អត្ថបទទី ១
អ៊ីស្រាអែលជាប្រជារាស្ត្ររបស់ព្រះអម្ចាស់
«ថ្ងៃនេះ ព្រះអម្ចាស់ ជាព្រះរបស់អ្នក បង្គាប់អោយអ្នកប្រតិបត្តិតាមច្បាប់ និងវិន័យទាំងនេះ។ ចូរកាន់ និងប្រតិបត្តិតាមអោយអស់ពីចិត្ត អស់ពីគំនិត។ ថ្ងៃនេះ អ្នកសុខចិត្តទទួលស្គាល់ថា ព្រះអម្ចាស់ជាព្រះរបស់អ្នក ហើយអ្នកយល់ព្រមដើរតាមមាគ៌ារបស់ព្រះអង្គ គោរពច្បាប់ បទបញ្ជា និងវិន័យទាំងឡាយរបស់ព្រះអង្គ ព្រមទាំងស្ដាប់បង្គាប់ព្រះអង្គទៀតផង។ ថ្ងៃនេះព្រះអម្ចាស់ យល់ព្រមទទួលអ្នកជាប្រជារាស្ត្ររបស់ព្រះអង្គផ្ទាល់ ដូចព្រះអង្គមានព្រះបន្ទូលប្រាប់អ្នក ហើយអ្នកត្រូវប្រតិបត្តិតាមបទបញ្ជាទាំងប៉ុន្មានរបស់ព្រះអង្គ។ ព្រះអង្គនឹងធ្វើអោយ អ្នកក្លាយទៅជាប្រជាជាតិមួយ មានកិត្តិយសរុងរឿង មានកេរ្តិ៍ឈ្មោះល្បី ហើយថ្កុំថ្កើងជាងគេក្នុងចំណោមប្រជាជាតិទាំងអស់ដែលព្រះអង្គបាន បង្កើតមក។ អ្នកនឹងទៅជាប្រជារាស្ត្រដ៏វិសុទ្ធ សំរាប់ព្រះអម្ចាស់ជាព្រះរបស់អ្នក ដូចព្រះអង្គមានព្រះបន្ទូលទុក»។
ទំនុកតម្កើងលេខ ១១៩ៈ ១-២, ៤-៥
១. អ្នកណាដែលមាន កិរិយាជាប់ប្រាណ ត្រឹមត្រូវឥតខ្ចោះ ប្រតិបត្តិតាម
ធម្មវិន័យព្រះ អ្នកនោះប្រទះ តែសុខមង្គល ។
២. អ្នកដែលប្រតិបត្តិ តាមផ្លូវល្អពិត បញ្ជានិម្មល ហើយស្វែងរកព្រះ
មិនខ្ជីខ្ជាខ្ជិល ពិតជាបាបផល មង្គលពេកហោង ។
៤. ព្រះអង្គចេញច្បាប់ ដោយប្រកាស់ប្រាប់ អោយយើងស្រឡាញ់ យកចិត្តទុកដាក់
ព្យាយាមទន្ទេញ ខិតខំបំពេញ ដានស្នាមព្រះអង្គ ។
៥. សូមជួយខ្ញុំផង អោយដូចបំណង មានចិត្តរឹងប៉ឹងដើម្បីប្រតិបត្តិ
តាមក្រឹត្យព្រះអង្គ វិន័យត្រឹមត្រង់ តាមទ្រង់បញ្ជា ។
អត្ថបទគម្ពីរដំណឹងល្អតាមសន្តម៉ាថាយ ៥ៈ៤៣-៤៨
ត្រូវស្រឡាញ់ខ្មាំងសត្រូវ
«អ្នករាល់គ្នាធ្លាប់បានឮសេចក្ដីថ្លែងទុកមកថា “ចូរស្រឡាញ់បងប្អូនឯទៀតៗ ហើយស្អប់ខ្មាំងសត្រូវរបស់អ្នក”។ រីឯខ្ញុំវិញ ខ្ញុំសុំបញ្ជាក់ប្រាប់អ្នករាល់គ្នាថា ចូរស្រឡាញ់ខ្មាំងសត្រូវរបស់អ្នករាល់គ្នា ព្រមទាំងទូលអង្វរព្រះជាម្ចាស់ សូមព្រះអង្គប្រទានពរអោយអស់អ្នក ដែលបៀតបៀនអ្នករាល់គ្នាផង។ ធ្វើដូច្នេះ អ្នករាល់គ្នានឹងបានទៅជាបុត្ររបស់ព្រះបិតាដែលគង់នៅស្ថានបរមសុខ ដ្បិតព្រះអង្គប្រទានអោយព្រះអាទិត្យរបស់ព្រះអង្គរះបំភ្លឺ ទាំងមនុស្សអាក្រក់ ទាំងមនុស្សល្អ ហើយទ្រង់ប្រទានទឹកភ្លៀងអោយទាំងមនុស្សសុចរិត ទាំងមនុស្សទុច្ចរិតផងដែរ។ ប្រសិនបើអ្នករាល់ គ្នាស្រឡាញ់តែអស់អ្នកដែលស្រឡាញ់អ្នករាល់គ្នា តើនឹងទទួលរង្វាន់អ្វី ? សូម្បីតែអ្នកទារពន្ធ*ក៏ចេះស្រឡាញ់គ្នាគេដែរ។ បើអ្នករាល់គ្នារាប់រកតែបងប្អូនរបស់ខ្លួនប៉ុណ្ណោះ តើមានអ្វីអស្ចារ្យ ? សូម្បីតែសាសន៍ដទៃក៏ប្រព្រឹត្តដូច្នោះដែរ។ ព្រះបិតារបស់អ្នក រាល់គ្នាដែលគង់នៅស្ថានបរមសុខទ្រង់គ្រប់លក្ខណ៍យ៉ាងណា សុំអោយអ្នករាល់គ្នាបានគ្រប់លក្ខណ៍យ៉ាងនោះដែរ»។
