ផ្នែកទី ចន្ទ – ស្វ – ថ្ងៃចន្ទពិសិដ្ឋ

ពាក្យអធិដ្ឋានពេលចូល

បពិត្រព្រះជាម្ចាស់ប្រកបដោយតេជានុភាពសព្វប្រការ! យើងខ្ញុំនាំគ្នានឹករឭកដល់ព្រះយេស៊ូ ជាព្រះបុត្រាព្រះអង្គរងទុក្ខលំបាក ដើម្បីសង្គ្រោះមនុស្សលោក។ ពេលយើងខ្ញុំជាមនុស្សទន់ខ្សោយ ភ្លាត់ប្រព្រឹត្តអំពើបាប សូមទ្រង់ព្រះមេត្តាប្រោសយើងខ្ញុំមានជីវិតថ្មី ដោយយល់ដល់ព្រះបុត្រាដ៏ជាទីស្រឡាញ់របស់ព្រះអង្គផង។

សូមថ្លែងព្រះគម្ពីរព្យាការីអេសាយ អស ៤២,១-៧

ព្រះអម្ចាស់មានព្រះបន្ទូលថា៖ «លោកនេះហើយជាអ្នកបម្រើដែលយើងគាំទ្រ ជាអ្នកដែលយើងបានជ្រើសរើស និងជាទីគាប់ចិត្តរបស់យើងខ្ញុំ។ យើងដាក់វិញ្ញាណរបស់យើងឱ្យសណ្ឋិតនៅលើលោក។ លោកនឹងបង្ហាញឱ្យប្រជាជាតិទាំងឡាយស្គាល់ការវិនិច្ឆ័យរបស់យើង។ លោកមិនស្រែក ឬគំហកកំហែងដាក់នរណាឡើយ ហើយក៏មិនបន្លឺសម្លេងនៅតាមផ្លូវដែរ។ លោកនឹងមិនកាច់ផ្តាច់ដើមត្រែង​ណាដែលទក់ហើយនោះទេ លោកក៏មិនផ្លុំពន្លត់ភ្លើងដែលហៀបនឹងរលត់នោះដែរ។ ប្រាកដមែនហើយ! លោកនឹងបង្ហាញការវិនិច្ឆ័យរបស់យើង។ លោកនឹងមិនខ្សោយឡើយ លោកអង់អាចជានិច្ច រហូតទាល់តែធ្វើឱ្យការវិនិច្ឆ័យរបស់យើងបានសម្រេចនៅលើផែនដី។ មនុស្សនៅទីដាច់ស្រយាលនៃផែនដីក៏រង់ចាំទទួលការប្រៀនប្រដៅពីលោកដែរ»។ ព្រះជាអម្ចាស់ដែលបានបង្កើត និងលាតត្រដាងផ្ទៃមេឃ ព្រះអង្គបានសន្ធឹងផែនដី និងធ្វើឱ្យមានអ្វីៗទាំងអស់ដុះឡើង។ ព្រះអង្គបានប្រទានដង្ហើមចេញចូលឱ្យសត្វលោកទាំងអស់រស់​នៅផែនដី ហើយប្រទានជីវិតឱ្យអស់អ្នកដែលដើរទៅមកនៅលើផែនដីនេះ។ ព្រះអង្គមានព្រះបន្ទូលថា៖ «យើងនេះហើយជាព្រះអម្ចាស់! យើងបានហៅអ្នកស្របតាមសេចក្តីសុចរិតរបស់យើង។ យើងកាន់ដៃអ្នក យើងទុកអ្នកដោយឡែកពីគេ ហើយតែងតាំងអ្នកធ្វើជាសម្ព័ន្ធមេត្រីជាមួយប្រជាជនឱ្យអ្នកធ្វើពន្លឺសម្រាប់បំភ្លឺប្រជាជាតិនានា អ្នកនឹងប្រោសមនុស្សខ្វាក់ឱ្យបានភ្លឺ នាំពួកឈ្លើយសឹក​សង្គ្រាមចេញពីទីឃុំឃាំង ព្រមទាំងរំដោះប្រជាជនដែលរស់នៅក្នុងភាពងងឹតឱ្យបានចេញរួចផង។

ទំនុកតម្កើងរបស់ព្យាការីយេរេមី ២៧(២៦),១-៣.១៣-១៤ បទពាក្យ ៧

ពិធីអបអរសាទរព្រះគម្ពីរដំណឹងល្អ

សូមថ្លែងព្រះគម្ពីរដំណឹងល្អតាមសន្តយ៉ូហាន យហ ១២,១-១១

ប្រាំមួយថ្ងៃមុនបុណ្យចម្លង ព្រះយេស៊ូយាងមកភូមិបេថានី ជាភូមិរបស់លោកឡាសារដែលព្រះអង្គបានប្រោសឱ្យរស់ឡើងវិញ។ នៅទីនោះ គេរៀបចំជប់លៀងថ្វាយព្រះយេស៊ូ។ នាងម៉ាថាបម្រើភ្ញៀវ រីឯលោកឡាសារអង្គុយរួមតុជាមួយព្រះយេស៊ូ និងអ្នកឯទៀត។ នាងម៉ារីយកប្រេងក្រអូបកន្លះលីត្រ គឺប្រេងទេពិ្វរូសុទ្ធដ៏មានតម្លៃលើស​លប់មកចាក់លាបព្រះបាទាព្រះយេស៊ូ រួចយកសក់នាងជូត ក្លិនប្រេងក្រអូបសាយពេញផ្ទះ។ ពេលនោះសាវ័កម្នាក់ឈ្មោះយូដាសអ៊ីស្ការីយ៉ុតដែលនឹងនាំគេមកចាប់ព្រះអង្គពោលឡើងថា៖ «ម្តេចក៏មិនយកប្រេងក្រអូបដែលមានតម្លៃបីរយដួងទៅលក់យកប្រាក់ចែកឱ្យជនក្រីក្រវិញ?»។ គាត់និយាយដូច្នេះ មិនមែនមកពីគាត់យកចិត្តទុកដាក់នឹងអ្នកក្រទេ គឺមកពីគាត់ជាចោរ គាត់កាន់ថង់ប្រាក់ ហើយតែងលួចយកប្រាក់ដែលគេដាក់ក្នុងថង់នោះ។ ព្រះយេស៊ូមានព្រះបន្ទូលថា៖ «ទុកឱ្យនាងធ្វើតាមបំណងចិត្តនាងទៅ! នាងចាក់ប្រេងក្រអូបនេះសម្រាប់ថ្ងៃបញ្ចុះសពខ្ញុំ។ អ្នកក្រីក្រនៅជាមួយអ្នករាល់គ្នារហូត រីឯខ្ញុំវិញ ខ្ញុំមិននៅជាមួយអ្នករាល់គ្នារហូតទេ»។ ជនជាតិយូដាច្រើនកុះករបានឮដំណឹងថា ព្រះអង្គគង់នៅភូមិបេតថានី គេនាំគ្នាមកមិនមែនគ្រាន់តែចង់ឃើញព្រះយេស៊ូប៉ុណ្ណោះទេ គឺចង់​ឃើញលោកឡាសារដែលព្រះអង្គបានប្រោស​ឱ្យរស់ឡើងវិញនោះថែមទៀតផង។ ពួកនាយកបូជាចារ្យបានសម្រេចចិត្តសម្លាប់លោកឡាសារដែរ ព្រោះតែគាត់នេះហើយ បានជាមានជនជាតិយូដាជាច្រើនបែកចេញ​ពីពួកគេ ហើយមកជឿលើព្រះយេស៊ូ។

ពាក្យថ្វាយតង្វាយ

បពិត្រព្រះអម្ចាស់ជាព្រះបិតា! ព្រះអង្គសព្វព្រះហប្ញទ័យឱ្យព្រះបុត្រាបូជាព្រះជន្មដើម្បីរំដោះមនុស្សលោកឱ្យរួចពីបាប។ សូមព្រះអង្គទ្រង់ព្រះមេត្តាទទួលសក្ការបូជានេះដោយអនុគ្រោះ។ សូមប្រោសយើងខ្ញុំឱ្យរួមរស់ជាមួយព្រះគ្រីស្តជានិច្ច និងបង្កើតផលដែលនៅស្ថិតស្ថេរផង។

ពាក្យអរព្រះគុណ

បពិត្រព្រះអម្ចាស់ជាព្រះបិតា! ក្នុងអភិបូជានេះ ព្រះអង្គប្រោសយើងខ្ញុំឱ្យបានវិសុទ្ធ ដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ ដែលបានបូជាព្រះជន្ម។ សូមព្រះអង្គទ្រង់ព្រះមេត្តាសណ្ឋិតនៅជាមួយប្រជារាស្ត្រព្រះអង្គជានិច្ច សូមបំភ្លឺចិត្តគំនិតយើងខ្ញុំកុំឱ្យបដិសេធព្រះគ្រីស្តឡើយ។

ផ្នែកទី១ ស – បុណ្យចូលឆ្នាំថ្មីប្រពៃណីជាតិ-មហាសង្រ្កាន្ដ

ពាក្យអធិដ្ឋានពេលចូល

បពិត្រព្រះជាម្ចាស់ជាប្រះបិតា! ព្រះអង្គមានព្រះហឫទ័យស្រលាញ់មនុស្សគ្រប់ជាតិសាសន៍ ព្រះអង្គបាន បង្កើតមនុស្សលោកដើម្បីឲ្យមានសេចក្តីសុខ! នៅថ្ងៃចូលឆ្នាំនេះ យើងខ្ញុំសូមព្រះអង្គទ្រង់ព្រះមេត្តាប្រទានពរ ដល់យើងខ្ញុំនិងប្រជានជនខ្មែរទាំងមូល។ សូមប្រោសប្រទានឲ្យយើងខ្ញុំបានប្រកបដោយសេចក្តីសុខសាន្ត ដោយីគ្មានជំងឺព្យាធិមកបៀតបៀនឡើយ! សូមឲ្យប្រជាជនកម្ពុជាទាំងមូលបានសប្បូរណ៍សប្បាយ មិនខ្វះខាត អ្វីឡើយ! សូមពង្រឹងជំនឿ សេចក្តីសង្ឈឹម មិនសេចក្តីស្រលាញ់របស់យើងខ្ញុំផង។

សូមថ្លែងព្រះគម្ពីរជំរឿងប្រជាជន ជរ ៦,២២-២៧

ព្រះ‌អម្ចាស់​មាន​ព្រះ‌បន្ទូល​មក​កាន់​លោក​ម៉ូសេ​ថា៖ «ចូរ​ប្រាប់​អរ៉ុន និង​កូន​ចៅ​របស់​គាត់ឱ្យជូន​ពរ​ជន​ជាតិ​អ៊ីស្រា‌អែល​ដូច​ត​ទៅ: “សូម​ព្រះ‌អម្ចាស់​ប្រទាន​ពរ និង​ថែ‌រក្សា​អ្នក។ សូម​ព្រះ‌អម្ចាស់​ទត​មក​អ្នក ដោយ​ព្រះ‌ហឫ‌ទ័យ​មេត្តា​ករុណាសូម​ព្រះ‌អង្គ​ប្រណី​សន្ដោស​អ្នក សូម​ព្រះ‌អម្ចាស់​សម្ដែង​ព្រះ‌ហឫ‌ទ័យ​សប្បុរសចំពោះ​អ្នក និង​ប្រទាន​ឱ្យអ្នក​បាន​ប្រកប​ដោយ​សេចក្ដី​សុខ‌សាន្ត”។ ពេល​ពួក​បូជា‌ចារ្យ​ឱ្យ​ពរ​ជន​ជាតិ​អ៊ីស្រា‌អែល​ក្នុង​នាម​យើង​ដូច្នេះ យើង​នឹង​ឱ្យពរ​ពួក​គេ»។

ទំនុកតម្កើងលេខ ៦៧​(៦៦),៣.៥-៦.៨ បទពាក្យ ៧

ពិធីអបអរសាទរព្រះគម្ពីរដំណឹងល្អតាម មថ ១១,២៨

សូមថ្លែងព្រះគម្ពីរដំណឹងល្អតាមសន្តម៉ាថាយ មថ ៥,១-១២

ព្រះ‌យេស៊ូ​ទត​ឃើញ​មហា‌ជន​ទាំង​នេះ ព្រះ‌អង្គ​យាង​ឡើង​ទៅ​លើ​ភ្នំ រួច​ព្រះ‌អង្គ​គង់​នៅ​ទី​នោះ។ សាវ័កនាំ​គ្នា​ចូល​មក​គាល់​ព្រះ‌អង្គ ព្រះ‌អង្គ​ក៏​មាន​ព្រះ‌បន្ទូល​បង្រៀន​គេ​ថា៖ «អ្នក​ណា​ដាក់​ចិត្ត​ជា​អ្នក​ក្រ‌ខ្សត់​ អ្នក​នោះ​មាន​សុភមង្គលហើយ ដ្បិត​ពួក​គេ​បាន​ទទួល​ព្រះ‌រាជ្យនៃ​ស្ថាន​បរម‌សុខ! អ្នក​ណា​សោក‌សៅ អ្នក​នោះ​មាន​សុភមង្គល​ហើយ ដ្បិត​ព្រះ‌ជាម្ចាស់​នឹង​សម្រាល​ទុក្ខ​ពួក​គេ! អ្នក​ណា​មាន​ចិត្ត​ស្លូត‌បូត អ្នក​នោះ​មាន​សុភមង្គល​ហើយ ដ្បិត​ពួក​គេ​នឹង​ទទួល​ផែន‌ដី​ទុក​ជា​មត៌ក! អ្នក​ណា​ស្រេក​ឃ្លាន​សេចក្ដី​សុចរិត អ្នក​នោះ​មាន​សុភមង្គល​ហើយ ដ្បិត​ព្រះ‌ជាម្ចាស់​នឹង​ប្រទាន​ឱ្យពួក​គេ​បាន​ឆ្អែត! អ្នក​ណា​មាន​ចិត្ត​មេត្តា‌ករុណា អ្នក​នោះ​មាន​សុភមង្គល​ហើយ ដ្បិត​ព្រះ‌ជាម្ចាស់​នឹង​សម្ដែង​ព្រះ‌ហឫ‌ទ័យមេត្តា‌ករុណា​ដល់​ពួក​គេ​វិញ! អ្នក​ណា​មាន​ចិត្ត​បរិសុទ្ធ អ្នក​នោះ​មាន​សុភមង្គល​ហើយដ្បិត​ពួក​គេ​នឹង​ឃើញ​ព្រះ‌ជាម្ចាស់! អ្នក​ណា​កសាង​សន្តិ‌ភាព អ្នក​នោះ​មាន​សុភមង្គល​ហើយ ដ្បិត​ពួក​គេ​នឹង​មានឈ្មោះ​ជា​បុត្ររបស់​ព្រះ‌ជាម្ចាស់! អ្នក​ណា​ត្រូវ​គេ​បៀត‌បៀនព្រោះ​តែ​បាន​ធ្វើ​តាម​សេចក្ដី​សុចរិត អ្នក​នោះ​មាន​សុភមង្គល​ហើយ ដ្បិត​គេ​បាន​ទទួល​ក្នុង​ព្រះ‌រាជ្យនៃ​ស្ថាន​បរម‌សុខ! ប្រសិន​បើ​មាន​គេ​ត្មះ‌តិះ‌ដៀល បៀត‌បៀន និង​មាន​គេ​និយាយ​អាក្រក់​គ្រប់​យ៉ាង បង្ខូច​ឈ្មោះ​អ្នក​រាល់​គ្នា ព្រោះ​តែ​ខ្ញុំ នោះ​អ្នក​រាល់​គ្នា​មាន​សុភមង្គល​ហើយ! ចូរ​អរ​សប្បាយ​រីក‌រាយ​ឡើង ព្រោះ​អ្នក​រាល់​គ្នា​នឹង​ទទួល​រង្វាន់​យ៉ាង​ធំ​នៅ​ស្ថាន​បរម‌សុខ ដ្បិត​ពួក​ព្យាការីដែល​រស់​នៅ​មុន​អ្នក​រាល់​គ្នា ក៏​ត្រូវ​គេ​បៀត‌បៀន​ដូច្នោះ​ដែរ»។

ពាក្យថ្វាយតង្វាយ

បពិត្រព្រះជាម្ចាស់ជាព្រះបិតា! មុនព្រះយេស៊ូសោយទីវង្គត ទ្រង់ថ្វាយព្រះជន្មទៅព្រះបិតាទុកជាសក្ការៈបូជាដែលគាប់ព្រះហឫទ័យព្រះអង្គ។ នៅថ្ងៃចូលឆ្នាំនេះ យើងខ្ញុំសូមថ្វាយខ្លួនទាំងស្រុងទៅព្រះអង្គ គឺថ្វាយកាយវាចាចិត្ត ព្រមទាំងថ្វាយកិច្ចការ កង្វល់ អំណរសប្បាយគ្រប់យ៉ាងប្រចាំឆ្នាំនេះទុកជាមុន សូមទ្រង់មេត្តាទទួលតង្វាយរបស់យើងខ្ញុំដោយអនុគ្រោះ រួមនឹងសក្ការបូជារបស់ព្រះយេស៊ូ​គ្រីស្ត ជាព្រះបុត្រាព្រះអង្គ និងជាអម្ចាស់យើងខ្ញុំ។

ធម៌លើកតម្កើង

បពិត្រព្រះបិតាដ៏វិសុទ្ធបំផុត ជាព្រះជាម្ចាស់ប្រកបដោយតេជានុភាពសព្វប្រការ ហើយដែលមានព្រះជន្មគង់នៅអស់កល្បជានិច្ច! យើងខ្ញុំសូមអរព្រះគុណ និងសូមលើកតម្កើងព្រះអង្គដោយរួមជាមួយព្រះយេស៊ូគ្រីស្តជាព្រះបុត្រាព្រះអង្គ និងជាអម្ចាស់យើងខ្ញុំ។ ព្រះគ្រីស្តពិតជាខាងដើម និងខាងចុងបំផុតនៃអ្វីៗទាំងអស់។ ព្រះអង្គពិតជាម្ចាស់នៃពេលវេលា ព្រះអង្គក៏យាងមកប្រមែប្រមូលអ្វីៗទាំងអស់ឱ្យស្ថិតនៅក្រោមអំណាចព្រះអម្ចាស់តែមួយដែរ។ អាស្រ័យហេតុនេះហើយ បានជាយើងខ្ញុំសូមចូលរូមជាមួយទេវទូត និង សន្តបុគ្គលទាំងឡាយ សូមលើកតម្កើងសិរីរុងរឿងរបស់ព្រះអង្គដោយប្រកាសថា៖ “ព្រះដ៏វិសុទ្ធ! ព្រះដ៏វិសុទ្ធ! ព្រះដ៏វិសុទ្ធ!”

ពាក្យអរព្រះគុណ

បពិត្រព្រះអម្ចាស់ជាព្រះបិតា! ព្រះអង្គសព្វព្រះហឫទ័យត្រាស់ហៅយើងខ្ញុំឱ្យចូលរួមក្នុងសក្ការបូជារបស់ព្រះយេស៊ូគ្រីស្ត ជាព្រះបុត្រាព្រះអង្គ។ សូមទ្រង់ព្រះមេត្តាប្រោសយើងខ្ញុំឱ្យរស់នៅអស់មួយឆ្នាំយ៉ាងសមគួរនឹងឋានៈរបស់ខ្លួនជាបុត្រធីតាព្រះអង្គ។ សូមពង្រឹងជំនឿ សេចក្តីសង្ឈឹម និងសេចក្តីស្រលាញ់របស់យើងខ្ញុំ។ សូមប្រោសប្រទានឱ្យប្រទេសកម្ពុជាយើងបានប្រកបដោយសេចក្តីសុខសាន្តផង។