សិប្បកម្មដូងតាកែវនៃព្រះសហគមន៍កាតូលិកភូមិភាគភ្នំពេញ បានចូលរួមប្រលងថ្នាក់ពាក់កណ្តាលផ្ដាច់ព្រ័តពានរង្វាន់សហគ្រិនធនតូច និងមធ្យមប្រចាំតំបន់កំពត នៅកម្ពុជា លើកទី៤ ឆ្នាំ២០២៣នាខេត្តទីរួមខេត្តកំពត កាលពីថ្ងៃទី១៩ ខែកញ្ញា ឆ្នាំ២០២៣។
ក្នុងការប្រលងថ្នាក់ពាក់កណ្ដាលផ្ដាច់ព្រ័តនេះ សិប្បកម្មដូងតាកែវបានទទួលចំណាត់ថ្នាក់លេខ៤ ក្នុងចំណោម២០ក្រុមហ៊ុនសហគ្រាសប្រចាំតំបន់កំពត ហើយនឹងត្រៀមខ្លួនដើម្បីចូលរួមប្រកួតពាន់រង្វាន់សហគ្រិនថ្នាក់ជាតិនាពេលខាងមុខ។
តាមប្រសាសន៍របស់លោក មាគ ស៊ន ជាអ្នកទទួលខុសត្រូវសិប្បកម្មដូងតាកែវបានឱ្យដឹងថា ការប្រលងថ្នាក់ពាក់កណ្ដាលផ្ដាច់ព្រ័តនេះ ថ្នាក់តំបន់កំពតមាន៥០ក្រុមហ៊ុនសហគ្រាសបានដាក់ពាក្យចូលរួមប្រកួតប្រជែង ដោយឆ្លងកាត់វគ្គជម្រុះជាបន្តបន្ទាប់និងតាមលក្ខខណ្ឌរបស់កម្មវិធីតម្រូវឱ្យមានតែ ២០ ក្រុមហ៊ុនសហគ្រាសដែលអាចចូលរួមប្រកួតប្រជែងក្នុងវគ្គនេះ។
លោកបន្តថា លក្ខខណ្ឌការប្រកួតនៅវគ្គនេះគឺតម្រូវក្រុមហ៊ុនសហគ្រាសទាំង២០រៀបចំ ជាបទបង្ហាញរយៈពេល៨នាទី និងមាន១២នាទីជាសំណួរដេញដោលពីវាគ្មិន និងគណៈកម្មាការអំពីការងារសិប្បកម្មតាមកន្លែងនីមួយៗ ហើយជ្រើសរើសយកតែ៤ក្រុមហ៊ុនសហគ្រាស ដើម្បីចូលរួមប្រកួតពានរង្វាន់សហគ្រិននៅថ្នាក់ជាតិតែប៉ុណ្ណោះ។
លោកបន្តទៀតថា ក្នុងនោះដែរ សិប្បកម្មដូងតាកែវ បានបង្ហាញដោយយកការងារចំនួន៥ រួមមាន ផ្នែកកាត់ដេរដោយស្ត្រីមានពិការភាព ផ្នែកតម្បាញដែលមានសសៃសូត្រ សសៃអំបោះ សសៃចេក និងស្រកីដូង ផ្នែកកែច្នៃផ្លែដូង ផ្នែកកែច្នៃដើមចេកដោយត្បាញសសៃចេកជាក្រមា ថង់ដាក់សម្ភារពីសសៃចេក និងផ្នែកកែច្នៃម្ហូបអាហាររួមមានស្ករគ្រាប់ មីដូង និងភោជនីយដ្ឋាន។
លោក មាគ ស៊ន បញ្ជាក់ថា ដោយមានការចាប់អារម្មណ៍ខ្លាំងពីសំណាក់គណៈកម្មាការទៅលើការកែច្នៃ អំពីផ្លែដូង ដើមចេក និងការជួយដល់ក្រុមស្រ្តីមានពិការភាពនិងម្តាយដែលមានកូនពិការក្រីក្រអាចរកប្រាក់ចំណូល ក្នុងទិសដៅជួយសង្គមនិងសហគមន៍ ទើបធ្វើឱ្យសិប្បកម្មដូងតាកែវទទួលបានចំណាត់ថ្នាក់មួយល្អ។
ជាមួយការត្រៀមខ្លួនប្រកួតបន្តក្នុងខែវិច្ឆិកាខាងមុខនេះ លោកស៊នបានប្ដេជ្ញាខិតខំប្រឹងប្រែងបង្ហាញអំពីសមទ្ធិផលផ្សេងៗដែលមាននៅក្នុងសិប្បកម្ម បង្ហាញអំពីគម្រោងការណ៍ផ្ដោតសំខាន់ទៅលើការជួយសង្គម ដើម្បីឱ្យសង្គមចេះសាមគ្គីគ្នា យកចិត្តទុកដាក់ជាមួយអ្នកក្រីក្រ ជនមានពិការភាព ឱ្យយល់ថាពិតមែនជនពិការក៏មានសមត្ថភាពបំពេញភារកិច្ចការងារសម្រាប់ចិញ្ចឹមជីវិត និងជួយសង្គម។
សិប្បកម្មដូងតាកែវ បង្កើតឡើងក្នុងឆ្នាំ ២០១៦ មានទីតាំងស្ថិតនៅ ភូមិពងទឹកខាងត្បូង ឃុំគុស ស្រុកត្រាំកក់ ខេត្តតាកែវ ដែលមានបុគ្គលិក៤២នាក់កំពុងបម្រើការងារដែលក្នុងនោះមាន១៣នាក់ជាជនមានពិការភាព។ គម្រោងនេះបង្កើតឡើងដោយ លោក អូលីវីយ៉េ ជ្មីតហស្លេ អភិបាលនៃព្រះសហគមន៍កាតូលិកភូមិភាគភ្នំពេញ៕
ដោយចាន់ ម៉ានុត
