កិច្ចការប្រកាសដំណឹងល្អរបស់ព្រះជាម្ចាស់លើទឹកដីកម្ពុជាក្នុងរយៈពេល២៥ឆ្នាំរបស់លោកអភិបាលអូលីវីយ៉េ ជ្មីតហស្លេ កន្លងមកនេះ ទទួលបានសមទ្ធផលជាច្រើនស្ទើរគ្រប់វិស័យក្នុងព្រះសហគមន៍។ នេះបើតាមការបញ្ជាក់របស់គ្រីស្តបរិស័ទជាច្រើនដែលបានស្គាល់លោក។
លោកគឹម រតនា នាយកប្រតិបត្តិនៃអង្គការការីតាសកម្ពុជា និយាយថា «២៥ឆ្នាំមកនេះ ខ្ញុំឃើញថា លោកអភិបាលអូលីវីយ៉េ បានលះបង់ ចូលរួមនិងផ្ដល់សេចក្ដីស្រឡាញ់ដល់កម្ពុជាខ្លាំងមែនទែន ដោយយកចិត្តទុកដាក់ទាំងជំនឿ ទាំងការអភិវឌ្ឍនិងធនធានមនុស្ស។»
លោករតនា បញ្ជាក់ទៀតថា លោកអភិបាលបានបង្កើតនូវវិស័យអប់រំដ៏មានគុណភាពតាំងពីថ្នាក់មត្តេយ្យរហូតដល់ឧត្តមសិក្សា ដើម្បីផ្ដល់ឱកាសដល់កុមារនិងយុវជនទទួលបាននូវការសិក្សាស្មើៗគ្នា ហើយលោកបានចំណាយពេលវេលា យកចិត្តទុកដាក់កសាងព្រះសហគមន៍ រួមទាំងហេដ្ឋារចនាសម្ព័ន្ធនានាដែលមានលក្ខណៈវិជ្ជមានខ្លាំង និងផ្ដល់យោបល់ណែនាំនិងបង្កើតនូវអ្វីដែលថ្មីៗជាអត្តសញ្ញាណសម្រាប់ព្រះសហគមន៍នៅកម្ពុជាជាច្រើន។
«តាមរយៈសកម្មភាពទាំងនេះខ្ញុំសង្ឃឹមថានឹងមានអ្នកជឿលើព្រះជាម្ចាស់កាន់តែច្រើនឡើង ដោយក្ដីក្លាហាននិងហ៊ានចូលរួម យកចិត្តទុកដាក់លើបញ្ហាសង្គមរបស់យើងដោយប្រើជំនឿដែលយើងមាន។» លោករតនាបន្ថែម។
លោកកាន់ប៊ុយ នាយកប្រតិបត្តិនៃមណ្ឌលអប់រំជំនឿសន្តអឺរ៉េណេ និយាយថា«ខ្ញុំចាប់អារម្មណ៍ទៅលើពាក្យដែលគាត់តែងតែនិយាយអំពីការប្រកាសដំណឹងល្អ ការអភិវឌ្ឍ និងការអប់រំ ហាក់បីដូចជាបានវចនាដ៏សំខាន់សម្រាប់គាត់ក្នុងការចាប់ផ្ដើមបេសកកម្ម» ដោយផ្អែកលើការយកចិត្តទុកដាក់ចំពោះវិស័យអប់រំ ការថែទាំ និងបណ្ដុះបណ្ដាលគ្រូអប់រំជំនឿ។
ប៊ុយបន្តថា ចំពោះការអភិវឌ្ឍន៍ គាត់បានឃើញថាគ្រប់សកម្មភាពទាំងអស់ដែលគាត់ធ្វើទាំងមណ្ឌលជនពិការ យុវជន និងការអភិវឌ្ឍទាំងនៅក្នុងភូមិ ទាំងអង្គការមនុស្សធម៌ និងទំនាក់ទំនងអន្តរសសាសនា ដែលគាត់យកចិត្តទុកដាក់អភិវឌ្ឍន៍ ក្នុងគំនិតឈ្លាសវៃដ៏អស្ចារ្យ។ ហើយការអស្ចារ្យទាំងអស់នេះមកពីព្រះអំណោយទានរបស់ព្រះជាម្ចាស់បំភ្លឺគាត់។
លោកអូលីវីយ៉េ ជ្មីតហស្លេ បានមកដល់ប្រទេសកម្ពុជាកាលពីថ្ងៃទី៩ ខែវិច្ឆិកា ឆ្នាំ១៩៩៨ក្នុងនាមជាបូជាចារ្យកាតូលិក។ លោកបានចាប់ផ្ដើមសកម្មភាពដំបូងនៅតំបន់កំពតនិងតាកែវ ក្នុងឆ្នាំ២០០១ ស្ថិតក្នុងភូមិភាគភ្នំពេញ។ បេសកជនរូបនេះ បានប្រាប់ថា កុំគិតថាយើងជ្រើសរើសផ្លូវរបស់យើង គឺព្រះជាម្ចាស់ដែលជ្រើសរើសឲ្យ និងព្រះជាម្ចាស់ការពារថែរក្សានៅក្នុងព្រះហឫទ័យប្រណីសន្ដោស។
នៅក្នុងព្រះសហគមន៍ចំការទៀង លោកបូជាចារ្យអូលីវីយ៉េ បានខិតខំបង្កើតព្រះសហគមន៍ដែលមានគ្រីស្តបរិស័ទម្នាក់ និងមានកម្មវិធីអប់រំជាច្រើនសម្រាប់កុមារតូចរហូតដល់យុវជន ដើម្បីផ្សាយដំណឹងល្អដល់ប្រជាជនក្នុងភូមិតូចមួយនេះ។
រយៈពេលជាង២០ឆ្នាំ ព្រះសហគមន៍នេះបានសាបព្រោះដំណឹងល្អដល់តំបន់ផ្សេងៗទៀត ហើយបានបង្កើតព្រះសហគមន៍៧បន្ថែមទៀត គឺមានបាទី ត្រពាំងក្រញូង គិរីវង់ ព្រៃកប្បាស សន្តប៉ូល កំពង់អំពិល និងក្រុងតាកែវ។
លោក កុល ជាង ជាគ្រីស្តបរិស័ទដំបូងនៅព្រះសហគមន៍ចំការទៀង និងជាប្រធានព្រះសហគមន៍នេះ ដែលបានស្គាល់លោកអភិបាលអូលីវីយ៉េជាង២០ឆ្នាំមកហើយឲ្យដឹងថា លោកអភិបាលអូលីវីយ៉េតែងតែបង្ហាញផ្លូវដើម្បីប្រកាសដំណឹងល្អ ដោយរិះគិតក្នុងជួរគណៈកម្មការធ្វើយ៉ាងណាសហការរួបរួមគ្នាកសាងសេចក្ដីស្រឡាញ់ កសាងព្រះសហគមន៍ឱ្យមានភាពរីកចម្រើនទៅថ្ងៃមុខ។
គណៈកម្មការរូបនេះបន្តថា លើសពីនេះទៀតលោកគង្វាលរូបនេះតែងយកចិត្តទុកដាក់ជាមួយព្រះសង្ឃនិងបងប្អូនគ្រប់សាសនា គឺជាគំរូសម្រាប់គាត់ផ្ទាល់។
បច្ចុប្បន្ននេះ ព្រះសហគមន៍មណ្ឌលសកម្មភាពតាកែវ មានកម្មវិធីជាច្រើនដូចជា កម្មវិធីអប់រំជំនឿ កម្មវិធីអប់រំកុមារនិងយុវជនកាយឫទ្ធិ កម្មវិធីសិក្សាពីកម្រិតមត្តេយ្យសិក្សាដល់ឧត្តមសិក្សា កម្មវិធីអប់រំនិងសម្តែងសិល្បៈ កម្មវិធីអភិវឌ្ឍជនបទ គម្រោងសិប្បកម្មតម្បាញសូត្រដោយក្រុមស្ត្រី ភូមិសម្រាប់កុមារមានពិការភាព កម្មវិធីអេកូទេសចរនៅភ្នំវល្លិ៍ ជាដើម។
អ្នកស្រី ខា លីន និងក្រុមគ្រួសារត្រូវបានលោកអភិបាលជួយគាំទ្រទាំងថវិកា ស្មារតី សុខភាព និងការសិក្សារបស់កូនៗ តាំងពីឆ្នាំ២០០១ ដោយសារពួកគាត់មានផ្ទុកមេរោគអេដស៍ ហើយបានទទួលជ្រមុជទឹកក្នុងឆ្នាំ២០១៥ ដោយសារសកម្មភាពមនុស្សធម៌ដែលគាត់បានទទួលនិងមើលឃើញ។
សព្វថ្ងៃអ្នកស្រីនិងគ្រួសាររស់នៅក្នុងតំបន់ព្រះសហគមន៍ចំការទៀងក្នុងខេត្តតាកែវ។ អ្នកស្រីលីនរៀបរាប់ទាំងទឹកភ្នែកទៀតថា «សេចក្ដីស្រឡាញ់របស់លោកអភិបាលខ្ញុំគ្មានមធ្យោបាយអ្វីតបស្នងក្រៅពីជួយរៀបចំផ្កានៅក្នុងព្រះវិហារនិងចូលរួមគ្រប់សកម្មភាពរបស់ព្រះសហគមន៍ ដោយមិនត្រូវការប្រាក់ខែអីទេ។»
មានប្រសាសន៍កាលពីថ្ងៃទី២៥ ខែមិថុនា លោកអភិបាលអូលីវីយ៉េ ឲ្យដឹងថា ខួប២៥ឆ្នាំថ្ងៃនេះ ជាពេលវេលាដែលត្រូវអរព្រះគុណព្រះជាម្ចាស់ដែលបានថែរក្សាព្រះហសគមន៍និងរូបលោក និងរបៀបដែលព្រះអង្គបានបំភ្លឺផ្លូវជីវិត ដើម្បីឲ្យយើងរួមគ្នាសាបព្រោះជាមួយគ្រីស្តបរិស័ទពីដើមរហូតដល់សព្វថ្ងៃ។
លោកអភិបាលបន្ថែមថា ទាំងអស់នេះ ជាស្នាព្រះហស្តរបស់ព្រះជាម្ចាស់ដែលធ្វើឡើងតាមរយៈមនុស្សយើងដែលជាជនតូចតាច។
លោកបញ្ជាក់ថា «ជាឱកាសមួយដែលព្រះជាម្ចាស់ប្រើយើងជាឧបករណ៍របស់ព្រះអង្គ ដើម្បីចែករំលែកជីវិតដែលព្រះជាម្ចាស់ប្រទានឲ្យ។»
លោកអភិបាលអូលីវីយ៉េ ជ្មីតហស្លេ ប្រសូតនៅថ្ងៃទី២៦ ខែមិថុនា ឆ្នាំ១៩៧០ បានទទួលអគ្គសញ្ញាតែងតាំងជាបូជាចារ្យកាតូលិក នៅថ្ងៃទី ២៨ ខែមិថុនា ឆ្នាំ១៩៩៨ ក្នុងក្រុមគ្រួសារសាសនទូតក្រៅប្រទេសក្រុងប៉ារីស នៅប្រទេសបារាំង។ លោកបានមកដល់ប្រទេសកម្ពុជានៅចុងឆ្នាំ១៩៩៨។ ហើយបានទទួលការតែងតាំងជាអភិបាលនាថ្ងៃទី២០ ខែមីនា ឆ្នាំ២០១០។
ក្នុងឱកាសខួប២៥ឆ្នាំនេះ លោកអភិបាលអូលីវីយ៉េ ស្រមៃថាលោកនឹងមានជីវិតសាមញ្ញធម្មតាដើម្បីរស់នៅនិងបម្រើគ្រីស្តបរិស័ទឯទៀតៗ និងដើម្បីបន្តណែនាំអ្នកជំនាន់ក្រោយជាខ្មែរឲ្យបន្តធ្វើជាតំណាងនៃសេចក្ដីសុខសាន្តរបស់ព្រះជាម្ចាស់ ដោយ ធ្វើដំណើររួមគ្នានៅក្នុងផ្លូវថ្មីនៃជីវិត ជាពិសេសទូលអង្វរព្រះបិតាសូមប្រទានគង្វាលដ៏សប្បុរសសម្រាប់ព្រះសហគមន៍លើទឹកដីកម្ពុជា៕
សួន ស្រីហួច ដាលីស
