រូបសំណាកព្រះនាងម៉ារីនៃហ្វាទីម៉ា បានដាក់តម្កល់នៅមុខព្រះវិហារគ្រួសារដ៏វិសុទ្ធនៅព្រះសហគមន៍អ្នកលឿង និងប្រោសទឹកព្រះពរ ដោយលោកប្រ៊ុយណូ កូសម៍ អភិបាលព្រះសហគមន៍កាតូលិកភូមិភាគកំពង់ចាម និងលោកបូជាចារ្យវ៉ូសាំង សេរ៉ាល់ជាបូជាចារ្យគ្រប់គ្រង់តំបន់អ្នកលឿង។
ក្នុងបរិបទកូវីដ១៩ ពិធីនេះប្រព្រឹត្តទៅយ៉ាងស្ងៀមស្ងាត់ ដែលមានការចូលរួមពីដូនជីកាតូលិក គណៈកម្មការព្រះសហគមន៍ និង តំណាងគ្រីស្តបរិស័ទមួយចំនួន កាលពីថ្ងៃអាទិត្យទី១៦ ខែ ឧសភា ឆ្នាំ២០២១។
ដូនជី ម៉ារីយ៉ា ង្វៀន ធី ទៀត ហឿង បំពេញបេសកម្មនៅព្រះវិហារអ្នកលឿង មានប្រសាសន៍ថា «គ្រីស្តបរិស័ទ(នៅទីនេះ)ចូលចិត្តអធិដ្ឋានតាមរយៈព្រះនាងម៉ារី ដូចនេះបើមានរូបសំណាកព្រះនាងម៉ារីគឺកាន់តែជួយខាងជំនឿពួកគាត់ប្រសើឡើង។»
ដូនជីរូបនេះបន្ថែមថា កន្លែងព្រះនាងម៉ារីនេះគឺសម្រាប់មនុស្សទាំងអស់ ទាំងអ្នកជឿនិងអ្នកមិនជឿ ដែលចង់អធិដ្ឋាន សម្រាប់ផ្ទាល់ខ្លួន និងជាក្រុម។ ដូនជីម៉ារីយ៉ា បន្តថា រូងថ្មនេះ ធ្វើឡើងគឺដើម្បីបង្ហាញពីវត្តមានព្រះនាងម៉ារីទៅអ្នកផ្សេងដែលមិនមែនជាគ្រីស្តបរិស័ទឲ្យបានស្គាល់ និង ដើម្បីសុំព្រះនាងម៉ារីជួយថែរក្សាការពារព្រះសហគមន៍និងគ្រីស្តបរិស័ទរួមទាំងប្រជាជននៅតំបន់អ្នកលឿងក៏ដូចជាប្រទេសកម្ពុជាទាំងមូល។
រូបសំណាកព្រះនាងម៉ារីនេះ ធ្វើពីថ្ម និងយកតាមរចនាបថព្រះនាងម៉ារីបង្ហាញខ្លួននៅហ្វាទីម៉ា មានទំងន់ជាង៨០០គីឡូក្រាម ដែលមានគ្រងឈុតពណ៌ស លម្អរដោយមកុដធ្វើអំពីស្ពាន់លាយប្រាក់ ដៃប្រណមអមដោយខ្សែផ្គាំ បានតម្កល់នៅរូងថ្មទំហំបណ្តោយ១៥ម៉ែត្រនិងកម្ពស់៧ម៉ែត្រ នៅខាងមុខព្រះវិហារគ្រួសារដ៏វិសុទ្ឋអ្នកលឿង ដែលមានទីតាំងស្ថិតនៅក្នុងភូមិ៦ឃុំព្រែកខ្សាយ(ខ) ស្រុកពាមរ ខេត្តព្រៃវែង។
រូបសំណាក់ព្រះនាងម៉ារីនិងរូងថ្មនេះ អាចបញ្ចប់បានដោយជោគជ័យគឺក្រោមការជួយជ្រោមជ្រែងនិង ការចូលរួមវិភាគទានរបស់បងប្អូនគ្រីស្តបរិស័ទចំណុះព្រះវិហារផ្ទាល់និង មួយចំណែកទៀតជាថវិកាផ្ទាល់ខ្លួនពីលោកអភិបាលភូមិភាគកំពង់ចាម លោកបូជាចារ្យវ៉ូសាំង សេរ៉ាល់ និង បងស្រី២នាក់នៅតំបន់អ្នកលឿង សរុបទឹកប្រាក់នៃសាងសង់គឺប្រមាណជា២០,៥០០$ អាមេរិក៕
ដោយ៖ រឿន ស្រីម៉ាច
