«តាមពិតក្នុងបេះដូងខ្ញុំពិបាកជំរាបលាបងប្អូន និងគ្រប់កន្លែងដែលធ្លាប់រស់នៅ។» នេះជាឃ្លាដែលដូនជី មេកស៊ី ឌីសូ បានប្រាប់ដល់គ្រីស្តបរិស័ទក្នុងឱកាសបុណ្យគោរពសន្តអ៊ីញ៉ានៅឡូយ៉ូឡា កាលពីថ្ងៃទី០១ ខែសីហា ឆ្នាំ២០២២ នៅព្រះវិហារព្រះជាម្ចាស់លើកនាងម៉ារីឡើងស្ថានបរមសុខ នៅក្រុងបាត់ដំបង ខេត្តបាត់ដំបង។
ដូនជីមេកស៊ី ឌីសូ ជាដូនជីក្នុងក្រុមបុត្រីនៃមេត្តាករុណា(Daughter of Charity) ដែលបានមកបំពេញបេសសកម្ម និងបម្រើព្រះសហគមន៍នៅប្រទេសកម្ពុជាតាំងពីឆ្នាំ២០០០។
«ខ្ញុំសូមកោតសរសើរព្រះជាម្ចាស់សម្រាប់២២ឆ្នាំដែលខ្ញុំបានរស់នៅប្រទេសខ្មែរ និងមាន
ឱកាសបម្រើបងប្អូននៅព្រះសហគមន៍។» ដូនជីមេកស៊ី បញ្ជាក់។
ក្នុងរយៈពេល២២ឆ្នាំនេះ ដូនជីមេកស៊ីបានចូលរួមក្នុងសកម្មភាពជាច្រើនរបស់ព្រះសហគមន៍ក្នុងវិស័យសុខាភិបាល និងអប់រំ មានកសាងមណ្ឌលសុខភាពពេទ្យយាយជី បង្កើតសាលាមត្តេយ្យពន្លកថ្មី សាលាមត្តេយ្យព្រះសហគមន៍ទំពូង សាលាមត្តេយ្យព្រះសហគមន៍តាហែន បង្កើតក្រុមក្រុមយុវជននៅបាត់ដំបង និងផ្តល់អាហារូបករណ៍សម្រាប់កុមារនិងយុវជន។ ជាមួយគ្នានេះ គាត់ក៏បានចាត់ឲ្យសមាជិកក្រុមដូនជីបុត្រីមេត្តាករុណាទៅជួយដល់ព្រះសហគមន៍ខេត្តប៉ៃលិន និងបង្កើតមណ្ឌលសិស្សនៅទីនោះ។ ដូនជីរូបនេះ បានជួយណែនាំក្រុមសន្តវិនសេនដឺប៉ូលបាត់ដំបង ឲ្យមានសកម្មភាពចុះជួយ ដល់កុមារ អ្នកក្រីក្រ និងចាស់ជរានៅតាមភូមិផងដែរ។
អ្នកស្រីភ្ញី មន្ថា ជាគណៈកម្មការព្រះសហគមន៍បាត់ដំបង បាននិយាយថា គាត់សូមអរគុណដល់ដូនជីមេកស៊ី ដែលតែងតែជួយលើកទឹកចិត្តដល់គ្រីស្តបរិស័ទ ឲ្យចូលរួមសកម្មភាពជាមួយព្រះសហគមន៍។ អ្នកស្រី បន្ថែមថា ពួកគាត់ នឹងចងចាំដូនជីមេកស៊ីទុកក្នុងចិត្ត និងយកគំរូរបស់គាត់សម្រាប់អនុវត្តក្នុងជីវិតរស់នៅ។
ក្នុងវ័យចូលនិវត្តន៍ ដូនជីមេកស៊ីនឹងត្រឡប់ទៅកាន់ប្រទេសហ្វីលីពីនដែលជាប្រទេសកំណើតវិញនាពេលឆាប់ៗខាងមុខនេះ។ ក្នុងឱកាសនោះដែរ ដូនជីអរគុណដល់ដូនជីទាំងអស់សម្រាប់ «មិត្តភាព អំណរសប្បាយ ទុក្ខលំបាក និងទឹកភ្នែក ដែលយើងចែករំលែកជាមួយគ្នា នៅពេលយើងបំពេញបេសសកម្មរបស់ព្រះជាម្ចាស់ ពោរពេញដោយសេចក្តីស្រឡាញ់។»
គាត់ក៏សូមអរគុណដល់ក្រុមគណៈកម្មការ និងក្រុមសង្គហៈ បានធ្វើការនិងចែករំលែកដំណើរជីវិត និងបេសសកម្មជាមួយគ្នាក្នុងព្រះសហគមន៍ ។
ក្នុងនោះដែរ ដូនជីមេកស៊ី បានផ្តាំផ្ញើដល់យុវជននិងកុមារ ឲ្យចេះស្តាប់បង្គាប់ឪពុកម្តាយ ហើយយកគំរូល្អរបស់ពួកគាត់ និងព្យាយាមរៀនសូត្រដើម្បីអនាគត។
ដូនជីបញ្ជាក់ថា «សង្ឃឹមថាកូនៗនឹងក្លាយទៅជាអ្នកដឹកនាំដ៏ល្អ និងបំពេញបេសសកម្មនៅក្នុងព្រះសហគមន៍ និងសង្គមនាពេលអនាគត៕»
ដោយសេងមួយ
