លោកគ្រូ អ្នកគ្រូសាលាមត្តេយ្យនិងបឋម ក្នុងព្រះសហគមន៍កាតូលិកភូមិភាគបាត់ដំបងចំនួន៣៥នាក់ បានចូលរួមសិក្ខាសាលា ស្តីអំពី «យើងជាអ្នកកសាងអនាគតរបស់កុមារ» ដែលរៀបចំឡើងដោយក្រុមដូនជីបុត្រីព្រះនាងម៉ារីជាទីពឹងពំនាក់ (FMA) នៃសាលេស៊ានដុនបូស្កូ កាលពីថ្ងៃទី១២-១៥ ខែតុលា ធ្វើនៅសាលាដុនបូស្កូជ្រៃកោងបាត់ដំបង ស្ថិតនៅភូមិជ្រៃកោង សង្កាត់ស្លាកែត ខេត្តបាត់ដំបង
ដូនជី ដៅធី មីហាញ ជាដូនជីFMA និងជាគ្រូឧទ្ទេស មានប្រសាសន៍ថា គោលដៅសំខាន់ គឺឲ្យគ្រូបង្រៀនដឹងច្បាស់លាស់អំពីតួនាទីរបស់គាត់ជាគ្រូសាលាមត្តេយ្យ។
ដូនជីបន្ថែមថា កុមារក៏ជាតំណាងរបស់ព្រះជាម្ចាស់ដែរ ហើយការបង្រៀន គឺមិនត្រូវប្រកាន់ថា ជាកូនអ្នកមាន ឬកូនអ្នកក្រ អ្នកមិនពូកែ ឬពូកែនោះទេ។
ដូនជីមីហាញឲ្យដឹងទៀតថា ក្នុងសិក្ខាសាលានេះ «ខ្ញុំបានចែករំលែកជាមួយគ្រូ អំពីគម្រោងរក្សាការពារក្មេង និងជំនាញបង្រៀនក្មេងក្នុងការរស់នៅប្រចាំថ្ងៃ គឺឲ្យក្មេងៗដឹងថាអ្វីដែលជាគ្រោះថា្នក់ និងអ្វីដែលល្អ។»
«គុណភាព និងគុណធម៌» ជារឿងសំខាន់ដែលគ្រូត្រូវតែមាន ហើយការប្រើពាក្យសម្តីទៅកាន់កុមារគឺត្រូវតែជារបៀបវិជ្ជមាន។ គ្រូឧទ្ទេសរូបនេះបន្តថា ទោះបីពេលខ្លះកុមារនោះខូចបន្តិចក្តី ប៉ុន្តែគ្រូត្រូវមានរបៀបក្នុងការលើកទឹកចិត្តដល់សិស្ស ដើម្បីប្តូរនិងកែកូនសិស្ស។
លោក ឌី ចាន់ឧត្តម ជាគ្រូបង្រៀននៅសាលាបឋមសិក្សាឧបការគុណ ក្នុងខេត្តកំពង់ឆ្នាំងបានលើកឡើងថា ការអប់រំដល់កុមារគឺមានសារៈសំខាន់ ដោយសារវាជាមូលដ្ឋានគ្រឹះដំបូង និងជាពន្លកថ្មីដើម្បីអនាគតរបស់ពួកគាត់។
សព្វថ្ងៃនេះ លោកចាន់ឧត្តមកំពុងបង្រៀនកុមារដែលរស់នៅលើទឹកទន្លេ។ លោកបានលើកឡើងថា កុមារដែលរស់នៅលើទឹក គឺពួកគាត់អត់មានការអប់រំពីម្តាយឪពុកទេ ដោយសារតែឪពុកម្តាយមិនបានរស់នៅជាមួយពួកគាត់ ដោយត្រូវទៅធ្វើការរកប្រាក់ ដូច្នេះហើយ មានតែគ្រូបង្រៀនប៉ុណ្ណោះដែលអាចជួយណែនាំ និងអប់រំពួកគាត់។
កញ្ញា យ៉ុង យី ជាអ្នកគ្រូសាលាមត្តេយ្យសន្តីតេរេសា នៃព្រះសហគមន៍ចំណោម ខេត្តបន្ទាយមានជ័យឲ្យដឹងថា សិក្ខាសាលានេះ បានជួយដល់គាត់និងលោកគ្រូ អ្នកគ្រូផ្សេងទៀតអាចទទួលបទពិសោធន៍ថ្មីៗពីដូនជីមីហាញ និងយល់ដឹងអំពីវិធីដែលអាចបង្រៀនកុមារតូចៗរៀនស្គាល់ពីជីវិតខ្លួនឯង។
ក្រោយបញ្ចប់សិក្ខាសាលានេះ លោកគ្រូអ្នកគ្រូទាំងអស់បានទទួលវិញ្ញាបនបត្របញ្ជាក់ពីការចូលរួមផងដែរ។
លោកគ្រូ អ្នកគ្រូដែលបានមកចូលរួម មកពីសាលានេះព្រះសហគមន៍កាតូលិកដូចជា សាលាមត្តេយ្យសន្តយ៉ូសែបតាហែន សាលាមត្តេយ្យសន្តអន់ដ្រេនិគម សាលាមត្តេយ្យសន្តប៉ូលស្នឹង សាលាមត្តេយ្យដុនបូស្កូជ្រៃកោង សាលាមត្តេយ្យមាតានៃសន្តិភាពប៉ោយប៉ែត សាលាមត្តេយ្យសន្តីតេរេសាចំណោម សាលាមត្តេយ្យពន្លកថ្មីបាត់ដំបង សាលាមត្តេយ្យព្រះកុមារយេស៊ូទំពូង សាលាមត្តេយ្យសន្តអន់តូនខ្នាចរមាស សាលាមត្តេយ្យគោកជ័រ និងសាលាបឋមសិក្សាឧបការគុណកំពង់ឆ្នាំង៕
ដោយសេង មួយ
