សូមថ្លែងលិខិតរបស់គ្រីស្ដទូតប៉ូលផ្ញើជូនគ្រីស្ដបរិស័ទក្រុងអេភេសូ អភ ១,១-១០

ខ្ញុំប៉ូល ព្រះជាម្ចាស់សព្វព្រះហប្ញទ័យតែងតាំងជាសាសនទូតរបស់ព្រះគ្រីស្ដយេស៊ូ សូមជម្រាបមកបងប្អូនជាប្រជារាស្រ្ដដ៏វិសុទ្ធនៅក្រុងអេភេសូ ដែលជឿលើព្រះគ្រីស្ដ​​យេស៊ូ។ សូមព្រះជាម្ចាស់ជាព្រះបិតារបស់យើង និងព្រះអម្ចាស់យេស៊ូគ្រីស្ដប្រណី​សន្ដោស និងប្រទានសេចក្ដីសុខសាន្ដដល់បងប្អូន។ សូមលើកតម្កើងព្រះជាម្ចាស់ និងព្រះបិតារបស់ព្រះយេស៊ូគ្រីស្ដ ដែលជាព្រះអម្ចាស់​នៃយើង! ព្រះអង្គបានប្រោសប្រទានព្រះពរគ្រប់យ៉ាងផ្នែកខាងវិញ្ញាណពីស្ថានបរមសុខ​មកយើង ក្នុងអង្គព្រះគ្រីស្ដ។ ព្រះអង្គបានជ្រើសរើសយើងក្នុងអង្គព្រះគ្រីស្ដ តាំងពីមុន​កំណើតពិភពលោកមក ដើម្បីឱ្យយើងបានវិសុទ្ធ និងឥតសៅហ្មង នៅចំពោះព្រះ​ភក្ត្រព្រះអង្គ ព្រោះព្រះអង្គមានព្រះហប្ញទ័យស្រឡាញ់យើង។ ព្រះអង្គបានតម្រូវយើង​ទុកជាមុន ឱ្យធ្វើជាបុត្រធីតារបស់ព្រះអង្គ ដោយសារព្រះយេស៊ូគ្រីស្ដ ស្របនឹង​ព្រះបំណងដ៏សប្បុរសរបស់ព្រះអង្គ ដើម្បីឱ្យយើងកោតសរសើរសិរីរុងរឿងនៃព្រះហប្ញទ័យប្រណីសន្ដោស ដែលទ្រង់បានប្រោសប្រទានមកយើង ក្នុងអង្គព្រះបុត្រាដ៏ជាទី​ស្រឡាញ់របស់ព្រះអង្គ។ ដោយយើងរួមក្នុងអង្គព្រះគ្រីស្ដនេះ ព្រះជាម្ចាស់បានលោះ​យើង ដោយព្រះលោហិតរបស់ព្រះគ្រីស្ដ និងលើកលែងទោសឱ្យយើងបានរួចពីបាបតាមព្រះហប្ញទ័យប្រណីសន្ដោសដ៏លើសលប់របស់ព្រះអង្គ។ ព្រះជាម្ចាស់ប្រណីសន្ដោស​យើងយ៉ាងខ្លាំងបំផុត គឺទ្រង់ប្រទានឱ្យយើងមានតម្រិះ និងប្រាជ្ញាវាងវៃគ្រប់យ៉ាង។ ព្រះអង្គ​បានប្រោសឱ្យយើងស្គាល់គម្រោងការដ៏លាក់កំបាំងនៃព្រះហប្ញទ័យរបស់ព្រះអង្គ​តាមព្រះបំណងដ៏សប្បុរសដែលទ្រង់បានសម្រេចទុកជាមុនក្នុងព្រះហឫទ័យព្រះអង្គផ្ទាល់។ ព្រះអង្គចាត់ចែងគម្រោងការនេះឱ្យបានសម្រេច នៅគ្រាចុងក្រោយបំផុត​ គឺប្រមូលអ្វីៗសព្វសារពើដែលនៅលើមេឃ និងនៅលើផែនដីឱ្យរួមគ្នានៅក្នុងអង្គ​ព្រះគ្រីស្ដជាម្ចាស់តែមួយ។

ទំនុកតម្កើងលេខ ៩៨ (៩៧) ,១-៦ បទកាកគតិ

ពិធីអបអរសាទរព្រះគម្ពីរដំណឹងល្អ

អាលេលូយ៉ា! អាលេលូយ៉ា!
បពិត្រព្រះអម្ចាស់! អ្នកដែលចូលចិត្តធម្មវិន័យរបស់ព្រះអង្គ ព្រមទាំងសញ្ជឹងគិតអំពីធម្មវិន័យទាំងយប់ទាំងថ្ងៃ ពិតជាមានសុភមង្គលមែន។ អាលេលូយ៉ា!

សូមថ្លែងព្រះគម្ពីរដំណឹងល្អតាមសន្តលូកា លក ១១,៤៧-៥៤

ព្រះយេស៊ូមានព្រះបន្ទូលទៅកាន់ពួកធម្មាចារ្យថា៖«អ្នករាល់គ្នាត្រូវវេទនាជាពុំខាន ​​​ព្រោះអ្នករាល់គ្នាបានសង់ផ្នូរឱ្យព្យាការី ដែលបុព្វបុរសរបស់អ្នករាល់គ្នាបានសម្លាប់។ ​អ្នករាល់គ្នាធ្វើដូចច្នេះ បញ្ជាក់ថា អ្នករាល់គ្នាសមគំនិតនឹងអំពើដែលបុព្វបុរសរបស់អ្នករាល់គ្នាបានប្រព្រឹត្ត គឺគេបានសម្លាប់ពួកព្យាការី ហើយអ្នករាល់គ្នាបានសង់ផ្នូរ។ ហេតុនេះហើយ បានជាព្រះជាម្ចាស់ប្រកបដោយព្រះប្រាជ្ញាញាណ មានព្រះបន្ទូលថា៖​«យើងនឹងចាត់ព្យាការី ព្រមទាំងទូតរបស់យើងជាច្រើនឱ្យទៅរកគេ តែគេនឹង​សម្លាប់ខ្លះ ព្រមទាំងបៀតបៀនខ្លះទៀតផង»។ ដូច្នេះ មនុស្សជំនាន់នេះនឹងត្រូវ​ទទួលទោស ព្រោះបុព្វបុរសរបស់គេបានសម្លាប់ព្យាការី តាំងតែពីកំណើតពិភពលោក​មក គឺចាប់តាំងពីលោកអបិល រហូតដល់លោកសាការី ដែលត្រូវគេសម្លាប់នៅត្រង់ចន្លោះទីអាសនៈ និងទីសក្ការៈ។ ខ្ញុំសុំបញ្ជាក់ប្រាប់អ្នករាល់គ្នាថា មនុស្សជំនាន់នេះនឹង​ត្រូវទទួលទោស ព្រោះតែឃាតកម្មទាំងនោះជាមិនខាន។ «ពួកធម្មាចារ្យអើយ! អ្នករាល់គ្នាត្រូវវេទនាជាពុំខាន ព្រោះអ្នករាល់គ្នាបានបិទ​មាគ៌ាមិនឱ្យគេចូលទៅស្គាល់ព្រះជាម្ចាស់។ អ្នករាល់គ្នាមិនត្រឹមតែមិនបានចូលខ្លួនឯងប៉ុណ្ណោះទេ គឺថែមទាំងឃាត់អស់អ្នកដែលចង់ចូលមិនឱ្យគេចូកទៀតផង»។ ពេលព្រះយេស៊ូយាងចាកចេញពីទីនោះ ពួកធម្មាចារ្យ និងពួកខាងគណៈផារីស៊ី នាំគ្នា​ប្រឆាំងនឹងព្រះអង្គយ៉ាងខ្លាំង ហើយដេញដោលសួរព្រះអង្គអំពីរឿងផ្សេងៗជាច្រើនដែលសុទ្ធសឹងតែជាកលល្បិចរកចាប់កំហុសព្រះអង្គ។