អភិបូជាបុណ្យសពលោកតា ហ្វ្រង់ស្វ័រនន
ធ្វើនៅព្រះសហគមន៍សន្តីម៉ារីញញឹម ចំការទៀង
តាកែវ ថ្ងៃទី១៨ ខែកញ្ញា ឆ្នាំ២០២២
| អត្ថបទទី១៖ ធីម៉ូថេ ទី១ ២,១-៨ ទ្រង់សព្វព្រះហឫទ័យឲ្យមនុស្សទាំងអស់ បានទទួលការសង្គ្រោះ។ ១ធម ២,៤ ដំណឹងល្អ៖ លូកា ៦,២០-២៦ អ្នករាល់គ្នាដែលជាជនក្រខ្សត់អើយ! អ្នកមានសុភមង្គលហើយ។ លក ៦,២០ |
បងប្អូនជាទីស្រឡាញ់
ថ្ងៃនេះ យើងជួបជុំគ្នានៅក្នុងពេលវេលាមួយណែនាំឲ្យយើងអធិដ្ឋានរួមជាមួយគ្នា នៅក្នុងគ្រួសារដែលជាព្រះសហគមន៍កាតូលិក សម្រាប់លោកតា នន ហ្វ្រង់ស្វ័រ ដែលបានទទួលមរណភាពពីព្រឹកមិញ។ តាមពិត ថ្ងៃអាទិត្យទូទៅមិនមែនថ្ងៃដើម្បីធ្វើបុណ្យសព ប៉ុន្តែនៅក្នុងព្រះសហគមន៍លើកលែងតែថ្ងៃឱឡារិក យើងមានសិទ្ធិធ្វើបុណ្យសពនៅថ្ងៃអាទិត្យ។ ថ្ងៃអាទិត្យ ជាថ្ងៃដែលយើងគោរពព្រះយេស៊ូដែលមានព្រះជន្មរស់ឡើងវិញ ជាថ្ងៃដែលយើងគោរពព្រះយេស៊ូដែលឈ្នះសេចក្ដីស្លាប់ ដើម្បីណែនាំឲ្យមនុស្សលោកមានជីវិតអស់កល្បជានិច្ច។
ថ្ងៃនេះ ដែលយើងអធិដ្ឋានសម្រាប់វិញ្ញាណក្ខ័ន្ធរបស់លោកតា នន ហ្វ្រង់ស្វ័រ ទៅឡើងស្ថានបរមសុខ ជាពេលវេលាមួយដើម្បីនឹកឃើញដល់ព្រះយេស៊ូ ដែលមានព្រះជន្មរស់ឡើងវិញ និងដើម្បីនឹកឃើញដល់ជំនឿរបស់យើងដែរ។ នៅឆ្នាំ២០១៧ ដែលគាត់ បានធ្វើដំណើរដល់ភូមិចំការទៀង ជាមួយយាយដែលជាប្អូនស្រីគាត់។ មណ្ឌលសុខសាន្ត បានទទួលស្វាគមន៍ដោយសារគាត់ទាំងពីរនាក់គ្មានទីពឹង និងអត់មានកន្លែងនៅដើម្បីមានសេចក្ដីសុខនៅក្នុងជីវិត។ ដូច្នេះ ខ្ញុំជឿថាសម្រាប់តា នន ដូចជាសម្រាប់យាយដែរ មណ្ឌលសុខសាន្តជាភូមិណែនាំឲ្យមានសេចក្ដីសុខ។ បន្តិចម្ដងៗ ក៏បានចូលនៅក្នុងជីវិតមណ្ឌលសុខសាន្តយើង ជាមួយមណ្ឌលទទួលនិងថែទាំកូនពិការ គាត់ដូចជាបានរកឃើញគ្រួសារមួយថ្មី។
ខ្ញុំរើសអត្ថបទគម្ពីរថ្ងៃនេះ ដោយសារខ្ញុំគិតថាអត្ថបទគម្ពីរ ដូចជាស៊ីជម្រៅនឹងលោកតាដែលបានទទួលមរណភាព។ នៅពេលយើងស្ដាប់ អត្ថបទគម្ពីរនេះទូទៅយើងមិនយល់ទេ ដោយសារមូលហេតុអ្វីព្រះយេស៊ូមានព្រះបន្ទូលថា “អ្នកណាសោកសៅ មានន័យថាអ្នកណាយំមានសុភមង្គលហើយ អ្នកណាដែលមានចិត្តស្លូតបូតមានសុភមង្គលហើយ មនុស្សដែលស្រេកឃ្លានសេចក្ដីសុចរិតមានសុភមង្គលហើយ មនុស្សដែលមានចិត្តបរិសុទ្ធមានសុភមង្គលហើយ”។ តាមពិត ពេលយើងមើលអត្ថបទនីមួយៗដែលព្រះយេស៊ូមានព្រះបន្ទូលថ្ងៃនេះ ហាក់បីដូចជាជិវិតរបស់លោកតា។ លោកតាដែលកំពុងរកសេចក្ដីសុខក្នុងជីវិត តាមពិតនៅក្នុងជីវិតរបស់គាត់បានយំច្រើនណាស់ មានទុក្ខលំបាកច្រើននៅក្នុងជីវិតគាត់ ណែនាំឲ្យគាត់មកដល់ភូមិសុខសាន្តយើង។ ប៉ុន្តែ ពេលមកដល់ភូមិសុខសាន្តទោះបីគាត់បានយំក៏ដោយ គាត់បានរកឃើញសុភមង្គល ដោយសារព្រះជាម្ចាស់នឹងសម្រាលទុក្ខរបស់គាត់។
លោកតាជាមនុស្សស្លូតបូត ដែលចូលព្រះវិហារគ្រប់ពេលវេលា ទោះបីគាត់ឈឺជើងតែគាត់នៅតែចូលព្រះវិហារទៀត។ ដូចព្រះយេស៊ូមានព្រះបន្ទូលថា “អ្នកដែលស្លូតបូតមានសុភមង្គលហើយ ត្បិតពួកគេនឹងទទួលផែនដីទុកជាមរតក”។ ខ្ញុំជឿថានៅក្នុងជីវិតគាត់ច្រើនដង គាត់ជួបរឿងអយុត្តិធម៌ គាត់ជួបការមើលងាយ គាត់ជួបមនុស្សដែលមិនរវីរវល់ មិនអើពើអំពីគាត់។ នៅក្នុងជីវិតរបស់គាត់ គាត់ចង់មានសេចក្ដីសុចរិតមែនទែន ចង់មានយុត្តិធម៌ ចង់មានសេចក្ដីសុខ។ ព្រះយេស៊ូបន្តថា “អ្នកដែលស្រេកឃ្លានសេចក្ដីសុចរិត មានសុភមង្គលហើយ ត្បិតព្រះជាម្ចាស់នឹងប្រទានឲ្យពួកគេបានឆ្អែត”។ នៅថ្ងៃនេះ ដែលគាត់ទទួលមរណភាពប្រហែលគាត់ឆ្អែត ប៉ុន្តែមិនមែនគាត់ឆ្អែតនៅក្នុងន័យថាឥលូវនេះល្មមហើយ ឬឆ្អែតនៅក្នុងអត្ថន័យអត់ល្អ ប៉ុន្តែឆ្អែតដោយសារមើលឃើញព្រះជាម្ចាស់ផ្ទាល់នៅស្ថានបរមសុខ។
“អ្នកណាដាក់ចិត្តជាអ្នកក្រខ្សត់ អ្នកនោះមានសុភមង្គលហើយ ត្បិតពួកគេបានទទួលព្រះរាជ្យនៃស្ថានបរមសុខ”។ ពាក្យក្រខ្សត់ មិនមែនថាអ្នកក្រីក្រតែប៉ុណ្ណឹង ពាក្យក្រខ្សត់មានន័យថាជីវិតដូចជាអត់មានអ្វី ទ្រព្យសម្បត្តិក៏អត់។ ប៉ុន្តែ នៅក្នុងជីវិតក្រខ្សត់នេះអាចរកឃើញសុភមង្គល ដោយសារនៅក្នុងជីវិតដែលគាត់បានផ្ញើទៅលើព្រះជាម្ចាស់ រកឃើញសេចក្ដីសុខមួយថ្មី។ សេចក្ដីសុខនេះ ណែនាំឲ្យគាត់ទទួលព្រះរាជ្យនៃស្ថានបរមសុខ ថ្ងៃនេះជាថ្ងៃដែលយើងដឹងថាជីវិតរបស់គាត់ បានទទួលសេចក្ដីសុខ គាត់បានទទួលសេចក្ដីសុខជាមួយបងប្អូន និងបានរកឃើញព្រះរាជ្យនៃស្ថានបរមសុខនៅលើផែនដីខ្លះៗ។ នៅពេលយើងដឹងថា គាត់ទទួលមរណភាពបីដូចជាល្មម ដើម្បីធ្វើដំណើរនៅលើផែនដីនេះ ដើម្បីទទួលជីវិតពីព្រះជាម្ចាស់។
ដូច្នេះ ខ្ញុំគិតថាអត្ថបទគម្ពីរដែលយើងស្ដាប់ថ្ងៃនេះ ដូចជាស៊ីជម្រៅនឹងជីវិតរបស់គាត់ ជួនកាលយើងស្ដាប់អត្ថបទគម្ពីរនេះហើយយើងគិតថា មិនមែនសម្រាប់យើងទេ។ ប៉ុន្តែ តាមពិតជីវិតរបស់គាត់គឺហ្នឹង បានទទួលសេចក្ដីសុខសាន្តដោយសារបានដាក់ចិត្តជាអ្នកក្រខ្សត់។ រស់នៅពីមួយថ្ងៃទៅមួយថ្ងៃ ដោយផ្ញើជីវិតទៅលើព្រះជាម្ចាស់ ពីព្រឹកមិញបាននិយាយអំពីគ្រូអប់រំជំនឿ ប៉ុន្តែយើងឃើញជួនកាលយើងមិនត្រូវការអប់រំជំនឿជាចំណេះដឹង ប៉ុន្តែជារបៀបរស់នៅប្រចាំថ្ងៃ។ គាត់មានគ្រួសារថ្មីនៅភូមិសុខសាន្ត មានគ្រួសារថ្មីនៅក្នុងព្រះសហគមន៍ មានបងប្អូនដែលបានថែរក្សា យកចិត្តទុកដាក់ មានបងប្អូនដែលធ្វើដំណើរជាមួយគាត់រហូតដល់ដង្ហើមចុងក្រោយ មានយើងដែលនៅទីនេះ ដើម្បីផ្ញើគាត់ទៅលើព្រះជាម្ចាស់។ ដូច្នេះ នេះជាសុភមង្គលដែលលោកតាបានរកឃើញនៅក្នុងប៉ុន្មានឆ្នាំ ដែលគាត់នៅជាមួយយើងដែរ។
ថ្ងៃនេះ យើងអធិដ្ឋានសម្រាប់លោកយាយ យើងអធិដ្ឋានសម្រាប់បងប្អូន យើងអធិដ្ឋានសម្រាប់វិញ្ញាណក្ខ័ន្ធរបស់លោកតា នន ហ្វ្រង់ស្វ័រ ឲ្យគាត់រស់នៅក្នុងសេចក្ដីសុខនៅឋានបរមសុខ។ យើងសុំព្រះជាម្ចាស់ទទួលវិញ្ញាណក្ខ័ន្ធគាត់ដ៏ពេញលក្ខណៈ ដោយសារពិតមែនគាត់បានផ្ញើជីវិតរបស់គាត់ចុងក្រោយទៅលើព្រះជាម្ចាស់។ ដោយដាក់ចិត្តជាអ្នកក្រខ្សត់ ថ្ងៃនេះគាត់មានសុភមង្គលដោយសារគាត់បានទទួលព្រះរាជ្យនៃស្ថានបរមសុខដ៏ពេញលក្ខណៈ។ អាម៉ែន៕
+ លោកអភិបាល អូលីវីយ៉េ ជ្មីតហស្លេ
អភិបាលព្រះសហគមន៍កាតូលិកកម្ពុជា
ភូមិភាគភ្នំពេញ
