សិក្ខាកាមជាង២០នាក់ មកពីតំបន់ផ្សេងៗក្នុងភូមិភាគភ្នំពេញ ដែលជាគ្រូអប់រំជំនឿ បានចូលរួមកម្មវិធីសិក្ខាសាលារយៈពេល៣ថ្ងៃ ពីរថ្ងៃទី១-៣ ខែតុលា នៅព្រះសហគមន៍សន្តសិលានិងសន្តប៉ូលភ្នំពេញថ្មីនារាជធានីភ្នំពេញ ដែល សម្របសម្រួលដោយការិយាល័យអប់រំជំនឿកាតូលិកកម្ពុជា សន្តអ៊ីរ៉េណេ។
លោក កាន់ ប៊ុយ ជានាយកមណ្ឌលអប់រំជំនឿកាតូលិកកម្ពុជាបានឲ្យដឹងថា សិក្ខាសាលានេះណែនំាដោយលោកបូជាចារ្យ យ៉ូសែប បេពេ ពីក្រុមសហជីវិនព្រះយេស៊ូ ហើយកម្មវិធីនេះ ចង់បង្ហាញឲ្យសិក្ខាកាមដែលជាក្រុមគ្រូអប់រំជំនឿបានយល់គោលការណ៍១០យ៉ាងរបស់ដំណឹងល្អដែលយើងសព្វថ្ងៃបានទទួល ហើយយកវាមកនិទានដើម្បីឲ្យអ្នកជំនាន់ក្រោយបានដឹង។
លោកថា ល្ខោនចិត្តសាស្រ្តព្រះគម្ពីរ (Biblical Psychodrama) គឺជាវិធីសាស្ត្រមួយដ៏សំខាន់បំផុតក្នុងការប្រកាសដំណឹងល្អដំបូង (Kerygma) ទៅកាន់អស់អ្នកដែល “នៅឆ្ងាយ”។ ល្ខោននេះសង្កត់ធ្ងន់ថា ត្រូវយល់ដឹងអំពីអត្ថបទព្រះគម្ពីរ ដោយស្វែងរកអ្វី ដែលជាការពិតសម្រាប់ជីវិតយើង ពោលគឺ ឱ្យមានទំនាក់ទំនងរវាងតួអង្គនីមួយៗនៃព្រះគម្ពីរ នឹងអស់អ្នកដែលចូលរួមក្នុងឈុតឆាកណាមួយ។
លោកបន្ថែមថា ល្ខោនចិត្តវិទ្យាព្រះគម្ពីរអញ្ជើញយើងឱ្យយល់ដឹងពីអត្ថបទព្រះគម្ពីរថា ជារឿងរ៉ាវរបស់មនុស្សពិតប្រាកដ។
លោក កាន់ ប៊ុយ រំពឹងថា គ្រូអប់រំនឿទាំងអស់នឹងទទួលបានគរុកោសល្យច្បាស់ជាងមុន ក្នុងការចែករំលែកព្រះគម្ពីរទៅកាន់អ្នកឈ្វេងយល់កាន់តែល្អ និងស៊ីជម្រៅបន្ថែមទៀត ហើយនឹងអាចជំរុញឲ្យមានការឈ្វេងយល់និងព្យាយាមអាន ឬស្តាប់ការចែករំលែកព្រះគម្ពីរបានច្រើនជាងមុន ដើម្បីឲ្យព្រះបន្ទូលបានជ្រាបចូលជ្រៅទៅក្នុងជីវិតរបស់ម្នាក់ៗ និងជួយព្យាបាលរបួសស្នាម និងអំពើបាបជាច្រើនជំពូករបស់មនុស្ស។
ក្នុងកម្មវិធីរយៈពេលបីថ្ងៃនេះ សិក្ខាកាមទាំងអស់បានចែករំលែកអំពីបទពិសោធនៃការអប់រំជំនឿឲ្យគ្នា និងអនុវត្តមេរៀនដោយធ្វើត្រាប់តាមតួអង្គក្នុងព្រះគម្ពីរ និងរិះគិតអំពីអត្ថន័យក្នុងព្រះគម្ពីរជាដើម ដែលធ្វើឲ្យពួកគេយល់ថា ព្រះគម្ពីរនៅជិតនឹងស្ថានភាពជីវិតរបស់មនុស្សប្រុសស្រីគ្រប់សម័យកាល រួមទាំងសម័យបច្ចុប្បន្នផងដែរ។
ដូនជី ហ្វូស្ទីណា ម៉ារី នារី មកពីក្រុមគ្រួសារឧបការគុណ និងជាសិក្ខាកាមមួយរូបបានឲ្យដឹងថា កម្មវិធីពិតជាប្លែង និងល្អខ្លាំងណាស់ ព្រោះវានាំឲ្យតួអង្គចេញពីក្នុងព្រះគម្ពីរចូលទៅក្នុងជីវិតយើងផ្ទាល់តែម្តង។ មិនត្រឹមតែប៉ុណ្ណោះ យើងបានយល់ច្បាស់អំពីអត្ថន័យនៃសេចក្តីស្រឡាញ់ដែលកប់យ៉ាងជ្រៅនៅក្នុងព្រះគម្ពីររបស់ព្រះជាម្ចាស់ចំពោះមនុស្សគ្រប់គ្នា។
ដូនជីរូបនេះបន្តទៀតថា សិក្ខាសាលរយៈពេល៣ថ្ងៃនេះ បានបង្ហាញឲ្យយើងឃើញយ៉ាងច្បាស់អំពីវត្តមានរបស់ព្រះយេស៊ូ ដែលទ្រង់តែងគង់នៅផ្ទាល់ជាមួយពួកយើងតាមរយៈកិច្ចការផ្សេងៗ។
ចំណែកលោក សូ វ៉ាន់នី ជាសិស្សទស្សនវិទ្យនៃទេវវិទ្យាល័យកាតូលិកកម្ពុជាប្រាប់ថា នេះជាបទពិសោធមួយថ្មីទៀត ដើម្បីជាផ្លូវក្នុងការសិក្សាអំពីព្រះគម្ពីរឲ្យកាន់តែស៊ីជម្រៅ។
លោកបន្ថែមថាការអាន ការស្តាប់ ការចែករំលែកអំពីព្រះគម្ពីរពីលោកបូជាចារ្យ បានជួយដល់ជីវិតយើងជាប្រចាំថ្ងៃក្នុងការសម្រេចចិត្តធ្វើអ្វីមួយ ឬក៏រកដំណោះស្រាយអ្វីមួយ ជាពិសេសគឺផ្លូវវិញ្ញាណរបស់យើងផ្ទាសល់តែម្តង។ ជាក់ស្តែងព្រះគម្ពីរបានបង្ហាញអំពីការអស្ចារ្យ នៃការសង្គ្រោះរបស់ព្រះជាម្ចាស់ចំពោះមនុស្សគ្រប់គ្នា ដែលជំរុញឲ្យយើងជាអ្នកជឿ ទុកចិត្ត និងជឿជាក់លើព្រះអង្គជានិច្ច។
កញ្ញា ម៉ៅ សាវ៉េត ជាសិក្ខាកាមម្នាក់ទៀត បានលើកឡើងថា ជាង២០ឆ្នាំមកហើយដែលនាងបាន ធ្វើជាគ្រូអប់រំជំនឿ។ នាងថា ក្រោយចូលរួមកម្មវិធីនេះខ្លួនបានទទួលបច្ចេកទេសថ្មីមួយទៀតដើម្បីបង្រៀន ឬក៏ចែករំលែកទៅអ្នកឈ្វេងយល់កាន់ស៊ីជម្រៅ និងមិនធ្វើឲ្យពួកគាត់ធុញទ្រាន់ ផ្ទុយទៅវិញពួកនឹងអាច កាន់តែសប្បាយចិត្ត និងរបៀបថ្មីៗក្នុងររៀនសូត្រពីព្រះគម្ពីរ។
ដោយ ឆាក លាំង
