«សូមអញ្ជើញមក អ្នកនឹងឃើញ» (យ៉ូហាន ១:៤៦) ការប្រាស្រ័យទាក់ទង ដោយជួបផ្ទាល់ជាមួយប្រជាជននៅកន្លែងដែលគេនៅ
បងប្អូនជាទីស្រឡាញ់!
ការត្រាស់ហៅ “ សូមអញ្ជើញមក អ្នកនឹងបានឃើញ” ជាវិធីសាស្ត្ររបស់ព្រះយេស៊ូដែលបានត្រាស់ហៅសាវ័កដំបូង ហើយក៏ជាវិធីសាស្ត្រសម្រាប់ការប្រាស្រ័យទាក់ទងរបស់មនុស្សពិតប្រាកដផងដែរ។ ដើម្បីប្រាប់ពីការពិតនៃជីវិតដែលក្លាយជាប្រវត្តិសាស្ត្រ (សារលិខិតសម្រាប់ទិវាសារគមនាគមន៍ពិភពលោកលើកទី ៥៤ ថ្ងៃទី ២៤ ខែមករាឆ្នាំ ២០២០) ចាំបាច់ណាស់ត្រូវទៅឲ្យហួសពីអាកប្បកិរិយា ឥតខ្វល់ដែលយើង«បានដឹង»ជាក់ប្រាកដ គ្រប់អ្វីទាំងអស់។ ផ្ទុយទៅវិញ យើងទៅជួបពួកគេដោយផ្ទាល់ខ្លួន ចំណាយពេលវេលាជាមួយគេ ស្តាប់រឿងរ៉ាវរបស់ពួកគេ និងចូលក្នុងស្ថានភាពពិត ដែលតែងតែធ្វើឱ្យយើងភ្ញាក់ផ្អើល។ អ្នកមានសុភមង្គល Manuel Lozano Garrido បានផ្តល់ដំបូន្មានទៅកាន់អ្នកសារព័ត៌មាន ជាសហការីរបស់គាត់ ថា «សូមបើកភ្នែករបស់អ្នកដោយចាប់អារម្មណ៍ ទៅនឹងអ្វីដែលអ្នកបានឃើញ សូមឱ្យដៃរបស់អ្នកបានប៉ះ នឹងអ្វីៗដែលពោរពេញដោយភាពស្រស់បំព្រង និងភាពក្លៀវក្លា ដូច្នេះនៅពេលដែលអ្នកដទៃអានអ្វីដែលអ្នកសរសេរ ពួកគេក៏អាចប៉ះ នូវភាពអស្ចារ្យ ដ៏រស់រវើកនៃជីវិតនោះបានដែរ»។ នៅឆ្នាំនេះ ខ្ញុំសូមឧទ្ទិសសារលិខិតរបស់ខ្ញុំចំពោះ ការត្រាស់ហៅ «សូមអញ្ជើមក អ្នកនឹងឃើញ» ដើម្បីបំភ្លឺសម្រាប់គ្រប់ទម្រង់នៃសារគមនាគមន៍ទាំងអស់ដែលខិតខំធ្វើឱ្យមានភាពច្បាស់លាស់ និងដោយចិត្តស្មោះត្រង់ នៅក្នុងសារព័ត៌មានតាមអ៊ីនធើណែត ក្នុងព្រះសហគមន៍ តាមរយៈការផ្សាយប្រចាំថ្ងៃ និង វិស័យនយោបាយ ឬសង្គម។ «សូមអញ្ជើញមក អ្នកនឹងឃើញ! » នេះជារបៀប មួយក្នុងការប្រាស្រ័យទាក់ទងជំនឿរបស់គ្រីស្តបរិស័ទ ដែលត្រូវបានប្រាស្រ័យទាក់ទងចាប់តាំងពីពេលគេជួបលើកដំបូងនៅទន្លេយ័រដាន់ និងសមុទ្រកាលីឡេ។
«ធ្វើការលើដងផ្លូវ»
ជាបឋមចូរយើងក្រឡេកមើលលើសេចក្តីរាយការណ៍ពិសេសរបស់សារព័ត៌មាន។ មានសំឡេង ដែលទាញ យកការចាប់អារម្មណ៍ ដែលបង្ហាញពីការព្រួយបារម្ភអំពីហានិភ័យ ព្រោះថា សេចក្តីរាយការណ៍ ការស៊ើបអង្កេត នៅក្នុងកាសែត ទូរទស្សន៍ វិទ្យុ និង តាមអ៊ីនធើណែត គឺកំពុងជំនួសដោយរបាយការណ៍ដែលប្រកាន់ខ្ជាប់ជាមួយនិន្នាការណាមួយ ឬជារឿយៗមានការធ្វើអធិប្បាយលំអៀង។ សេចក្តីរាយការណ៍ទាំងនោះធ្វើឲ្យបាត់បង់ការពិត និងរឿងរ៉ាវជីវិតជាក់ស្តែងរបស់ប្រជាជន និងកាត់បន្ថយការចាប់អារម្មណ៍ចំពោះបាតុភូតសំខាន់ក្នុងសង្គម ឬចលនាវិជ្ជមាននៅកម្រិតមូលដ្ឋាន។
វិបត្តិនៃឧស្សាហកម្មបោះពុម្ភ មានហានិភ័យខ្លាំង ដែលនាំឱ្យអ្នករាយការណ៍ព័ត៌មាន បង្កើតឲ្យមានបន្ទប់ព័ត៌មាន នៅតែមុខកុំព្យូទ័រផ្ទាល់ខ្លួន ឬកុំព្យូទ័រក្រុមហ៊ុន និងនៅលើបណ្តាញសង្គម ដោយមិនបាន“ ចុះទៅធ្វើការនៅតាមដងផ្លូវ” ជួបផ្ទាល់ជាមួយប្រជាជន និង ធ្វើការស្រាវជ្រាវរឿងរ៉ាវ ដើម្បីបញ្ជាក់ពីស្ថានភាពជាក់លាក់ជាមួយនោះឡើយ។ លុះត្រាតែយើងបើកខ្លួនយើងដើម្បីជួបផ្ទាល់ មិនដូច្នោះទេ យើងគ្រាន់តែជាអ្នកទស្សនាប៉ុណ្ណោះ សម្រាប់ការច្នៃប្រឌិតបច្ចេកទេសទាំងអស់ដែលអាចឱ្យយើងមានអារម្មណ៍ថា មានភាពរឹងមាំនៅក្នុងភាពពិតធំទូលាយ និងរហ័ស។ ឧបករណ៍នីមួយៗបង្ហាញថាមានប្រយោជន៍ និងមានតម្លៃ តែក្នុងកំរិតមួយដែលវាជម្រុញយើងឲ្យចេញក្រៅ និងមើលរឿងរ៉ាវកើតនៅខាងក្រៅដែលយើងមិនដឹង ហើយយើងអាចយកមកផ្សព្វផ្សាយតាមអ៊ិនធើណែត ដែលគ្មាននរណាចាប់អារម្មណ៍ផ្សាយ ដើម្បីនាំសំឡេងដែលគេមិនដែលបានដឹងថាវានឹងអាចបានកើតឡើង។
ព្រះគម្ពីរដំណឹងល្អ ជាអត្ថបទព័ត៌មាន
“ សូមអញ្ជើញមក អ្នកនឹងឃើញ” គឺជាពាក្យដំបូងដែលព្រះយេស៊ូ មានព្រះបន្ទូលទៅកាន់សាវ័កដែលចង់ដឹងចង់ពីព្រះអង្គ បន្ទាប់ពីព្រះអង្គទទួលពិធីជ្រមុជទឹកនៅទន្លេយ័រដាន់ (យ៉ូហាន ១:៣៩)។ ព្រះយេស៊ូបានអញ្ជើញពួកគេឱ្យមានទំនាក់ទំនងជាមួយព្រះអង្គ។ ជាងកន្លះសតវត្សក្រោយមក នៅពេលលោកយ៉ូហាន មានវ័យចំណាស់ លោកបានសរសេរព្រះគម្ពីរដំណឹងល្អ។ លោកបានរំឭកនូវ «ព័ត៌មានល្អ ៗ» ជាច្រើន ដែលបង្ហាញថា គាត់មានវត្តមានផ្ទាល់នៅក្នុងព្រឹត្តិការណ៍ដែលលោកបានរៀបរាប់ និងបង្ហាញពីការប៉ះពាល់ ជាបទពិសោធន៍មាននៅក្នុងជីវិតរបស់លោក។ លោកយ៉ូហានបានកត់សម្គាល់ថា “ ពេលនោះប្រហែលជា ម៉ោង៤ រសៀល (ខ.៣៩)។ នៅថ្ងៃបន្ទាប់ លោកយ៉ូហាន ក៏រៀបរាប់ដែរ – លោកភីលីពបានប្រាប់ លោកណាថាណែល ថា លោកបានជួបព្រះមេស្ស៊ី។ លោកណាថាអែលសង្ស័យហើយសួរថា៖ « តើមានអ្វីល្អអាចចេញពីភូមិណាសារ៉ែតបានមែនទេ? លោកភីលីពមិនព្យាយាមយកឈ្នះគាត់ដោយមានហេតុផលល្អនោះទេ ប៉ុន្តែលោកគ្រាន់តែប្រាប់គាត់ថា“ សូមអញ្ជើញមក អ្នកនឹងបានឃើញ” (ខ ៤៥-៤៦) ។ លោកណាថាណែលបានទៅ ហើយបានឃើញមែន ចាប់ពីពេលនោះមកជីវិតរបស់គាត់ត្រូវបានផ្លាស់ប្តូរ។ នោះហើយជារបៀបដែលជំនឿរបស់គ្រីស្តបរិស័ទចាប់ផ្តើម ហើយក្លាយជារបៀបនៃទំនាក់ទំនង ៖ ដោយមាន ចំណេះដឹងផ្ទាល់ខ្លួន បទពិសោធន៍ជាក់ស្តែង និងមិនមែនគ្រាន់តែឮតាមគេនោះទេ។ “ យើងជឿ មិនមែនត្រឹមតែឮពាក្យនាងប៉ុណ្ណោះទេគឺមកពីយើងបានឮ ព្រះអង្គមានព្រះបន្ទូលផ្ទាល់នឹងត្រចៀក ” ។ អ្នកស្រុកបានប្រាប់ស្ដ្រីជនជាតិសាម៉ារី បន្ទាប់ពីព្រះយេស៊ូយេស៊ូបានស្នាក់នៅក្នុងភូមិរបស់ពួកគេ (យ៉ូហាន ៤: ៣៩-៤២) ។ “ សូមអញ្ជើញមកអ្នកនឹងបានឃើញ” គឺជាវិធី សាមញ្ញបំផុតដើម្បីស្គាល់ពីស្ថានភាព។ នេះគីជាវិធីដ៏មានប្រសិទ្ធិភាពនិងត្រឹមត្រូវ សម្រាប់សារទាំងឡាយ ពីព្រោះ ដើម្បីដឹង យើងត្រូវជួបផ្ទាល់ ដើម្បីឱ្យមនុស្សដែលខ្ញុំជួប គាត់និយាយ និងដើម្បីខ្ញុំស្តាប់សក្ខីកម្មរបស់គាត់។
សូមអរគុណចំពោះភាពក្លាហានរបស់អ្នកសារព័ត៌មាន
អត្ថបទសារព័ត៌មាន ក៏ជាកំណត់ហេតុនៃតថភាពពិតផងដែរ ដែលទាមទារឱ្យមានសមត្ថភាព ទៅដល់កន្លែងដែលគ្មាននរណាម្នាក់បានគិតដល់ គឺការត្រៀមខ្លួនទៅ និងមានបំណងចង់ឃើញជាក់ស្តែង។ ការចង់ដឹង ការលាតត្រដាងឲ្យឃើញ ចំណង់ចំណូលចិត្ត។ យើងសូមថ្លែងអំណរគុណចំពោះភាពក្លាហាន និងការប្តេជ្ញាចិត្តរបស់អ្នកជំនាញទាំងអស់ ដូចជា អ្នកសារព័ត៌មាន អ្នកប្រតិបត្តិកាមេរ៉ា(ថតរូប និងវីដេអូ) និពន្ធនាយក នាយក ដែលពួកគេតែងតែប្រថុយជីវិតបំពេញការងាររបស់ខ្លួន។ សូមអរគុណចំពោះការខិតខំរបស់អស់លោកលោកស្រី ដោយសារការខិតខំរបស់បងប្អូន យើងបានដឹងអំពីការធ្វើទុក្ខបុកម្នេញ ដល់ជនជាតិដើមភាគតិចនៅតាមតំបន់ផ្សេងៗនៃពិភពលោក មានករណីជិះជាន់ជាច្រើន និងភាពអយុត្តិធម៌ជាច្រើនចំពោះអ្នកក្រ និងការបំផ្លាញបរិស្ថាន និងសង្គ្រាមជាច្រើនដែលត្រូវបានមើលរំលង។ វាជាការបាត់បង់មួយបើវាមិនត្រូវបានរាយការណ៍ពីរឿងទាំងនោះ គឺមិនត្រឹមតែសម្រាប់ការរាយការណ៍ព័ត៌មានប៉ុណ្ណោះទេ ប៉ុន្តែសម្រាប់សង្គមនិងសម្រាប់លទ្ធិប្រជាធិបតេយ្យទាំងមូល ដែលប្រៀបដូចជាសំឡេងដែលរសាត់បាត់ទៅ។ គ្រួសារមនុស្សជាតិទាំងមូល នឹងជួបក្រីក្រ។
ពិភពលោកយើងជួបស្ថានភាពជាច្រើន ខ្លាំងជាងគេគឺជំងឺរាតត្បាត ជាពេលសូមអញ្ជើញសារគមនាគមន៍ទាំងអស់ “សូមអញ្ជើញមក អ្នកនឹងបានឃើញ”។ យើងអាចជួបហានិភ័យពេលធ្វើការរាយការណ៍អំពីជំងឺរាតត្បាតនេះ ហើយជាការពិតរាល់វិបត្តិទាំងអស់ មានតែតាមក្នុងកែវភ្នែករបស់ប្រទេសអ្នកមានប៉ុណ្ណោះ គឺ“ រក្សាទុកក្នុងសៀវភៅពីរឈុត”។ ឧទាហរណ៍ មានសំណួរ អំពីវ៉ាក់សាំង និងការថែទាំសុខភាពជាទូទៅដែលមានហានិភ័យ ដោយមិនរាប់បញ្ចូលប្រជាជនក្រីក្រ។ តើអ្នកណានឹងជូនដំណឹងដល់យើងអំពីការរង់ចាំយ៉ាងយូរសម្រាប់ការព្យាបាលនៅតាមភូមិក្រីក្រ នៃទ្វីបអាស៊ី អាមេរិកឡាទីន និងអាហ្វ្រិក? ភាពខុសគ្នារវាង សង្គម និងសេដ្ឋកិច្ច អំពីហានិភ័យជាសកលបង្ហាញពីលំដាប់នៃការចែកចាយវ៉ាក់សាំងប្រឆាំងនឹង កូវីដ-១៩ ជាមួយអ្នកក្រតែងតែនៅបន្ទាត់ចុងបញ្ចប់ និងសិទ្ធិទទួលបានការថែទាំសុខភាពជាសកលបានបញ្ជាក់ជាគោលការណ៍ ប៉ុន្តែបានដកហូតនូវផលប៉ះពាល់ជាក់ស្តែង។ ទោះបីជានៅក្នុងពិភពដែលមានសំណាងជាងនេះក៏ដោយ ក៏សោកនាដកម្មសង្គមគ្រួសារដែលធ្លាក់ក្នុងភាពក្រីក្រជាច្រើន នៅតែត្រូវបានគេបិទបាំង។ មានមនុស្សជាច្រើនដែលលែងខ្មាស់អៀនតំរង់ជួររង់ចាំជំនួយពីអង្គការសប្បុរសធម៌ តែមានគោលការណ៍មិនបង្ហាញក្នុងសារព័ត៌មាន។
ឱកាស និងគ្រោះថ្នាក់ដែលលាក់មុខនៅលើគេហទំព័រ
នៅលើអ៊ីនធើណែត និងលើបណ្តាញសង្គម មានការបញ្ចេញមតិរាប់មិនអស់ ដែលអាចបង្កើនសមត្ថភាព ការរាយការណ៍និងចែករំលែកព័ត៌មានទៅកាន់ពិភពលោក មានការបង្ហាញរូបភាពនិងទីបន្ទាល់យ៉ាងច្រើនឥតឈប់ឈរ។ បច្ចេកវិទ្យាឌីជីថល ផ្តល់ឱ្យយើងនូវលទ្ធភាពទទួលបានព័ត៌មានថ្មីៗទាន់ពេលវេលា និងមានប្រយោជន៍។ យើងអាចគិតពីស្ថានភាពបន្ទាន់មួយចំនួនដែលអ៊ីនធើណែត គឺជាអ្នកដំបូងគេដែលរាយការណ៍ព័ត៌មានអំពីសេចក្តីជូនដំណឹងផ្លូវការនានា។ វាគឺជាឧបករណ៍ដ៏មានឥទ្ធិពលមួយ ដែលទាមទារ ឱ្យយើងទាំងអស់គ្នាចេះទទួលខុសត្រូវក្នុងនាមជាអ្នកប្រើប្រាស់។ សក្តានុពលនោះ គឺយើងអាចក្លាយជាសាក្សី ចំពោះព្រឹត្តិការណ៍ដែលកើតឡើង ដែលជួនកាលប្រព័ន្ធផ្សព្វផ្សាយបែបប្រពៃណីមើលរំលង។ វាក៏ផ្តល់នូវការចូលរួមចំណែកដល់សង្គម និងរំលេចរឿងរ៉ាវជាច្រើនទៀតរួមទាំងរឿងវិជ្ជមានផងដែរ។ សូមអរគុណដល់អ៊ីនធើណែត ដែលយើងមានឱកាសរាយការណ៍ពីអ្វីដែលយើងបានឃើញ អ្វីដែលកំពុងកើតឡើងនៅចំពោះមុខយើង និងចែករំលែកជាមួយអ្នកដទៃ។
ទន្ទឹមនឹងនេះ ហានិភ័យនៃព័ត៌មានក្លែងក្លាយ ក៏បានផ្សព្វផ្សាយលើបណ្តាញសង្គមផងដែរ ដែលមនុស្សគ្រប់គ្នាបានដឹង។ យើងបានដឹងខ្លះៗថា ព័ត៌មាន ក៏ដូចជារូបភាព អាចត្រូវបានរៀបចំយ៉ាងងាយស្រួល។ មានហេតុផលមួយចំនួនទៀត នៅពេលខ្លះសម្រាប់តែការនិយាយខ្លី។ ការរិះគន់ក្នុងរឿងនេះមិនមែននិយាយអំពីការធ្វើឱ្យប៉ះពាល់ដល់អ៊ីនធើណែតទេ ប៉ុន្តែវាជាការលើកទឹកចិត្ត ដល់ការវែកញែក និងទំនួលខុសត្រូវខ្ពស់ចំពោះមាតិកាដែលបានផ្ញើ និងទទួល។ យើងទាំងអស់គ្នាទទួលខុសត្រូវចំពោះការផ្សព្វផ្សាយនានាដែលយើងធ្វើ និងដំណឹងនានា ដែលយើងចែករំលែក សម្រាប់ការត្រួតពិនិត្យ លើព័ត៌មានក្លែងក្លាយដោយលាតត្រដាងវាឲ្យបានច្បាស់លាស់។ យើងទាំងអស់គ្នាត្រូវធ្វើជាសាក្សីនៃសេចក្តីពិត៖ ចេញទៅ បានឃើញ និងចែករំលែក។
គ្មានអ្វីដែលអាចជំនួសការមើលឃើញផ្ទាល់ភ្នែកឡើយ
នៅក្នុងការប្រាស្រ័យទាក់ទង គ្មានអ្វីអាចជំនួសបានទាំងស្រុងចំពោះការមើលឃើញដោយផ្ទាល់ឡើយ។ រឿងខ្លះអាចរៀនបានតែតាមរយៈបទពិសោធន៍ផ្ទាល់ខ្លួន។ យើងមិនគ្រាន់តែប្រាស្រ័យទាក់ទងគ្នាដោយពាក្យសម្ដីប៉ុណ្ណោះទេ ប៉ុន្តែដោយផ្ទាល់ភ្នែក ផ្ទាល់សម្ដី និងកាយវិការរបស់យើង។ ភាពទាក់ទាញរបស់ ព្រះយេស៊ូចំពោះ អ្នកដែលបានជួបព្រះអង្គគឺ ពឹងលើសេចក្ដីពិត ដែលព្រះអង្គបានបង្រៀន ។ ប៉ុន្តែប្រសិទ្ធភាពនៃអ្វីដែលព្រះអង្គមានព្រះបន្ទូល ផ្សារភ្ជាប់ជាមួយអ្វីដែលព្រះអង្គបានទតមើលក្នុងអ្នកដទៃ និង របៀបដែលព្រះអង្គប្រព្រឹត្ដចំពោះពួកគេ និងពីភាពស្ងៀមស្ងាត់របស់ព្រះអង្គ។ ពួកសាវ័កមិនត្រឹមតែស្តាប់ព្រះបន្ទូលរបស់ព្រះអង្គប៉ុណ្ណោះទេ ពួកគេបានមើលព្រះអង្គមានបន្ទូល។ ជាការពិតណាស់នៅក្នុងព្រះអង្គ មាននិមិត្តសញ្ញាដែលបានចាប់កំណើតជាមនុសុ្ស មានព្រះបន្ទូលក់តជារូបរាង ព្រះបន្ទូលដែលមនុស្សមើលពុំឃើញព្រះអង្គបង្ហាញឲ្យឃើញ យើងបានឮព្រះបន្ទូលនេះ បានឃើញផ្ទាល់នឹងភ្នែក និងបានពាល់ដោយដៃយើងផ្ទាល់ ដូចដែលលោកយ៉ូហានបានរៀបរាប់ (១យ៉ូហាន១: ១-៣) ។ ពាក្យសម្ដីនេះមានប្រសិទ្ធភាពលុះត្រាតែបានបង្ហាញឲ្យ“ឃើញ” និងបានផ្សារភ្ជាប់ជាមួយបទពិសោធន៍របស់យើងក្នុងការសន្ទនា។ ដោយហេតុផលនេះការអញ្ជើញ “សូមអញ្ជើញ មកអ្នកនឹងបានឃើញ” គឺត្រូវតែបន្តចាំបាច់។
យើងគិតពីចំនួនវោហាសាស្ត្រគ្មានបានការមានច្រើនណាស់ សូម្បីតែនៅក្នុងពេលបច្ចុប្បន្នយើងនេះ នៅក្នុងជីវិតសាធារណៈ ក្នុងមុខជំនួញ ក៏ដូចជាក្នុងជីវិតជាអ្នកនយោបាយក៏ដោយ។ មួយនេះឬមួយនោះ«និយាយគ្មានន័យអ្វីសោះ … គាត់ចង់ពន្យល់ប្រាប់ថា ដូចជាគា្រប់ស្រូវសាលីពីរគ្រាប់នៅក្នុងអង្កាមពីរតៅ អ្នកបានស្វែងរកពេញមួយថ្ងៃ ពេលអ្នករកឃើញហើយ វាមិនសមនឹងការខិតខំស្វែងរករបស់អ្នកទេ។ សម្ដីដ៏ពីរោះៗនៃពាក្យរបស់អ្នកនិពន្ធជាតិអង់គ្លេស ក៏ឆ្លើយតបចំពោះ យើងជាគ្រីស្តបរិស័ទដែលបំពេញកិច្ចការក្នុងប្រព័ន្ធផ្សព្វផ្សាយដែរ។ ដំណឹងល្អនៃព្រះបន្ទូលដំណឹងល្អ បានផ្សព្វផ្សាយពាសពេញពិភពលោកជាលទ្ធផលនៃការជួបគ្នាពីម្នាក់ទៅម្នាក់ ពីដួងចិត្តម្នាក់ទៅម្នាក់ដែលឆ្លើយតបនិងការអញ្ជើញ“ សូមអញ្ជើញមកអ្នកនឹងបានឃើញ” ហើយត្រូវបានវាយប្រហារ“កាន់តែច្រើនឡើង” នៃមនុស្សជាតិដែលបញ្ចាំងពន្លឺតាមរយៈការសម្លឹងមើលការនិយាយ និងកាយវិការរបស់អ្នកដែលធ្វើបន្ទាល់អំពីព្រះយេស៊ូគ្រីស្ត។ រាល់ឧបករណ៍ទាំងអស់មានតម្លៃរបស់វា ហើយអ្នកសារគមនាគមន៍ដ៏អស្ចារ្យម្នាក់គឺលោកប៉ូល នៅតាស៊ូស បានប្រើអ៊ីម៉ែលនិងការផ្ញើសារសង្គម។ ប៉ុន្តែវាជាជំនឿ សេចក្តីសង្ឃឹម និងសេចក្តីសប្បុរសរបស់គាត់ដែលបានធ្វើឱ្យមនុស្សនៅសម័យលោកដែលស្តាប់លោកអធិប្បាយ ឬមានសំណាងបានចំណាយពេលជាមួយលោក ជួបលោកក្នុងសន្និបាត ឬការសន្ទនាផ្ទាល់ខ្លួនជាមួយលោក។ សង្កេតមើលសកម្មភាពរបស់លោកនៅកន្លែងណាដែលលោកបាននៅ មនុស្សទាំងអស់បានឃើញថាខ្លួនឯងពិត មានផលផ្លែ សម្រាប់ជីវិតរបស់ពួកគេ គឺជាសារនៃការសង្រ្គោះ ដោយសារព្រះជាម្ចាស់បានចាត់លោកឲ្យមកបង្រៀនពួកគេ។ សូម្បីតែកន្លែងដែលអ្នកបំរើព្រះជាម្ចាស់រូបនេះ មិនអាចជួបផ្ទាល់ដោយខ្លួនលោក លោកបានចាត់សាវ័កជាកូនដ៏ជាទីស្រឡាញ់របស់លោក ដែលស្មោះត្រង់នឹងព្រះអម្ចាស់ឲ្យទៅបង្រៀនអំពីរបៀបរស់នៅក្នុងអង្គព្រះគ្រីស្ត(១ កូរិនថូស ៤:១៧)។
សន្ត អូគូស្ទីនមានប្រសាសន៍ថា“ យើងមានសៀវភៅនៅក្នុងដៃរបស់យើង ប៉ុន្តែព្រឹតិ្តការណ៍ពិតនៅចំពោះមុខយើង” លោកចង់រៀបរាប់អំពីការបំពេញតាមពាក្យព្យាការី ដែលមានចែងនៅក្នុងព្រះគម្ពីរ។ ព្រះគម្ពីរដំណឹងល្អបានរស់រានមានជីវិតក្នុងការរស់នៅប្រចាំថ្ងៃរបស់យើងផ្ទាល់ នៅពេលយើងព្រមទទួលយកសក្ខីភាពរបស់បងប្អូនដែលបានកែប្រែចិត្តគំនិត បន្ទាប់ពីគេបានជួបជាមួយព្រះយេស៊ូ។ អស់រយៈពេលពីរសហស្សវត្សរ៍ខ្សែសង្វាក់នៃការជួបបែបនេះបានផ្សារភ្ជាប់យ៉ាងមានប្រសិទ្ធិភាពនូវដំណើរជីវិតរបស់គ្រីស្តបរិស័ទ។ ដូច្នេះ ឱកាសកំពុងរង់ចាំយើង គឺការប្រាស្រ័យទាក់ទង ដោយជួបផ្ទាល់ជាមួយប្រជាជននៅកន្លែងដែលគេនៅ។
ឱព្រះអម្ចាស់អើយ! សូមបង្រៀនយើងខ្ញុំឲ្យចេះលះបង់
និងចេះស្វែងរកសេចក្ដីពិត។
សូមបង្រៀនយើងខ្ញុំឲ្យចេះចេញទៅក្រៅ និងចេះបើកភ្នែក
សូមបង្រៀនយើងខ្ញុំឲ្យចេះស្ដាប់
សូមកុំឲ្យយើងខ្ញុំមានចិត្តបុរេនិច្ឆ័យ ឬសន្និដ្ឋានលឿនពេកឡើយ។
សូមបង្រៀនយើងខ្ញុំឲ្យចេះដើរទៅរកកន្លែងដែលគ្មាននរណាចង់ទៅ ដោយ៖
យកពេលចាំបាច់ដើម្បីឈ្វេងយល់ យកចិត្តទុកដាក់ទៅលើអី្វដែលសំខាន់
សូមកុំឲ្យយើងខ្ញុំចាញ់ការល្បួងលោកីយ៍ឡើយ
សូមឲ្យយើងខ្ញុំមានចិត្តក្លាហានបង្ហាញសេចក្ដីពិត។
ឱព្រះអម្ចាស់អើយ!សូមប្រទានឲ្យយើងខ្ញុំចេះមើលឃើញវត្តមានរបស់ព្រះអង្គក្នុងពិភពលោកនេះ
សូមឲ្យយើងខ្ញុំមានចិត្តស្មោះត្រង់ ក្លាហានធ្វើសេចក្តីរាយការណ៍ អ្វីៗដែលយើងខ្ញុំបានឃើញផង៕