ ហើយជាង១០មកនេះ មានគ្រីស្តបរិស័ទសរុបចំនួន៦៧នាក់ ដែលបានជ្រមុជទឹកជាបន្តបន្ទាប់៕
ដោយ សួន ស្រីហួច ដាលីស
