កាលពីដើម ជនជាតិយូដាតែងតែទន្ទឹមរង់ចាំ “ព្រះមែស្ស៊ី” គឺ“ព្រះគ្រីស្ត” ជាស្តេចមួយអង្គដែលនឹងយាងមកសង្គ្រោះពួកគេ តាមព្រះបន្ទូលសន្យារបស់ព្រះជាម្ចាស់។ ពួកគេ សង្ឃឹមថា ព្រះគ្រីស្តយាងមកតែងតាំង “ព្រះរាជ្យរបស់ព្រះជាម្ចាស់” ឬធ្វើឱ្យ “ព្រះជាម្ចាស់គ្រងរាជ្យលើមនុស្សលោក” នាំសុភមង្គលដ៏ពេញលេញមកមនុស្សលោក។
គ្រីស្តបរិស័ទជាអ្នកប្រកាសថា លោកគ្រូយេស៊ូដែលត្រូវគេឆ្កាងសម្លាប់ចោល ហើយដែលទទួលព្រះជន្មថ្មី ពិតជាព្រះគ្រីស្តនោះមែន គឺពិតជាអ្នកផ្តល់សុភមង្គលដល់ខ្លួនគេ និងដល់មនុស្សលោកផង។
ចុះហេតុអ្វីបានជាក្នុងពិភពលោកយើងនេះ នៅតែមានទុក្ខ នៅតែមានមនុស្សជរា ពិការ នៅតែមានសង្គ្រាមដូច្នេះ?
ព្រះយេស៊ូដែលមានព្រះជន្មគង់នៅជាមួយយើង ទ្រង់ប្រទានឱ្យទុក្ខវេទនាគ្រប់យ៉ាងរបស់មនុស្សលោកទទួលអត្ថន័យថ្មី។ នេះជាសេចក្តីសង្ឃឹម និងអំណរសប្បាយរបស់យើង។

ពាក្យអង្វរពេលចូល

បពិត្រព្រះអម្ចាស់ជាព្រះបិតា! ព្រះអង្គមានព្រះហឫទ័យសប្បុរសយ៉ាងក្រៃលែង ព្រះអង្គសព្វព្រះហឫទ័យឱ្យមនុស្សបានប្រកបដោយសេចក្តីសុខគ្រប់យ៉ាង ហើយមានព្រះបន្ទូលសន្យាថា នឹងចាត់ព្រះគ្រីស្តឱ្យយាងមកផ្តល់សេចក្តីសុខនោះផង។ សូមទ្រង់ព្រះមេត្តាបំភ្លឺចិត្តគំនិតយើងខ្ញុំឱ្យជឿថា ព្រះយេស៊ូពិតជាព្រះគ្រីស្តមែន ទ្រង់កំពុងយាងមករំដោះយើងខ្ញុំឱ្យរួចពីសេចក្តីអាក្រក់គ្រប់យ៉ាងទៀតផង ទ្រង់មានព្រះជន្មគង់នៅ និងសោយរាជ្យរួមជាមួយព្រះបិតា និងព្រះវិញ្ញាណដ៏វិសុទ្ធអស់កល្បជាអង្វែងតរៀងទៅ។

អត្ថបទទី១​៖ សូមថ្លែងព្រះគម្ពីរព្យការីសេផានី សផ ៣,១៤-១៨ក

ប្រជាជននៃក្រុងស៊ីយ៉ូនអើយ ចូរបន្លឺសំឡេងដោយអំណរ! ជនជាតិអ៊ីស្រាអែលអើយ ចូរនាំគ្នាស្រែកជយឃោស! ប្រជាជនក្រុងយេរូសាឡឹមអើយ ចូរអសប្បាយ និងមាន ចិត្តរីករាយឡើង! ព្រះអម្ចាស់បានលើកលែងទោសឱ្យអ្នក ព្រះអង្គបានពង្វាងខ្មាំងសត្រូវចេញពីអ្នក។ ព្រះអម្ចាស់ជាព្រះមហាក្សត្រនៃជនជាតិអ៊ីស្រាអែលគង់នៅជាមួយអ្នក អ្នកនឹងមិនខ្លាចទុក្ខវេទនាទៀតឡើយ។ នៅថ្ងៃនោះ គេនឹងពោលមកកាន់ក្រុងយេរូសាឡឹមថា “កុំខ្លាចអ្វីឡើយ! ក្រុងស៊ីយ៉ូនអើយ! កុំបាក់ទឹកចិត្តឱ្យសោះ!។ ព្រះអម្ចាស់ជាព្រះរបស់អ្នក ព្រះអង្គគង់ជាមួយអ្នក ព្រះអង្គជាវីរបុរសដែលមានជ័យជំនះ ព្រះអង្គមានអំណរសប្បាយជាខ្លាំង ព្រោះតែអ្នក។ ព្រះអង្គមានព្រះហឫទ័យស្រឡាញ់អ្នក ទ្រង់ប្រោសឱ្យអ្នកមានជីវិតថ្មី ព្រះអង្គត្រេកអរយ៉ាងខ្លាំង និងរាំសប្បាយព្រោះតែអ្នក ដូចនៅថ្ងៃពិធីបុណ្យដ៏សប្បាយ”។

ទំនុកតម្កើងរបស់ព្យាការីអេសាយ ១២, ២.៤-៦ បទពាក្យ ៧

អត្ថបទទី​ ២៖ សូមថ្លែងលិខិតរបស់គ្រីស្តទូតប៉ូលផ្ញើជូនគ្រីស្តបរិស័ទក្រុងភីលីព ភល ៤,៤-៧

បងប្អូនជាទីស្រឡាញ់!
ចូរបងប្អូនអរសប្បាយដោយសារព្រះអម្ចាស់ជានិច្ច ខ្ញុំសូមជម្រាបបងប្អូនម្តងទៀតថា ចូរអសប្បាយឡើង !។ ចូរសម្តែងឱ្យមនុស្សម្នាទាំងអស់ស្គាល់សន្តានចិត្តសប្បុរសរបស់បងប្អូន ព្រះអម្ចាស់ជិតយាងមកដល់ហើយ។ សូមកុំខ្វល់ខ្វាយនឹងអ្វីឡើយ ផ្ទុយទៅវិញ ក្នុងគ្រប់កាលៈទេសៈត្រូវទូលព្រះជាម្ចាស់ឱ្យជ្រាបពីសំណូមពររបស់បងប្អូនដោយអធិដ្ឋាន និងទូលអង្វរទាំងអរព្រះគុណព្រះអង្គផង។ ធ្វើដូច្នេះសេចក្តី​សុខសាន្តរបស់ព្រះជាម្ចាស់ដែលហួសពីការស្មានរបស់មនុស្សនឹងស្ថិតនៅជាប់ក្នុងចិត្តគំនិត​បងប្អូនដោយសារព្រះគ្រីស្តយេស៊ូមិនខាន។

ពិធីអបអរសាទរព្រះគម្ពីរដំណឹងល្អតាម លក ២,៧៦;១,៧

អលេលូយ៉ា! អាលេលូយ៉ា!
លោកយ៉ូហានជាព្យាការីរបស់ព្រះដ៏ខ្ពង់ខ្ពស់បំផុត លោកដើរខាងមុខដើម្បីរៀបចំផ្លូវថ្វាយព្រះអម្ចាស់ និងធ្វើជាសាក្សីថ្វាយព្រះពន្លឺ។ អាលេលូយ៉ា!

សូមថ្លែងព្រះគម្ពីរដំណឹងល្អតាមសន្ដលូកា លក ៣,១០-១៨

មហាជនដែលមកទទួលពិធីជ្រមុជទឹកពីលោកយ៉ូហានតែងសួរលោកថា៖«តើយើងត្រូវធ្វើអ្វីខ្លះ?»។ លោកយ៉ូហានតបទៅពួកគេវិញថា៖ «អ្នកមានអាវពីរ ត្រូវចែកឱ្យ អ្នកដែលគ្មាន ហើយអ្នកដែលមានចំនីអាហារ ក៏ត្រូវចែកឱ្យអ្នកដែលគ្មានដែរ»។ មានអ្នកទារពន្ធខ្លះមកទទួលពិធីជ្រមុជទឹក ហើយសួរលោកថា៖«លោកគ្រូ! តើយើងខ្ញុំត្រូវធ្វើអ្វីខ្លះ?»។ លោកឆ្លើយទៅវិញថា៖«កុំទារពន្ធដាហួសពីកម្រិតដែលមានកំណត់ទុកនោះឡើយ»។ មានទាហានមកសួរលោកថា៖«ចុះយើងខ្ញុំវិញ តើត្រូវធ្វើអ្វីដែរ?»។ លោកឆ្លើយថា៖«កុំចោទប្រកាន់ កុំសង្កត់សង្កិនយកប្រាក់ពីអ្នកណាឱ្យសោះ ត្រូវស្កប់ចិត្តតែនឹងប្រាក់ខែរបស់អ្នករាល់គ្នាប៉ុណ្ណោះបានហើយ»។
ប្រជាជននៅតែរង់ចាំ ហើយគេរិះគិតក្នុងចិត្តគ្រប់គ្នាថា ប្រហែលលោកនេះទេដែលជាព្រះគ្រីស្ត!។ លោកយ៉ូហានមានប្រសាសន៍ប្រាប់គេទាំងអស់គ្នាថា៖«ខ្ញុំធ្វើពិធីជ្រមុជ ឱ្យអ្នករាល់គ្នាក្នុងទឹក ប៉ុន្តែលោកដែលមានកម្លាំងខ្លាំងជាងខ្ញុំជិតមកដល់ហើយ។ ខ្ញុំមានឋានៈទាបណាស់ សូម្បីតែស្រាយខ្សែស្បែកជើងជូនលោក ក៏មិនសមនឹងឋានៈដ៏ ខ្ពង់ខ្ពស់របស់លោកផង លោកនឹងធ្វើពិធីជ្រមុជឱ្យអ្នករាល់គ្នាក្នុងព្រះវិញ្ញាណដ៏វិសុទ្ធ និងដោយភ្លើងវិញ។ លោកកាន់ចង្អេរ លោកសម្អាតលានបោកស្រូវ ដើម្បីអុំស្រូវយក គ្រាប់ល្អប្រមូលដាក់ជង្រុក រីឯសម្តីវិញ លោកនឹងដុតក្នុងភ្លើងដែលឆេះពុំចេះរលត់ឡើយ»។ លោកយ៉ូហានប្រកាសដំណឹងល្អដល់ប្រជាជនដោយពាក្យដាល់តឿនជាច្រើន ទៀតផង។

ធម៌ថ្វាយតង្វាយ

បពិត្រព្រះអម្ចាស់ជាព្រះបិតា! ពេលណាយើងខ្ញុំនាំគ្នាថ្វាយអភិបូជា យើងខ្ញុំរំឭកពីព្រះបុត្រាបូជាព្រះជន្មដើម្បីសង្គ្រោះមនុស្សលោក។ យើងខ្ញុំសូមថ្វាយកាយ វាចា ចិត្ត សូមទ្រង់ព្រះមេត្តាប្រោសយើងខ្ញុំឱ្យចូលរួមក្នុងសក្ការបូជារបស់ព្រះបុត្រាព្រះអង្គ ដែលមានព្រះជន្មគង់នៅ និងសោយរាជ្យអស់កល្បជាអង្វែងតរៀងទៅ។

ធម៌លើកតម្កើង

បពិត្រព្រះបិតាប្រកបដោយធម៌មេត្តាករុណាយ៉ាងក្រៃលែង! យើងខ្ញុំសូមលើកតម្កើងសិរីរុងរឿងរបស់ព្រះអង្គ ដោយរួមជាមួយព្រះយេស៊ូគ្រីស្តជាព្រះបុត្រាព្រះអង្គ។ ព្រះយេស៊ូពិតជាព្រះគ្រីស្តដែលយាងមក ស្របតាមព្រះបន្ទូលសន្យារបស់ព្រះអង្គ ដូចព្យាការីទាំងឡាយបានថ្លែងទុកមក។ ព្រះយេស៊ូបានប្រោសមនុស្សលោកឱ្យរួចពីទុក្ខវេទាគ្រប់យ៉ាង ទ្រង់បានបង្ហាញមេត្តាករុណាធម៌ដ៏លើស​លប់របស់ព្រះអង្គ។ ព្រះគ្រីស្តពិតជាប្រភពនៃអំណរសប្បាយរបស់យើងខ្ញុំ។
អាស្រ័យហេតុនេះហើយ បានជាយើងខ្ញុំសូមចូលរួមជាមួយអស់ទេវទូត និងគ្រីស្តបរិស័ទទាំងឡាយ ដើម្បីលើកតម្កើងសិរីរុងរឿងរបស់ព្រះអង្គ ដោយប្រកាសថា៖ «ព្រះដ៏វិសុទ្ធ»។

ពាក្យអរព្រះគុណ

បពិត្រព្រះអម្ចាស់ជាព្រះបិតា! ព្រះអង្គសព្វព្រះហឫទ័យប្រោសប្រទានព្រះកាយ និងព្រះលោហិតនៃព្រះបុត្រាឱ្យយើងខ្ញុំក្នុងអភិបូជានេះ។ យើងខ្ញុំសូមអរព្រះគុណព្រះអង្គ ដែលចាត់ព្រះគ្រីស្តមកប្រោសយើងខ្ញុំឱ្យមើលឃើញ ឱ្យស្តាប់ឮ និងឱ្យរស់ឡើងវិញផង។ សូមទ្រង់ព្រះមេត្តាប្រែចិត្តគំនិតយើងខ្ញុំឱ្យទទួលព្រះអំណោយទានរបស់ព្រះអង្គ ដោយចិត្តស្មោះ និងប្រព្រឹត្តតាមព្រះអំណោយទានទាំងនោះផង។ យើងខ្ញុំសូមអង្វរព្រះអង្គ ដោយរួមជាមួយព្រះយេស៊ូជាព្រះគ្រីស្ត និងជាអម្ចាស់យើងខ្ញុំ។