បងស្រី រេជីន ម៉ារី ង្វៀន ធី ជៀវ (Régine-Marie NGUYỄN THỊ CHIÊU) ជាដូនជីនៃក្រុមបងស្រីឧបការគុណ បានទទួលមរណភាពកាលពីវេលាម៉ោង ២៣:៤៥ នាទីយប់ ថ្ងៃព្រហស្បតិ៍ ទី២៩ ខែតុលា ឆ្នាំ២០២៦ នៅផ្ទះថែទាំចាស់ជរា Cù Lao Giêng នៃក្រុមបងស្រីឧបការគុណក្នុងប្រទេសវៀតណាម ក្នុងជន្មាយុ ៨៣ ឆ្នាំ និង៦៩ ឆ្នាំ ក្នុងជីវិតបព្វជិតា។
បងស្រី រេជីន ម៉ារី កើតនៅថ្ងៃទី២៣ ខែមីនា ឆ្នាំ១៩៤៣ នៅខេត្តកណ្តាល ប្រទេសកម្ពុជា។ បងស្រីបានចូលក្រុមបងស្រីឧបការគុណនៅឆ្នាំ១៩៥៨ និងបានថ្វាយសច្ចានិរន្តរ៍នៅឆ្នាំ១៩៦៨ ដោយបានលះបង់ពេញមួយជីវិតរបស់គាត់បម្រើព្រះជាម្ចាស់ និងប្រជាពលរដ្ឋទាំងនៅក្នុងប្រទេសកម្ពុជា និងប្រទេសវៀតណាម។
នៅក្នុងដំណើរជីវិតបេសកកម្ម បងស្រីត្រូវបានចាត់ទៅកាន់ខេត្តកំពង់ឆ្នាំងកាលពីថ្ងៃទី១៧ ខែធ្នូ ឆ្នាំ២០០២។ ពេលមកដល់ដំបូង បងស្រីបានស្នាក់នៅក្នុងបន្ទប់តូចមួយក្រោមដំបូលព្រះវិហារចាស់ ក្រុងកំពង់ឆ្នាំង។ ដោយក្តីអាណិតស្រឡាញ់ និងការមើលឃើញពីភាពក្រីក្ររបស់កុមារនៅតំបន់ផ្សារក្រោម នៅឆ្នាំ២០០៤ បងស្រីបានចាប់ផ្តើមប្រមូលកុមារតាមភូមិ និងលើទូកនានាមកបង្រៀនអក្សរ។ ពីថ្នាក់រៀនតូចមួយដែលមានកុមារត្រឹមតែ ៤ ទៅ ៥ នាក់ បានពង្រីករហូតដល់ថ្នាក់ទី១ ដល់ទី៣ ភាសាខ្មែរ ដែលមានកូនសិស្សជិត ១០០ នាក់។ ថ្នាក់រៀនដែលបងស្រីបានកសាងឡើងដោយការអត់ធ្មត់នេះ បានក្លាយជាគ្រឹះដ៏សំខាន់ឈានទៅរកការសាងសង់សាលាបឋមសិក្សាថ្មីនៅផ្សារក្រោមក្នុងឆ្នាំ២០០៩។ ក្រៅពីការបង្រៀន បងស្រីតែងតែចុះសួរសុខទុក្ខ ចែករំលែកអាហារដល់គ្រួសាររស់នៅលើផ្ទះបណ្តែតទឹក និងបង្រៀនអប់រំជំនឿតាមផ្ទះជាប្រចាំ។
ពិធីបុណ្យសពរបស់បងស្រីរេជីន ម៉ារី ប្រព្រឹត្តទៅនៅវិហារនៅផ្ទះថែទាំចាស់ជរា Cù Lao Giêng នៅវៀតណាម ដោយពិធីទទួលសពបានធ្វើឡើងនៅព្រឹកថ្ងៃទី៣០ ខែតុលា ឆ្នាំ២០២៦ ហើយពិធីដង្ហែសព និងអភិបូជាបុណ្យសពនឹងប្រព្រឹត្តទៅនៅព្រឹកថ្ងៃសៅរ៍ ទី៣១ ខែតុលា ឆ្នាំ២០២៦។
ការចាកចេញរបស់បងស្រីរេជីន ម៉ារី បន្សល់ទុកនូវសេចក្តីអាឡោះអាល័យយ៉ាងជ្រាលជ្រៅ ប៉ុន្តែក្តីមេត្តាករុណា និងស្នាដៃនៃការអប់រំដែលបងស្រីបានបណ្តុះដល់កុមារក្រីក្រនៅកំពង់ឆ្នាំង នឹងបន្តស្ថិតនៅក្នុងការចងចាំជានិច្ច៕
ដោយ លី សុវណ្ណា
