អភិបូជាថ្ងៃព្រហស្បតិ៍ពិសិដ្ឋ
នៅព្រះសហគមន៍ព្រះកុមារយេស៊ូ បឹងទំពន់
ភ្នំពេញខាងត្បូង ថ្ងៃទី៦ ខែមេសា ឆ្នាំ២០២៣
បងប្អូនជាទីស្រឡាញ់
ប្រសិនបើ បងប្អូនបានធ្វើដំណើរជាមួយយើងនៅក្នុងភូមិភាគភ្នំពេញ ពីថ្ងៃពុធអាទិត្យមុនក្នុងពិធីព្រះពរលើប្រេងពិសិដ្ឋ ជាមួយលោកបូជាចារ្យទាំងអស់ និងថ្ងៃអាទិត្យបុណ្យហែស្លឹក ខ្ញុំបានទេសនាអំពី “យើងជាអ្នកចម្បាំងការពារពន្លឺ”។ ពីមួយថ្ងៃទៅមួយថ្ងៃ ជាពិសេសនៅក្នុងអាទិត្យពិសិដ្ឋនេះ បន្តរិះគិតរួមជាមួយគ្នាអំពីការប្រយុទ្ធ ដែលមាននៅក្នុងពិភពលោក រវាងព្រះពន្លឺដែលមកពីព្រះជាម្ចាស់នឹងភាពងងឹត។ ព្រះយេស៊ូមានព្រះបន្ទូលថា “ខ្ញុំជាពន្លឺនៃពិភពលោក” ព្រះយេស៊ូមានព្រះបន្ទូលថា “ខ្ញុំជាផ្លូវ ខ្ញុំជាជីវិត ខ្ញុំជាសេចក្ដីពិត”។ យើងនឹកឃើញដល់ព្រះយេស៊ូដែលបានយកភក់លាយជាមួយទឹកឱស្ឋរបស់ព្រះអង្គ ដាក់លើភ្នែកមនុស្សខ្វាក់ នៅពេលនោះ មនុស្សខ្វាក់បានមើលឃើញ។
បងប្អូនជាទីស្រឡាញ់ យប់នេះដែលព្រះយេស៊ូកំពុងជប់លៀងបុណ្យចម្លងតាមសាសនាយូដា ដែលយើងបានស្ដាប់នៅក្នុងអត្ថបទទី១។ រំលឹកអំពីជនជាតិហេប្រឺ ដែលបានចេញពីកណ្ដាប់ដៃនៃជនជាតិអេហ្ស៊ីប។ នៅពេលនោះ ព្រះយេស៊ូកំពុងជប់លៀងជាមួយក្រុមសាវ័កតាមប្រពៃណីសាសនាយូដា បុណ្យចម្លង។ នៅពេលហ្នឹងនៅខាងក្រៅគឺងងឹតហើយ យើងដឹងនៅពេលយូដាអ៊ីស្ការីយូតចេញពីបន្ទប់ជប់លៀង នៅពេលនោះងងឹតហើយ។ ប៉ុន្តែ មិនមែនតែងងឹតនៅខាងក្រៅទេ ងងឹតនៅក្នុងដួងចិត្ត ជាពិសេសនៅក្នុងដួងចិត្តលោកយូដា។ នៅពេលនោះ ភាពងងឹតរបស់មារសាតាំងកំពុងធ្វើការនៅក្នុងដួងចិត្តរបស់គាត់ ដោយសារបងប្អូនជាទីស្រឡាញ់កុំឲ្យយើងភ្លេច ការប្រយុទ្ធរបស់យើង មិនមែនជាការប្រយុទ្ធនឹងសត្រូវណាម្នាក់ដែលមកពីខាងក្រៅយើង។ ដូចព្រះយេស៊ូបានរំលឹកដល់គណៈផារីស៊ីពីដើម “អ្វីៗទាំងអស់ដែលមិនបរិសុទ្ធ មិនចូលតាមម្ហូបអាហារដែលយើងញ៉ាំ អ្វីៗទាំងអស់ដែលមិនបរិសុទ្ធចេញពីមាត់របស់យើង ដោយសារចេញពីដួងចិត្តរបស់យើងតែម្ដង”។
ពិតមែន នៅពេលយើងធ្វើដំណើរនៅក្នុងដួងចិត្តរបស់យើង យើងមើលឃើញភាពងងឹតដែលយើងមាន យើងមើលឃើញអំពើបាបដែលយើងមាន។ យើងដឹងថា ជីវិតចាប់ផ្ដើមនៅពេលព្រះយេស៊ូនៅវាលរហោស្ថាន នៅពេលនោះព្រះយេស៊ូចាប់ផ្ដើមប្រយុទ្ធជាមួយមារសាតាំង នៅពេលនោះព្រះយេស៊ូបានឈ្នះមារសាតាំង។ ហេតុនេះហើយ នៅពេលព្រះយេស៊ូចេញពីវាលរហោស្ថាន ដើម្បីចាប់ប្រកាសដំណឹងល្អអស់រយៈពេលបីឆ្នាំ គ្រប់ស្នាមព្រះហស្ដរបស់ព្រះអង្គ គ្រប់ព្រះបន្ទូលរបស់ព្រះអង្គ គឺជាការអស្ចារ្យនៃជីវិត ការអស្ចារ្យនៃសេចក្ដីសុខសាន្ត ការអស្ចារ្យនៃពន្លឺ ការអស្ចារ្យនៃសេចក្ដីស្រឡាញ់។ នៅពេលនោះ មហាជនដែលជាមនុស្សខ្វាក់ មហាជនដែលជាជនពិការ មហាជនដែលជាអ្នកសុំទាន មហាជនដែលជាអ្នកមានបាប មហាជនដែលជាស្រីពេស្យា មហាជនដែលមានខ្មោចចូលនៅក្នុងខ្លួន បានយល់យ៉ាងច្បាស់ថា ព្រះយេស៊ូយាងមកដើម្បីរំដោះគេពីអំពើបាប រំដោះគេពីអ្វីៗទាំងអស់ដែលណែនាំឲ្យជាប់ក្នុងដួងចិត្ត។ ដោយសារ ព្រះយេស៊ូជាបរមគ្រូនៃព្រះពន្លឺ ជាព្រះអម្ចាស់នៃជីវិត ទោះបីម្ចាស់នៃមារសាតាំង បេសេប៉ូល ក៏ខ្លាចមិនហ៊ាននៅក្បែរព្រះយេស៊ូដែរ។ ដោយសារ ព្រះយេស៊ូបានឈ្នះមារសាតាំង ព្រះយេស៊ូបានឈ្នះភាពងងឹតពីដើម។ ដូច្នេះ ព្រះយេស៊ូជាពន្លឺ គឺមិនមែនតែនៅខាងក្រៅ ពេលព្រះយេស៊ូឡើងនៅលើភ្នំជាមួយក្រុមសាវ័ក ដើម្បីបង្ហាញអំពីឋានៈរបស់ព្រះអង្គជាព្រះអម្ចាស់។ ប៉ុន្តែ ពន្លឺពោរពេញនៅក្នុង ពន្លឺដ៏ពេញលក្ខណៈ។
បងប្អូនជាទីស្រឡាញ់ ឲ្យយើងនឹកឃើញយប់នេះព្រះយេស៊ូកំពុងជប់លៀងនៅក្នុងបន្ទប់ដ៏តូចមួយ នៅទីក្រុងយេរូសាឡឹម។ ជាបន្ទប់តូចមែនទែន បន្ទប់នេះមានទ្វារទាប មានបង្អួចតូចៗ នៅខាងក្រៅងងឹត នៅក្នុងបន្ទប់នោះប្រហែលមានតែទៀនតិចតួច ដើម្បីមើលឃើញនៅក្នុងងងឹត។ ប៉ុន្តែ នៅក្នុងភាពងងឹតដែលមាននៅក្នុងបន្ទប់ នៅក្បែរសាវ័កនៅក្បែរមារសាតាំង ដោយសារនៅពេលនោះមារសាតាំងបានចូលនៅក្នុងលោកយូដាហើយ។ ព្រះយេស៊ូយកនំបុ័ង ហើយមានព្រះបន្ទូលថា “នេះជារូបកាយរបស់ខ្ញុំ” ព្រះយេស៊ូបានយកស្រាទំពាំងបាយជូរ ហើយមានព្រះបន្ទូលថា “នេះជាលោហិតរបស់ខ្ញុំ”។ នៅពេលនោះ ប្រហែលគ្មានសាវ័កណាម្នាក់ដែលយល់អំពីអ្វីដែលព្រះយេស៊ូកំពុងតែមានព្រះបន្ទូល។ ប៉ុន្តែ ព្រះបន្ទូលរបស់ព្រះយេស៊ូនៅយប់នោះ ជាព្រះបន្ទូលនៃពន្លឺ ដែលមានអំណាច ដែលមានបារមី ដែលមានឫទ្ធានុភាពដ៏អស្ចារ្យ មិនដែលមាននៅលើផែនដីនេះពីព្រះជាម្ចាស់ដែលបានបង្កើតពិភពលោក ដោយព្រះបន្ទូលពីដើមរៀងមក។
ពិតមែន ព្រះបន្ទូលនេះជាព្រះបន្ទូលនៃអគ្គសញ្ញាដែលណែនាំឲ្យនំបុ័ង ណែនាំឲ្យស្រាទំពាំងបាយជូរទៅជារូបកាយ ទៅជាលោហិតរបស់ព្រះយេស៊ូដ៏ពិតប្រាកដ ពីយប់ហ្នឹងរហូតដល់ពេលនេះ។ នៅពេលព្រះយេស៊ូមានព្រះបន្ទូលនេះ នៅមុខក្រុមគ្រីស្តទូត “នេះជារូបកាយរបស់ខ្ញុំ នេះជាលោហិតរបស់ខ្ញុំ” នៅពេលនោះព្រះយេស៊ូកំពុងនិយាយអំពីពិធីជប់លៀងចុងក្រោយនៅស្ថានបរមសុខ។ ពិធីជប់លៀងដ៏អស់កល្បជានិច្ច ដែលពោរពេញទៅដោយព្រះពន្លឺដ៏ត្រចះត្រចង់ ដែលមកពីព្រះជាម្ចាស់ផ្ទាល់នៅក្នុងព្រះវិញ្ញាណដ៏វិសុទ្ធ។ ពិតមែន ព្រះបន្ទូលនៃព្រះពន្លឺសម្រាប់ជីវិតអស់កល្បជានិច្ច ដែលបន្តិចទៀតយើងស្ដាប់ម្ដងទៀតនៅក្នុងអភិបូជាយប់នេះ នេះជារូបកាយរបស់ខ្ញុំ នេះជាលោហិតរបស់ខ្ញុំ។ នេះជាអាថ៌កំបាំងដ៏អស្ចារ្យ ដែលយើងមានសិទ្ធិចូលរួមគ្រប់ពេលវេលា ដែលយើងចូលនៅក្នុងពិធីអភិបូជា។
បន្តិចទៀត នៅពេលយើងហែដើម្បីទទួលព្រះកាយព្រះគ្រីស្ត ដើម្បីចូលរួមនៅក្នុងគម្រោងការដ៏អស្ចារ្យនៃព្រះជាម្ចាស់ យើងដឹងថានៅពេលហ្នឹងលោហិតផ្ទាល់របស់ព្រះយេស៊ូ ព្រះកាយផ្ទាល់របស់ព្រះយេស៊ូ យាងចូលនៅក្នុងដួងចិត្តរបស់យើង នៅក្នុងភាពងងឹតរបស់យើង ដើម្បីជម្រះចិត្តគំនិតរបស់យើង ដើម្បីឲ្យយើងប្រែទៅជាអ្នកចម្បាំងការពារពន្លឺសម្រាប់ពិភពលោក។ សូមនឹកឃើញព្រះយេស៊ូមិនតែមានព្រះបន្ទូលថា “ខ្ញុំជាព្រះពន្លឺសម្រាប់ពិភពលោក” ព្រះយេស៊ូមានព្រះបន្ទូលថា “បងប្អូនទាំងអស់ជាពន្លឺសម្រាប់ពិភពលោក”។ បងប្អូនជាទីស្រឡាញ់ នេះជាព្រះបន្ទូលនៃពន្លឺ ប៉ុន្តែយើងត្រូវការមើលឃើញស្នាមព្រះហស្ដនៃពន្លឺដែលព្រះយេស៊ូប្រព្រឹត្តភ្លាម។ នៅពេលនោះ ព្រះយេស៊ូបានដោះអាវរបស់ព្រះអង្គចេញ ក្រវ៉ាត់ក្រមារនឹងចង្កេះ នៅពេលនោះព្រះយេស៊ូលាងជើងដល់ក្រុមគ្រីស្តទូត។ នេះជាស្នាមព្រះហស្ដដែលពោរពេញដោយការដាក់ខ្លួន ពោរពេញដោយការសុខចិត្តទៅជាមនុស្សដ៏តូចតាច នេះជាសញ្ញាសម្គាល់ដែលចេញពីព្រះហឫទ័យស្រឡាញ់របស់ព្រះយេស៊ូសម្រាប់យើង។
យប់នេះ បងប្អូនជាទីស្រឡាញ់ព្រះយេស៊ូមិនតែលាងជើងរបស់ក្រុមសាវ័ក ប៉ុន្តែព្រះអង្គបានណែនាំឲ្យដួងចិត្តរបស់យើង។ ដែលពោរពេញដោយអំពើបាប និងភាពងងឹត ដែលជាលក្ខណៈរបស់មនុស្សអាចជម្រះនៅក្នុងព្រះពន្លឺរបស់ព្រះយេស៊ូ តាមរយៈស្នាមព្រះហស្ដរបស់ព្រះអង្គដែលកំពុងលាងជើង។ យប់នេះ ល្ខោននៃមនុស្សលោកលែងលេងល្បែង យប់នេះស្នាមញញឹមរបស់យើងដែលពោរពេញដោយពុតត្បុតលែងមានហើយ។ យប់នេះ គឺសេចក្ដីពិតរបស់ព្រះយេស៊ូផ្ទាល់កំពុងលុតជង្គង់នៅមុខមនុស្សលោក ដើម្បីណែនាំឲ្យយើងមើលឃើញព្រះភ័ក្រ្តរបស់ព្រះជាម្ចាស់ ដើម្បីឲ្យដួងចិត្តរបស់យើងសម្លឹងមើលព្រះហឫទ័យស្រឡាញ់របស់ព្រះជាម្ចាស់ផ្ទាល់។
យប់នេះ ភាពងងឹតដែលយើងមាននៅក្នុងដួងចិត្តរបស់យើង ទទួលព្រះពន្លឺដ៏ថ្មីពីព្រះពន្លឺរបស់ព្រះជាម្ចាស់ផ្ទាល់។ ប៉ុន្តែ ប្រហែលយើងកំពុងញ័រដៃញ័រជើង នៅពេលយើងស្ដាប់ព្រះបន្ទូលរបស់ព្រះយេស៊ូ “បងប្អូនជាមានចិត្តបរិសុទ្ធ ប៉ុន្តែមិនមែនទាំងអស់”។ នៅពេលនោះ ព្រះយេស៊ូនឹកឃើញដល់យូដាសអ៊ីស្ការីយ៉ូត។ តើខ្ញុំជាដាសអ៊ីស្ការីយ៉ូតដែរឬ?
បងប្អូនជាទីស្រឡាញ់ ព្រះហស្ដនៃពន្លឺរបស់ព្រះយេស៊ូយប់នេះ ជាស្នាមព្រះហស្ដរបស់ព្រះអង្គដើម្បីបម្រើបងប្អូនរបស់យើង។ នៅពេលនោះ ព្រះយេស៊ូមានព្រះបន្ទូលតែមួយគត់ “សូមធ្វើតាម សូមយកខ្ញុំជាគម្រូ សូមលាងជើងឱ្យគ្នាទៅវិញទៅមក សូមបម្រើគ្នាទៅវិញទៅមក” ឲ្យយើងយល់នៅក្នុងដួងចិត្តរបស់យើង។ បន្តិចទៀត យើងលាងជើងឲ្យគ្នាទៅវិញទៅមក ជាពេលវេលាដើម្បីឲ្យយើងចូលនៅក្នុងការប្រយុទ្ធរបស់ព្រះជាម្ចាស់ ដើម្បីឲ្យព្រះពន្លឺរបស់ព្រះអង្គជម្រះចិត្តគំនិតរបស់យើងផ្ទាល់ ដើម្បីឲ្យយើងអាចចូលនៅក្នុងពិភពលោកនេះ ដោយទៅជាអ្នកបម្រើ និងអ្នកដែលស្រឡាញ់ដូចព្រះយេស៊ូផ្ទាល់។
បងប្អូនជាទីស្រឡាញ់ ព្រះបន្ទូលពោរពេញទៅដោយព្រះពន្លឺរបស់ព្រះយេស៊ូ ស្នាមព្រះហស្ដពោរពេលទៅដោយពន្លឺរបស់ព្រះយេស៊ូ ជាអំណោយទានដែលយើងទទួលយប់នេះ ដើម្បីត្រៀមខ្លួនសម្រាប់ថ្ងៃស្អែកចូលនៅក្នុងការប្រយុទ្ធចុងក្រោយបំផុត។ ការប្រយុទ្ធដ៏កំពូល គឺការប្រយុទ្ធនៅលើព្រះឈើឆ្កាង។ ព្រះពន្លឺ សេចក្ដីស្រឡាញ់ សុខសន្តិភាព ជាពាក្យតែមួយដែលយើងមើលឃើញនៅក្នុងព្រះយេស៊ូផ្ទាល់ “ឱ! ព្រះយេស៊ូអើយ! សូមអាណិតមេត្តាទូលបង្គំ ឱ! ព្រះយេស៊ូអើយ! សូមសង្គ្រោះទូលបង្គុំផង ឱ! ព្រះយេស៊ូអើយ! សូមបង្រៀនឲ្យបង្គំទៅជាអ្នកបម្រើដូចព្រះអង្គបានបម្រើទូលបង្គំ ឱ! ព្រះយេស៊ូអើយ! សូមបង្រៀនទូលបង្គំឲ្យចេះស្រឡាញ់បងប្អូនឯទៀតៗដូចព្រះអង្គបានស្រឡាញ់ទូលបង្គំដែរ ឱ! ព្រះយេស៊ូអើយ! សូមបើកដួងចិត្តរបស់ទូលបង្គំ ដើម្បីឲ្យទូលបង្គំមើលឃើញព្រះហឫទ័យស្រឡាញ់របស់ព្រះអង្គផ្ទាល់ ឱ! ព្រះយេស៊ូអើយ! សូមលាងទាំងខ្លួនរបស់ទូលបង្គំផង ឱ! ព្រះយេស៊ូអើយ! ទូលបង្គំស្រឡាញ់ព្រះអង្គអស់ពីដួងចិត្ត ឱ! ព្រះយេស៊ូអើយ! សូមអាណិតទូលបង្គំផង ទូលបង្គំជាអ្នកមានបាប”។ អាម៉ែន។
+ លោកអភិបាល អូលីវីយ៉េ ជ្មីតហស្លេ
អភិបាលព្រះសហគមន៍កាតូលិកកម្ពុជា
ភូមិភាគភ្នំពេញ
