សមាគមសប្បុរសធម៌ សន្តវិនសេនដឺប៉ូលកម្ពុជា នៅថ្ងៃទី២៥ ខែមេសា ឆ្នាំ២០២១ បាននំាយក នូវគ្រឿងឧបភោគបរិភោគ ជូនដល់គ្រួសារក្រីក្រនិងចាស់ជរាចំនួន១០គ្រួសារ ដែលកំពុងជួបការលំបាកខ្វះស្បៀង ក្នុងអំឡុងពេលនៃការផ្ទុះវីរុសកូវីដ១៩នេះ។
លោក ផាន បូរ៉ា ជាក្រុមប្រឹក្សាជាន់ខ្ពស់របស់សមាគមសប្បុរសធម៌សន្តវិនសេនដឺប៉ូលកម្ពុជា បានប្រាប់ឱ្យដឹងថា គ្រឿងឧបភោគបរិភោគ ដែលសមាគមផ្តល់ជូនគ្រួសារនីមួយៗដែលកំពុងខ្វះខាតអំឡុងពេលកូវីដ១៩ រួមមាន អង្ករ១៥គីឡូ ទឹកត្រី ប្រេងឆា ប៊ីចេង ស្ករ អំបិល និងមី ដែលជាថវិការផ្ទាល់របស់សមាគម។
លោកបន្តថា ៖ «អ្នកក្រីក្រនិងចាស់ជរាទំាង១០គ្រួសារនេះ ភាគច្រើនពួកគាត់អាយុពី៧០-៨០ ឆ្នាំ ហើយពួកគាត់រំពឹងលើកូនៗរបស់គាត់ ជាអ្នកធ្វើការរោងចក្រ នៅទីក្រុងភ្នំពេញផ្ញើប្រាក់ឲ្យពួកគាត់»។
លោក ផាន បូរ៉ា បានបន្ថែមថា ស្របពេលកើតមានការផ្ទុះខ្លាំងនូវការរីករាលដាលនៃវីរុសកូវីដ១៩ បានផ្ទុះឡើង កូនៗរបស់ពួកគាត់មិនបានផ្ញើប្រាក់ឲ្យពួកគាត់ទៀតទេ ដែលធ្វើឲ្យពួកគាត់ខ្វះខាតស្បៀងយ៉ាងនេះ។
លោកថា សមាគមបានសហការជាមួយនឹងអាជ្ញាធរភូមិ ដើម្បីប្រគល់ស្បៀងជូនពួកគាត់ ដែលពួកគាត់ទំាង១០គ្រួសារមកពី៥ភូមិផ្សេងៗគ្នា ក្នុងនោះមាន ភូមិកោះចាស់ ភូមិកោះកំពង់ត្រុំ ភូមិកោះប៉ែន ភូមិចុងខ្សាច់ និងភូមិកោះដាច់ ដែលស្ថិតនៅក្នុងស្រុកកំពង់សៀម ខេត្តកំពង់ចាម។
សូមបញ្ជាក់ផងដែរថា នៅថ្ងៃទី០២ ខែឧសភា ឆ្នាំ២០២១ ខាងមុខនេះ សមាគមសប្បុរសធម៌ សន្តវិនសេនដឺប៉ូលកម្ពុជា ក៏នឹងមានគម្រោងយកស្បៀងជូនគ្រួសារក្រីក្រ១០គ្រួសារថែមទៀត ដែលមានទីតាំងនៅ សង្កាត់សំបួរមាស ក្រុងកំពង់ចាម ខេត្តកំពង់ចាម៕
