លិខិតរបស់លោកប៉ូលផ្ញើជូន
លោកភីលេម៉ូន
ពាក្យលំនាំ
លោកភីលេម៉ូន ជាអ្នកធំមួយរូបដែលជឿព្រះគ្រីស្ដ ហើយប្រហែលជាលោកត្រូវជាសមាជិកមួយរូបក្នុងក្រុមជំនុំ/ ព្រះសហគមន៍នៅក្រុងកូឡូស។ គាត់ត្រូវជាមិត្ដភក្ដិរបស់លោកប៉ូល (ខ១)។ គាត់មានខ្ញុំបម្រើម្នាក់ ឈ្មោះអូនេស៊ីម ដែលបានរត់ចេញពីផ្ទះ។ អូនេស៊ីមបានទៅជួបលោកប៉ូល ហើយក៏ប្រែចិត្ដជឿព្រះយេស៊ូដែរ។ លោកប៉ូលបានសម្រេចចិត្ដចាត់គាត់ឲ្យវិញត្រឡប់ទៅរកម្ចាស់របស់ខ្លួនវិញ ហើយលោកបានសរសេរលិខិតឲ្យ គាត់កាន់ទៅជាមួយផង។ ក្នុងលិខិតនេះ លោកប៉ូលបានសុំឲ្យលោកភីលេម៉ូនទទួលអូនេស៊ីម ក្នុងឋានៈជាបងប្អូនរួមជំនឿ គឺមិនមែនជាខ្ញុំបម្រើ ទៀតទេ (ធម្មតាទាសករដែលរត់ដូច្នេះ តែងតែទទួលទោសជាទម្ងន់)។
គោលសំខាន់ៗ
យើងសង្កេតឃើញថាលោកប៉ូឡពុំបានបង្គាប់បញ្ជាលោកភីលេម៉ូនទេ ហើយលោកក៏ពុំបានជំទាស់នឹងសិទ្ធិរបស់លោកភីលេម៉ូន ដែលជាម្ចាស់ លើអូនេស៊ីមដែរ។ លោកគ្រាន់តែរំលឹកលោកភីលេម៉ូន និង អស់អ្នកដែលអានលិខិតនេះ អំពីព្រះហឫទ័យស្រឡាញ់របស់ព្រះគ្រីស្ដ ដែល នាំមនុស្សឲ្យមានទំនាក់ទំនងរវាងគ្នានឹងគ្នា តាមបែបមួយថ្មី សមជាអ្នកដែលបានទទួលជីវិតថ្មី។
គំរោងគម្ពីរភីលេម៉ូនៈ
- សេចក្ដីផ្ដើម ១-៣
- លោកប៉ូលសរសេរលោកភីលេម៉ូន ៤-៧
- លោកប៉ូលសុំអនុគ្រោះអូនេស៊ីម ៨-២២
- អវសានកថា ២៣-២៥
ជំពូក ១
សេចក្ដីផ្ដើម
១ ខ្ញុំ ប៉ូល នៅជាប់ឃុំឃាំងព្រោះតែព្រះគ្រីស្ដយេស៊ូ ព្រមទាំងធីម៉ូថេជាបងប្អូន សូមជំរាបមកលោកភីលេម៉ូនជាទីស្រឡាញ់ ដែលរួមការងារជាមួយយើង ២ សូមជំរាបមកប្អូនស្រី អ័ព្យ៉ា ជំរាបមកលោកអឃីពូសដែលតយុទ្ធរួមជាមួយយើង និងសូមជំរាបមកក្រុមជំនុំ/ព្រះសហគមន៍*ដែលប្រជុំគ្នាក្នុងផ្ទះរបស់លោកប្អូន សូមជ្រាប។
៣ សូមព្រះជាម្ចាស់ជាព្រះបិតារបស់យើង និងព្រះយេស៊ូគ្រីស្ដជាអម្ចាស់ ប្រណីសន្ដោស ប្រទានសេចក្ដីសុខសាន្តដល់បងប្អូន។
សេចក្ដីស្រឡាញ់ និងជំនឿរបស់លោកភីលេម៉ូន
៤ រាល់ពេលអធិស្ឋាន* ខ្ញុំតែងតែនឹកដល់លោកប្អូន ហើយអរព្រះគុណព្រះជាម្ចាស់របស់ខ្ញុំជានិច្ច ៥ ដ្បិតខ្ញុំបានឮគេ និយាយអំពីសេចក្ដីស្រឡាញ់ និងជំនឿរបស់លោកប្អូន ចំពោះព្រះអម្ចាស់យេស៊ូ និងចំពោះប្រជាជនដ៏វិសុទ្ធទាំងអស់។ ៦ សូមព្រះអង្គប្រទានអោយ ការរួមរស់ក្នុងជំនឿ ជំរុញចិត្តលោកប្អូនអោយស្គាល់ច្បាស់ នូវការល្អគ្រប់យ៉ាងដែលយើងត្រូវធ្វើថ្វាយព្រះគ្រីស្ដ*។ ៧ ខ្ញុំមានអំណរ និងមានកម្លាំងចិត្តយ៉ាងខ្លាំង ដោយឃើញថាលោកប្អូនមានចិត្តស្រឡាញ់ ដ្បិតលោកប្អូនបានធ្វើអោយប្រជាជនដ៏វិសុទ្ធ*មានចិត្តស្ងប់។
លោកប៉ូលអង្វរលោកភីលេម៉ូន
៨ ទោះបីខ្ញុំមានសិទ្ធិពេញទីនឹងបង្គាប់លោកប្អូន ក្នុងនាមព្រះគ្រីស្ដ អោយធ្វើអ្វីដែលលោកប្អូនត្រូវធ្វើក្ដី ៩ ក៏ខ្ញុំចូលចិត្តយក សេចក្ដីស្រឡាញ់មកអង្វរលោកប្អូនវិញដែរ។ ខ្ញុំ ប៉ូល ដែលកាន់តែចាស់ហើយ ឥឡូវនេះ ក៏ជាប់ឃុំឃាំងព្រោះតែព្រះគ្រីស្ដយេស៊ូថែមទៀត ១០ ខ្ញុំសូមអង្វរលោកប្អូនអោយកូនរបស់ខ្ញុំ គឺអូនេស៊ីមដែលខ្ញុំបានបង្កើត នៅពេលជាប់ឃុំឃាំង។ ១១ ពីដើមគាត់គ្មាន ប្រយោជន៍អ្វីសំរាប់លោកប្អូនមែន ប៉ុន្តែ ឥឡូវនេះ គាត់ប្រាកដជាមានប្រយោជន៍សំរាប់លោកប្អូន ក៏ដូចជាមានប្រយោជន៍សំរាប់ខ្ញុំដែរ។
១២ ខ្ញុំសូមចាត់គាត់ ដែលប្រៀបបីដូចជាថ្លើមប្រមាត់របស់ខ្ញុំ អោយវិលមករកលោកប្អូនវិញ។ ១៣ ខ្ញុំមានបំណងចង់ទុក គាត់អោយនៅជាមួយខ្ញុំដែរ ដើម្បីអោយនៅបំរើខ្ញុំជំនួសលោកប្អូនក្នុងពេលខ្ញុំជាប់ឃុំឃាំង ព្រោះតែដំណឹងល្អ*នេះ ១៤ ក៏ប៉ុន្តែ ខ្ញុំមិនចង់ធ្វើអ្វី ដោយគ្មានការយល់ព្រមពីលោកប្អូនឡើយ ដើម្បីកុំអោយលោកប្អូនធ្វើអំពើល្អ ទាំងទើសទាំងទ័ល គឺធ្វើដោយស្ម័គ្រចិត្តវិញ។ ១៥ អូនេស៊ីមត្រូវតែឃ្លាតឆ្ងាយពីលោកប្អូនមួយរយៈមែន ដើម្បីអោយលោកប្អូនបានទទួលគាត់វិញអស់កល្បជានិច្ច ១៦ មិនមែនក្នុងឋានៈជា ខ្ញុំបំរើទៀតទេ គឺក្នុងឋានៈជាបងប្អូនដ៏ជាទីស្រឡាញ់ ដូច្នេះ ប្រសើរជាងខ្ញុំបំរើទៅទៀត។ គាត់ជាបងប្អូនដ៏ជាទីស្រឡាញ់យ៉ាងខ្លាំងរបស់ខ្ញុំ ហើយចំពោះលោកប្អូនគាត់ក៏រឹតតែជាទីស្រឡាញ់ថែមទៀត ទាំងខាងលោកីយ៍ ទាំងខាងព្រះអម្ចាស់។
១៧ ដូច្នេះ ប្រសិនបើលោកប្អូនរាប់ខ្ញុំ ទុកជាបងប្អូនរួមជំនឿមែន សូមទទួលគាត់អោយបាន ដូចទទួលខ្ញុំផ្ទាល់ដែរ។ ១៨ ប្រសិនបើគាត់ធ្វើអ្វីខុសចំពោះលោកប្អូន ឬប្រសិនបើគាត់ជំពាក់អ្វីលោកប្អូនសូមគិតទៅលើខ្ញុំចុះ។ ១៩ ខ្ញុំ ប៉ូល ខ្ញុំសរសេរពាក្យនេះដោយដៃខ្ញុំផ្ទាល់ថា ខ្ញុំនឹងសងលោកប្អូនវិញ (ខ្ញុំមិនបាច់រំលឹកថា លោកប្អូនក៏នៅជំពាក់ខ្ញុំផងដែរនោះទេ គឺនៅជំពាក់រូបលោកប្អូនផ្ទាល់តែម្ដង)។ ២០ លោកប្អូនអើយ សូមលោកប្អូនមេត្តាជួយខ្ញុំដោយយល់ដល់ព្រះអម្ចាស់ ហើយសូមធ្វើអោយចិត្តខ្ញុំបានស្ងប់ក្នុងអង្គព្រះគ្រីស្ដផង។
២១ ខ្ញុំ សរសេរមកលោកប្អូន ដោយជឿជាក់ថា លោកប្អូនមុខជាស្ដាប់តាមសំណូមពររបស់ខ្ញុំ។ ខ្ញុំក៏ដឹងថា លោកប្អូននឹងធ្វើលើសពីពាក្យ ដែលខ្ញុំសុំទៅទៀត។ ២២ ព្រមជាមួយគ្នានេះ សូមលោកប្អូនរៀបចំកន្លែងមួយសំរាប់អោយខ្ញុំស្នាក់ផង ដ្បិតខ្ញុំសង្ឃឹមថានឹងបានមកជួបបងប្អូនមិនខាន ព្រោះបងប្អូនបានទូលអង្វរព្រះជាម្ចាស់អោយខ្ញុំ។
ពាក្យសួរសុខទុក្ខ
២៣ លោកអេប៉ាប្រាស ដែលជាប់ឃុំឃាំងជាមួយខ្ញុំ ព្រោះតែព្រះគ្រីស្ដយេស៊ូ សូមជំរាបសួរមកលោកប្អូន ២៤ ហើយលោកម៉ាកុស លោកអរីស្ដាក លោកដេម៉ាស និងលោកលូកា ដែលរួមការងាររបស់ខ្ញុំ ក៏សូមជំរាបសួរមកលោកប្អូនដែរ។
២៥ សូមព្រះយេស៊ូគ្រីស្ដជាព្រះអម្ចាស់នៃយើង ប្រណីសន្ដោដល់វិញ្ញាណបងប្អូន។