អត្ថបទទី១៖ សូមថ្លែងព្រះគម្ពីរវីរបុរស វរ ៦,១១-២៤

ទេវទូតរបស់ព្រះអម្ចាស់មកភូមិអូប្រា អង្គុយនៅក្រោមដើមជ្រៃដែលជាកម្មសិទ្ធិរបស់លោកយ៉ូស៊ូអា ជាសមាជិកនៃអំបូរអប៊ីយេស៊ែរ។ ពេលនោះ លោកកេដូនជាកូនរបស់លោកយ៉ូអាស កំពុងតែបោកបែនស្រូវក្នុងកន្លែងបញ្ជាន់ផ្លែទំពាំងបាយជូរ ដើម្បីកុំឱ្យជនជាតិ​ម៉ាឌីយ៉ានឃើញ។ ទេវទូតរបស់ព្រះអម្ចាស់បង្ហាញខ្លួនឱ្យលោកកេដូនឃើញ ហើយពោលថា៖ «វីរជនដ៏អង់អាចអើយ! សូមព្រះអង្គម្ចាស់គង់ជាមួយអ្នក!»។ លោកកេដូនឆ្លើយវិញថា៖ «លោកម្ចាស់! ប្រសិនបើព្រះអម្ចាស់គង់ជាមួយយើងខ្ញុំមែន ហេតុអ្វីក៏ទុក្ខវេទនាទាំងនេះកើតមានដល់យើងខ្ញុំដូច្នេះ? ឯណាទៅការអស្ចារ្យទាំងប៉ុន្មានដែលដូនតារបស់យើងខ្ញុំតែងតែដំណាលប្រាប់ ទាំងបញ្ជាក់ថា ព្រះអម្ចាស់បាននាំយើងខ្ញុំចេញពីស្រុកអេស៊ីបមកនោះ? ឥឡូវនេះ ព្រះអម្ចាស់បានបោះបង់ចោលយើងខ្ញុំ ហើយព្រះអង្គប្រគល់យើងខ្ញុំទៅក្នុងកណ្តាប់ដៃរបស់ជនជាតិម៉ាឌីយ៉ានហើយ!»។ ព្រះអម្ចាស់បែរមករកលោក ហើយមានព្រះបន្ទូលថា៖ «ចូរទៅសង្គ្រោះអ៊ីស្រា​អែលឱ្យរួចពីកណ្តាប់ដៃរបស់ជនជាតិម៉ាឌីយ៉ាន ដោយប្រើកម្លាំងដែលអ្នកមាន គឺយើងចាត់អ្នកឱ្យទៅ!»។ លោកកេដូនក៏ឆ្លើយ​ថា៖ «បពិត្រលោកម្ចាស់ ធ្វើដូចម្តេចឱ្យខ្ញុំប្របាទអាចសង្គ្រោះអ៊ីស្រាអែលបាន ដ្បិតនៅក្នុងកុលសម្ព័ន្ធម៉ាណាសេ អំបូររបស់ខ្ញុំប្របាទខ្សត់ខ្សោយជាងគេ ហើយក្នុងគ្រួសាររបស់ខ្ញុំប្របាទសោតទៀត ក៏ខ្ញុំប្របាទក្មេងជាងគេដែរ»។ ព្រះអម្ចាស់មានព្រះបន្ទូលមកលោកវិញ​ថា៖ «យើងនឹងស្ថិតនៅជាមួយអ្នក ហើយអ្នកនឹងប្រយុទ្ធជាមួយជនជាតិម៉ាឌីយ៉ាន ដូចប្រយុទ្ធជាមួយនឹងមនុស្សតែម្នាក់»។ លោក​កេដូនទូលតបថា៖ «ប្រសិនបើលោកម្ចាស់មេត្តាប្រោសដល់ខ្ញុំប្របាទមែន សូមផ្តល់ទីសម្គាល់មួយឱ្យខ្ញុំប្របាទដឹងថា លោកពិតជាព្រះអម្ចាស់ដែលកំពុងតែមានព្រះបន្ទូលមកខ្ញុំប្របាទមែន!។ សូមលោកម្ចាស់កុំអញ្ជើញទៅណា ចាំខ្ញុំប្របាទត្រឡប់មកវិញ ទាំងនាំ​យកម្ហូបអាហារមកជូនផង»។ ព្រះអម្ចាស់មានព្រះបន្ទូលថា៖ «យើងនឹងចាំនៅទីនេះរហូតដល់អ្នកត្រឡប់មកវិញ»។ លោកកេដូនក៏ចូលទៅក្នុងផ្ទះ យកកូនពពែមួយមករៀបចំធ្វើម្ហូប ព្រមទាំងម្សៅមួយថាំងមកធ្វើនំប័ុងឥតមេ។ លោកស្រង់សាច់ដាក់ក្នុងកញ្ច្រែង ហើយដួសទឹកសម្លដាក់ក្នុងចានមួយ រួចយកទៅជូនទេវទូតរបស់ព្រះអម្ចាស់នៅក្រោមដើមជ្រៃ។ ទេវទូតពោលមកលោកថា៖ «ចូរ​ដាក់សាច់ និងនំប័ុងឥតមេលើថ្មនេះ រួចចាក់ទឹកសម្លពីលើទៀតផង»។ លោក​កេដូនក៏ធ្វើតាម។ ទេវទូតរបស់ព្រះអម្ចាស់យកចុងដំបងដែលលោកកាន់ទៅពាល់​សាច់ និងនំប័ុងឥតមេ ពេលនោះ មានភ្លើងផុសចេញពីថ្ម ហើយឆេះសាច់ និង​នំប័ុង​អស់។ បន្ទាប់មក ទេវទូតរបស់ព្រះអម្ចាស់កំបាំងបាត់ទៅ។ ពេលនោះ លោក​កេដូនដឹងថា ជាទេវទូតរបស់ព្រះអម្ចាស់មែន លោកក៏ពោលថា៖ «វីវរហើយ! ព្រះជា​អម្ចាស់អើយ! ដ្បិតទូលបង្គំបានឃើញទេវទូតរបស់ព្រះអង្គផ្ទាល់ភ្នែកហើយ!»។ ព្រះ​អម្ចាស់មានព្រះបន្ទូលមកលោកថា៖ «សុំឱ្យអ្នកបានប្រកបដោយសេចក្តីសុខសាន្ត កុំខ្លាចអី្វ! អ្នកនឹងមិនស្លាប់ទេ!»។ លោកកេដូនសង់អាសនៈមួយថ្វាយព្រះអម្ចាស់ត្រង់​កន្លែងនោះ ហើយដាក់ឈ្មោះអាសនៈនេះថា៖ «ព្រះអម្ចាស់ប្រទានសេចក្តីសុខសាន្ត»។

ទំនុកតម្កើងលេខ ៨៥ (៨៤),៩.១១-១៤ បទកាកគតិ

ពិធីអបអរសាទរព្រះគម្ពីរដំណឹងល្អតាម ១ ករ ៨,៩

អាលេលូយ៉ា! អាលេលូយ៉ា!
ព្រះយេស៊ូគ្រីស្តដែលមានសម្បត្តិដ៏ច្រើន ទ្រង់ដាក់ខ្លួនធ្វើជាអ្នកក្រ ដើម្បីឱ្យយើងបានទៅជាអ្នកមានដោយភាពក្រីក្ររបស់ព្រះអង្គ។ អាលេលូយ៉ា!

សូមថ្លែងព្រះគម្ពីរដំណឹងល្អតាមសន្តម៉ាថាយ មថ ១៩,២៣-៣០

ព្រះយេស៊ូមានព្រះបន្ទូលទៅក្រុមសាវ័កថា៖ «ខ្ញុំសុំប្រាប់ឱ្យអ្នករាល់គ្នាដឹងច្បាស់ថា អ្នកមានពិបាកចូលទៅក្នុងព្រះរាជ្យនៃស្ថានបរមសុខណាស់!។ ខ្ញុំសុំប្រាប់អ្នករាល់គ្នា​ទៀតថា សត្វអូដ្ឋចូលតាមប្រហោងម្ជុលងាយជាងអ្នកមានចូលទៅក្នុងព្រះរាជ្យនៃ​ស្ថាន​បរមសុខទៅទៀត»។ កាលក្រុមសាវ័កឮដូច្នេះ គេងឿងឆ្ងល់យ៉ាងខ្លាំង ហើយពោលថា៖ «បើដូច្នេះ តើអ្នក​ណានឹងអាចទទួលការសង្រ្គោះបាន?»។ ព្រះយេស៊ូទតមើលគេ រួចមានព្រះបន្ទូលថា៖​ «ការនេះមនុស្សធ្វើពុំកើតទេ រីឯព្រះជាម្ចាស់វិញ អ្វីក៏ដោយ ក៏ព្រះអង្គធ្វើកើតទាំងអស់»។ ពេលនោះ លោកសិលាទូលព្រះអង្គថា៖ «ព្រះអង្គទតឃើញស្រាប់ហើយ យើងខ្ញុំលះ​បង់អ្វីៗទាំងអស់ដើម្បីមកតាមព្រះអង្គ។ តើយើងខ្ញុំនឹងទៅជាយ៉ាងណា?»។ ព្រះយេស៊ូ​​មានព្រះបន្ទូលទៅក្រុមសាវ័កថា៖ «ខ្ញុំសុំប្រាប់ឱ្យអ្នករាល់គ្នាដឹងច្បាស់ថា នៅក្នុងពិភព​ថ្មី ពេលបុត្រមនុស្សគង់លើបល្ល័ង្កប្រកបដោយសិរីរុងរឿង​ អ្នករាល់គ្នាដែលមកតាមខ្ញុំ​នេះ ក៏នឹងអង្គុយលើបល្ល័ង្កទាំងដប់ពីរដែរ ហើយគ្រប់គ្រងលើកុលសម្ព័ន្ធទាំងដប់ពីរនៃជនជាតិអ៊ីស្រាអែលទៀតផង។ អ្នកណាលះបង់ផ្ទះសម្បែង បងប្អូនប្រុសស្រី ឪពុកម្តាយ កូនចៅ ឬស្រែចម្ការព្រោះតែខ្ញុំ អ្នកនោះនឹងទទួលវិញមួយជាមួយរយ ព្រមទាំងមាន​ជីវិតអស់កល្បជានិច្ចថែមទៀតផង។ មានមនុស្សជាច្រើនដែលនៅខាងមុខ នឹងបែរជា​ទៅនៅខាងក្រោយ រីឯអ្នកដែលនៅខាងក្រោយ នឹងត្រឡប់ទៅនៅខាងមុខវិញ»។