គ្រីស្តបរិស័ទដែលបានទទួលពិធីជ្រមុជទឹកក្នុងឆ្នាំ២០២២ក្នុងភូមិភាគបាត់ដំបងមួយចំនួនបានចួបជុំគ្នា សិក្សាអំពីព្រះគម្ពីរ អគ្គសញ្ញានិងពិធីអភិបូជា កាលពីដើមខែវិច្ឆិកាកន្លងទៅនេះ នៅមណ្ឌលកាឡូស ប៉ូរូមេ ក្នុងខេត្តបាត់ដំបង។
លោកអភិបាលទេពច័ន្ទពិសិដ្ឋ អភិបាលនៃព្រះសហគមន៍កាតូលិកភូមិភាគបាត់ដំបងមានប្រសាសន៍ដល់សិក្ខាកាមយ៉ាងនេះថា គ្រីស្តបរិស័ទត្រូវមានព្រះគម្ពីរ ព្រោះព្រះគម្ពីរ ជាព្រះបន្ទូលរបស់ព្រះជាម្ចាស់ ដែលរៀបរាប់ឲ្យយើងស្គាល់ព្រះអង្គយ៉ាងច្បាស់លាស់។
លោកអភិបាលបន្ថែមថា «យើងចង់ស្គាល់ព្រះជាម្ចាស់ ចង់ស្គាល់ព្រះហឫទ័យរបស់ព្រះយេស៊ូ ចង់ដឹងអំពី ប្រាជ្ញាញាណដែលយើងត្រូវការសម្រាប់ជីវិត គឺសូមអានព្រះគម្ពីរ និងចូលរួមអភិបូជាជារៀងរាល់ថ្ងៃ។»
ការអានព្រះគម្ពីរពិតជាសំខាន់ណាស់ ដោយសារពេលយុវតី ថន អ៊ីស៊ីញ ពិបាកចិត្ត ឬមានបញ្ហាអ្វីមួយ អត្ថបទនៅក្នុងគម្ពីរបានជួយលើកទឹកចិត្តគាត់យ៉ាងច្រើន។
អ៊ីស៊ីញ មកពីព្រះសហគមន៍ស្វាយស៊ីសុផុន ឲ្យដឹងថា «មានតែព្រះគម្ពីរ ទេដែលធ្វើឲ្យខ្ញុំសប្បាយចិត្ត និងចិត្តស្ងប់បាន ហើយការអានព្រះគម្ពីរគឺធ្វើឲ្យ យើងកាន់តែជិតស្និទ្ធនឹងព្រះជាម្ចាស់។»
នេះជាសិក្ខាសាលាលើកទី២ដែលព្រះសហគមន៍ភូមិភាគបាត់ដំបងបានរៀបចំ សម្រាប់អ្នកទទួលអគ្គសញ្ញាជ្រុមុជទឹកថ្មី ដែលហៅថា ក្រុមពន្លកថ្មី។
កម្មវិធីនេះរៀបចំឡើងដោយគណៈកម្មការព្រះគម្ពីរកម្ពុជានៃភូមិភាគបាត់ដំបង ដែលទទួលខុសត្រូវដោយបូជាចារ្យ សិលា ទម្លាប់ សុផល ។
អ្នកស្រី ស្រី សុជុំ ជាគណៈកម្មការព្រះគម្ពីរកម្ពុជា នៃភូមិភាគបាត់ដំបង មានប្រសាសន៍ថា សិក្ខាសាលានេះសំដៅលើបងប្អូន ដែលទើបនឹងទទួលអគ្គសញ្ញាជ្រមុជទឹក។ ដូច្នេះហើយជំនឿពួកគាត់ប្រៀបដូចពន្លកថ្មីដែលទើបតែដុះពន្លក ដែលត្រូវការការថែទាំ ដូចជាយើងដាក់ទឹក ដាក់ជី ឲ្យមានភាពរឹងមាំនៃជំនឿ ដើម្បីឲ្យមានផលផ្លែ។
អ្នកស្រីសុជុំបញ្ជាក់ថា «ប្រសិនបើយើងជា គ្រីស្តបរិស័ទមិនបានអានព្រះគម្ពីរ គឺយើងអត់បានដឹងអំពីរបៀបដែលព្រះយេស៊ូបង្រៀន និងណែនាំយើងទេ។»
យុវជន លឹម វុទ្ធី មកពីព្រះសហគមន៍ប៉ោយប៉ែត បានចូលរួមកម្មវិធីនេះ ២លើករួចមកហើយនិយាយថា កម្មវិធីនេះបានជួយដល់គាត់ ទទួលបានបទពិសោធន៍ថ្មីៗ និងមេរៀនល្អៗពីលោកបូជាចារ្យ។
វុទ្ធីបន្ថែមថា « អភិបូជាពិតជា សំខាន់ណាស់សម្រាប់ខ្ញុំ ក៏ដូចជាគ្រីស្តបរិស័ទទាំងអស់ ទាំងបីជារវល់យ៉ាងណា ក៏ត្រូវឆ្លៀតពេលដើម្បីចូលរួមអភិបូជា ដើម្បីថ្វាយបង្គំ ព្រះជាម្ចាស់ និងស្តាប់ព្រះបន្ទូលរបស់ព្រះអង្គ ដើម្បីអនុវត្តន៍ក្នុងការរស់នៅ។»
សិក្ខាកាមដែលមកចូលរួមចំនួន៦២នាក់មកពីមណ្ឌល និងព្រះសហគមន៍នានា ក្នុងភូមិភាគបាត់ដំបង ដែលរៀបចំឡើងកាលពីថ្ងៃទី០៤-០៦ ខែវិច្ឆិកា ឆ្នាំ២០២២ កន្លងទៅ។ សិក្ខាកាមទាំងអស់បានឈ្វេងយល់បន្ថែមអំពី អគ្គសញ្ញាជ្រមុជទឹក ពិធីអភិបូជា និងអគ្គសញ្ញាលើកលែងទោស៕
ដោយសេង មួយ
