អត្ថបទគម្ពីរ ថ្ងៃសុក្រ ទី០៧ ខែតុលា ឆ្នាំ ២០២២

ព្រះនាងព្រហ្មចារិនីម៉ារី តាមមាលា

ព្រះនាងម៉ារីជាគំរូគ្រីស្តបរិស័ទ ព្រោះព្រះនាងមានជំនឿលើព្រះជាម្ចាស់ដោយចិត្តស្មោះ។ តាំងពីយូរសតវត្សមកហើយ គ្រីស្តបរិស័ទធ្លាប់សរសើរលើកតម្កើងព្រះជាម្ចាស់ ដោយរួមចិត្តជាមួយព្រះនាងម៉ារីតាមព្រឹត្តិការណ៍ដ៏អស្ចារ្យដែលកើតមានឡើងក្នុងជិវិតរបស់ព្រះនាង ទាំងនឹករឭកពាក្យជម្រាបសួររបស់ទេវទូត និងរបស់នាងអេលីសាបិតផង។ គេហៅរបៀបអធិដ្ឋាននេះថា៖ “សូត្រផ្គាំ” ឬ “សូត្រមាលា” ព្រោះគ្រីស្តបរិស័ទដូចជាយកភួងផ្កាមកបំពាក់ព្រះនាម៉ារី។

សូមថ្លែងលិខិតរបស់គ្រីស្ដទូតប៉ូលផ្ញើជូនគ្រីស្ដបរិស័ទស្រុកកាឡាទី កាឡ ៣,៦-១៤

បងប្អូនជាទីស្រឡាញ់! លោកអប្រាហាំជឿលើព្រះជាម្ចាស់ ហើយព្រះអង្គប្រោស​លោកឱ្យបានសុចរិត ដោយយល់ដល់ជំនឿនេះ។ ដូច្នេះ សូមបងប្អូនយល់ថា អ្នកណា​មានជំនឿអ្នកនោះហើយ ជាកូនចៅរបស់លោកអប្រាហាំ។ ក្នុងគម្ពីរមានគ្រោងទុកជា​មុនថា ព្រះជាម្ចាស់នឹងប្រោសសាសន៍ដទៃ ឱ្យបានសុចរិតដោយសារជំនឿ ហើយលោក​អប្រាហាំបានទទួលដំណឹងល្អនេះជាមុនថា ជាតិសាសន៍ទាំងអស់នឹងទទួលពរដោយសារ​អ្នក។ ​ហេតុនេះ អស់អ្នកដែលមានជំនឿ ក៏បានទទួលព្រះពររួមជាមួយលោកអប្រាហាំ​ដែលជាអ្នកមានជំនឿនោះដែរ។ រីឯអស់អ្នកដែលពឹងផ្អែកលើការប្រព្រឹត្តតាមធម្ម​វិន័យនោះវិញ គេត្រូវបណ្ដាសាហើយ ដ្បិតមានចែងទុកមកថា៖«អ្នកណាមិនប្រតិបិត្ត​តាមសេចក្ដីទាំងប៉ុន្មាន​​ដែលមានចែងទុកក្នុងគម្ពីរធម្មវិន័យយ៉ាងខ្ជាប់ខ្ជួនទេនោះ អ្នក​នោះត្រូវបណ្ដាសាហើយ»។ មួយវិញទៀត យើងដឹងច្បាស់ថា គ្មាននរណាម្នាក់បាន​សុចរិតនៅចំពោះព្រះភក្រ្ដព្រះជាម្ចាស់ ដោយសារធម្មវិន័យនោះឡើយ ដ្បិតម​នុស្ស​សុចរិតដោយសារជំនឿនឹងមានជីវិត។ រីឯធម្មវិន័យប្លែកពីជំនឿទាំងស្រុង ព្រោះមាន​ចែងថា អ្នកណាប្រតិបត្តិតាមសេចក្ដីទាំងនេះ អ្នកនោះនឹងមានជីវិត ដោយបានប្រព្រឹត្ត​តាមសេចក្ដីទាំងនេះ។ ដោយព្រះគ្រីស្ដបានទទួលបណ្ដាសាសម្រាប់យើង ទ្រង់លោះ​យើងឱ្យរួចផុតពីបណ្ដាសា ដែលមកពីធម្មវិន័យ ដ្បិតមានចែងទុកមកថា៖«អ្នកណាដែលត្រូវគេព្យួរជាប់នឹងឈើ អ្នកនោះត្រូវបណ្ដាសាហើយ!»។ ហេតុការណ៍នេះកើត​មានដូច្នេះ ដើម្បីឱ្យព្រះពរដែលលោកអប្រាហាំទទួល បានហូរទៅដល់សាសន៍ដទៃ​ដោយសារព្រះគ្រីស្ដយេស៊ូដែរ ហើយឱ្យយើងទទួលព្រះវិញ្ញាណ ដែលព្រះជាម្ចាស់បាន​សន្យាប្រទានមក ដោយយើងមានជំនឿ។

ទំនុកតម្កើងលេខ ១១១ (១១០) ,១-៦ បទពាក្យ ៧

ចូរលើកតម្កើងព្រះជាម្ចាស់ប្រសើរពេកណាស់លើលោកា
ខ្ញុំថ្កើងព្រះអង្គហួសសិរសាក្នុងហ្វូងមនុស្សណាដែលទៀងត្រង់
គ្រប់ស្នាព្រហស្ដព្រះអម្ចាស់ប្រសើរពេកណាស់ខ្ពស់ឧត្តុង
អ្នកពេញចិត្តស្នាព្រះហស្ដទ្រង់ស្វះស្វែងយល់ផងកុំរារែក
គ្រប់ស្នាព្រះហស្ដបានបញ្ចេញរស្មីចិញ្ចែងភ្លឺអនេក
សេចក្ដីសុចរិតល្អពន់ពេកមិនប្រេះបាក់បែកនៅរហូត
ព្រះអង្គទ្រង់សព្វព្រះហប្ញទ័យឱ្យយើងស្រមៃមិនរលត់
ដល់ការអស្ចារ្យខ្ពស់បំផុតហប្ញទ័យអាណិតចិត្តអាសូរ
ព្រះអង្គប្រទានទាំងអាហារដល់អ្នកវេទនាស្រែកទ្រហោរ
អ្នកដែលកោតខ្លាចទ្រង់អាសូរសម្ពន្ធមានយូរធ្លាប់មេត្រី
ព្រះអង្គដម្ដែងអានុភាពឱ្យរាស្រ្ដជ្រួតជ្រាបឥតសង្ស័យ
គឺព្រះអង្គបានឱ្យទឹកដីប្រជាដទៃមកពួកគេ

ពិធីអបអរសាទរព្រះគម្ពីរដំណឹងល្អតាម វវ ១២,១០

អាលេលូយ៉ា! អាលេលូយ៉ា!
ឥឡូវនេះ ដល់ពេលព្រះជាម្ចាស់គ្រងរាជ្យ ហើយព្រះគ្រីស្ដរបស់ព្រះអង្គក៏បង្ហាញប្ញទ្ធានុភាពដែរ។
សូមលើកតម្កើងព្រះអង្គ ដែលយាងមកក្នុងព្រះនាមព្រះអម្ចាស់។ អាលេលូយ៉ា!

សូមថ្លែងព្រះគម្ពីរដំណឹងល្អតាមសន្តលូកា លក ១១,១៥-២៦

ព្រះយេស៊ូដេញខ្មោចចេញពីមនុស្សម្នាក់។ ប៉ុន្ដែ ​មានអ្នកខ្លះនិយាយថា៖«អ្នកនេះ​ដេញខ្មោចបានដូច្នេះ ព្រោះបេលសេប៊ូលជាស្ដេចខ្មោចបានប្រគល់អំណាចឱ្យគាត់»។ មានអ្នកខ្លះទៀតចង់ចាប់កំហុសព្រះអង្គក៏សូមឱ្យព្រះអង្គសម្ដែងទីសម្គាល់មួយបញ្ជាក់ថា ព្រះអង្គបានទទួលអំណាចពីព្រះជាម្ចាស់មក។ ព្រះយេស៊ូឈ្វេងយល់ចិត្តគំនិតរបស់គេ​ ទ្រង់មានព្រះបន្ទូលទៅគេថា៖«​នគរណាក៏ដូចជានគរណាដែរ ប្រសិនបើពលរដ្ឋបាក់​បែកទាស់ទែងគ្នាឯង នគរនោះមុខជាត្រូវិនាស ហើយផ្ទះទាំងប៉ុន្មានមុខជារលំសង្កត់លើគ្នាជាមិនខាន។ យ៉ាងណា​មិញ ប្រសិនបើមារសាតាំងបាក់បែកទាស់ទែងគ្នាឯង​ ធ្វើម្ដេចនឹងឱ្យរាជ្យរបស់វានៅស្ថិតស្ថេរគង់វង្សបាន! ខ្ញុំនិយាយដូច្នេះ ព្រោះអ្នករាល់គ្នា​ថា ខ្ញុំដេញខ្មោចដោយអំណាចបេលសេប៊ូល។ ប្រសិនបើខ្ញុំដេញខ្មោចដោយអំណាចបេលសេប៊ូលមែន តើកូនចៅរបស់អ្នករាល់គ្នា​ ដេញខ្មោចដោយអំណាចនរណាវិញ?។ ​ដូច្នេះ កូនចៅរបស់អ្នករាល់គ្នានឹងដាក់ទោសអ្នករាល់គ្នា។ ផ្ទុយទៅវិញ បើខ្ញុំដេញខ្មោចដោយប្ញទ្ធានុភាពរបស់ព្រះជាម្ចាស់នោះបានសេចក្ដីថា ព្រះរាជ្យរបស់ព្រះអង្គមក​ដល់អ្នករាល់គ្នាហើយ! បើមនុស្សណាម្នាក់ខ្លាំងពូកែ មានអាវុធការពារផ្ទះរបស់ខ្លួន​​ ទ្រព្យសម្បត្ដិរបស់គេនឹងបានគង់វង្ស។ ប៉ុន្ដែ បើមានម្នាក់ទៀតខ្លាំងពូកែជាង​មកវាយ​យកជ័យជម្នះបាន គេនឹងដកហូតគ្រឿងអាវុធ ព្រមទាំងរឹបអូសទ្រព្យសម្បតិ្តពីអ្នកនោះ​យកទៅចែកឱ្យអ្នកផ្សេងថែមទៀតផង។ អ្នកណាមិននៅខាងខ្ញុំ អ្នកនោះប្រឆាំងនឹងខ្ញុំ​ហើយ អ្នកណាមិនជួយប្រមូលផ្ដុំជាមួយខ្ញុំទេ អ្នកនោះជាអ្នកកម្ចាត់កម្ចាយ។ កាលបើខ្មោចចេញពីមនុស្សណាម្នាក់ហើយ វាតែស្វែងរកទីជម្រកនៅវាលហួតហែង តែ​ប្រសិនបើវារកពុំឃើញទេនោះ វាមុខជានិយាយថា៖«អញនឹងវិលត្រឡប់ទៅផ្ទះដែល​​អញទើបនឹងចេញមក»។ លុះទៅដល់ឃើញផ្ទះនោះបោសស្អាត ហើយតុបតែងល្អវានឹងចេញទៅបបួលខ្មោចប្រាំពីរទៀត ដែលសុទ្ធតែអាក្រក់ជាងវា មកចូលអ្នកនោះ​បណ្ដាលឱ្យគាត់រឹងរឹតតែអាក្រក់លើសដើមទៅទៀត»។

Facebook
Twitter
LinkedIn