នៅក្នុងជំនួបរវាងសាសនា អង្គការក្រៅរដ្ឋាភិបាល និងមន្ត្រីរាជការ ក្នុងខេត្តបាត់ដំបង ក្នុងទិវាសន្តិភាពពិភពលោកលើកទី២០ លោកទេព ច័ន្ទពិសិដ្ឋ (គីគេ) អភិបាលព្រះសហគមន៍កាតូលិកភូមិភាគបាត់ដំបងមានប្រសាសន៍ថា ការជួបជុំគ្នារវាងអន្តរសាសនានៅក្នុងតំបន់បាត់ដំបង បានជំរុញឲ្យមានសាមគ្គីភាព កសាងសន្តិភាពរួមគ្នា និងចេះលើកទឹកចិត្តគ្នាទៅវិញទៅមក។
នេះជាសកម្មភាពពិសេសដែលនាំឲ្យបងប្អូនមានសេចក្តីសង្ឃឹម និងជាគំរូតូចមួយដើម្បីឲ្យអ្នកជំនាន់ក្រោយ ចេះយកបញ្ហាមកដោះស្រាយ និងលើកទឹកចិត្តគ្នា។ លោកបន្ថែមថា «សកម្មភាពនេះមានតម្លៃណាស់សម្រាប់អន្តរសាសនារបស់យើង។»
លោកអភិបាលគីគេ ជាអភិបាលទទួលបន្ទុកផ្នែកទំនាក់ទំនងអន្តរសាសនាសម្រាប់ព្រះសហគមន៍កាតូលិកនៅកម្ពុជា បន្ថែមថា យើងត្រូវធ្វើដំណើររួមគ្នា ជួយលើកទឹកចិត្តនិងជំរុញគ្នាទៅវិញទៅមកដើម្បីឲ្យសាសនិកនីមួយៗចេះរួមគ្នាកសាងសន្តិភាព។
លោកអភិបាលគីគេបានរំលឹកថា ប្រទេសកម្ពុជាក្រោយសង្គ្រាម គឺមានមីនច្រើនដែលនាំឲ្យប្រជាជនភ័យខ្លាច ហើយទទួលរងផលប៉ះពាល់ពីវាក៏ច្រើនដែរ។ ប៉ុន្តែអ្វីដែលសំខាន់ គឺរដ្ឋាភិបាលនៃប្រទេសកម្ពុជាដែលជាប្រទេសមួយតូច មានច្បាប់លុបបំបាត់គ្រាប់មិនទាន់ផ្ទុះ ដែលនេះជាជោគជ័យមួយ ហើយលទ្ធផលនេះ បានដោយសារ ការចេះសហការគ្នា រវាងអង្គការ រដ្ឋាភិបាល និងសាសនា។
លោកបញ្ជាក់ថា ការកសាងសន្តិភាពគឺត្រូវចូលរួមដោយគ្មានការប្រកាន់ គ្មានការច្រណែន ទើបទទួលបានជោគ។ «ការកសាងសន្តិភាព គឺមិនបានចាប់ផ្តើមតែថ្ងៃនេះ ប៉ុណ្ណោះទេ គឺធ្វើពីយូរហើយតាំងតែពី២៥ឆ្នាំមកហើយនៅក្នុងប្រទេសកម្ពុជា។» លោកអភិបាលបញ្ជាក់។
លោកបន្ថែមថា ជាមួយគ្នានេះ ដើម្បីឲ្យពិភពលោកបានយល់ច្បាស់អំពីអសន្តិសុខ ដែលកើតពីគ្រាប់មិនទាន់ផ្ទុះនេះ ព្រះសហគមន៍កាតូលិក បានបញ្ជូនមនុស្សមួយចំនួនដែលរងគ្រោះដោយសារគ្រាប់មីន ទៅចែកបទពិសោធនៅស្ទើរគ្រប់កន្លែងនៅក្នុងពិភពលោក។
ព្រះសហគមន៍នៅក្នុងភូមិភាគបាត់ដំបងបានធ្វើកិច្ចការជាច្រើន ដើម្បីស្តារលទ្ធភាពអ្នកមានពិការភាពដោយសារគ្រាប់មីន ដោយបង្កើតជាមណ្ឌលទទួលកុមារពិការហៅថា អារ៉ូប៉េ និងចែករទេះជនពិការដល់អ្នកភូមិជាច្រើនដោយមានការសហការជាមួយអង្គការជេស្វីតសឺរីសកម្ពុជា។
នៅឆ្នាំ ១៩៩៩ អនុសញ្ញាហាមឃាត់គ្រាប់បែកប្រឆាំងមនុស្ស ដែលកម្ពុជាជាភាគីហត្ថលេខី បានចូលជាធរមាន។ អនុសញ្ញាអន្តរជាតិនេះ ហាមឃាត់ការប្រើប្រាស់ ការស្តុកទុក ការផលិត និងការផ្ទេរគ្រាប់មីនប្រឆាំងមនុស្ស ហើយតម្រូវឲ្យមានការបំផ្លាញគ្រាប់មីនកប់ដីទាំងអស់ និងកំណត់ថារដ្ឋជាសមាជិកត្រូវជួយដល់ជនរងគ្រោះនៃគ្រាប់មីនកប់ដី។
ក្នុងទិវាសន្តិភាពពិភពលោកលើកទី២០ក្នុងឆ្នាំនេះ ធ្វើឡើងក្រោមប្រធានបទ «បញ្ចប់ការរើសអើង កសាងសន្តិភាព» ដែលព្រះសហគមន៍កាតូលិកពេទ្យយាយជីធ្វើជាម្ចាស់ផ្ទះ កាលពីថ្ងៃទី២១ ខែកញ្ញាកន្លងទៅ នៅភូមិរំចេក១ ឃុំរតនៈ ស្រុកស្វាយប៉ោ ខេត្តបាត់ដំបង។
កម្មវិធីនេះ មានតំណាងសាសនាដែលរួមមានគ្រីស្តសាសនានិកាយកាតូលិក និងប្រូតេស្តង់ ពុទ្ធសាសនា ឥស្លាមសាសនា និងអង្គការក្រៅរដ្ឋាភិបាលមួយចំនួន រួមនិងមន្ត្រីរាជការក្នុងខេត្តបាត់ដំបងផងដែរ។
សន្តិភាពជាអ្វីដែលមនុស្សម្នាក់តែងប្រាថ្នាចង់បាន ប៉ុន្តែពេលខ្លះមនុស្សបានចាប់យកភាពរើសអើងមកជំនួសវិញ។ នេះបើតាមសង្ឃដីការបស់ព្រះយសបញ្ញា វី សុវិជ្ជា ព្រះប្រធានសាខាពុទ្ធិកសកលវិទ្យាល័យសីហុនរាជ ខេត្តបាត់ដំបង។
ព្រះតេជគុណ មានសង្ឃដីកាថា «ពេលខ្លះយើងភ្លេចថាយើងក៏រើសអើងខ្លួនឯងដែរ។ ការរើសអើង ខ្លួនឯងគឺយើងមិនពេញចិត្តនូវអ្វីដែលខ្លួនយើងមាន។»
ព្រះប្រធានសកលវិទ្យាល័យ អង្គនេះមានដីកាទៀតថា ការកសាងសេចក្តីសង្ឃឹម និងមានសុទិដិ្ឋនិយម ជាឥទ្ធិពល សម្រាប់ព្យាបាលរបួសនៅក្នុងខ្លួន ហើយក្រោយមកអាចផ្សព្វផ្សាយ សេចក្តីសង្ឃឹម សេចក្តីស្រឡាញ់ និងព្រហ្មវិហារធម៌ ដល់មនុស្សជុំវិញខ្លួនបាន។
ស្របពេលជាមួយគ្នានោះដែរ យុវនមកពីសហគមន៍បាហៃខាងនិកាយប្រូតេស្តង់ ឈ្មោះអ៊ឹង សាត បានលើកឡើងថា យើងទាំងអស់គ្នាត្រូវការសន្តិភាព ព្រោះយើងចង់រស់នៅដោយចុះសម្រុងគ្នា សាមគ្គីគ្នា លើកទឹកចិត្តគ្នា និងចេះគោរពឲ្យតម្លៃគ្នា ជាពិសេសរួមគ្នាអភិវឌ្ឍន៍ប្រទេស ជាតិឲ្យមានការរីកចម្រើនទៅខាងមុខ។
កញ្ញាឈុន សុខឿន មកពីព្រះសហគមន៍កាតូលិកបាត់ដំបង ឲ្យដឹងថា នេះជាលើកទី១ដែលគាត់បានចូលរួមក្នុងកម្មវិធីនេះ ហើយឃើញថា ទំនាក់ទំនងល្អរវាងសាសនានិងសាសនាមានភាពល្អប្រសើរ « យើងសាមគ្គីគ្នា យើងសហការគ្នា និងចែករំលែកបទពិសោធគ្នាទៅវិញទៅមក។»
នៅក្នុងកម្មវិធីនេះក៏មានការអធិដ្ឋានតាមជំនឿសាសនារៀងៗខ្លួន ជាពិសេស យុវជនមកពី គ្រប់សាសនា បានរួមគ្នាគូរគំនូរ និងធ្វើបទបង្ហាញពីសន្តិភាព។
មុនបិទបញ្ចប់កម្មវិធី អ្នកចូលរួមទាំងអស់បានរួមគ្នាដាំកូនឈើក្នុងបរិវេណព្រះសហគមន៍កាតូលិកបាត់ដំបង ដោយមានបំបួសដើមពោធិ៍មួយដើមតាមរបៀបព្រះពុទ្ធសាសនា និងព្រលែងសត្វព្រាបដែលតំណាងឲ្យសន្តិភាព៕
ដោយ សេង មួយ
