សូមថ្លែងលិខិតរបស់គ្រីស្ដទូតប៉ូលផ្ញើជូនគ្រីស្ដបរិស័ទក្រុងអេភេសូ អភ ១,១៥-២៣

បងប្អូនជាទីស្រឡាញ់!
តាំងពីពេលដែលខ្ញុំបានឮគេតំណាលអំពីជំនឿរបស់បងប្អូន​ដោយរួមជាមួយព្រះអម្ចាស់យេស៊ូ និងអំពីសេចក្ដីស្រឡាញ់របស់បងប្អូនចំពោះ​ជនដ៏វិសុទ្ធទាំងអស់នោះ ខ្ញុំអរព្រះគុណព្រះជាម្ចាស់ឥតឈប់ឈរព្រោះតែបងប្អូន។ ពេលខ្ញុំ​អធិដ្ឋាន ខ្ញុំតែងតែនឹកគិតដល់បងប្អូនជានិច្ច សូមឱ្យព្រះរបស់ព្រះយេស៊ូគ្រីស្ដជាអម្ចាស់​នៃយើង គឺព្រះបិតាប្រកបដោយសិរីរុងរឿង ប្រទានព្រះវិញ្ញាណឱ្យបងប្អូនមានប្រាជ្ញា​នឹងសម្ដែងឱ្យបងប្អូនស្គាល់ព្រះអង្គយ៉ាងច្បាស់។ សូមព្រះបិតាបំភ្លឺចិត្តគំនិតបងប្អូនឱ្យ​យល់ថា ដោយព្រះអង្គត្រាស់ហៅបងប្អូន បងប្អូនមានសេចក្ដីសង្ឃឹមយ៉ាងណា និងយល់​ថា ដោយបងប្អូនទទួលមត៌ករួមជាមួយប្រជាជនដ៏វិសុទ្ធ បងប្អូននឹងមានសិរីរុងរឿងដ៏​ប្រសើរលើសលប់យ៉ាងណាដែរ!។ សូមទ្រង់ប្រទានឱ្យបងប្អូនយល់ទៀតថា ប្ញទ្ធានុភាព​ដ៏អស្ចារ្យបំផុតដែលព្រះអង្គសម្ដែងមក ជាប្រយោជន៍ដល់យើងជាអ្នកជឿ មានទំហំ​ធំធេងយ៉ាងណា ស្របតាមមហិទ្ធិឫទ្ធិនៃព្រះចេស្ដាដ៏ខ្លាំងក្លា ដែលទ្រង់បានសម្ដែង​ក្នុងអង្គព្រះគ្រីស្ដ។ ព្រះអង្គបានសម្ដែងមហិទ្ធិឫទ្ធិនេះ ដោយប្រោសព្រះគ្រីស្ដឱ្យទទួល​ព្រះជន្មដ៏រុងរឿង និងឱ្យគង់នៅខាងស្ដាំព្រះអង្គនៅស្ថានបរមសុខ ខ្ពស់ជាងវត្ថុស័ក្ដិសិទ្ធិ​គ្រប់យ៉ាង មានទាំងយមយក្ស អារុក្ខអារក្ស អ្នកតា ទេវតាថែរក្សាព្រៃភ្នំជាដើម និង​ខ្ពស់លើសអ្វីៗដែលមានឈ្មោះមិនត្រឹមតែនៅលោកនេះទេ គឺនៅលោកខាងមុខទៀត​ផង។ ​ព្រះជាម្ចាស់បានបង្ក្រាប់អ្វីៗទាំងអស់ឱ្យនៅក្រោមព្រះបាទារបស់ព្រះគ្រីស្ដ ព្រម​ទាំងប្រទានឱ្យព្រះអង្គគង់នៅលើអ្វីៗទាំងអស់ ធ្វើជាសិរសាលើព្រះសហគមន៍ ដែលជា​ព្រះកាយរបស់ព្រះអង្គ។ ព្រះសហគមន៍នេះ បានពោរពេញដោគ្រប់លក្ខណៈសម្បត្តិ​របស់ព្រះគ្រីស្ដ ហើយព្រះគ្រីស្ដផ្ទាល់ក៏បានពោរពេញដោយគ្រប់លក្ខណៈសម្បត្តិរបស់​ព្រះជាម្ចាស់ដែរ។

ទំនុកតម្កើងលេខ ៨,២-៧ បទកាកគតិ

ពិធីអបអរសាទរព្រះគម្ពីរដំណឹងល្អតាម យហ ១៥,២៦-២៧

សូមថ្លែងព្រះគម្ពីរដំណឹងល្អតាមសន្តលូកា លក ១២,៨-១២

ព្រះយេស៊ូមានព្រះបន្ទូលទៅកាន់សាវ័កថា៖«ខ្ញុំសុំប្រាប់អ្នករាល់គ្នាថា អ្នកណាទទួល​ស្គាល់ខ្ញុំ​នៅចំពោះមុខមនុស្សលោក បុត្រមនុស្សនឹងទទួលស្គាល់អ្នកនោះនៅចំពោះមុខពួកទេវទូតរបស់ព្រះជាម្ចាស់ដែរ។ រីឯអ្នកណាមិនទទួលស្គាល់ខ្ញុំនៅចំពោះមុខ​មនុស្សលោក បុត្រមនុស្សក៏នឹងមិនទទួលស្គាល់អ្នកនោះ នៅចំពោះមុខពួកទេវទូតរបស់ព្រះជាម្ចាស់ដែរ។ អ្នកណាពោលពាក្យទាស់នឹងបុត្រមនុស្ស ព្រះ​ជាម្ចាស់នឹងលើកលែង​ទោសឱ្យ ប៉ុន្ដែ អ្នកណាពោលពាក្យទាស់នឹងព្រះវិញ្ញាណដ៏វិសុទ្ធ ព្រះអង្គមិនលើក​លែង​ទោសឱ្យឡើយ។ កាលណាគេបញ្ជូនអ្នករាល់គ្នាទៅវិនិច្ឆ័យទោសក្នុងធម្មសាលា​ ឬនៅមុខចៅក្រម ឬអ្នកកាន់អំណាច កុំភ័យបារម្ភអំពីរបៀបដែលអ្នករាល់គ្នាត្រូវឆ្លើយការពារខ្លួន ឬសេចក្ដីដែលអ្នករាល់គ្នាត្រូវនិយាយនោះឡើយ ដ្បិតព្រះវិញ្ញាណដ៏វិសុទ្ធ​នឹងបំភ្លឺអ្នករាល់គ្នា ឱ្យដឹងសេចក្ដីដែលត្រូវនិយាយនៅពេលនោះឯង»។