ពិធីប្រសិទ្ធីពរលើគ្រូអប់រំជំនឿសម្រាប់តំបន់ភ្នំពេញនិងតាខ្មៅ
ធ្វើនៅមជ្ឈមណ្ឌលព្រះសហគមន៍ភ្នំពេញថ្មី
ភ្នំពេញ ថ្ងៃទី២៩ ខែតុលា ឆ្នាំ២០២២
| អត្ថបទទី១៖ ភីលីព ១,១៨-២៦ ឲ្យបងប្អូនបានចម្រើនឡើង ទាំងមានអំណរមកពីជំនឿ។ ភីល ១,២៥ ដំណឹងល្អ៖ ម៉ាថាយ ១៣,១-៩ មានបុរសម្នាក់ចេញទៅព្រោះគ្រាប់ពូជ។ មថ ១៣,៣ |
បងប្អូនជាទីស្រឡាញ់
បងប្អូនដែលបានចូលរួមនៅក្នុងពិធីតែងតាំងលោកអភិបាល លី ថ្មីៗនេះបានស្ដាប់នៅពេលប្រគល់មួកទៅលោកអភិបាល លី។ មួកជាសញ្ញាសម្គាល់នៃការអប់រំ ដោយសារលោកអភិបាលមានតួនាទីគ្រប់គ្រង មានតួនាទីណែនាំឲ្យគ្រីស្តបរិស័ទទៅជាអ្នកដ៏វិសុទ្ធ និងមានតួនាទីអប់រំ។ ដូច្នេះ ពេលលោកអភិបាលទេសនាមិនមែនទេសនាល្មមៗលេងៗ ប៉ុន្តែជាពេលវេលាមួយដើម្បីឲ្យយើងចូលនៅក្នុង អាថ៌កំបាំងរបស់គម្រោងការនៃការសង្រ្គោះ តាមរយៈព្រះបន្ទូលរបស់ព្រះជាម្ចាស់។
ថ្ងៃនេះ យើងបានជ្រើសរើសព្រះបន្ទូលមួយ ដែលដូចជាបង្ហាញអំពីតួនាទីរបស់យើងដែរ “មានបុរសម្នាក់ចេញទៅព្រោះគ្រាប់ពូជ ពេលគាត់ព្រោះមានគ្រាប់ពូជខ្លះធ្លាក់នៅលើដីល្អ ដីដែលមានថ្ម ដីដែលមានបន្លា”។ អ្វីដែលខ្ញុំចង់ឲ្យយើងនឹកឃើញគឺ មានបុរសម្នាក់ចេញទៅព្រោះគ្រាប់ពូជ ថ្ងៃនេះយើងបាននិយាយច្រើនអំពីអប់រំជំនឿ។ ប្រធានបទដែលលោកគ្រូ វង់ បានទុកសម្រាប់ពេលក្រោយ យើងមានតួនាទីមួយ គឺប្រកាសដំណឹងល្អ។ ដោយសារ ប្រសិនបើអត់មាននរណាដែលប្រកាសដំណឹងល្អដល់បងប្អូនឯទៀតៗ គេធ្វើដូចម្ដេចដើម្បីស្ដាប់ព្រះបន្ទូលហ្នឹង គេធ្វើដូចម្ដេចដើម្បីឲ្យព្រះបន្ទូលចូលនៅក្នុងខ្លួនគេ ប្រសិនបើគេអត់ស្ដាប់។ សម្រាប់យើងដែលជាគ្រូអប់រំជំនឿ យើងធ្វើដូចម្ដេចដើម្បីអប់រំជំនឿ ប្រសិនបើយើងអត់ដែលស្ដាប់ព្រះបន្ទូល។ កុំឲ្យយើងភ្លេច យើងមិនមែននៅក្នុងព្រះសហគមន៍ ដែលមានប្រវត្តិសាស្រ្តយូរឆ្នាំ ទោះបីយើងកើត៥០០ឆ្នាំហើយក៏ដោយ។ ប៉ុន្តែ យើងជាព្រះសហគមន៍ដែលសព្វថ្ងៃរស់នៅជាមួយបងប្អូនជាគ្រីស្តបរិស័ទជំនាន់ទី១ មានន័យថាមិនមែនពីជំនាន់ដើម។ នៅព្រះវិហារសន្តសិលា និងសន្តប៉ូលនេះ យើងមានបងប្អូនមួយចំនួនជាជំនាន់ទី១នៃគ្រីស្តបរិស័ទ ជួនកាលជំនាន់ទី២ដែរដោយសារមានកូនជាជំនាន់ទី២ ដូច្នេះយើងអត់មានជំនាន់ច្រើនទេ។
តួនាទីរបស់យើងមិនមែនតែអប់រំជំនឿ ប៉ុន្តែនឹកឃើញដូចពីសម័យដើម គ្រូអប់រំជំនឿជាអ្នកដែលចេញ ដែលសាបព្រោះ។ ដែលប្រកាសដំណឹងល្អ ដើម្បីឱ្យមនុស្សយ៉ាងច្រើនបានស្ដាប់ នេះជាតួនាទីរបស់យើងជាលោកបូជាចារ្យ។ មិនមែនតែអង្គុយចាំឲ្យគ្រីស្តបរិស័ទមក ប៉ុន្តែយើងធ្វើដូចម្ដេចដើម្បីណែនាំឲ្យព្រះបន្ទូលរបស់ព្រះជាម្ចាស់ ទៅដល់ទីដាច់ស្រយាលនៃផែនដី។ នេះជាព្រះបន្ទូលចុងក្រោយរបស់ព្រះយេស៊ូ មុនព្រះអង្គឡើងស្ថានបរមសុខ ធ្វើពិធីជ្រមុជទឹកដោយនាមព្រះបិតា ព្រះបុត្រា និងព្រះវិញ្ញាណដ៏វិសុទ្ធ សូមព្យាបាលគេទៅដល់ទីដាច់ស្រយាលនៃផែនដី។ ថ្មីៗនេះ យើងបានរៀបចំទិវាប្រកាសដំណឹងល្អ មានប្រធានបទសម្រាប់ឆ្នាំនេះ គឺ “សូមទៅប្រកាសដំណឹងល្អដល់ទីដាច់ស្រយាលនៃផែនដី”។ យើងអាចនិយាយថា មណ្ឌលសកម្មភាពភ្នំពេញខាងត្បូង ភ្នំពេញខាងជើង ភ្នំពេញថ្មី និងតាខ្មៅ ជាផ្នែកមួយនៃទីដាច់ស្រយាលនៃផែនដី ដែលយើងទទួលខុសត្រូវផ្ទាល់ខ្លួន។
ថ្ងៃនេះយើងទូលអង្វរព្រះជាម្ចាស់ជួយយើង ដើម្បីឱ្យយើងទៅជាអ្នកសាបព្រោះ ដើម្បីឱ្យយើងទៅជាអ្នកដែលណែនាំឱ្យព្រះសហគមន៍របស់យើង បងប្អូនរបស់យើង លោកឪពុក បងស្រី បានសាបព្រោះ អាចដុះឡើងដែរ។ ពិតមែន មានដីខ្លះពោរពេញដោយបន្លា មានដីខ្លះដែលពោរពេញដោយថ្ម មានដីខ្លះមានជីជាតិល្អ។ ប៉ុន្តែស៊ីសងយើងខ្លះៗដែរ ដោយសារប្រសិនបើយើងជួយដកថ្មចេញនៅក្នុងដួងចិត្តរបស់បងប្អូនដែលយើងទទួល ប្រសិនបើយើងជួយកាត់បន្លាចេញក៏អាចធ្វើឱ្យមានដីស្អាតវិញ។ ប្រសិនបើយើងថែមជីជាតិខ្លះៗ ប្រសិនបើយើងស្រោចទឹកខ្លះៗក៏អាចធ្វើឱ្យដីស្អាតទៅៗ អាចមានផ្កានិងផ្លែយ៉ាងច្រើន។ នេះជាតួនាទីរបស់យើង យើងមិននិយាយថាមនុស្សនេះអស់សង្ឃឹមហើយ ដោយសារសុទ្ធតែថ្ម ដោយសារសុទ្ធតែបន្លា។ កុំឲ្យយើងភ្លេច ម្ចាស់ដែលកាត់ដើមឈើដោយសារអត់មានផ្លែ អ្នកបម្រើថាទុកសិនមួយឆ្នាំ ពីរឆ្នាំ បីឆ្នាំទៀត យើងនឹងខិតខំកែច្នៃឲ្យមានផ្លែ ប្រសិនបើអត់មានផ្លែយើងកាត់ចោល។
ពីសម័យដើម មានច្រើនដែលគេចង់ទៅជាគ្រីស្តបរិស័ទ និងមានគ្រីស្តបរិស័ទដទៃគេរិះគន់ គេថាមើលគាត់ គាត់ចង់ចូលដោយសារមានប្រយោជន៍គាត់ គាត់ចង់ចូលដោយសារគាត់ចង់បាននេះចង់បាននោះ។ សព្វថ្ងៃក៏យើងបានស្ដាប់នេះដែរ គាត់ចង់ចូលសាសនាដោយសារគាត់ចង់បានទៅរៀន ចង់ឱ្យគេជួយគាត់។ ប៉ុន្តែ កុំវិនិច្ឆ័យលឿនពេកដោយសារព្រះជាម្ចាស់មានពេលវេលាផ្សេង ពីពេលវេលារបស់យើងដែលជាមនុស្ស។ ព្រះជាម្ចាស់ស្គាល់ចិត្តរបស់មនុស្ស យើងត្រូវការចូលនៅក្នុងគម្រោងការរបស់ព្រះជាម្ចាស់ ដើម្បីជួយជានិច្ច។ ជួយជានិច្ច ដើម្បីឲ្យម្នាក់ដែលថាឥលូវនេះខ្ញុំចង់ចូលនៅក្នុងពន្លឺថ្មី សម្រាប់ជីវិតរបស់ខ្ញុំ មានឱកាស មានពេលដើម្បីកែប្រែចិត្តគំនិត។ ពេលនិយាយអំពីកែប្រែចិត្តគំនិត មុននិយាយដល់គេយើងនិយាយដល់យើងផ្ទាល់ខ្លួនសិន។
ថ្ងៃនេះ ខ្ញុំសូមអធិដ្ឋានដើម្បីឱ្យយើងទាំងអស់ដែលជាលោកអភិបាល ដែលជាបងប្រុសបងស្រី ដែលជាបូជាចារ្យ ដែលជាគ្រូអប់រំជំនឿ ឲ្យយើងបន្តកែប្រែចិត្តគំនិត ដើម្បីមានជំនឿរឹងមាំ ដើម្បីអប់រំណែនាំប្អូនៗដែលចង់ស្គាល់ព្រះយេស៊ូ ចង់ស្គាល់ព្រះសហគមន៍ ចង់ស្គាល់ជំនឿផ្ទាល់ខ្លួន។ យើងត្រូវការថែរក្សា ជំនឿយ៉ាងរឹងមាំ សេចក្ដីស្រឡាញ់យ៉ាងសកម្ម និងសេចក្ដីសង្ឃឹមជានិច្ច។ ដូច្នេះ យើងអាចធ្វើដំណើររួមជាមួយគ្នា ដើម្បីបន្តប្រកាសដំណឹងល្អ និងណែនាំឲ្យបងប្អូនយ៉ាងច្រើន អាចទទួលជីវិតថ្មីនៅក្នុងព្រះយេស៊ូគ្រីស្តផ្ទាល់។ អាម៉ែន៕
+ លោកអភិបាល អូលីវីយ៉េ ជ្មីតហស្លេ
អភិបាលព្រះសហគមន៍កាតូលិកកម្ពុជា
ភូមិភាគភ្នំពេញ
