មាតាបិតាកុមារជាច្រើននៅក្នុងតំបន់ក្រុងបាត់ដំបងបានឲ្យដឹងថា ពួកគាត់រីករាយដែលបានកូនរៀននៅសាលាមត្តេយ្យពន្លកថ្មីរបស់ព្រះសហគមន៍កាតូលិក ដែលជួយឲ្យកូនរបស់គាត់អភិវឌ្ឍន៍ខ្លួនបានច្រើនជាងមុន។
«ក្រោយពីគាត់(កូន)បានមកសិក្សានៅទីនេះ ខ្ញុំឃើញគាត់មានអារម្មណ៍សប្បាយរីករាយច្រើន ចេះនិយាយលេងសើច ក៏ដូចជាចេះយកចិត្តទុកដាក់ចំពោះការសិក្សាពេលត្រឡប់ទៅផ្ទះវិញ។» នេះជាការលើកឡើងរបស់លោកគង់ ចន្ថា ជាប្រជាពលរដ្ឋរស់នៅក្នុងក្រុងបាត់ដំបង។
លោកចន្ថា ជាឪពុកដែលបានបញ្ជូនកូនៗរបស់គាត់ចំនួន២រូបឲ្យរៀននៅសាលាមត្តេយ្យនេះ បានលើកឡើងទៀតថា កូនៗរបស់គាត់មករៀននៅទីនេះរយៈពេល៣ឆ្នាំមកហើយ ហើយពេលនេះពួកគាត់បានបញ្ចប់ការសិក្សាកម្រិតមត្តេយ្យហើយ។
លោកសង្កេតឃើញថា សកម្មភាពរបស់កូនខុសប្លែកពីមុនច្រើន ព្រោះពេលមុនកូនរបស់គាត់មានអារម្មណ៍ឯកោ គ្មានមិត្តភក្តិ និងមិនសូវចេះនិយាយទៅកាន់មនុស្សជុំវិញខ្លួនច្រើនទេ។
សាលាមានអនាម័យល្អ មានផាសុខភាព មានច្បាប់ទម្លាប់ត្រឹមត្រូវដែលធ្វើឲ្យកូនសិស្សមានភាពក្លាហាន និងថែរក្សាសិស្សដោយសុវត្ថិភាព ជាពិសេសមានការបង្រៀន និងមានកម្មវិធីល្អៗជាច្រើន។ នេះជាការរៀបរាប់របស់អ្នកស្រីរ៉ូ សុភា ជាអាណាព្យាបាលម្នាក់ទៀតដែលមានកូនកំពុងសិក្សានៅក្នុងសាលានេះ។
អ្នកស្រីបន្ថែមថា «កូនខ្ញុំមានភាពក្លាហាន និងរបៀបរៀបរយល្អជាងមុន ជាពិសេសធ្វើឲ្យគាត់ចង់មករៀនដោយទទួលបានភាពកក់ក្តៅពីអ្នកគ្រូ ធ្វើឲ្យគាត់ឈប់ខ្លាច ឈប់យំ និងខិតខំរៀនសូត្របានល្អ។»
អ្នកស្រី សូមឲ្យអាណាព្យាបាលផ្សេងៗយកកូនរបស់ខ្លួនមកសិក្សានៅសាលានេះព្រោះ «សាលានេះគឺធ្វើឲ្យ(កូន)មានទំនុកចិត្ត ធ្វើឲ្យកូនយើងមានភាពកក់ក្តៅ ភាពក្លាហាន និងរៀនពូកែ។»
សាលាមត្តេយ្យពន្លកថ្មីរបស់ព្រះសហគមន៍កាតូលិក បានបើកដំណើរការក្នុងឆ្នាំ២០០០ សម្រាប់កុមារតូច ពីអាយុ៤ឆ្នាំ ដល់៦ឆ្នាំ។
«ការអប់រំដែលកូនៗទទួលបាននៅសាលាមត្តេយ្យមានតម្លៃ។ នៅផ្ទះ សូមតាមដានកូន កុំចោលកូន សូមឲ្យកូនរៀននៅផ្ទះ មានរបៀប ដូចដែលបានរៀននៅសាលា។» លោកអភិបាលទេព ច័ន្ទពិសិដ្ឋ (គីគេ) ជាអភិបាលប្រចាំព្រះសហគមន៍កាតូលិកភូមិភាគបាត់ដំបង មានប្រសាសន៍ទៅកាន់អាណាព្យាបាលរបស់កុមារតូចៗ ដែលបានមកចូលរួមក្នុងកម្មវិធីបិទវគ្គសិក្សាឆ្នាំ២០២១-២០២២ កាលពីថ្ងៃទី២៧ ខែកក្កដា ឆ្នាំ២០២២ ។
លោកអភិបាលបន្តទៀតថា ការអប់រំពិតប្រាកដគឺនៅផ្ទះ ដែលឪពុកម្តាយគួរយកចិត្តទុកដាក់ក្នុងការអប់រំកូនៗរបស់ខ្លួនឲ្យបានល្អ ដើម្បីឲ្យពួកគាត់អាចជួយកសាងប្រទេសជាតិនាថ្ងៃខាងមុខ។
ក្នុងកម្មវិធីបិទវគ្គឆ្នាំសិក្សានេះ កុមារតូចៗបានសម្តែងរបាំ និងការសម្តែងរឿង បង្ហាញសមត្ថភាពរបស់ខ្លូនដល់អាណាព្យាបាលនិងឪពុកម្តាយ។ ក្នុងកម្មវិធីនេះដែរក៏មាន ផ្តល់ជូនប័ណ្ណសរសើរចំពោះសិស្សដែលមករៀនបានទៀងទាត់ និងសិស្សដែលរៀនបានចំណាត់ថ្នាក់ពីលេខ១ដល់លេខ៥ ។
ដូនជី រ៉ុង បុប្ផា ជានិយការទទួលខុសត្រូវសាលាមត្តេយ្យពន្លកថ្មី និងជាដូនជីក្នុងក្រុមឧបការគុណ បានមានប្រសាសន៍ថា ទិសដៅរបស់សាលាគឺឲ្យក្មេងៗទទួលបានការអប់រំខ្ពស់ មានសុជីវធម៌ល្អ ឲ្យចេះស្តាប់ ចេះអាន ចេះសរសេរ និងអាចចូលរួមគ្រប់សកម្មភាពទាំងក្នុងសាលានិងនៅក្នុងសង្គម ជាពិសេសគឺរបៀបថ្លៃថ្នូរ គុណធម៌ និងគុណតម្លៃ។
បងស្រីបុប្ផារំពឹង និងសង្ឃឹមថាឆ្នាំក្រោយសិស្សទាំងអស់នឹងមករៀនបានទៀងទាត់ អាណាព្យាបាលយកចិត្តទុកដាក់ និងសហការណ៍ជាមួយសាលា ដើម្បីឲ្យក្មេងៗទទួលបានការអប់រំល្អ។
សាលាមេត្តេយ្យពន្លកថ្មី មានបង្រៀនកុមារចំនួន៣កម្រិតដូចជា៖ ថ្នាក់មត្តេយ្យកម្រិតទាប កម្រិតមធ្យម និងកម្រិតខ្ពស់ ហើយសាលាក៏មានបន្ថែមលើថ្នាក់ភាសាអង់គ្លេស និងផ្នែកសិល្បៈដែលមានដូចជាការហាត់របាំបុរាណ និងប្រជាប្រិយ៍ខ្មែរ។ សាលានេះបង្រៀនចាប់ពីម៉ោង៨ព្រឹក ដល់ម៉ោង៣រសៀល ហើយនៅក្នុងឆ្នាំសិក្សា២០២១-២០២២នេះ មានសិស្សសរុប៧៤នាក់ ស្រី៣២នាក់ និងបុគ្គលិកចំនួន១០នាក់៕
ដោយសេង មួយ
