ព្រះសហគមន៍តាហែនចែកអង្ករដល់គ្រួសារកូនសិស្សស្នាក់ក្រីក្រចំនួន៥គ្រួសារ ដែលកំពុងជួបប្រទះបញ្ហាសេដ្ឋកិច្ចក្នុងអំឡុងពេលកូវីដ១៩ កាលពីថ្ងៃទី ៨ ខែ សីហា ដែលធ្វើឡើងនៅក្នុងទីតាំងព្រះវិហារក្នុងស្រុកសង្កែរ ខេត្តបាត់ដំបង។
អ្នកស្រីសៀ សៀក ជាប្រធានព្រះសហគមន៍តាហែនបានឲ្យដឹងថា កម្មវិធីនេះមានការចូលរួមពីលោកអភិបាលអេនរីគេ ហ្វីការេដូ ជាអភិបាលព្រះសហគមន៍កាតូលិកភូមិភាគបាត់ដំបងនិង គណៈកម្មការព្រះសហគមន៍។ អំណោយដែលចែកជូននោះរួមមាន មួយគ្រួសារទទួលបានអង្ករ៥០ គីឡូក្រាម សាប៊ូលាងដៃ ទឹកស៊ីអ៊ីវ ទឹកត្រីជាដើម។ អ្នកស្រីសៀកបន្ថែមថា អំណោយទាំងនោះទទួលបានមកពីសប្បុរសជនមកពីប្រទេសសិង្ហបុរី។
គួរបញ្ជាក់ផងដែរថា ក្នុងអំឡុងពេលកូវីដ១៩នេះ ព្រះសហគមន៍តាហែនបានផ្តល់ជាអង្ករ និងគ្រឿងឧបភោគបរិភោគដល់គ្រួសារក្រីក្រចំនួនបីលើកមកហើយ ដែលសរុបមកមានចំនួន១៣៦គ្រួសារ ដែលគ្រួសារទាំងនោះមកពីភូមិនានានៅជុំវិញភូមិតាហែន៕
