អត្ថបទទី១៖ សូមថ្លែងព្រះគម្ពីរដំណើរឆ្ពោះទៅកាន់សេរីភាព សរ ១៩,១-២.៩-១១.១៦-២០

នៅថ្ងៃទីមួយនៃខែទីបី ក្រោយពេលចាកចេញពីស្រុកអេស៊ីប គឺនៅថ្ងៃនេះ ជន​ជាតិអ៊ីស្រាអែលទៅដល់វាលរហោស្ថានស៊ីណៃ។ ពួកគេបានចេញពីរេភីឌីមទៅដល់​វាលរហោស្ថានស៊ីណៃ ហើយបោះជំរំនៅទីនោះ ទល់មុខនឹងភ្នំស៊ីណៃ។ ព្រះអម្ចាស់មានព្រះបន្ទូលមកកាន់លោកម៉ូសេថា៖ «យើងនឹងមករកអ្នកដោយស្ថិត​នៅក្នុងផ្ទាំងពពកយ៉ាងក្រាស់ ដើម្បីឱ្យប្រជាជនឮយើងនិយាយជាមួយអ្នក ហើយ​ទុកចិត្តលើអ្នកជារៀងរហូត»។ ព្រះអម្ចាស់មានព្រះបន្ទូលមកកាន់លោកម៉ូសេទៀត​ថា៖ «ចូរវិលទៅរកប្រជាជនវិញ ហើយប្រាប់ពួកគេឱ្យជម្រះខ្លួនឱ្យបានវិសុទ្ធនៅថ្ងៃនេះ និងថ្ងៃស្អែក។ ចូរឱ្យពួកគេបោកសម្លៀកបំពាក់ផងដែរ។ ត្រូវឱ្យពួកគេត្រៀមខ្លួនជាស្រេចនៅថ្ងៃទីបី ដ្បិតថ្ងៃនោះ យើងនឹងចុះទៅលើភ្នំស៊ីណៃឱ្យប្រជាជនទាំងអស់ឃើញ»។ នៅថ្ងៃទីបី ពេលព្រលឹមស្រាងៗមានផ្គរលាន់ ផ្លេកបន្ទោរ និងពពកយ៉ាងក្រាស់​នៅលើភ្នំ ហើយមានសំឡេងត្រែលាន់ឮឡើងយ៉ាងរំពងទៀតផង។ ប្រជាជនទាំងអស់នៅក្នុងជំរំភ័យញ័ររន្ធត់យ៉ាងខ្លាំង។ លោកម៉ូសេនាំប្រជាជនចេញពីជំរំទៅគាល់ព្រះ​ជាម្ចាស់ ហើយពួកគេឈរនៅជើងភ្នំ។ មានផ្សែងហុយពាសពេញលើភ្នំស៊ីណៃ ដ្បិត​ព្រះម្ចាស់ចុះមកលើភ្នំ ព្រះអង្គគង់នៅក្នុងភ្លើង។ ផ្សែងនោះហុយ ឡើងដូចផ្សែងចេញ​ពីឡ ហើយភ្នំទាំងមូលក៏រញ្ជួយយ៉ាងខ្លាំង។ សំឡេងត្រែលាន់ឮកាន់តែខ្លាំងឡើងៗ ពេលដែលលោកម៉ូសេទូលព្រះជាម្ចាស់ ព្រះអង្គឆ្លើយមកលោកដោយសំឡេងផ្គរលាន់។ ព្រះអម្ចាស់យាងចុះមកលើភ្នំស៊ីណៃ គឺនៅលើកំពូលភ្នំ។ ព្រះអង្គត្រាស់ហៅលោកម៉ូសេពីលើកំពូលភ្នំ ហើយលោកម៉ូសេក៏ឡើងទៅ។

ទំនុកតម្កើងរបស់លោកដានីអែល ៣,៥២-៥៦ បទកាកគតិ

ពិធីអបអរសាទរព្រះគម្ពីរដំណឹងល្អតាម មថ ១១,២៥

អាលេលូយ៉ា! អាលេលូយ៉ា!
បពិត្រព្រះបិតាជាអម្ចាស់នៃស្ថានបរមសុខ និងជាអម្ចាស់នៃផែនដី! យើងខ្ញុំសូមសរសើរតម្កើងព្រះអង្គ ព្រោះទ្រង់បានសម្តែងការណ៌អស្ចារ្យនៃព្រះរាជ្យឱ្យមនុស្សតូចតាចយល់។ អាលេលូយ៉ា!

សូមថ្លែងព្រះគម្ពីរដំណឹងល្អតាមសន្តម៉ាថាយ មថ ១៣,១០-១៧

ពេលនោះ ក្រុមសាវ័កនាំគ្នាចូលមកជិតព្រះយេស៊ូ ហើយទូលសួរព្រះអង្គថា៖ «ហេតុដូចម្តេចបានជាព្រះគ្រូមានព្រះបន្ទូលទៅកាន់បណ្តាជនដោយប្រើពាក្យប្រស្នាដូច្នេះ?» ​ព្រះអង្គតបទៅគេវិញថា៖ «មកពីព្រះជាម្ចាស់បានប្រោសប្រទានឱ្យអ្នករាល់គ្នាយល់គម្រោងការដ៏លាក់កំបាំងរបស់ព្រះរាជ្យនៃស្ថានបរមសុខ។ រីឯអ្នកដទៃវិញ ព្រះអង្គ​មិនប្រទានឱ្យយល់ឡើយ។ អ្នកណាមានហើយ ព្រះជា​ម្ចាស់នឹងប្រទានថែមទៀត ដើម្បីឱ្យអ្នកនោះបានបរិបូរណ៌ រីឯអ្នកដែលគ្មាន ព្រះអង្គនឹងហូតយកអ្វីៗដែលអ្នក​នោះមានផង។ ហេតុនេះហើយ បានជាខ្ញុំនិយាយទៅគេដោយប្រើពាក្យប្រស្នា គឺទោះបី​គេមើលក៏គេពុំឃើញ ទោះបីគេស្តាប់ក៏គេពុំឮ ហើយក៏ពុំយល់ដែរ។ ហេតុការណ៍នេះកើតចំពោះគេ ស្របតាមសេចក្តីដែលព្យាការីអេសាយថ្លែងទុកអំពីពួកគេថា៖ «អ្នករាល់គ្នាស្តាប់មែនតែពុំឮទេ ហើយ​ក៏ពុំយល់ផង។ អ្នករាល់គ្នាមើលមែន តែមិនឃើញសោះ ដ្បិតចិត្តប្រជារាស្ត្រនេះរឹងណាស់ ហើយត្រចៀកគេក៏ធ្ងន់ដែរ គេនាំគ្នាបិទភ្នែក មិន​ឱ្យមើលឃើញ មិនឱ្យត្រចៀកស្តាប់ឮ មិនឱ្យប្រាជ្ញាយល់ ហើយមិនចង់វិលមកវិញទេក្រែងលោយើងប្រោសគេឱ្យបានជា។ រីឯអ្នករាល់គ្នាវិញ អ្នករាល់គ្នាមានសុភមង្គល​ហើយ ព្រោះភ្នែកអ្នករាល់គ្នាអាចមើលឃើញ ត្រចៀកអ្នករាល់គ្នាអាចស្តាប់ឮបាន!។ ខ្ញុំសុំប្រាប់​ឱ្យអ្នករាល់គ្នាដឹងច្បាស់ថា មានព្យាការី និងមនុស្សសុចរិតជាច្រើនមានបំណងចង់ឃើញហេតុការណ៍ដែលអ្នករាល់គ្នាឃើញនេះដែរ តែមិនបានឃើញឡើយ គេ​ចង់ឮសេចក្តីដែលអ្នករាល់គ្នាឮនេះដែរ តែមិនបានឮទេ!»។