ធ្វើនៅព្រះសហគមន៍សន្តសិលា និងសន្តប៉ូល
ភ្នំពេញថ្មី ថ្ងៃទី២៩ ខែឧសភា ឆ្នាំ២០២២
“ធ្វើជាសាក្សីរបស់ព្រះយេស៊ូ”
| អត្ថបទទី១៖ កិច្ចការ ១,១-១១ អ្នករាល់គ្នានឹងធ្វើជាបន្ទាល់របស់ខ្ញុំ។ កក ១,៨ អត្ថបទទី២៖ ហេប្រឺ ៩,២៤-២៨;១០,១៩-២៣ យើងត្រូវនាំគ្នាចូលទៅជិតព្រះអង្គដោយចិត្តទៀងត្រង់។ ហប ១០,២២ ដំណឹងល្អ៖ លូកា ២៤,៤៦-៥៣ ខ្ញុំនឹងចាត់ព្រះវិញ្ញាណមកសណ្ឋិតលើអ្នករាល់គ្នា។ លក ២៤,៤៩ |
បងប្អូនជាទីស្រឡាញ់
ថ្ងៃនេះ យើងគោរពព្រះយេស៊ូឡើងស្ថានបរមសុខ យើងបានស្តាប់ទាំងនៅក្នុងអត្ថបទទី១ និងគម្ពីរដំណឹងល្អ “ដូច្នេះ អ្នករាល់គ្នានឹងធ្វើជាសាក្សីរបស់ខ្ញុំនៅក្នុងយេរូសាឡឹមសិន ក្រោយមកនៅក្នុងស្រុកយូដាទាំងមូល នៅស្រុកសាម៉ារី រហូតដល់ដាច់ស្រយាលនៃផែនដី”។ ថ្ងៃនេះ ដែលយើងអង្គុយនៅកន្លែងនេះបាន ដោយសារមានក្រុមគ្រីស្តទូតពីដើម ដោយសារសាវ័ក២០០០ឆ្នាំមុន។ នៅពេលគេបានស្តាប់លឺព្រះបន្ទូលរបស់ព្រះយេស៊ូ ដែលណែនាំឱ្យគេទៅប្រកាសដំណឹងល្អនៅគ្រប់ទីកន្លែង។ ពីទីក្រុងយេរូសាឡឹមដល់ស្រុកយូដា ដល់ជុំវិញសមុទ្រមីឌីទែរ៉ាណេ រហូតដល់ដាច់ស្រយាលនៃផែនដី គេបានអនុវត្តតាម។ ប្រសិនបើ គេគ្រាន់តែស្តាប់ព្រះបន្ទូលរបស់ព្រះយេស៊ូ ក្រោយមកគេភ្លេចអនុវត្តព្រះបន្ទូលហ្នឹង ថ្ងៃនេះប្រហែលយើងមិននៅទីនេះទេ។
ពីដើម ក្រុមគ្រីស្តទូតនិងក្រុមសាវ័កបានយកចិត្តទុកដាក់អនុវត្តព្រះបន្ទូលរបស់ព្រះជាម្ចាស់យ៉ាងសកម្ម ណែនាំឱ្យព្រះបន្ទូលបានចាប់ផ្តើមទៅគ្រប់ទីកន្លែង នៅក្នុងពិភពលោកទាំងមូលរហូតដល់ដាច់ស្រយាលនៃផែនដី រហូតដល់ប្រទេសកម្ពុជាយើង។ នៅពេលយើងមើលឃើញព្រះយេស៊ូកំពុងឡើងស្ថានបរមសុខ នៅពេលយើងមើលឃើញយើងដូចជាបាត់ព្រះយេស៊ូ។ ប៉ុន្តែ យើងស្ដាប់ព្រះបន្ទូលរបស់ព្រះយេស៊ូថែម គឺនៅពេលហ្នឹងព្រះអង្គបានប្រទានព្រះវិញ្ញាណដ៏វិសុទ្ធផ្ទាល់របស់ព្រះអង្គ ដែលណែនាំឱ្យយើងដឹងថា ពិតមែនថ្ងៃនេះនៅភ្នំពេញថ្មីយើង នៅក្នុងដួងចិត្តរបស់យើង យើងមានព្រះយេស៊ូដែលគង់នៅ។ ដោយសារព្រះយេស៊ូគង់នៅ យើងមានសមត្ថភាព យើងមានកម្លាំង ដើម្បីធ្វើដំណើរតទៅទៀត។ សប្តាហ៍ក្រោយ យើងមានពិធីបុណ្យព្រះវិញ្ញាណដ៏វិសុទ្ធយាងមក យើងនឹកឃើញក្រុមគ្រីស្តទូតដែលទទួលព្រះវិញ្ញាណដ៏វិសុទ្ធ។ ប៉ុន្តែ មិនមែនជាពិធីនឹករលឹកគឺជាពិធីដែលកំពុងកើតឡើងជារៀងរាល់ថ្ងៃ។ អាទិត្យមុន ខ្ញុំបានចាប់ផ្តើមធ្វើពិធីអគ្គសញ្ញាលាបថ្ងាសនៅជ្រៃធំ បន្តិចទៀតនៅភ្នំពេញថ្មី នៅតាកែវ និងនៅប៉ុន្មានកន្លែងទៀត។ ប៉ុន្តែ នៅពេលយើងពិធីអគ្គសញ្ញាលាបថ្ងាស យើងនឹកឃើញដល់ព្រះវិញ្ញាណដ៏វិសុទ្ធយាងមកសម្រាប់ព្រះសហគមន៍របស់យើងបច្ចុប្បន្ននេះ ជាមូលហេតុព្រះសហគមន៍របស់យើងនៅមានជីវិត។
នៅពេលយើងច្រៀងលើកតម្កើងសិរីរុងរឿងរបស់ព្រះជាម្ចាស់ ខ្ញុំបានឃើញកូនៗរបស់យើងមិននៅស្ងាត់ទេគេបានច្រៀងអស់ពីដួងចិត្ត។ ដោយសារមានកូនៗយើងច្រើន ដែលបានចូលព្រះវិហាររាល់អាទិត្យ គេជាប់ជាមួយព្រះជាម្ចាស់ គេស្គាល់បទចម្រៀងព្រះសហគមន៍ គេចេះអធិដ្ឋាន។ នេះជាផ្លែនៃព្រះវិញ្ញាណដ៏វិសុទ្ធ ដែលយើងមើលឃើញនៅក្នុងព្រះសហគមន៍របស់យើង ទោះបីព្រះសហគមន៍របស់យើងជាព្រះសហគមន៍តូចក៏ដោយ។ ទោះបីជាព្រះសហគមន៍ ដែលបានឆ្លងទុក្ខលំបាកដែលយើងផ្តាច់ការបន្តជំនឿ ពីសម័យប៉ុលពតរហូតដល់ឆ្នាំ១៩៩៣។ ទោះបីជាព្រះសហគមន៍ ដែលបានរងទុក្ខលំបាកយ៉ាងច្រើនពិតប្រាកដមែន ប៉ុន្តែជាព្រះសហគមន៍ដែលពោរពេញដោយវត្តមានរបស់ព្រះវិញ្ញាណដ៏វិសុទ្ធ។ ដែលណែនាំឱ្យពីមួយថ្ងៃទៅមួយថ្ងៃ យើងអាចធ្វើដំណើររួមជាមួយគ្នា។
អ្វីដែលសំខាន់ ហើយដែលយើងមើលឃើញយ៉ាងជាក់ស្តែងអំពីជីវិត អំពីកម្លាំង ដែលមកពីព្រះវិញ្ញាណដ៏វិសុទ្ធ ដូចខ្យល់មួយយ៉ាងពិសេសនៅពេលដើមឈើនៅស្ងៀម យើងដឹងថាអត់មានខ្យល់។ នៅពេលយើងឃើញកូនៗរបស់យើង យើងមើលឃើញពិតមែនព្រះសហគមន៍របស់យើងពោរពេញដោយជីវិតដោយសារព្រះវិញ្ញាណដ៏វិសុទ្ធ។ បងប្អូនជាទីស្រឡាញ់ យើងចូលនៅក្នុងទិវាសិទ្ធិកុមារអន្តរជាតិដែលមានប្រធានបទថា “អនាគតភ្លឺស្វាងសម្រាប់កុមារទាំងអស់”។ ពេលយើងស្តាប់នេះហើយ យើងត្រូវការគិត តើយើងត្រូវធ្វើដូចម្តេច ដើម្បីរៀបចំអនាគត? តើយើងត្រូវធ្វើដូចម្តេច ដើម្បីអនាគតរបស់យើងភ្លឺស្វាងដ៏ពិតប្រាកដ? អនាគតរបស់យើងអាចភ្លឺស្វាងលុះត្រាតែ យើងជាកូនក្មេងដែលយកចិត្តទុកដាក់នឹងការសិក្សា ជាកូនក្មេងដែលយកចិត្តទុកដាក់ និងមានចិត្តមេត្តាករុណាដល់បងប្អូនឯទៀតៗ ជាកូនក្មេងដែលគោរពនិងស្រឡាញ់បរិស្ថាន និងធម្មជាតិជាអំណោយទានដែលយើងទទួលពីព្រះជាម្ចាស់។ ជាកូនក្មេងដែលយកចិត្តទុកដាក់ជាមួយព្រះជាម្ចាស់ និងស្រឡាញ់ព្រះជាម្ចាស់ ដោយសារព្រះជាម្ចាស់ប្រទានជីវិតឱ្យយើង។
ថ្ងៃនេះ ជាទិវាផ្សព្វផ្សាយព័ត៌មានកាតូលិកលើកទី៥៦ នៅពេលនោះសម្តេចប៉ាបបានសរសេរលិខិតមួយដែលមានចំណងជើងថា “សូមស្តាប់គ្នាទៅវិញទៅមក ដោយប្រើត្រចៀកនៃដួងចិត្ត” សូមស្តាប់គ្នាទៅវិញទៅមកដោយយល់ចិត្តគ្នា។ ដើម្បីស្តាប់យើងត្រូវការនៅស្ងាត់ ប្រសិនបើយើងមិនស្ងាត់យើងស្តាប់មិនលឺ ជាពិសេសដើម្បីស្តាប់ព្រះសូរសៀងរបស់ព្រះជាម្ចាស់ ជាសំលេងមួយយ៉ាងតូចដែលមាននៅក្នុងដួងចិត្តរបស់យើង។ ដូច្នេះ ថ្ងៃនេះដែលសម្តេចប៉ាបអញ្ជើញឱ្យយើងចេះស្តាប់គ្នាទៅវិញទៅមក ដោយយល់ចិត្តគ្នាទៅវិញទៅមក ជាពេលវេលាដើម្បីនៅស្ងៀមស្ងាត់ស្តាប់ព្រះជាម្ចាស់ដែលមានព្រះបន្ទូល។ ថ្ងៃនេះ ព្រះយេស៊ូមានព្រះបន្ទូលមួយយ៉ាងសំខាន់ “សូមអ្នករាល់គ្នាធ្វើជាសាក្សី” សាក្សីអំពីខ្ញុំដែលមានព្រះជន្មរស់ឡើងវិញ សាក្សីអំពីខ្ញុំដែលស្រឡាញ់មនុស្សទាំងអស់ សាក្សីអំពីខ្ញុំដែលបង្ហាញព្រះបិតាណែនាំឱ្យមនុស្សស្រឡាញ់គ្នាទៅវិញទៅមក។
យើងយកចិត្តទុកដាក់ដើម្បីស្តាប់ព្រះយេស៊ូ យើងយកចិត្តទុកដាក់ដើម្បីស្តាប់គ្នាទៅវិញទៅមកដែរ។ ស្តាប់គ្នាទៅវិញទៅមកនៅក្នុងព្រះសហគមន៍របស់យើង នេះជាអ្វីដែលយើងកំពុងធ្វើនៅក្នុងសន្និបាតព្រះសហគមន៍២០២១-២០២៣ ធ្វើដំណើររួមជាមួយគ្នា។ ប៉ុន្តែ ដើម្បីធ្វើដំណើររួមជាមួយគ្នា យើងត្រូវការអង្គុយដើម្បីស្តាប់យោបល់គ្នា ដើម្បីស្តាប់គំនិត ដើម្បីស្តាប់អ្វីដែលម្នាក់ៗចង់និយាយ។ អំពីព្រះសហគមន៍ អំពីជីវិតផ្ទាល់ អំពីសង្គមបច្ចុប្បន្ននេះ អំពីអំណរសប្បាយ អំពីទុក្ខលំបាក អំពីសេចក្តីសង្ឃឹម…។ គណៈកម្មការចង់ចែករំលែកជាមួយលោកឪពុក បូជាចារ្យនិងបូជាចារ្យចង់ចែករំលែកនិងស្តាប់គ្នាទៅវិញទៅមក ដើម្បីធ្វើការជាមួយគ្នា ដើម្បីសហការគ្នា ដើម្បីយល់ចិត្តគ្នា។ យើងធ្វើដូចម្តេច ដើម្បីរស់នៅក្នុងសង្គមបច្ចុប្បន្ននេះ ដោយថែរក្សាអត្តសញ្ញាណរបស់យើងជាគ្រីស្តបរិស័ទ ដោយថែរក្សាអត្តសញ្ញារបស់យើងជាជនជាតិខ្មែរ ដែលគោរពព្រះជាម្ចាស់តែមួយព្រះអង្គគត់។ យើងត្រូវការស្តាប់គ្នាទៅវិញទៅមក នេះជាអ្វីដែលសម្តេចប៉ាបបានជម្រុញដើម្បីឱ្យឆ្នាំនេះ ក្នុងឱកាសទិវាផ្សព្វផ្សាយព័ត៌មានកាតូលិកលើកទី៥៦ យើងដឹងថាយើងត្រូវការអង្គុយដើម្បីស្តាប់គ្នាទៅវិញទៅមក។ ជាពិសេសដើម្បីយល់ចិត្តគ្នា ដោយសារនៅក្នុងចិត្តរៀងៗខ្លួនមានវត្តមានរបស់ព្រះជាម្ចាស់ មានអំណរសប្បាយរបស់យើង មានរឿងសម្ងាត់របស់យើង។
បងប្អូនជាទីស្រឡាញ់ ថ្ងៃនេះជាពេលវេលាដើម្បីស្តាប់គ្នាទៅវិញទៅមក ដោយទទួលព្រះវិញ្ញាណដ៏វិសុទ្ធយាងមក ដោយដឹងថាព្រះយេស៊ូមានវត្តមានគង់នៅជាមួយយើង ទោះបីព្រះអង្គយាងឡើងស្ថានបរមសុខហើយ។ ជាពេលវេលា ដើម្បីអរគុណគ្នាទៅវិញទៅមកដែលបានធ្វើដំណើរជាមួយគ្នា អរគុណដោយសារយើងមានមហាគ្រួសារមួយនៅក្នុងព្រះសហគមន៍របស់យើង។ ជាពិសេសអរព្រះគុណព្រះជាម្ចាស់ ជាពេលវេលាដើម្បីអរព្រះគុណព្រះជាម្ចាស់ ដែលបានថែរក្សាយើងអស់រយៈពេលប៉ុន្មានឆ្នាំ។ ព្រះជាម្ចាស់ដែលថែរក្សាព្រះសហគមន៍យើង ថែរក្សាជីវិតរបស់យើង ថែរក្សាមហាគ្រួសាររបស់យើង ថែរក្សាជីវិតរបស់យើងប្រចាំ។
ថ្ងៃនេះ យើងចូលរួមជាមួយកូនៗរបស់យើង ដើម្បីឱ្យកូនទាំងអស់ជាពិសេសកូនដែលកំពុងរងទុក្ខលំបាក ដូចនៅប្រទេសភូមា នៅប្រទេសអ៊ុយក្រែន ដែលកំពុងមានសង្រ្គាម។ យើងត្រូវតែអធិដ្ឋាននឹកឃើញដល់ពួកគាត់ អធិដ្ឋានសម្រាប់កូនក្មេងដែលកំពុងរងទុក្ខលំបាក អធិដ្ឋានសម្រាប់កូនក្មេងដែលគ្មានម្ហូបអាហារគ្រប់គ្រាន់។ យើងត្រូវការនឹកឃើញកូនក្មេងដែលកំពុងមានទុក្ខលំបាក យើងដឹងថានៅក្នុងមហាគ្រួសាររបស់យើង យើងអាចធ្វើដំណើរតទៅទៀត ដើម្បីមានអនាគតដ៏ភ្លឺស្វាង។ ដោយសារយើងបានយកចិត្តទុកដាក់ស្តាប់គ្នាទៅវិញទៅមកដោយយល់ចិត្តគ្នា យកចិត្តទុកដាក់ស្តាប់ព្រះបន្ទូលរបស់ព្រះជាម្ចាស់ ដែលអញ្ជើញយើងឱ្យយើងធ្វើជាសាក្សីអំពីធម៌មេត្តាករុណាដែលចេញពីព្រះបិតា។ ដូចព្រះយេស៊ូមានព្រះបន្ទូលថា “ចូរមានចិត្តមេត្តាករុណា ដូចព្រះបិតាមានព្រះហឫទ័យមេត្តាករុណា”។ អាម៉ែន៕
+ លោកអភិបាល អូលីវីយ៉េ ជ្មីតហស្លេ
អភិបាលព្រះសហគមន៍កាតូលិកកម្ពុជា
ភូមិភាគភ្នំពេញ
