អភិបូជាអគ្គសញ្ញាលាបថ្ងាស
នៅព្រះសហគមន៍សន្តយ៉ូសែប ផ្សារតូច
ភ្នំពេញខាងជើង ថ្ងៃទី១២ ខែកក្កដា ឆ្នាំ២០២៦
“ពូជនៃព្រះបន្ទូល និងជីវិតគ្រួសារដ៏វិសុទ្ធ”
| អត្ថបទទី១៖ អេសាយ ៥៥,១០-១១ពាក្យដែលចេញពីមាត់របស់យើងនឹងមិនវិលត្រឡប់មករកយើងវិញឡើយ។ អស ៥៥,១១អត្ថបទទី២៖ រ៉ូម ៨,១៨-២៣ទទួលព្រះអំណោយទានដំបូងរបស់ព្រះវិញ្ញាណ។ រម ៨,២៣ដំណឹងល្អ៖ ម៉ាថាយ ១៣, ១-២៣អ្នកណាមានហើយ ព្រះជាម្ចាស់នឹងប្រទានថែមទៀត។ មថ ១៣,១២ |
បងប្អូនជាទីស្រឡាញ់!
ថ្ងៃនេះ យើងសប្បាយចិត្តដែលមានបងប្អូនយើងមួយចំនួនទទួលអគ្គសញ្ញាលាបថ្ងាស គឺព្រះវិញ្ញាណដ៏វិសុទ្ធយាងមក។ ឆ្នាំនេះ បុណ្យព្រះវិញ្ញាណដ៏វិសុទ្ធយាងមក ជាលើកទីមួយដែលខ្ញុំជាអត់បាននៅ ព្រោះត្រូវចូលរួមនៅក្នុងដំណើរសួរសុខទុក្ខសម្តេចប៉ាប។ ខ្ញុំបានអធិដ្ឋាននៅលើផ្នូរសន្តសិលា សន្តប៉ូល នៅពេលហ្នឹងខ្ញុំបានអធិដ្ឋានយ៉ាងពិសេសនៅក្នុងវិសាលវិហារសន្តសិលានៅទីក្រុងរ៉ូម។ ដោយនឹកឃើញថា ព្រះសហគមន៍របស់យើងនៅក្នុងពិភពលោកទាំងមូល ទៅជាព្រះសហគមន៍តែមួយ ដោយសារព្រះវិញ្ញាណដ៏វិសុទ្ធ។ ពេលព្រះវិញ្ញាណដ៏វិសុទ្ធយាងមក គឺអ្នកទាំងអស់ដែលចូលរួមសម្រាប់ពិធីបុណ្យហាសិប នៅក្នុងសាសនាយូដាដែលមកពីប្រទេសផ្សេងៗ នៅពេលលោកសិលាចេញចាប់ផ្ដើមធម្មតេសនា ដើម្បីប្រកាសថាពិតមែនព្រះយេស៊ូសោយទិវង្គត ក៏ប៉ុន្តែព្រះយេស៊ូមានព្រះជន្មរស់ឡើងវិញ និងគង់នៅជាមួយយើងសព្វថ្ងៃ។ ទាំងអស់គ្នាគេស្ដាប់បាន ដោយបង្ហាញថានៅក្នុងព្រះវិញ្ញាណដ៏វិសុទ្ធ យើងមកពីណាក៏ដោយ យើងជាជនជាតិណាក៏ដោយ យើងជាព្រះសហគមន៍កាតូលិកតែមួយ យើងជាក្រុមគ្រួសារតែមួយ ដឹកនាំដោយសម្តេចប៉ាប រួមជាមួយគ្នាយើងធ្វើដំណើរនៅក្នុងសេចក្តីសុខ និងសុខដុមរមនា។
ថ្ងៃនេះនៅក្នុងអត្ថបទទីពីរ “ទុក្ខលំបាកនាបច្ចុប្បន្នកាល ពុំអាចប្រៀបផ្ទឹមនឹងសិរីរុងរឿងដែលព្រះជាម្ចាស់នឹងសម្តែងឲ្យយើងឃើញនៅអនាគតកាលនោះបានឡើយ”។ បងប្អូនជាទីស្រឡាញ់ នៅពេលយើងមើលជីវិតរបស់យើង ទុក្ខលំបាកក៏មាន នៅពេលយើងមើលពិភពលោករបស់យើងសព្វថ្ងៃ ក៏មានទុក្ខលំបាកយ៉ាងច្រើន។ ជាពិសេសតាមរយៈសង្គ្រាម តាមរយៈការខ្វះម្ហូបអាហារ តាមរយៈជំងឺនានា…។ ប៉ុន្តែ បងប្អូនជាទីស្រឡាញ់យើងដឹងថា ទុក្ខលំបាកដែលយើងមើលឃើញសព្វថ្ងៃ មិនអាចប្រៀបធៀបនឹងសិរីរុងរឿងដែលយើងនឹងទទួលបាននៅថ្ងៃអនាគតជាមួយព្រះជាម្ចាស់នៅស្ថានបរមសុខ។ នេះណែនាំឲ្យយើងពោរពេញដោយសេចក្តីសង្ឃឹម ណែនាំឲ្យយើងនឹកឃើញថា ជីវិតរបស់យើងជាគ្រីស្តបរិស័ទនៅលើផែនដីនេះ ទោះបីយើងឆ្លងទុក្ខលំបាក ឆ្លងគ្រោះអាសន្ន យើងដឹងថាយើងមានសេចក្តីសង្ឃឹមជាផ្លូវមួយ ដែលព្រះយេស៊ូបានបើក។ សេចក្តីសង្ឃឹមនេះ យើងមានសាក្សីពីរនាក់យ៉ាងពិសេស គឺ លូវីស និង ហ្សេលី ម៉ាតាំង ជាប្តីប្រពន្ធដែលព្រះសហគមន៍បានទទួលស្គាល់ជាសន្តសន្តីទាំងពីររួមជាមួយគ្នា។
លូវីស និងហ្សេលី ម៉ាតាំង បានប្រទានកូនស្រីម្នាក់គឺ តេរេសា ជាបងស្រីសម្ងាត់នៅក្នុងអារាមកាម៉ែល។ តេរេសា បានទៅជាសន្តីតេរេសានៃព្រះកុមារយេស៊ូ ដែលសព្វថ្ងៃគេគោរព គេស្រឡាញ់ពេញពិភពលោកទាំងមូល។ គ្រួសារដ៏វិសុទ្ធនេះ ណែនាំឲ្យយើងមើលឃើញពាក្យប្រស្នារបស់ព្រះយេស៊ូដែលយើងស្ដាប់នៅថ្ងៃនេះ។ ព្រះយេស៊ូបង្ហាញថា យើងសាបព្រោះព្រះបន្ទូលនៅលើផែនដីទាំងមូល។ ផែនដីទាំងមូល ជាចម្ការមួយដ៏ធំ ហើយព្រះបន្ទូលជាពូជដែលទៅលើផ្លូវ លើថ្ម លើបន្លា លើដីល្អ ហើយណែនាំឲ្យយើងបង្កើតផលតាមអ្វីដែលយើងទទួលនៅក្នុងខ្លួនរបស់យើង។ បងប្អូនជាទីស្រឡាញ់ នៅពេលយើងមើលឃើញព្រះបន្ទូលដែលធ្លាក់នៅលើបន្លា នេះជាការពិតនៅក្នុងពេលវេលាបច្ចុប្បន្ននេះ។ ប៉ុន្មានដងប៉ុន្មានសារ ព្រះបន្ទូលរបស់ព្រះយេស៊ូបានទៅក្នុងដួងចិត្តរបស់យើងនៅលើលោកីយ៍នេះ ក៏ប៉ុន្តែលោកីយ៍នេះមិនទទួល។ ដោយសារ លោកីយ៍នេះជួនកាលរវីរវល់ និងរត់តាមទ្រព្យសម្បត្តិ តាមសេចក្តីសុខសាន្តក្នុងលោកីយ៍។ ដែលយល់ថា ប្រសិនបើយើងមានទ្រព្យសម្បត្តិច្រើន មានលុយច្រើន ផ្ទះមួយស្អាត… ខ្ញុំពោរពេញដោយសេចក្តីសុខ។ ប៉ុន្តែ បងប្អូនជាទីស្រឡាញ់ទ្រព្យសម្បត្តិទាំងនេះ ជាទ្រព្យសម្បត្តិដែលមិនស្ថិតស្ថេរទេ។ ជាទ្រព្យសម្បត្តិដែលណែនាំឲ្យយើងអាចវង្វេង ណែនាំឲ្យយើងមានចិត្តលោភលន់ ចិត្តច្រណែន ណែនាំឲ្យយើងរកមិនឃើញសុខដុមរមនានៅក្នុងដួងចិត្តរបស់យើង។ ជាសេចក្តីសុខសាន្ត ដែលណែនាំឲ្យថ្ងៃណាមួយទៅជាសេចក្តីសុខសាន្តដ៏ស្ងួត ស្វិត រាំង បាត់បង់អ្វីៗទាំងអស់។
នៅពេលយើងមើល លូវីស ដែលជាអ្នកជួសជុលនាឡិកា ហ្សេលី ដែលជាជាងកាត់ដេរ យើងមើលឃើញប្តីប្រពន្ធមួយគូរដែលមិនរត់តាមទ្រព្យសម្បត្តិ។ ប៉ុន្តែ ដែលយកចិត្តទុកដាក់ធ្វើការពីមួយថ្ងៃទៅមួយថ្ងៃ យកចិត្តទុកដាក់ចិញ្ចឹមគ្រួសារផ្ទាល់ គឺកូនស្រីប្រាំនាក់ (តែកូនបួននាក់បានទទួលមរណភាពតាំងពីទារក)។ យើងមើលឃើញគ្រួសារដែលបានតស៊ូនៅក្នុងទុក្ខលំបាកនៃជីវិតប្រចាំថ្ងៃ ប៉ុន្តែភាពអស់កម្លាំងរបស់គេដោយសារការងារ ដោយសារគ្រប់គ្រងគ្រួសារ គឺជាការអស់កម្លាំងដែលគេផ្ញើទៅលើព្រះជាម្ចាស់ ដើម្បីទទួលសេចក្តីសុខជាមួយព្រះជាម្ចាស់។ ថ្ងៃអាទិត្យ គ្រួសាររបស់លូវីស និងហ្សេលី អត់ធ្វើការទេ គេគោរពព្រះបន្ទូលរបស់ព្រះជាម្ចាស់។ ថ្ងៃអាទិត្យ គេដឹងថាជាថ្ងៃរបស់ព្រះជាម្ចាស់ពិតមែន គេបិទហាងដើម្បីទៅព្រះវិហារ ដើម្បីអធិដ្ឋាន ដើម្បីស្វាគមន៍អ្នកក្រីក្រនៅក្នុងផ្ទះរបស់គេ ដើម្បីលើកតម្កើងសិរីរុងរឿងរបស់ព្រះជាម្ចាស់។ បងប្អូនជាទីស្រឡាញ់ នៅពេលយើងមើលឃើញព្រះបន្ទូលដែលចូលនៅក្នុងបន្លានៃសង្គមបច្ចុប្បន្ននេះ នៅក្នុងបន្លានៃទ្រព្យសម្បត្តិដែលអត់ប្រយោជន៍ យើងអធិដ្ឋានតាមរយៈលូវីស និងហ្សេលី ម៉ាតាំង ដើម្បីឲ្យព្រះជាម្ចាស់ទៅជាអាទិភាពនៅក្នុងជីវិតរបស់យើង ដើម្បីឲ្យទ្រព្យសម្បត្តិដ៏គ្មានតម្លៃទៅជាព្រះរាជ្យរបស់ព្រះជាម្ចាស់ ដែលយើងស្វែងរកពីមួយថ្ងៃទៅមួយថ្ងៃនៅក្នុងជីវិតរបស់យើង។ នៅពេលយើងទទួលព្រះវិញ្ញាណដ៏វិសុទ្ធ យើងទទួលព្រះអំណោយទានមួយយ៉ាងពិសេស គឺគោរពកោតខ្លាចព្រះជាម្ចាស់។ នៅក្នុងព្រះអំណោយទានទាំងប្រាំពីរមានមួយ គឺគោរពកោតខ្លាចព្រះជាម្ចាស់ ដោយដឹងថាព្រះជាម្ចាស់ជាអាទិភាពនៅក្នុងជីវិតរបស់យើង។ ដូច្នេះ កុំឲ្យព្រះបន្ទូលរបស់ព្រះអង្គបាត់បង់កម្លាំងដើម្បីដុះឡើង ដោយសារការរវីរវល់នឹងលោកីយ៍ ការរវីរវល់នឹងទ្រព្យសម្បត្តិ ការរវីរវល់នឹងចិត្តលោភលន់ និងភាពអាត្មានិយម ឲ្យយើងមើលឃើញពិតមែនព្រះបន្ទូលរបស់ព្រះជាម្ចាស់ណែនាំឲ្យយើងមានជីវិតដ៏ពេញលក្ខណៈ។
បងប្អូនជាទីស្រឡាញ់ នៅពេលយើងមើលឃើញព្រះបន្ទូលរបស់ព្រះជាម្ចាស់ជាពូជដែលធ្លាក់នៅលើផ្លូវដែលមានថ្មយ៉ាងច្រើន។ ជាពេលវេលាដែលព្រះបន្ទូលអត់មានសមត្ថភាពដើម្បីចាក់គ្រឹះ ដោយសារថ្មទៅជារបៀបដែលរារាំងគ្រឹះហ្នឹង។ ប៉ុន្តែ យើងដឹងថានៅក្នុងអំណរសប្បាយរបស់ព្រះជាម្ចាស់ ទោះបីយើងមានឧបសគ្គ មានទុក្ខលំបាកនៅក្នុងជីវិត ពេលយើងមើលឃើញអនាគតរបស់យើង គឺសិរីរុងរឿងដ៏ពេញលក្ខណៈ។ ដូច្នេះ កុំឲ្យថ្មដែលមាននៅក្នុងដួងចិត្ត នៅក្នុងបេះដូងរបស់យើង ទៅជាទុក្ខលំបាកសម្រាប់យើង។ ផ្ទុយទៅវិញ ឲ្យយើងធ្វើដូចម្តេចដើម្បីឲ្យព្រះបន្ទូលចាក់គ្រឹះដ៏ជ្រៅ កុំឲ្យថ្មនានារំខានយើង។ អ្នកណាក៏មានថ្មនៅក្នុងជីវិត ប៉ុន្តែកុំឲ្យថ្មនេះរារាំងសេចក្តីសង្ឃឹមរបស់យើង។ មើលក្រុមគ្រួសារលូវីស និងហ្សេលី ម៉ាតាំង តាមពិតគេរងទុក្ខលំបាកយ៉ាងច្រើន។ ហ្សេលី គាត់បានបាត់បង់កូនបួននាក់ដែលទទួលមរណភាពភ្លាមៗនៅពេលគេកើត ហ្សេលី គាត់មានជំងឺមហារីក ហើយស្លាប់ទាំងវ័យក្មេង នៅពេលនោះ តេរេសា អាយុតែប្រាំឆ្នាំ បានក្លាយទៅជាកុមារកំព្រា។ លូវីស ជាឪពុកដែលស្រឡាញ់កូន នៅពេលចុងក្រោយនៃជីវិតរបស់គាត់ គាត់ចាប់ផ្តើមវង្វេងស្មារតី។ ប៉ុន្តែ ទោះបីមានទុក្ខលំបាកនៅក្នុងជីវិត គេដឹងថាជំនឿរបស់គេបានស៊ីជម្រៅនិងជីវិតរបស់គេផ្ទាល់ ដោយសារបានអធិដ្ឋាន បានចូលព្រះវិហាររាល់ថ្ងៃ និងទទួលអគ្គសញ្ញាគ្រប់ពេលវេលា។
បងប្អូនជាទីស្រឡាញ់ សព្វថ្ងៃសម្រាប់ព្រះសហគមន៍របស់យើង ដែលឆ្លងទុក្ខលំបាកយ៉ាងច្រើន ព្រះសហគមន៍ដែលបាត់បង់អ្វីៗទាំងអស់នៅក្នុងឆ្នាំ១៩៧៥។ ព្រះសហគមន៍ដែលបានចាប់ផ្តើមរស់ឡើងវិញ ឲ្យយើងបន្តចាក់ឫសយ៉ាងជ្រៅនៅក្នុងទឹកដីរបស់យើង នៅក្នុងជីវិតរបស់យើងដោយអធិដ្ឋាន ដោយស្រឡាញ់ព្រះជាម្ចាស់ ដោយស្រឡាញ់បងប្អូនឯទៀតៗ។ ដោយដឹងថា ទុក្ខលំបាកដែលយើងទទួលនៅក្នុងជីវិតរបស់យើង មិនមែនជាទីបញ្ចប់នៃជីវិតរបស់យើង ទុក្ខលំបាកនេះជាសញ្ញាសម្គាល់នៅពេលអនាគតយើងមានសិរីរុងរឿងជាមួយព្រះជាម្ចាស់។ នេះជារបៀបដែល លូវីស និងហ្សេលី បានធ្វើដំណើរនៅក្នុងការតស៊ូ នៅក្នុងការទទួលទុក្ខលំបាកដែលគេមានពីមួយថ្ងៃទៅមួយថ្ងៃ។ ប៉ុន្តែ ដោយថែរក្សាសេចក្តីសង្ឃឹមជានិច្ច ដោយដឹងថាថ្មនីមួយៗមិនណែនាំឲ្យជីវិតរបស់គេបាត់បង់ឡើយ។ ផ្ទុយទៅវិញ ថ្មនីមួយៗទៅជារបៀបដើម្បីភ្ជាប់នឹងព្រះហឫទ័យស្រឡាញ់របស់ព្រះជាម្ចាស់ថែមទៀត។
ចុងក្រោយ សាបព្រោះគ្រាប់នៃព្រះបន្ទូលនៅក្នុងដីដ៏ល្អប្រសើរបំផុត ដែលណែនាំឲ្យមានផលច្រើន ណែនាំឲ្យជីវិតរបស់យើងពោរពេញដោយកម្លាំង ដោយសេចក្តីស្រឡាញ់ដ៏ពេញលក្ខណៈ។ តាមពិត លូវីស និងហ្សេលី បានទទួលផ្លែមួយដ៏ពិសេស ដោយគេមិនបានដឹងនៅពេលរស់នៅលើផែនដីនេះ។ គេស្រឡាញ់ថែរក្សាគ្រួសារ ជាប្តីប្រពន្ធដែលស្រឡាញ់កូន ណែនាំកូនឲ្យស្រឡាញ់ព្រះជាម្ចាស់ ហើយផលផ្លែដ៏ពិសេសដែលគេទទួលបាន គឺសព្វថ្ងៃយើងគោរព លូវីស និងហ្សេលី នៅលើអាសនៈទូទាំងពិភពលោកទាំងមូល។ នេះជាផលផ្លែដែលយើងមើលឃើញ ជាផ្លែដែលគេមើលឃើញនៅស្ថានបរមសុខ។ សន្តីតេរេសានៃព្រះកុមារយេស៊ូ ជាសន្តីម្នាក់ដែលបានណែនាំឲ្យយើងទទួលផ្លូវថ្មីដើម្បីដឹកនាំជីវិតរបស់យើង គឺសេចក្តីស្រឡាញ់របស់ព្រះយេស៊ូ។ ព្រះហស្តរបស់ព្រះយេស៊ូ ដូចជាជណ្ដើរយន្តដែលណែនាំឲ្យយើងឡើងទៅស្ថានបរមសុខ លុះត្រាតែយើងលះបង់ផលប្រយោជន៍ផ្ទាល់ខ្លួន លុះត្រាតែយើងយល់ថាព្រះយេស៊ូជាអាទិភាពនៃជីវិតរបស់យើង។ សេចក្តីស្រឡាញ់ដែលយើងទទួលពីព្រះជាម្ចាស់ ជាកម្លាំងដ៏អស្ចារ្យដែលណែនាំឲ្យយើងទៅមុខ។
បងប្អូនជាទីស្រឡាញ់ ថ្ងៃនេះដែលយើងទទួលព្រះវិញ្ញាណដ៏វិសុទ្ធរួមជាមួយគ្នាតាមរយៈបេក្ខជនរបស់យើង យើងមើលឃើញផលនៃព្រះវិញ្ញាណដ៏វិសុទ្ធនៅក្នុងជីវិតរបស់យើង។ យើងទូលអង្វរព្រះអង្គ ដូចសន្តលូវីស សន្តីហ្សេលី ម៉ាតាំង សន្តីតេរេសា និងក្រុមគ្រួសារដ៏វិសុទ្ធព្រះយេស៊ូ ព្រះនាងម៉ារី និងសន្តយ៉ូសែប ឲ្យយើងខិតខំយកចិត្តទុកដាក់ដើម្បីរស់នៅក្នុងជីវិតរបស់យើងធម្មតា នៅក្នុងទុក្ខលំបាកដែលយើងមានធម្មតា នៅក្នុងអំណរសប្បាយដែលយើងមានដែរ ឲ្យយើងខិតខំរស់នៅជាមួយព្រះជាម្ចាស់ ដែលណែនាំឲ្យជីវិតរបស់យើងភ្លឺស្វាងនៅក្នុងរបៀបពិសេស។ ឲ្យយើងចាក់គ្រឹះយ៉ាងជ្រៅនៅក្នុងព្រះបន្ទូលរបស់ព្រះយេស៊ូ នៅក្នុងជីវិតអធិដ្ឋាន នៅក្នុងទំនាក់ទំនងជាមួយព្រះជាម្ចាស់ផ្ទាល់ នៅក្នុងទំនាក់ទំនងជាមួយព្រះជាម្ចាស់ តាមរយៈបងប្អូនឯទៀតៗ។ នេះជាផ្លែដែលយើងអាចទទួលសម្រាប់យើង សម្រាប់ព្រះសហគមន៍របស់យើង។ យើងអរព្រះគុណព្រះជាម្ចាស់ យើងទូលអង្វរព្រះអង្គដើម្បីឲ្យថ្ម បន្លាដែលត្រូវមាន មិនមែនទៅជាឧបសគ្គ តែផ្ទុយទៅវិញគ្រប់ទុក្ខលំបាក ណែនាំឲ្យយើងចាប់ផ្តើមមើលឃើញសិរីរុងរឿងរបស់ព្រះជាម្ចាស់ ឲ្យយើងចាប់ផ្តើមស្គាល់ជីវិតអស់កល្បជានិច្ច។
+ លោកអភិបាល អូលីវីយ៉េ ជ្មីតហស្លេ
អភិបាលព្រះសហគមន៍កាតូលិកកម្ពុជា
ភូមិភាគភ្នំពេញ
