«ព្រះជាម្ចាស់កែច្នៃជីវិតរបស់យើងឲ្យទៅជាជីវិតមួយដែលមានប្រយោជន៍។» នេះជាប្រសាសន៍លើកឡើងរបស់លោកអភិបាលសិលា សួន ហង្សលី អភិបាលព្រះសហគមន៍កាតូលិកភូមិភាគកំពង់ចាម ទៅកាន់យុវតីពីររូបដែលក្លាយជាបព្វជិតានាថ្ងៃទី១៤ខែកញ្ញានេះ។
«សូមឲ្យបងស្រីធ្វើជាថូមួយដែលមានសោភ័ណ្ឌភាព ដែលមកពីស្នាព្រះហស្តរបស់ព្រះជាម្ចាស់ ដែលណែនាំឲ្យមនុស្សលោកដែលឃើញជីវិតរបស់យើង ឃើញអ្វីៗដែលយើងប្រព្រឹត្ត គេគិតអំពីអ្នកដែលបានបង្កើត។» លោកអភិបាលលីបញ្ជាក់។
លោកអភិបាលបានពន្យល់ថា ដីឥដ្ឋមិនសូវមានតម្លៃទេ ប៉ុន្តែនៅពេលជាងស្មូនបានរៀបចំថូមួយដ៏ស្អាតចេញពីវា ថូនោះទៅជារបស់មានតម្លៃ។
យុវនារីទាំងពីររូបដែលថ្វាយពាក្យសច្ចា មានក្លារ៉ា ដូត ស្រីឡៃ និងក្លារ៉ា ឃាន កញ្ញា ដែលអ្នកទាំងពីរមកពីគ្រួសារពុទ្ធបរិស័ទ នៅកោះរការក្រៅ ក្នុងខេត្តកំពង់ចាម។ អ្នកទាំងពីរបានចូលសិក្សាអប់រំក្នុងក្រុមគ្រួសារបព្វជិតា អ្នកស្រឡាញ់ព្រះឈើឆ្កាង នៅក្នុងភូមិភាគកំពង់ចាម។
ព្រះសហគមន៍ភូមិភាគកំពង់ចាម គ្របដណ្ដប់ខេត្តចំនួន៨ រួមមាន កំពង់ចាម ត្បូងឃ្មុំ ព្រៃវែង ស្វាយរៀង ក្រចេះ ស្ទឹងត្រែង រតនគិរី និងមណ្ឌលគិរី។
លោកអភិបាលហង្សលី មានប្រសាសន៍ទៀតថា ការឆ្លើយតបនឹងការត្រាស់ហៅគឺមានការលំបាកជាច្រើនដោយមានសន្យាចំនួនបី គឺរស់នៅលីវ រស់នៅបែបក្រីក្រ និងស្តាប់បង្គាប់ប្រធានក្រុមគ្រួសារអ្នកបួស។
លោកបានពន្យល់ថា ពាក្យសច្ចានេះ ជាសន្យាមួយដ៏លំបាកក្នុងសម័យដែលយើងរស់នៅក្នុងសង្គមជឿនលឿន ដែលមនុស្សលោកបច្ចុប្បន្នមានការប្រកួតប្រជែងគ្នា គេចង់បានទ្រព្យសម្បត្តិច្រើន ចង់មានកិត្តិយស ចង់មានគ្រួសារមួយដ៏ថ្កុំថ្កើងក្នុងសង្គម។
លោកអភិបាលបន្តថា ការថ្វាយខ្លួនគឺថ្វាយទាំងភាពទន់ខ្យោយ ហើយក៏ត្រូវការការបន្ទាបខ្លួនរស់នៅក្នុងជីវិតសាមញ្ញដូចព្រះយេស៊ូ។ ការបន្ទាបខ្លួននាំឲ្យអ្នកដទៃចង់ស្គាល់ព្រះជាម្ចាស់ផងដែរ ហើយការបន្ទាបខ្លួន នាំឲ្យព្រះជាម្ចាស់លើកយើងឡើង ដើម្បីបំពេញបេសកកម្មពិសេសរបស់ព្រះអង្គដល់មនុស្សលោកដែលយើងជួបជារៀងរាល់ថ្ងៃ។
លោកអភិបាលក៏បានជំរុញនិងលើកទឹកចិត្តដល់គ្រីស្តបរិស័ទដែលមានវត្តមានជាង២០០នាក់ក្នុងពិធី ឲ្យរស់នៅ ដោយបង្ហាញវត្តមានព្រះជាម្ចាស់ ដើម្បីឲ្យគេបានឃើញ និងស្វែងរកព្រះជាម្ចាស់ ឲ្យគេអាចទៅចួបព្រះអង្គតាមរយៈសកម្មភាពរបស់គ្រីស្តបរិស័ទ។
ពិធីថ្វាយពាក្យសច្ចាប្រណិធានលើកដំបូងនេះ បានធ្វើឡើងនៅក្នុងព្រះសហគមន៍កាតូលិកកំពង់ចាមក្រុង ស្ថិតក្នុងបុណ្យលើកតម្កើងព្រះឈើឆ្កាង។ បេក្ខជនទាំងពីរបានលុតជង្គង់នៅមុខអាសនៈ ទល់មុខប្រធានក្រុមគ្រួសារអ្នកបួស ហើយបានសន្យាស្ម័គ្រស្ដាប់បង្គាប់និងធ្វើតាមពេញមួយជីវិត។
ក្រុមគ្រួសារបព្វជិតាអ្នកស្រឡាញ់ឈើឆ្កាងព្រះយេស៊ូ បង្កើតឡើងដោយលោកអភិបាលសិលា ម៉ារី ឡាំប៊ែរ ដឺឡាមុត ជាសាសនទូតជាតិបារាំង ក្នុងឆ្នាំ១៦៧០ នៅតូគីនប្រទេសវៀតណាម ហើយក្រោយមកនៅក្នុងទឹកដីកូសាំងស៊ីននិងតំបន់អាស៊ីអាគ្នេយ៍មួយចំនួនទៀត។
បច្ចុប្បន្នក្រុមបព្វជិតានេះ មានសមាជិក៨នាក់រួមទាំងសមាជិកថ្មីដែលទើបថ្វាយពាក្យសច្ចាប្រណិធាន។
ដូនជីអាង សង្វាត ជាប្រធានក្រុមគ្រួសារបព្វជិតាអ្នកស្រឡាញ់ឈើឆ្កាងព្រះយេស៊ូនៅប្រទេសកម្ពុជា មានប្រសាសន៍ថា ដូនជីថ្មីទាំងពីររូប ត្រូវរៀនបន្ថែមទៀត គឺរៀនអំពីកិច្ចការបម្រើព្រះសហគមន៍ រៀនបម្រើអ្នកក្រីក្រ និងរៀនរស់នៅជាមួយបងស្រីដែលជាសមាជិកក្រុមគ្រួសារនេះ។
ដូនជីប្រធានបានសង្កត់ធ្ងន់ថា «ទាំងនេះ គឺជាអ្វីដែលពួកគេត្រូវរៀបចំខ្លួនដោយខ្លួនឯង។ អត់ដឹងថា ជីវិតនៅខាងក្រៅជួបបញ្ហាអី ជួបឧបសគ្គអី តែបងស្រីសូមលើកទឹកចិត្តគេ ឲ្យបន្តជីវិតនេះទៅមុខទៀត ប៉ុន្តែកត្តាសំខាន់គឺលើសាមីខ្លួននិងព្រះជាម្ចាស់។»
ក្រុមគ្រួសារបព្វជិតានេះ មានទិសដៅសំខាន់គឺប្រកាសដំណឹល្អដល់អ្នកដទៃឲ្យស្គាល់ព្រះជាម្ចាស់ តាមរយៈការងារអប់រំទាំងជំនឿនិងចំណេះដឹងទូទៅនៅក្នុងព្រះសហគមន៍ ការរស់នៅជីវិតជាអ្នកបួស និងកិច្ចការងារសហការផ្សេងៗជាមួយលោកបូជាចារ្យតាមតំបន់ដែលសមាជិករស់នៅ។
ដូនជីក្លារ៉ា ឃាន កញ្ញា ដែលទើបនឹងថ្វាយសច្ចាដំបូង បានប្រាប់ថា ដំណើរនៃជីវិតអ្នកបួសរបស់គាត់ មានឧបសគ្គធំបំផុតមួយ គឺមើលថែរក្សាយាយតាជរា។
ប៉ុន្តែដោយសេចក្តីស្រឡាញ់ចំពោះជីវិតជាអ្នកបួស ការអធិដ្ឋានផ្ទាល់ខ្លួន និងគ្រីស្តបរិស័ទ «នាំឲ្យខ្ញុំមានកំលាំងអាចបន្តទៅមុខបាន។» ដូនជីដែលជាកូនកំព្រាឪពុកម្តាយតាំងពីកុមារភាពរូបនេះបន្ថែមថា គាត់បានត្រៀមខ្លួនរួចជាស្រេចដើម្បីបម្រើព្រះជាម្ចាស់ដោយសេចក្តីស្រឡាញ់ និងអស់ពីសមត្ថភាព។
រីឯដូនជីក្លារ៉ា ដូត ស្រីឡៃ ជាដូនជីថ្មីដែរនោះ បានឲ្យដឹងដែរថា ថ្ងៃនេះ គាត់មានអំណរសប្បាយយ៉ាងខ្លាំងដែលក្តីស្រមៃចង់ក្លាយជាអ្នកបម្រើព្រះសហគមន៍ក្នុងឋានៈជាអ្នកបួស ជាអ្នកក្រីក្រ អ្នកស្តាប់បង្គាប់ និងរស់នៅជាព្រហ្មចារី បានកើតជារូបរាង។
ដូនជីស្រីឡៃបន្ថែមថា «ខ្ញុំនឹងត្រៀមខ្លួន ត្រៀមចិត្ត គំនិត ដើម្បីចូលរួមបំពេញបេសកកម្មរបស់ព្រះយេស៊ូ ដើរតាមគំរូរបស់ព្រះអង្គ គឺមានតែការលះបង់ និងការថ្វាយជីវិតទៅព្រះអង្គ។»
អ្នកស្រីអ៊ាង ម៉ាច អាយុ៥៨ឆ្នាំ ជាពុទ្ធបរិស័ទ និងជាម្តាយរបស់ដូនជីដូតស្រីឡៃ និយាយថា កាលពីដំបូង អ្នកស្រីក៏ធ្លាប់ឃាត់កូនរបស់គាត់មិនឲ្យចូលបួស ប៉ុន្តែដោយចិត្តស្រឡាញ់របស់កូន អ្នកស្រីក៏យល់ព្រម ព្រោះដឹងថា ជីវិតអ្នកបួសគឺជាផ្លូវល្អមួយ៕
កែវ កញ្ញា
