សារវីដេអូរបស់សម្តេចប៉ាប ឡេអូទី១៤
ផ្ញើជូន
មហាសន្និបាតពេញអង្គនៃសភាលោកអភិបាលកាតូលិកអាស៊ី
នៅទីក្រុងហ្សាកាតា ប្រទេសឥណ្ឌូនេស៊ី
កាលពីថ្ងៃទី២៥ ខែកក្កដា ឆ្នាំ២០២៦
បងប្អូនប្រុសស្រីជាទីស្រឡាញ់នៅក្នុងព្រះគ្រីស្ត
ខ្ញុំសូមស្វាគមន៍យ៉ាងកក់ក្តៅបំផុតចំពោះបងប្អូនទាំងអស់គ្នា ដែលកំពុងចូលរួមនៅក្នុងមហាសន្និបាតពេញអង្គនៃសភាលោកអភិបាលកាតូលិកអាស៊ី (FABC) នៅទីក្រុងហ្សាកាតា។ ខណៈពេលដែលបងប្អូនប្រជុំជុំវិញគ្នា ដើម្បីពិភាក្សាអំពីបញ្ហាសំខាន់ៗទាំងឡាយ ដែលប៉ះពាល់ដល់ជីវិត និងអនាគតនៃព្រះសហគមន៍ នៅអាស៊ី ខ្ញុំសូមនៅក្បែរបងប្អូនតាមរយៈការអធិស្ឋានសុំឱ្យព្រះវិញ្ញាណដ៏វិសុទ្ធបំភ្លឺ និងដឹកនាំពេលវេលានៃការជួបជុំគ្នារបស់បងប្អូន។ ប្រធានបទដែលបានជ្រើសរើសសម្រាប់មហាសន្និបាតពេញអង្គរបស់បងប្អូន គឺដកស្រង់ចេញពីព្រះបន្ទូលរបស់ព្រះយេស៊ូ ដែលមានព្រះបន្ទូលទៅកាន់លោកណាតាណាអែលថា «អ្នករាល់គ្នានឹងបានឃើញការអស្ចារ្យលើសនេះទៅទៀត»។
ការត្រាស់ហៅលោកភីលីព និងលោកណាតាណាអែលឱ្យមកតាមព្រះអង្គ និងធ្វើជាសាវ័ករបស់ព្រះអង្គ ព្រះអម្ចាស់នៃយើងបានសម្តែងឱ្យឃើញអំពីព្រះអង្គទ្រង់ផ្ទាល់ថា ទ្រង់ជាអ្នកសម្របសម្រួលតែមួយគត់រវាងព្រះជាម្ចាស់ និងមនុស្សជាតិ។ ក្នុងនាមជាសាវ័កបច្ចុប្បន្ន យើងដឹងថា ព្រះយេស៊ូមិនត្រឹមតែជាប្រភពនៃភាពជាធ្លុងតែមួយរបស់យើងជាមួយព្រះជាម្ចាស់ប៉ុណ្ណោះទេ ក៏រវាងយើងនិងយើងទាំងអស់គ្នាផង។ នៅក្នុងឯកសារ Magnifica Humanitas ដែលទើបតែបានបោះពុម្ពផ្សាយកាលពីពេលថ្មីៗនេះ ខ្ញុំបានសរសេរថា សាមគ្គីភាពគ្រីស្ដសាសនិក មានប្រភពចេញពីអាថ៌កំបាំងរបស់ព្រះគ្រីស្ត និងកើតចេញពីព្រះកាយដែលយើងបានទទួល ពិសេសក្នុងពិធីអរព្រះគុណព្រះជាម្ចាស់។
ហេតុនេះ ខ្ញុំសូមលើកទឹកចិត្តបងប្អូនឱ្យបន្តលើកស្ទួយ ជីវិតផ្លូវវិញ្ញាណក្នុងពិធីអរព្រះគុណ នៅតាមព្រះសហគមន៍មូលដ្ឋាន ដែលជាប្រភពនៃការបង្រួបបង្រួមព្រះសហគមន៍ ដោយផ្អែកលើសេចក្តីស្រឡាញ់មេត្តា ដែលហូរចេញពីអំណោយទាននៃព្រះអម្ចាស់នៅក្នុងពិធីអរព្រះគុណនេះ។ ខ្ញុំសង្ឃឹមថា ចំណងនៃព្រះកាយព្រះគ្រីស្តទាំងនៅក្នុងនិងរវាងព្រះសហគមន៍មូលដ្ឋាន នឹងត្រូវបានពង្រឹង ហើយក្លាយជាទីសំគាល់ដ៏ធំធេងនៃវត្តមានរបស់ព្រះជាម្ចាស់នៅក្នុងប្រទេសរបស់បងប្អូន ដែលនឹងជួយឱ្យបងប្អូនក្លាយជាអ្នកកសាងស្ពានមេត្រីភាពជាមួយគ្នានៅទូទាំងទ្វីបអាស៊ី។
បងប្អូនជាទីស្រឡាញ់ ខ្ញុំសូមផ្ញើបងប្អូន និងការពិភាក្សាទាំងនេះ ទៅព្រះនាងព្រហ្មចារិនីម៉ារី ជាព្រះមាតានៃព្រះសហគមន៍ ខ្ញុំសូមទូលអង្វរព្រះអម្ចាស់សូមប្រទានព្រះអំណោយទាន និងភាពក្លាហានស៊ូទ្រាំមកបងប្អូន។
សូមព្រះជាម្ចាស់ដ៏មានឫទ្ធានុភាព គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ ប្រទានព្រះពរមក បងប្អូន និងគង់នៅជាមួយបងប្អូនជារៀងរហូត។ អាម៉ែន៕
