ពាក្យអធិដ្ឋាននៅពេលចូល

បពិត្រព្រះអម្ចាស់ជាព្រះបិតា! ព្រះអង្គពិតជាប្រភពនៃជីវិតគ្រប់យ៉ាង។ ព្រះ​អង្គក៏ជាព្រះបិតាដែលសព្វព្រះហឫទ័យណែនាំមនុស្សទាំងអស់ឱ្យបានសុភ​​មង្គលពេញលេញគ្រប់ៗគ្នា។ សូមទ្រង់ព្រះមេត្ដាប្រោសប្រទានឱ្យយើងខ្ញុំមាន​​ជំនឿ មានសេចក្ដីសង្ឃឹម និងមានសេចក្ដីស្រឡាញ់កាន់តែខ្លាំងឡើងៗផង។

អត្ថបទទី១៖ សូមថ្លែងព្រះគម្ពីរកំណើត កណ ១៨,១-១០

ព្រះអម្ចាស់យាងមកឱ្យលោកអប្រាហាំឃើញនៅដើមជ្រៃលោកតាម៉ាមរ៉េ។ ពេលនោះ ថ្ងៃពេញកម្ដៅ ហើយលោកអប្រាហាំអង្គុយនៅមាត់ទ្វារជំរំរបស់លោក លោកងើបមុខឡើងមើលទៅឃើញបុរសបីនាក់ឈរនៅជិតលោក។ ពេល​ឃើ​ញ​​បុរសបីនាក់នោះ លោកក៏រត់ចេញពីមាត់ទ្វារជំរំទៅជួប ក្រាបដល់ដី ហើយមាន​ប្រសាសន៍ថា៖«លោកម្ចាស់! បើលោកពេញចិត្ដនឹងខ្ញុំប្របាទមែន សូមមេត្ដាកុំអញ្ជើញទៅហួសខ្ញុំប្របាទឡើយ។ សូមឱ្យគេយកទឹកបន្ដិចមកលាងជើង​ជូន! សូមលោកសម្រាកក្រោមដើមឈើនេះសិនហើយ។ ខ្ញុំប្របាទនឹងទៅយក​នំប័ុងមួយដុំមកជូនលោកពិសាដើម្បីឱ្យមានកម្លាំង រួចសឹមបន្ដដំណើរទៅ​មុខ​ទៀត។ ដូច្នេះ លោកនឹងមិនឆៀងកាត់តាមផ្ទះខ្ញុំប្របាទដោយឥតបានការ​ឡើយ​​​»។ បុរសទាំងបីតបថា៖«សុំធ្វើតាមពាក្យលោកចុះ»។ លោកអប្រាហាំប្រញាប់ប្រញាល់ចូលទៅរកលោកស្រីសារ៉ានៅក្នុងជំរំ ប្រាប់ថា៖ «ចូរយកម្សៅបីកំប៉ុងមក ហើយរៀបចំធ្វើនំឱ្យបានរួសរាន់ទៅ»។ បន្ទាប់មក លោករត់ទៅ​រកហ្វូងសត្វ យកកូនគោស្ទាវយ៉ាងធាត់ល្អមួយ ប្រគល់ឱ្យក្មេងបម្រើម្នាក់យកទៅសម្លាប់ធ្វើម្ហូបជាបន្ទាន់។ លោកយកខ្លាញ់ និងទឹក​ដោះ​គោ ព្រមទាំងសាច់កូនគោដែលគេបានរៀបចំនោះមកដាក់នៅមុខបុរស​ទាំងបី។ ខ្លួនលោកផ្ទាល់ ឈរកំដរបុរសទាំងបី ក្រោមដើមឈើនោះ បុរសទាំង​បី​​នាក់ក៏នាំគ្នាបរិភោគ។ បន្ទាប់មក បុរសទាំងបីពោលមកលោកថា៖«អ្នកសារ៉ាភរិយារបស់លោកនៅឯណា?»។ លោក​តបវិញថា៖«នាងនៅក្នុងជំរំឯណោះ»។ ព្រះអម្ចាស់មានព្រះបន្ទូលថា៖«ឆ្នាំក្រោយនៅខែដដែលនេះ យើងនឹងវិលមករកអ្នកសាជាថ្មី ពេលនោះ នាងសារ៉ានឹងមានកូនប្រុសមួយ»។

ទំនុកតម្កើងលេខ ១៥ (១៤), ១-៥ បទព្រហ្មគីតិ

អត្ថបទទី២៖ សូមថ្លែងលិខិតរបស់គ្រីស្ដទូតប៉ូលផ្ញើជូនគ្រីស្ដបរិស័ទក្រុងកូឡូស កូឡ ១,២៤-២៨

បងប្អូនជាទីស្រឡាញ់!
ឥឡូវនេះ ខ្ញុំមានអំណរដោយរងទុក្ខលំបាកសម្រាប់​បងប្អូន ព្រោះខ្ញុំរងទុក្ខលំបាកក្នុងរូបកាយដូច្នេះ ដើម្បីជួយបំពេញទុក្ខលំបាករបស់ព្រះគ្រីស្ដសម្រាប់ព្រះកាយរបស់ព្រះអង្គដែលជាព្រះសហគមន៍។ ខ្ញុំបានទទួលមុខងារបម្រើព្រះសហគមន៍នេះតាមការចាត់ចែងដែលព្រះជា​ម្ចាស់បានផ្ទុក​ផ្ដាក់ឱ្យខ្ញុំធ្វើ គឺណែនាំបងប្អូនឱ្យស្គាល់ព្រះបន្ទូលរបស់ព្រះអង្គបាន​សព្វ​គ្រប់។ នេះហើយជាគម្រោងការដ៏លាក់កំបាំងដែលព្រះជាម្ចាស់បានលាក់ទុកតាំងពីយូរអង្វែងតរៀងមក មិនឱ្យមនុស្សជំនាន់មុនៗស្គាល់ឡើយ តែឥឡូវនេះ ព្រះអង្គបានបង្ហាញឱ្យប្រជាជនដ៏វិសុទ្ធរបស់ព្រះអង្គស្គាល់។ ព្រះជាម្ចាស់សព្វព្រះហឫទ័យឱ្យប្រជាជនដ៏វិសុទ្ធនេះស្គាល់សិរីរុងរឿងដ៏ប្រសើរបំផុតនៃ​គម្រោង​ការនេះ នៅក្នុងចំណោមសាសន៍ដទៃ ពោលគឺ ព្រះគ្រីស្ដគង់នៅក្នុងបងប្អូន ព្រះអង្គ​​​​​​​ប្រទានឱ្យបងប្អូនមានសង្ឃឹមថា នឹងបានទទួលសិរីរុងរឿងរបស់ ព្រះអង្គ។ ដូច្នេះ យើងប្រកាសដំណឹងអំពីព្រះគ្រីស្ដនេះ ហើយយើងដាស់តឿន និងប្រៀនប្រដៅ​មនុស្សគ្រប់ៗរូបដោយប្រើប្រាជ្ញាគ្រប់យ៉ាង ធ្វើឱ្យគេទាំងអស់គ្នាបានគ្រប់លក្ខណៈក្នុងអង្គព្រះគ្រីស្ដ។

ពិធីអបអរសាទរព្រះគម្ពីរដំណឹងល្អតាម វវ ៣,២០

សូមថ្លែងព្រះគម្ពីរដំណឹងល្អតាមសន្តលូកា លក ១០,៣៨-៤២

ព្រះយេស៊ូកំពុងធ្វើដំណើរជាមួយក្រុមសាវ័ក។ ព្រះអង្គយាងចូលក្នុងភូមិមួយ។ មានស្រ្ដីម្នាក់ឈ្មោះម៉ាថា បានទទួលព្រះអង្គឱ្យស្នាក់នៅក្នុងផ្ទះនាង។ នាងមានប្អូនស្រីម្នាក់ឈ្មោះម៉ារី អង្គុយនៅទៀបព្រះបាទាព្រះអម្ចាស់ ស្ដាប់ព្រះបន្ទូលរបស់ព្រះអង្គ។ រីឯនាងម៉ាថាវិញ នាងមានកិច្ចការរវល់ជាច្រើនដើម្បីបម្រើព្រះអង្គ។ នាងចូលមកទូលថា៖ «បពិត្រព្រះអម្ចាស់! ប្អូនខ្ញុំម្ចាស់ទុក​​ឱ្យខ្ញុំម្ចាស់បម្រើព្រះអង្គតែម្នាក់ឯង តើព្រះអង្គមិនអើពើទេឬ? សូមទ្រង់ប្រាប់ឱ្យនាងមកជួយខ្ញុំម្ចាស់ផង»។ ព្រះអម្ចាស់មានព្រះបន្ទូលទៅនាងថា៖«ម៉ាថា! ម៉ាថា អើយ! នាងមានកង្វល់ហើយរវល់នឹងកិច្ចការច្រើនណាស់ ប៉ុន្ដែ មានកិច្ចការតែមួយគត់ដែលចាំបាច់! នាងម៉ារីបានជ្រើសយកចំណែកដ៏ល្អវិសេស​នោះហើយ មិនត្រូវយកចេញពីនាងទេ»។

ពាក្យថ្វាយតង្វាយ

បពិត្រព្រះអម្ចាស់ជាព្រះបិតា! ពេលព្រះបុត្រាបានបូជាព្រះជន្មនៅលើឈើឆ្កាង ព្រះអង្គបានថ្វាយសក្ការបូជាដ៏ល្អឥតខ្ចោះ ប្រសើរជាងសក្ការបូជាឯទៀតៗទាំងអស់។ យើងខ្ញុំ សូមថ្វាយកាយ វាចា ចិត្ដ សូមទ្រង់ព្រះមេត្ដាប្រោស​យើងខ្ញុំ ឱ្យចូលរួមក្នុងសក្ការបូជារបស់ព្រះបុត្រាព្រះអង្គ ដែលមានព្រះជន្ម​គង់​​​នៅ និងសោយរាជ្យអស់កល្បជាអង្វែងតរៀងទៅ។

ពាក្យអរព្រះគុណ

ឱព្រះបិតាប្រកបដោយធម៌មេត្ដាករុណាយ៉ាងក្រៃលែងអើយ! សូមព្រះអង្គទ្រង់ព្រះមេត្ដាគង់នៅជាមួយយើងខ្ញុំជានិច្ច! បើព្រះអង្គមិនគង់នៅជាមួយទេ យើងខ្ញុំមុខជាត្រូវវិនាសអន្ដរាយពុំខាន។ សូមទ្រង់ព្រះមេត្ដាប្រោសយើងខ្ញុំ ដែលទទួលព្រះកាយព្រះគ្រីស្ដក្នុងអភិបូជានេះ បានរស់នៅតាមរបៀបថ្មី ស្របតាមព្រះអំណោយទានរបស់ព្រះអង្គផង។