ព្រះសហគមន៍កាតូលិកកម្ពុជាភូមិភាគកំពង់ចាម បានផ្តល់ម៉ាសចំនួន៥០,០០០ម៉ាស ដល់រដ្ឋបាលខេត្តកំពង់ចាម ដើម្បីប្រយុទ្ឋប្រឆាំងនឹងការឆ្លងរីករាលដាលនៃមេរោគកូវីដ១៩។ ការផ្តល់នេះបានធ្វើឡើង នារសៀលថ្ងៃទី១៨ ខែឧសភា ឆ្នាំ២០២១នេះកន្លងទៅ នៅសាលាខេត្តកំពង់ចាម។
ពិធីប្រគល់បានប្រព្រឹត្តទៅក្រោមអធិបតីភាព លោក អ៊ុន ចាន់ដា អភិបាលនៃគណៈអភិបាលខេត្តកំពង់ចាម និងលោក ប្រ៊ុយណូ កូសម៍ អភិបាលព្រះសហគមន៍កាតូលិកកម្ពុជាភូមិភាគកំពង់ចាម។
ក្នុងពិធីនេះ លោកអភិបាល ប៊្រុយណូ បានមានប្រសាសន៍ថា ៖ «ព្រះសហគមន៍ភូមិភាគកំពង់ចាម យើងចង់ចូលរួមចំណែកក្នុងកិច្ចការមនុស្សធម៌ក្នុងសង្គម គឺតាមរយៈការចែករំលែកសេចក្តីស្រលាញ់ ទៅមនុស្សគ្រប់គ្នា ជាពិសេសអ្នកដែលសង្គមមិនបានចាប់អារម្មណ៍»។
លោកអភិបាលបានបន្តថា កន្លងមកព្រះសហគមន៍បានបរិច្ចាគធនធានខ្លះៗ ទៅសាលាខេត្តកំពង់ចាមដើម្បីបញ្ជូនបន្តទៅប្រជាពលរដ្ឋដែលកំពុងខ្វះខាតក្នុងពេលប្រទេសកំពុងរងវិបត្តិជំងឺកូវីដ១៩ និងម្យ៉ាងទៀត ព្រះសហគមន៍ចង់បង្កើនទំនាក់ទំនងល្អរវាង ព្រះសហគមន៍កាតូលិកកម្ពុជាភូមិភាគកំពង់ចាម និងសង្គមខាងក្រៅ។
សកម្មភាពដែលព្រះសហគមន៍បានផ្តល់ គឺមិនមែនដើម្បីចង់ល្បីឬជាការអួតខ្លួនតាមរយៈអំណោយបន្តិចបន្តួចនេះទេ។
លោកមានប្រសាសន៍ថា ៖ «យើងចង់បង្ហាញថា ព្រះសហគមន៍កម្ពុជាភូមិភាគកំពង់ចាមចង់ចូលរួមចែករំលែក អ្វីដែលខ្លួនមាន ទោះតិចរឺច្រើនក្តី ក្នុងបំណងល្អ ក្នុងសេចក្តីស្រឡាញ់ និងធម៌មេត្តាករុណា ទៅមនុស្សជុំវិញខ្លួន»។
លោក អ៊ុន ចាន់ដា ក៏បានថ្លែងអំណរគុណចំពោះ ទឹកចិត្តក្នុងការចែករំលែក របស់ព្រះសហគមន៍កាតូលិកកម្ពុជាភូមិភាគកំពង់ចាម ក៏ដូចជាការយកចិត្តទុកដាក់ ជួយគ្នាក្នុងគ្រា ដែលប្រទេសកំពុងតែរងនូវវិបត្តិជំងឺកូវីដ១៩នេះ។
លោកអភិបាលខេត្តបានថ្លែងថា ៖ «ក្នុងនាមខ្ញុំជាអភិបាលនៃគណៈអភិបាលខេត្តកំពង់ចាម សូមថ្លែងអំណរគុណចំពោះ លោកប្រ៊ុយណូ កូសម៍ អភិបាលនៃព្រះសហគមន៍កាតូលិកកម្ពុជា ភូមិភាគកំពង់ចាមដែលតែងតែយកចិត្តទុកដាក់ និងបានចូលរួមចំណែកក្នុងការចែករំលែក សេចក្តីស្រឡាញ់ ចំពោះបងប្អូនក្រីក្រ ខ្វះខាត ជាពិសេសក្នុងគ្រាជំងឺកូវីដ១៩នេះ»។
ក្នុងនោះលោក អ៊ុន ចាន់ដា បានប្រគល់នូវលិខិតថ្លែងអំណរគុណព្រះសហគមន៍កាតូលិកម្ពុជា ភូមិភាគកំពង់ចាម របស់រដ្ឋបាលខេត្ត ជូនលោកអភិបាលប្រ៊ុណូ កូសម៍ផងដែរ។
សូមរំឭកថា កាលពីថ្ងៃទី២៦ ខែមីនា ឆ្នាំ២០២១ ព្រះសហគមន៍កាតូលិកកម្ពុជា កម្ពុជាភូមិភាគ កំពង់ចាមបានឧបត្ថមថវិកាចំនួន ១,១០០ ដុល្លាអាមេរិក មី៦០កេស និងអង្ករចំនួន១,២០០ គីឡូក្រាម រដ្ឋបាលខេត្តកំពង់ចាមម្តងរួចមកហើយដើម្បីចូលរួមជួយសម្រួលជីវភាពខ្វះខាតរបស់ប្រជាពលរដ្ឋមួយចំនួនក្នុងខេត្តកំពង់ចាមដោយសារវិបត្តិជម្ងឺ កូវីដ១៩នេះ៕
ដោយ៖ រឿន ស្រីម៉ាច
