ព្រះសហគមន៍កាតូលិកភូមិភាគបាត់ដំបង បានរៀបចំសន្និបាតយុវជនរយៈពេល៤ថ្ងៃ ក្រោមប្រធានបទ «យុវជនជាកម្លាំងព្រះសហគមន៍ ធ្វើដំណើរជាមួយគ្នា ជាធ្លុងតែមួយចូលរួមប្រកាសដំណឹងល្អ» ដែលបានធ្វើឡើងកាលពីពេលថ្មីៗនេះ នៅព្រះសហគមន៍កាតូលិកខេត្តប៉ៃលិន ភាគនិរតីនៃប្រទេសកម្ពុជា មានទីតាំងស្ថិតនៅ ភូមិអូរពឺត សង្កាត់ទួលល្វា ក្រុងប៉ៃលិន ខេត្តប៉ៃលិន។
ព្រះសហគមន៍បានចាត់ទុកយុវជនជាកម្លាំងរបស់ព្រះសហគន៍នាពេលបច្ចុប្បន្ន។ នេះជាប្រសាសន៍របស់លោកបូជាចារ្យ ចនឡេស្ទ័រ ហៅ បុងបុង ជាតំណាងពេញសិទ្ធិរបស់លោកអភិបាល ទេព ច័ន្ទពិសិដ្ឋនៃភូមិភាគបាត់ដំបងនៅថ្ងៃបើកសន្និបាតយុវជនភូមិភាគ។
ក្នុងនោះដែរ លោកបានណែនាំឲ្យយុវជនរួមគ្នាកសាងព្រះសហគមន៍ ដោយសេចក្តីស្រឡាញ់ ធ្វើដំណើររួមគ្នាជាធ្លុងតែមួយ។
ក្នុងថ្ងៃទី២នៃសន្និបាត លោកអភិបាលទេព ច័ន្ទពិសិដ្ឋ ជាអភិបាលព្រះសហគមន៍ភូមិភាគបាត់ដំបង បានជួបសំណេះសំណាលជាមួយយុវជនតាមប្រព័ន្ធអនឡាញ ហ្ស៊ូម ខណៈពេលលោកកំពុងជួបប្រជុំរួមជាមួយលោកអភិបាលនានាក្នុងទីក្រុងរ៉ូមជាមួយសម្តេចប៉ាប។
លោកអភិបាលមានប្រសាសន៍ថា សូមឲ្យយើង រួមគ្នាជាធ្លុងតែមួយ មានចិត្តតែមួយក្រោមពន្លឺនៃព្រះវិញ្ញាណដ៏វិសុទ្ធ។ លោកបញ្ជាក់ថា សូមយុវជនកុំភ្លេច យើងចូលរួមប្រជុំសន្និបាត ជួបជុំគ្នាដោយយើងជាធ្លុងតែមួយ សូមឲ្យយើងចេះសាមគ្គីគ្នា យើងជាយុវជន ជាកម្លាំងព្រះសហគមន៍ ដែលត្រូវធ្វើឲ្យព្រះសហគមន៍រីកចម្រើន និងឲ្យមានដំណាក់កាលទៅខាងមុខ។
លោកបានបញ្ជាក់ទៀតថា «ពេលណាយើងសប្បាយចិត្តរួមជាមួយគ្នា យើងលើកទឹកចិត្តគ្នា គឺយើងរួមគ្នាប្រកាសដំណឹងល្អ (គឺ)យើងជាសាក្សីរបស់ព្រះជាម្ចាស់ យើងប្រកាសធម៌មេត្តារបស់ព្រះជាម្ចាស់។»
ការដើរតាមព្រះយេស៊ូជាចំណុចសំខាន់ ព្រោះយុវជនជាកម្លាំងរបស់ព្រះសហគមន៍។ នេះជាសម្តីរបស់កញ្ញា ទូច ជេននី មកពីមណ្ឌលនិស្សិតទេព អ៊ីម ក្នុងខេត្តបាត់ដំបង។
ជេននីបន្តថា នៅពេលដែលយុវជនរួមគ្នាជាធ្លុងតែមួយ ធ្វើឲ្យគេស្គាល់ព្រះសហគមន៍ច្រើនជាងមុន ព្រមទាំងធ្វើឲ្យព្រះសហគមន៍រីកចម្រើន ហើយយើងមកទីនេះគឺមកចូលរួមសន្និបាត មានន័យថាយើងមកបង្ហាញពីកម្លាំងរបស់ព្រះសហគមន៍។
លោក គ្រុយ វឌ្ឍ មកពីព្រះសហគមន៍សៀមរាប តំបន់អង្គរ ឲ្យដឹងថា កម្លាំងរបស់ព្រះសហគមន៍គឺការរួមគ្នា ហើយយុវជនជាកម្លាំងពិសេស ដូច្នេះ «ឲ្យយើងចេះស្រឡាញ់ និងចែករំលែកឲ្យគ្នា កុំប្រកាន់គ្នា ត្រូវចេះស្តាប់ និង ផ្តល់យោបល់ឲ្យគ្នា។»
ក្នុងរយៈពេល៤ថ្ងៃនៃសន្និបាត យុវជនចំនួន៣៥០នាក់ ដោយរួមទាំងតំណាងយុវជននៃភូមិភាគកំពង់ចាម និងភូមិភាគភ្នំពេញចូលរួមផង បានរិះគិតរួមគ្នាអំពីរបៀបធ្វើដំណើរក្នុងព្រះសហគមន៍ ក្នុងការប្រកាសដំណឹងល្អដល់អ្នកដទៃទៀត។
ជាមួយគ្នានេះដែរ ក៏មានមេរៀនមួយចំនួនពីបូជាចារ្យដូចជា យុវជនជាកម្លាំងរបស់ព្រះសហគមន៍ ការធ្វើដំណើររួមគ្នាជាព្រះសហគមន៍ និងការប្រកាសដំណឹងល្អជាដើម។ ហើយដើម្បីអនុវត្តជាក់ស្តែង និងឲ្យយុវជនធ្វើដំណើររួមគ្នាបាន លោកបូជាចារ្យដែលបានចូលរួមក្នុងអង្គសន្និបាត បានឲ្យយុវជនអធិដ្ឋានតាំងព្រះកាយព្រះគ្រីស្ត និងទទួលអគ្គសញ្ញាសម្រុះសម្រួល។
សន្និបាតយុវជនភូមិភាគបាត់ដំបងនេះ បានធ្វើឡើងកាលពីថ្ងៃទី០៦-០៩ ខែវិច្ឆិកា។ ជារៀងរាល់ឆ្នាំព្រះសហគមន៍កាតូលិកនៃភូមិភាគនីមួយៗគឺមានភ្នំពេញ បាត់ដំបង និងកំពង់ចាម បានរៀបចំសន្និបាតសម្រាប់យុវជនក្នុងភូមិភាគរៀងៗខ្លួន យ៉ាងហោចណាស់ម្តងក្នុង១ឆ្នាំ ដើម្បីឲ្យយុវជនរិះគិតរួមគ្នាប្រកាសដំណឹងល្អក្នុងតំបន់ដែលពួកគាត់កំពុងរស់នៅ៕
ដោយសេង មួយ
