លោកបូជាចារ្យមួង រស់ នឹងចាកចេញពីប្រទេសកម្ពុជា ដើម្បីបន្តការសិក្សានៅប្រទេសហ្វីលីពីនរយៈពេល១ឆ្នាំ។ លោកនឹងចេញពីទៅនៅយប់ថ្ងៃទី២ ខែមករា ឆ្នាំ២០២០នេះ។ លោកបូជាចារ្យមួង រស់ បានឲ្យដឹងថា លោកនឹងសិក្សាលើមុខវិជ្ជា២ គឺ Pastoral Leadership and Management for the Mission និង Pastoral Renewal for Discipleship។ លោកបូជាចារ្យបានបញ្ជាក់ថា មុខវិជ្ជាទី១ គឺជាការងារសម្រាប់បម្រើព្រះសហគមន៍និងរៀបចំកិច្ចការប្រកាសដំណឹងល្អ ហើយមុខវិជ្ជាទី២ គឺការមើលកិច្ចការងាររបស់យើងឡើងវិញក្នុងនាមយើងជាសាវ័ករបស់ព្រះយេស៊ូគ្រីស្ត។
លោកបូជាចារ្យរូបនេះ រំពឹងថា ក្រោយពេលរៀនចប់ នឹងអាចយកចំណេះដឹងនិងជំនឿថែមទៀត ត្រឡប់មកភូមិភាគបាត់ដំបង ដើម្បីបម្រើកិច្ចការងារក្នុងការប្រកាសដំណឹងល្អនៅប្រទេសកម្ពុជា។
លោកបូជាចារ្យមួងរស់ បានទទួលអគ្គសញ្ញាតែងតាំងជាបូជាចារ្យកាតូលិកនាថ្ងៃទី៦ ខែធ្នូ ឆ្នាំ២០១៤។
លោកមានប្រសាសន៍ថា ក្នុងរយៈពេល៥ឆ្នាំមកនេះ លោកបានទទួលខុសត្រូវលើព្រះសហគមន៍ចំនួន២ គឺព្រះសហគមន៍ស្នឹង និងព្រះសហគមន៍ប៉ៃលិន។ ជាមួយគ្នានោះដែរ លោកក៏ទទួលខុសត្រូវលើកម្មវិធីយុវជនទូទាំងភូមិភាគបាត់ដំបងផងដែរ និងកិច្ចការងារមួយចំនួនទៀត។
លោកមានប្រសាសន៍ថា ក្នុងរយៈពេល៥ឆ្នាំនេះ លោកសប្បាយរីករាយដែលបានបម្រើព្រះសហគមន៍ ទោះបីកិច្ចការងារខ្លះមិនសូវស្រួល តែលោកពេញចិត្តបម្រើ «ធ្វើឲ្យខ្ញុំរីកចម្រើន មានភាពចាស់ទុំបន្តិចម្តងៗតាមផ្លូវវិញ្ញាណ…ដែលបានធ្វើការងាររបស់ព្រះជាម្ចាស់»៕
កែវ កញ្ញា
