ជនក្រីក្រ៣៣០គ្រួសារ ទទួលគ្រឿងឧបភោគបរិភោគពីព្រះសហគមន៍កាតូលិកនិងព្រះសង្ឃខាងព្រះពុទ្ធសាសនា នៅព្រះវិហារសន្តហ្វ្រង់ស្វ័រសាវីយ៉េ (ព្រះសហគមន៍ចំប៉ា) នៅភូមិចំប៉ា ស្រុកកៀនស្វាយ ខេត្តកណ្ដាល។
តាមប្រសាសន៍របស់លោកបូជាចារ្យ វិរជ័យ ស្រ៊ីប្រាម៉ុង បានឱ្យដឹងថា «គោលបំណងចង់ចែកជូនដល់ប្រជាជនក្រីក្រក្នុងឱកាសបុណ្យភ្ជុំ និងបងប្អូនដែលរងគ្រោះដោយទឹកលិច»។
លោកបូជាចារ្យបន្ថែមថា នៅក្នុងឱកាសនេះដែរក៏មានក្រុមព្រះសង្ឃខាងព្រះពុទ្ធសាសនា ធ្វើការជាមួយទូតនៅសមាគមវៀតណាម ដែលជួយតាមភូមិវៀតណាមដែលមានទឹកលិចឬមានបញ្ហានានា បានស្នើចូលរួមជួយចំនួន២០០គ្រួសារ រួមជាមួយព្រះវិហារសន្តហ្វ្រង់ស្វ័រសាវីយ៉េ ចំនួន១៣០គ្រួសារ។ ការផ្តល់ជូននេះ ក៏មានអ្នកក្រជនជាតិខ្មែរជុំវិញភូមិចំនួន១៣០គ្រួសារផងដែរ។
តាមប្រសាសន៍លោកបូជាចារ្យដដែលបានឱ្យដឹងទៀតថា ការសម្ដែងធម៌មេត្តាករុណា ជាព្រះយេស៊ូដែលបង្រៀនយើងឱ្យចេះបង្ហាញសេចក្ដីស្រឡាញ់ដល់អ្នកក្រីក្រ អ្នកជិតខាង។
គ្រឿងបរិភោគដែលបានចែកជូនដល់ជនក្រីក្រចំនួន៣៣០គ្រួសារ នាថ្ងៃទី៤ កញ្ញា ២០២២ ទាំងនោះមាន អង្ករ១០គីឡូ និងមី ១០កញ្ចប់ក្នុងមួយគ្រួសារ៕
ដោយដាលីស
