លិខិតទី ១ របស់លោកប៉ូលផ្ញើជូន
គ្រីស្ដបរិស័ទនៅក្រុងថេស្សាឡូនិក
ពាក្យលំនាំ
ក្រុងថេស្សាឡូនិកៈ សព្វថ្ងៃ ក្រុងនេះស្ថិតនៅក្នុងប្រទេសក្រិក។ នៅជំនាន់លោកប៉ូល ក្រុងថេស្សាឡូនិកនេះធំណាស់ មានប្រជាជនប្រមាណ ៣០០.០០០នាក់។ អ្នកក្រុងជាច្រើន ប្រកបរបរពាណិជ្ជកម្មតាមកំពង់ផែ។ មានមនុស្សជាច្រើនសាសន៍ស្នាក់នៅក្រុងនោះមានជនជាតិយូដាជាដើម។
គ្រីស្ដទូតប៉ូលបានប្រកាសដំណឹងល្អនៅក្រុងថេស្សាឡូនិក ក្នុងគ.ស. ៥០ (កិច្ចការ ១៧.១-១០)។ លោកបានប្រកាសដំណឹងល្អដល់ជនជាតិយូដាមុនគេ មានអ្នកខ្លះជឿ ហើយអ្នកខ្លះប្រឆាំងនឹងគ្រីស្ដបរិស័ទដែលទើបនឹងជឿថ្មីៗ។ ពួកគេបង្ខំលោកប៉ូលឲ្យចាកចេញពីក្រុងនោះ ហើយលោកក៏ធ្វើដំណើរទៅក្រុងអាថែន និង ក្រុងកូរិនថូស។ ដោយលោកព្រួយបារម្ភខ្លាចក្រែងគ្រីស្ដបរិស័ទនៅក្រុងថេស្សាឡូនិកលះបង់ជំនឿ លោកក៏សរសេរលិខិតមួយច្បាប់ទៅលើកទឹកចិត្ដពួកគេ នៅ គ.ស. ៥១។
គោលសំខាន់ៗ
ក្នុងលិខិតនេះ លោកប៉ូលបានសម្ដែងសេចក្ដីស្រឡាញ់យ៉ាងខ្លាំងចំពោះគ្រីស្ដបរិស័ទ ដែលលោកចាត់ទុកដូចជាកូនរបស់លោកផ្ទាល់។ លោកដាស់តឿនគេឲ្យកាន់តាមការប្រៀនប្រដៅរបស់លោកយ៉ាងខ្ជាប់ខ្ជួន ទោះបីពួកគេជួបប្រទះឧបសគ្គយ៉ាងណាក៏ដោយ
នៅសម័យនោះ គ្រីស្ដបរិស័ទជាច្រើនស្មានថា ព្រះគ្រីស្ដត្រូវយាងមកវិញក្នុងពេលឆាប់ៗ។ មានអ្នកខ្លះព្រួយបារម្ភ ខ្លាចក្រែងស្លាប់ មុនពេលឃើញព្រះយេស៊ូយាងត្រឡប់មកវិញ។ ដូច្នេះ លោកប៉ូលប្រៀនប្រដៅគេថា ទោះបីពួកគេស្លាប់ហួសហើយក៏ដោយ ក៏ព្រះគ្រីស្ដនឹងប្រោសគេឲ្យរស់ឡើងវិញព្រមទាំងប្រទានឲ្យគេមានសិរីរុងរឿងរួមជាមួយព្រះអង្គដែរ(១ថេស្សាឡូនិក ៤.១៣-៥.១១)។ ប៉ុន្ដែមានគ្រីស្ដបរិស័ទខ្លះទៀតយល់ច្រឡំ ហើយមិនយកចិត្ដទុកដាក់នឹងការរស់នៅក្នុងពិភពលោកនេះទេ ដោយសំអាងថាព្រះគ្រីស្ដជិតយាងមកវិញ ឬយាងមកវិញរួចស្រេចហើយ (២ថេស្សាឡូនិក ២.១-២)។ ដូច្នេះ លោកប៉ូល (ឬ កូនចៅរបស់លោកមួយរូប)បានតែងលិខិតមួយទៀត (ថេស្សាឡូនិកទី២)ដើម្បីប្រៀនប្រដៅពួកគេឲ្យរស់នៅយ៉ាងសមរម្យស្រគត់ស្រគំ ទំរាំដល់ព្រះគ្រីស្ដយាងមក។
គំរោងគម្ពីរថេស្សាឡូនិកៈ
១ថេស្សាឡូនិកៈ
សេចក្ដីផ្ដើម ១.១
ពាក្យអរព្រះគុណ និង ពាក្យសរសើរ ១.២-៣.១៣
ពាក្យដាស់តឿនអំពីរបៀបរស់នៅស្របតាមជំនឿ៤.១-១២
ការបង្រៀនស្ដីអំពីព្រះអម្ចាស់យាងមកវិញ ៤.១៣-៥.១១
ពាក្យទូន្មានផ្សេងៗ ៥.១២-២២
អវសានកថា ៥.២៣-២៨
២ថេស្សាឡូនិកៈ
សេចក្ដីផ្ដើម ១.១-២
ពាក្យសរសើរ និង ពាក្យទូន្មានផ្សេងៗ ១.៣-១២
ការបង្រៀនស្ដីអំពីព្រះអម្ចាស់យាងមកវិញ ២.១-១៧
ពាក្យដាស់តឿនអំពីរបៀបរស់នៅរបស់គ្រីស្ដបរិស័ទ ៣.១-១៥
អវសានកថា ៣.១៦-១៨
លិខិតទី ១ របស់លោកប៉ូលផ្ញើជូន
គ្រីស្ដបរិស័ទនៅក្រុងថេស្សាឡូនិក
ជំពូក ១
សេចក្ដីផ្ដើម
១ យើងខ្ញុំ ប៉ូល ស៊ីលវ៉ាន និងធីម៉ូថេ សូមជំរាបមកក្រុមជំនុំ/ព្រះសហគមន៍*នៅក្រុងថេស្សាឡូនិក ដែលរួមជាមួយព្រះជាម្ចាស់ជាព្រះបិតា និងជាមួយព្រះអម្ចាស់យេស៊ូគ្រីស្ដ។ សូមព្រះអង្គប្រណីសន្ដោស និង ប្រទានសេចក្ដីសុខសាន្តដល់បងប្អូន។
ជីវិត និងជំនឿរបស់គ្រីស្ដបរិស័ទនៅក្រុងថេស្សាឡូនិក
២ យើងតែងតែអរព្រះគុណ ព្រះជាម្ចាស់ អំពីបងប្អូនទាំងអស់គ្នាជានិច្ច ហើយនៅពេលយើងអធិស្ឋាន យើងតែងនឹកគិតដល់បងប្អូនជាដរាប។ ៣ នៅចំពោះព្រះភក្ត្រ ព្រះជាម្ចាស់ជាព្រះបិតារបស់យើង យើងនឹកចាំអំពីកិច្ចការដែលបងប្អូនបានធ្វើដោយជំនឿ អំពីការនឿយហត់ដែលបងប្អូនបំពេញ ដោយចិត្តស្រឡាញ់ និងអំពីការស៊ូទ្រាំរបស់បងប្អូន ដោយចិត្តសង្ឃឹមលើព្រះយេស៊ូគ្រីស្ដជាអម្ចាស់នៃយើង។ ៤ បងប្អូនជាទីស្រឡាញ់របស់ព្រះអម្ចាស់អើយ យើងដឹងហើយថា ព្រះអង្គបានជ្រើសរើសបងប្អូន ៥ ដ្បិតយើងបាននាំ ដំណឹងល្អ*មកជូនបងប្អូន មិនមែនត្រឹមតែដោយពាក្យសំដីប៉ុណ្ណោះទេ គឺដោយមានឫទ្ធានុភាព មានព្រះវិញ្ញាណដ៏វិសុទ្ធ* និងមានចិត្តជឿជាក់ទាំងស្រុងថែមទៀតផង។ កាលយើងនៅជាមួយបងប្អូន យើងបានប្រព្រឹត្តយ៉ាងណា សំរាប់ជាប្រយោជន៍បងប្អូន ដូចបងប្អូនជ្រាបស្រាប់ហើយ។ ៦ បងប្អូនបានយកតំរាប់ តាមយើង និងយកតំរាប់តាមព្រះអម្ចាស់ គឺទោះបីបងប្អូនជួបប្រទះនឹងទុក្ខវេទនាធ្ងន់ធ្ងរយ៉ាងណាក៏ដោយ ក៏បងប្អូនបានទទួលព្រះបន្ទូលទាំងមានអំណរ មកពីព្រះវិញ្ញាណដ៏វិសុទ្ធដែរ។ ៧ ហេតុនេះ បងប្អូនបានទៅជាគំរូដល់អ្នកជឿទាំងអស់នៅស្រុកម៉ាសេដូន និងស្រុកអាខៃ ៨ ដ្បិតព្រះបន្ទូលរបស់ ព្រះអម្ចាស់ដែលចេញពីបងប្អូនទៅនោះ មិនត្រឹមតែលាន់ឮសុសសាយក្នុងស្រុកម៉ាសេដូន និងស្រុកអាខៃប៉ុណ្ណោះទេ គឺជំនឿរបស់បងប្អូនលើព្រះជាម្ចាស់ បានឮខ្ចរខ្ចាយទៅគ្រប់ទីកន្លែង។ ដូច្នេះ យើងមិនបាច់និយាយអ្វីទៀតឡើយ។ ៩ មនុស្សម្នារៀបរាប់អំពី របៀបដែលបងប្អូនទទួលយើង នៅពេលយើងមករកបងប្អូន និងអំពីរបៀបដែលបងប្អូនលះបង់ព្រះក្លែងក្លាយ បែរមករកព្រះជាម្ចាស់ ដើម្បីគោរពបំរើព្រះអង្គដែលមានព្រះជន្មរស់ និងជាព្រះដ៏ពិតប្រាកដ។ ១០ បងប្អូនក៏ទន្ទឹង រង់ចាំព្រះបុត្រារបស់ព្រះអង្គ យាងពីស្ថានបរមសុខ*មក គឺព្រះយេស៊ូដែលព្រះអង្គបានប្រោសអោយមានព្រះជន្មរស់ឡើងវិញ។ ព្រះយេស៊ូនេះប្រោសយើងអោយរួចផុតពីព្រះពិរោធដែលកំពុងតែមក។
ជំពូក ៣
១ ដោយយើងពុំអាចទ្រាំតទៅទៀតបាន យើងក៏សំរេចចិត្តស្នាក់នៅក្រុងអាថែន តែគ្នាយើង ២ ហើយចាត់លោកធីម៉ូថេជា បងប្អូនរបស់យើង ដែលធ្វើការរួមជាមួយព្រះជាម្ចាស់ ក្នុងការប្រកាសដំណឹងល្អ*របស់ព្រះគ្រីស្ដ អោយមកជួយពង្រឹង និងដាស់តឿនបងប្អូនអោយមានជំនឿរឹងប៉ឹងឡើង ៣ ដើម្បីកុំអោយមាននរណា ម្នាក់ធ្លាក់ទឹកចិត្ត ព្រោះតែទុក្ខវេទនាដែលកំពុងកើតមាននៅពេលនេះឡើយ បងប្អូនជ្រាបស្រាប់ហើយថា ព្រះជាម្ចាស់បានតំរូវអោយយើងជួបប្រទះនឹងទុក្ខវេទនាយ៉ាងនេះឯង។ ៤ កាលយើងនៅជាមួយបង ប្អូននៅឡើយ យើងបានជំរាបបងប្អូនរួចហើយថា យើងមុខជានឹងជួបទុក្ខវេទនា។ ទុក្ខវេទនានេះក៏កើតមានមែន ដូចបងប្អូនជ្រាបស្រាប់។ ៥ ហេតុនេះ ដោយខ្ញុំពុំអាចទ្រាំតទៅទៀតបាន ខ្ញុំក៏ចាត់លោកធីម៉ូថេអោយមកយកដំណឹងអំពីជំនឿរបស់បងប្អូន ព្រោះខ្ញុំខ្លាចក្រែងលោមេល្បួងមកល្បួងបងប្អូនបាន បណ្ដាលអោយការនឿយហត់របស់យើង បែរទៅជាអសារបង់វិញ។
៦ ឥឡូវនេះ លោកធីម៉ូថេទើបនឹងវិលត្រឡប់ទៅដល់យើងវិញ ហើយគាត់បាននាំដំណឹងល្អ អំពីជំនឿ និងអំពីសេចក្ដីស្រឡាញ់របស់បងប្អូនមកប្រាប់យើង។ គាត់ប្រាប់យើងថាបងប្អូន នៅនឹកចាំពីយើងជានិច្ច ហើយមានបំណងចង់ជួបយើងវិញយ៉ាងខ្លាំង ដូចយើងចង់ជួបបងប្អូនដែរ។ ៧ ហេតុនេះ បងប្អូនអើយ ជំនឿរបស់បងប្អូនបានធ្វើអោយចិត្តយើងបែរជាធូរស្រាលវិញ ទោះបីយើងពិបាកចិត្តគ្រប់យ៉ាង និងមានទុក្ខវេទនាយ៉ាងណាក្ដី។ ៨ ដោយបងប្អូនស្ថិតនៅខ្ជាប់ខ្ជួន ជាមួយព្រះអម្ចាស់ដូច្នេះ យើងក៏ដូចជាមានជីវិតរស់វិញដែរ។ ៩ យើងពុំដឹងជារកពាក្យ អ្វីមកថ្លែង អរព្រះគុណព្រះជាម្ចាស់អំពីបងប្អូននោះឡើយ ព្រោះតែបងប្អូនធ្វើអោយយើងមានអំណររីករាយ នៅចំពោះព្រះភក្ត្រព្រះជាម្ចាស់របស់យើង។ ១០ ទាំងយប់ទាំងថ្ងៃ យើងទទូចសូមព្រះអង្គមេត្តាប្រោសអោយបានឃើញមុខបងប្អូន ព្រមទាំងប្រទានអោយជំនឿរបស់បងប្អូនបានពេញលក្ខណៈ កុំបីមានចន្លោះត្រង់ណាឡើយ។
១១ សូមព្រះជាម្ចាស់ផ្ទាល់ ជាព្រះបិតារបស់យើង និងព្រះយេស៊ូជាអម្ចាស់នៃយើងទ្រង់រៀបចំផ្លូវអោយយើងមករកបងប្អូន។ ១២សូមព្រះអម្ចាស់ប្រទាន អោយបងប្អូនមានសេចក្ដីស្រឡាញ់ដល់គ្នាទៅវិញទៅមក និងស្រឡាញ់មនុស្សទាំងអស់ កាន់តែខ្លាំងឡើងៗជាអនេកដូចយើងបានស្រឡាញ់បងប្អូនដែរ។ ១៣ សូមព្រះអង្គប្រទាន អោយចិត្តគំនិតរបស់បងប្អូនមានជំហររឹងប៉ឹង អោយបងប្អូនបានវិសុទ្ធឥតខ្ចោះ នៅចំពោះព្រះភក្ត្រព្រះជាម្ចាស់ ជាព្រះបិតារបស់យើង ក្នុងពេលព្រះយេស៊ូជាអម្ចាស់នៃយើងយាងមក ជាមួយប្រជាជនដ៏វិសុទ្ធទាំងអស់របស់ព្រះអង្គ!
ជំពូក ៤
របៀបរស់នៅដែលគាប់ព្រះហឫទ័យព្រះជាម្ចាស់
១ បងប្អូនអើយ បងប្អូនបានរៀនពីយើងអំពីរបៀបរស់នៅ ដែលគាប់ព្រះហឫទ័យព្រះជាម្ចាស់ ហើយបានប្រព្រឹត្តតាមទៀតផង។ ដូច្នេះ នៅទីបំផុតយើងសូមអង្វរ និងសូមដាស់តឿនបងប្អូន ក្នុងព្រះនាមព្រះអម្ចាស់យេស៊ូថា សូមអោយបងប្អូនបានប្រសើរលើសនេះទៅទៀត!
២ បងប្អូនជ្រាបស្រាប់ហើយថា យើងបានទូន្មានបងប្អូនក្នុងព្រះនាមព្រះអម្ចាស់យេស៊ូយ៉ាងណា។ ៣ ព្រះហឫទ័យរបស់ព្រះជាម្ចាស់ គឺអោយបងប្អូនបានវិសុទ្ធ* អោយបងប្អូនចៀសវាងអំពើប្រាសចាកសីលធម៌។ ៤ ម្នាក់ៗត្រូវចេះរួមរស់ជាមួយភរិយារបស់ខ្លួន ដោយវិសុទ្ធ និងថ្លៃថ្នូរ ៥ ឥតបណ្ដោយខ្លួនទៅតាមចំណង់តណ្ហា ដូចសាសន៍ដទៃដែលមិនស្គាល់ព្រះជាម្ចាស់នោះឡើយ។ ៦ មិនត្រូវអោយបងប្អូន ណាម្នាក់ប្រព្រឹត្តអ្វីខុសចំពោះបងប្អូនឯទៀតៗ ឬរំលោភលើសិទ្ធិគេក្នុងរឿងនេះឡើយ ដ្បិតព្រះអម្ចាស់នឹងដាក់ទោសអ្នកប្រព្រឹត្តអំពើទាំងនេះ ដូចយើងបាននិយាយ និងបញ្ជាក់រួចស្រេចហើយ។ ៧ ព្រះជាម្ចាស់ត្រាស់ហៅយើងមក មិនមែនអោយរស់នៅក្នុងអំពើថោកទាបនោះឡើយ គឺអោយយើងបានវិសុទ្ធវិញ។ ៨ ដូច្នេះ អ្នកណាបដិសេធមិនទទួលដំបូន្មាននេះ មិនត្រឹមតែបដិសេធមិនទទួលមនុស្សប៉ុណ្ណោះទេ គឺបដិសេធមិនទទួលព្រះជាម្ចាស់ ដែលបានប្រទានព្រះវិញ្ញាណដ៏វិសុទ្ធរបស់ព្រះអង្គ មកបងប្អូននោះតែម្ដង។
៩ រីឯការ ស្រឡាញ់គ្នាជាបងប្អូនវិញ យើងមិនចាំបាច់សរសេរមកទូន្មានបងប្អូនទេ ដ្បិតបងប្អូនបានរៀនពីព្រះជាម្ចាស់អោយចេះស្រឡាញ់គ្នាទៅវិញទៅមក ១០ ដូចបងប្អូនបាន ស្រឡាញ់បងប្អូនទាំងអស់នៅស្រុកម៉ាសេដូនទាំងមូលស្រាប់ហើយ។ ក៏ប៉ុន្តែ បងប្អូនអើយ យើងសូមដាស់តឿនបងប្អូនថា សូមស្រឡាញ់អោយបានប្រសើរលើសនេះទៅទៀត!។ ១១ ចូរយកចិត្តទុកដាក់ រស់នៅអោយបានស្រគត់ស្រគំ គិតតែពីកិច្ចការខ្លួនឯង និងធ្វើការដោយកម្លាំងខ្លួនឯងផ្ទាល់ ដូចយើងបានផ្ដាំផ្ញើបងប្អូនរួចស្រេចហើយ។ ១២ ធ្វើដូច្នេះ អ្នកដែលមិនមែនជាគ្រីស្ដបរិស័ទនឹងគោរពបងប្អូន ហើយបងប្អូនក៏លែងត្រូវការអោយគេជួយទៀតផង។
អំពីព្រះអម្ចាស់យាងមក
១៣ បងប្អូនអើយ យើងចង់អោយបងប្អូនជ្រាបយ៉ាងច្បាស់ អំពីអស់អ្នកដែលបានស្លាប់ ផុតទៅហើយ ដើម្បីកុំអោយបងប្អូនព្រួយចិត្ត ដូចអ្នកឯទៀតៗ ដែលគ្មានសេចក្ដីសង្ឃឹមនោះឡើយ។ ១៤ ប្រសិនបើយើងជឿថា ព្រះយេស៊ូពិតជាបានសោយទិវង្គត ហើយមានព្រះជន្មរស់ឡើងវិញមែន យើងក៏ជឿថា ព្រះជាម្ចាស់នឹងនាំបងប្អូនដែលបានស្លាប់ទៅហើយ អោយទៅនៅជាមួយព្រះអង្គដោយសារព្រះយេស៊ូដែរ។ ១៥ យើងសូមបញ្ជាក់ប្រាប់ បងប្អូន តាមព្រះបន្ទូលរបស់ព្រះអម្ចាស់ថា យើងដែលមានជីវិតរស់នៅឡើយ នៅពេលព្រះអម្ចាស់យាងមក យើងមិនទៅមុនអ្នកដែលបានស្លាប់នោះទេ ១៦ ដ្បិតនៅពេលមានឮ ស្នូរជាសញ្ញាលាន់ឡើង ហើយនៅពេលឮសំឡេងមហាទេវតា និងសំឡេងត្រែរបស់ព្រះជាម្ចាស់ ព្រះអម្ចាស់ផ្ទាល់ទ្រង់នឹងយាងចុះពីស្ថានបរមសុខមក។ អស់អ្នកជឿលើព្រះគ្រីស្ដដែលបានស្លាប់ទៅនោះ នឹងរស់ឡើងវិញជាមុន ១៧ បន្ទាប់មក ទើបព្រះអម្ចាស់លើកយើងដែលនៅរស់នៅឡើយ អោយឡើងទៅក្នុងពពក* ជាមួយបងប្អូនទាំងនោះ ដើម្បីជួបនឹងព្រះអង្គក្នុងអាកាសវេហាស៍ ហើយយើងនឹងស្ថិតនៅជាមួយព្រះអម្ចាស់រហូតតទៅ។ ១៨ ដូច្នេះ សូមបងប្អូនយកពាក្យទាំងនេះមកសំរាលទុក្ខគ្នាទៅវិញទៅមក។
ជំពូក ៥
១ ចំពោះពេលវេលា និងពេលកំណត់នោះ យើងមិនបាច់សរសេរមកប្រាប់បងប្អូនទេ ២ ដ្បិតបងប្អូនផ្ទាល់ជ្រាបច្បាស់ហើយថា ថ្ងៃដែលព្រះអម្ចាស់យាងមក ប្រៀបបីដូចជាចោរចូលលួចនៅពេលយប់។ ៣ ពេលណាមនុស្សម្នាពោលថា “មានសន្តិភាពហើយ! មានសន្តិសុខហើយ!” ពេលនោះ មហន្តរាយនឹងកើតមានដល់គេមួយរំពេច ពុំអាចគេចផុតបានឡើយ គឺប្រៀបបីដូចជាស្ត្រីឈឺផ្ទៃមុនសំរាលកូនដែរ។ ៤ រីឯបងប្អូនវិញ បងប្អូនអើយ បងប្អូនមិនមែនស្ថិតនៅក្នុងសេចក្ដីងងឹត បណ្ដោយអោយថ្ងៃនោះមកដល់ ដោយមិនដឹងខ្លួន ដូចជាពេលចោរចូលលួចនោះឡើយ។ ៥ បងប្អូនទាំងអស់គ្នា មានពន្លឺនៅក្នុងខ្លួន មានថ្ងៃនៅក្នុងខ្លួន យើងមិនមែនរស់នៅក្នុងយប់អន្ធការ និងក្នុងសេចក្ដីងងឹតទេ។ ៦ ហេតុនេះយើងមិនត្រូវដេកលក់ដូចអ្នកឯទៀតៗឡើយ ផ្ទុយទៅវិញ ត្រូវប្រុងស្មារតី ហើយភ្ញាក់ខ្លួនជានិច្ច។ ៧ អស់អ្នកដែលដេកលក់តែងដេកលក់នៅពេលយប់ ហើយអស់អ្នកស្រវឹងស្រាក៏តែងស្រវឹងនៅពេលយប់ដែរ។ ៨ រីឯយើងដែលមានថ្ងៃនៅ ក្នុងខ្លួនវិញ យើងត្រូវភ្ញាក់ខ្លួនដោយយកជំនឿ និងសេចក្ដីស្រឡាញ់មកពាក់ធ្វើជាអាវក្រោះ ព្រមទាំងយកសេចក្ដីសង្ឃឹមលើការសង្គ្រោះ មកពាក់ធ្វើជាមួកដែក ៩ ដ្បិតព្រះជាម្ចាស់មិន បានតំរូវអោយយើងទទួលទោសឡើយ គឺព្រះអង្គអោយយើងទទួលការសង្គ្រោះ ដោយសារព្រះយេស៊ូគ្រីស្ដ ជាព្រះអម្ចាស់នៃយើង ១០ បានសោយទិវង្គតសំរាប់យើង ដើម្បីអោយយើងរស់រួមជាមួយព្រះអង្គ ទោះបីយើងនៅរស់ក្ដី ស្លាប់ក្ដី។ ១១ ដូច្នេះ ចូរលើកទឹកចិត្តគ្នា និងអប់រំគ្នាទៅវិញទៅមក ដូចបងប្អូនកំពុងតែធ្វើនេះស្រាប់។
ពាក្យដាស់តឿនផ្សេងៗ និងពាក្យសួរសុខទុក្ខ
១២ បងប្អូនអើយ យើងសូមអង្វរបងប្អូនអោយចេះគោរពអស់អ្នកដែលធ្វើការនឿយហត់ ក្នុងចំណោមបងប្អូន ជាអ្នកនាំមុខបងប្អូនក្នុងមាគ៌ាព្រះអម្ចាស់ និងអប់រំបងប្អូន។ ១៣ ត្រូវលើកតម្លៃបង ប្អូនទាំងនោះអោយបានខ្ពស់បំផុត ទាំងមានចិត្តស្រឡាញ់ ដោយយល់ដល់កិច្ចការដែលគេបំពេញនោះផង។ ត្រូវរស់នៅអោយបានសុខជាមួយគ្នា។
១៤ បង ប្អូនអើយ យើង សូមដាស់តឿនបងប្អូនថា ចូរព្រមានអស់អ្នកដែលរស់គ្មានសណ្ដាប់ធ្នាប់ ចូរសំរាលទុក្ខអស់អ្នកដែលបាក់ទឹកចិត្ត ជួយទ្រទ្រង់អស់អ្នកទន់ខ្សោយ និងមានចិត្តអត់ធ្មត់ ចំពោះមនុស្សទួទៅផង។
១៥ ចូរ ប្រយ័ត្ន កុំអោយនរណាម្នាក់ប្រព្រឹត្តអំពើអាក្រក់តបនឹងអំពើអាក្រក់ឡើយ តែត្រូវសង្វាតធ្វើអំពើល្អជានិច្ច គឺធ្វើចំពោះបងប្អូនគ្នាឯង និងចំពោះមនុស្សទួទៅ។
១៦ ចូរមានអំណរសប្បាយជានិច្ច ១៧ ចូរអធិស្ឋានឥតឈប់ឈរ ១៨ ចូរអរព្រះគុណ ព្រះជាម្ចាស់គ្រប់កាលៈទេសៈទាំងអស់ ដ្បិតព្រះអង្គសព្វព្រះហឫទ័យអោយបងប្អូន ដែលរួមជាមួយព្រះគ្រីស្ដយេស៊ូធ្វើដូច្នេះឯង។
១៩ កុំរារាំងសកម្មភាពរបស់ព្រះវិញ្ញាណឡើយ ២០ កុំមើលងាយការថ្លែងព្រះបន្ទូល ២១ ចូរពិចារណាមើលគ្រប់សេចក្ដីទាំងអស់ ហើយស្រង់យកនូវសេចក្ដីណាដែលល្អ។ ២២ ត្រូវចៀសចេញអោយផុតពីអំពើអាក្រក់គ្រប់បែបយ៉ាង។
២៣ សូម ព្រះជាម្ចាស់ ជាប្រភពនៃសេចក្ដីសុខសាន្តប្រោសបងប្អូនអោយបានវិសុទ្ធ*ទាំងស្រុង។ សូមព្រះអង្គថែរក្សាខ្លួនបងប្អូនទាំងមូល ទាំងវិញ្ញាណ ទាំងព្រលឹង ទាំងរូបកាយអោយបានស្អាតឥតសៅហ្មង នៅថ្ងៃព្រះយេស៊ូគ្រីស្ដជាអម្ចាស់នៃយើងយាងមក។ ២៤ ព្រះអង្គដែលបានត្រាស់ហៅបងប្អូនមក ទ្រង់មានព្រះហឫទ័យស្មោះត្រង់ ព្រះអង្គនឹងសំរេចការនេះជាពុំខាន។
២៥ បងប្អូនអើយ សូមអធិស្ឋាន*អោយយើងផង។ ២៦ សូមជំរាបសួរពួកបងប្អូនទាំងអស់ ដោយស្និទ្ធស្នាល។
២៧ ខ្ញុំសូមអង្វរបងប្អូន ក្នុងព្រះនាមព្រះអម្ចាស់ថា សូមអានសំបុត្រនេះ អោយបងប្អូនទាំងអស់គ្នាស្ដាប់ផង។
២៨ សូមព្រះយេស៊ូគ្រីស្ដ ជាអម្ចាស់នៃយើងប្រណីសន្ដោសដល់បងប្អូន!