អភិបូជានៅព្រះសហគមន៍សន្តសន្តីតេរេសា ស្រែអំបិល
កំពង់សោម ថ្ងៃទី០៤ ខែកក្កដា ឆ្នាំ២០២៦
“ដើរក្នុងផ្លូវនៃសេចក្ដីស្រឡាញ់របស់ព្រះគ្រីស្ត”
| អត្ថបទទី១៖ អម៉ូល ៩,១១-១៥យើងនឹងលើកកន្លែងដែលរលំបាក់បែក ហើយសង់ខ្ទមនោះឲ្យបានល្អដូចដើមវិញ។ អម ៩,១១ដំណឹងល្អ៖ ម៉ាថាយ ៩,១៤-១៧ក្នុងពិធីមង្គលការ ពេលកូនកំលោះនៅជាមួយ តើភ្ញៀវអាចកាន់ទុក្ខកើតឬទេ!។ មថ ៩,១៥ |
បងប្អូនជាទីស្រឡាញ់!
សម្រាប់យើងជាគ្រីស្តបរិស័ទ យើងមិនត្រូវវង្វេងតាមរបៀបលោកីយ៍ដូចយើងស្តាប់ក្នុងគម្ពីរថ្ងៃនេះ។ ពេលយើងដើរតាមព្រះយេស៊ូយើងអត់វង្វេងទេ យើងមានពន្លឺមួយដ៏ពិសេសដែលណែនាំឲ្យយើងទៅតាមផ្លូវនៃសេចក្តីស្រឡាញ់ ដែលព្រះយេស៊ូបានរៀបចំ។ នៅពេលយើងដើរតាមព្រះយេស៊ូ ទោះបីមានផ្លូវយ៉ាងច្រើនដែលណែនាំឲ្យយើងទៅខាងស្តាំ ខាងឆ្វេង ណែនាំឲ្យយើងភ្លេចខ្លួន ណែនាំឲ្យយើងវង្វេង ប៉ុន្តែយើងដឹងថានៅពេលយើងដើរតាមផ្លូវដែលព្រះអង្គបានរៀបចំយើងអត់វង្វេងទេ។
ផ្លូវដែលព្រះយេស៊ូបានរៀបចំ ជាផ្លូវមិនស្រួលទេ ដោយសារពេលយើងអនុវត្តព្រះបន្ទូលរបស់ព្រះអង្គថា ”សូមស្រឡាញ់គ្នាទៅវិញទៅមក”។ ប៉ុន្តែ មិនមែនស្រឡាញ់គ្នាទៅវិញទៅមកធម្មតាទេ គឺស្រឡាញ់តាមរបៀបព្រះយេស៊ូស្រឡាញ់យើង។ ព្រះយេស៊ូមានព្រះបន្ទូលថា “សូមស្រឡាញ់សត្រូវ” មានន័យថាមនុស្សដែលយើងស្អប់បំផុត ព្រះយេស៊ូឲ្យយើងស្រឡាញ់ដែរ។ ព្រះយេស៊ូមានព្រះបន្ទូលថា “សូមលើកលែងទោស” ប៉ុន្តែមិនមែនលើកលែងទោសល្មមៗទេ គឺលើកលែងទោសដ៏ពេញលក្ខណៈ (៧គុណ៧០ដង)។ ព្រះយេស៊ូមានព្រះបន្ទូលថា “យើងជាអំបិល យើងជាពន្លឺសម្រាប់ពិភពលោកទាំងមូល” យើងបានធ្វើជាពន្លឺខ្លះៗដែរ ជាមួយកូនមត្តេយ្យ ជាមួយយុវជនអក្ខរកម្មដែរ។ ទោះបីយើងមានអារម្មណ៍ថាយើងនៅឆ្ងាយ ប៉ុន្តែដោយសារយើងមានកម្មវិធីសិក្សា យើងបង្រៀនភាសាអង់គ្លេសខ្លះៗ បង្រៀនក្មេងៗមត្តេយ្យ យើងមានឱកាសដើម្បីមានទំនាក់ទំនង។ ពេលឪពុកម្តាយជូនកូនមកសាលារៀនយើង យើងមានឱកាសដើម្បីផ្ដល់សេចក្តីស្រឡាញ់ដែលយើងមាន។
ទំនាក់ទំនងដែលយើងបង្កើតជារបៀបមួយ ដើម្បីទៅជាពន្លឺ ដើម្បីទៅជាអំបិល ដើម្បីបង្ហាញអំពីការយកចិត្តទុកដាក់ជាមួយក្មេងៗ ជាមួយយុវជន។ នេះយើងបង្កើតគ្រួសារមួយ ដែលព្រះយេស៊ូចង់ឲ្យយើងមាន។ ដូច្នេះ លើទឹកដីស្រែអំបិលនេះយើងលែងវង្វេងហើយ ដោយសារទឹកដីនេះជាពន្លឺមួយ ដែលយើងដឹងថាមានវត្តមានរបស់ព្រះយេស៊ូ។ អ្វីដែលសំខាន់ គឺកុំឲ្យយើងនៅក្នុងជីវិតផ្ទាល់ខ្លួន យើងភ្លេចព្រះយេស៊ូ យើងភ្លេចព្រះបន្ទូល យើងភ្លេចព្រះជាម្ចាស់ដែលណែនាំឲ្យយើងរស់នៅដោយព្រះវិញ្ញាណដ៏វិសុទ្ធ។ ព្រះយេស៊ូសោយទិវង្គត ព្រះយេស៊ូមានព្រះជន្មរស់ឡើងវិញ ព្រះយេស៊ូឡើងស្ថានបរមសុខ ប៉ុន្តែព្រះយេស៊ូឲ្យព្រះវិញ្ញាណដ៏វិសុទ្ធ ឲ្យសេចក្ដីស្រឡាញ់ ឲ្យកម្លាំងរបស់ព្រះជាម្ចាស់ពិសេស ដើម្បីឲ្យយើងរស់នៅក្នុងអំណរដែលយើងទទួលពីព្រះអង្គ។ លោកឪពុកដែលមកថ្មី សូមជួយប្រមូលគ្រីស្តបរិស័ទដែលវង្វេងផ្លូវ ឱ្យជួយនៅកោះកុងដែរ ដើម្បីប្រមូលកូនក្មេងឲ្យមានច្រើនដូចនៅទីនេះ។ នេះជារបៀបមួយដើម្បីឲ្យយើងអនុវត្ត យើងនៅក្នុងលោកីយ៍ យើងមានសកម្មភាព យើងជួយ យើងលើកទឹកចិត្ត យើងបង្ហាញសេចក្ដីស្រឡាញ់ ដោយដឹងថាព្រះយេស៊ូគង់នៅ។
ថ្ងៃនេះ ព្រះយេស៊ូណែនាំឲ្យយើងមានកម្លាំងជានិច្ច ពេលយើងមានអារម្មណ៍ថាអស់កម្លាំងព្រះយេស៊ូគង់នៅ ពេលមានអារម្មណ៍ថាអស់សង្ឃឹមព្រះយេស៊ូគង់នៅ។ យើងដឹងថាព្រះយេស៊ូគង់នៅ ព្រះយេស៊ូផ្ដល់កម្លាំងដើម្បីឱ្យយើងទៅមុខបន្តទៀត ដើម្បីយើងរស់នៅក្នុងព្រះពន្លឺដែលយើងទទួលពីព្រះជាម្ចាស់។ ណែនាំឲ្យសេចក្ដីស្រឡាញ់ដែលយើងស្ដាប់ ដែលយើងអធិដ្ឋាននៅក្នុងព្រះកាយព្រះគ្រីស្ត យើងដឹងថាពិតមែនសេចក្ដីស្រឡាញ់ គឺសេចក្ដីស្រឡាញ់រវាងគ្នានឹងគ្នា ជាមួយគ្រីស្តបរិស័ទ ជាមួយបងប្អូននៅតាមភូមិ នៅកន្លែងដែលយើងធ្វើការ កន្លែងដែលយើងរកស៊ី។ កោះកុង-ស្រែ អំបិល ពិសេសដោយសារយើងមាននិស្សិតទេវៈ នេះជាផ្លែមួយដ៏អស្ចារ្យ យើងមានពីរនាក់នៅក្នុងមណ្ឌលសកម្មភាពកំពង់សោមយើង។ នេះជាអំណោយដែលព្រះជាម្ចាស់បានប្រទាន យើងមើលឃើញព្រះជាម្ចាស់ស្រឡាញ់យើង។ទោះបីយើងនៅកន្លែងតូច ព្រះជាម្ចាស់ស្រឡាញ់យើង។
បន្តិចទៀតលោកឪពុកជួយកែកន្លែងយើង ដើម្បីឲ្យយើងស្វាគមន៍ថែមទៀត ដើម្បីឲ្យយើងកក់ក្ដៅថែមទៀត ដើម្បីឲ្យសាលាមត្តេយ្យយើងល្អជាងមុនទៀត ដើម្បីឲ្យជីវិតរបស់យើងជាគ្រីស្តបរិស័ទអនុវត្តអ្វីដែលយើងបានស្ដាប់នៅក្នុងព្រះគម្ពីរ។ ដូចព្រះយេស៊ូមានព្រះបន្ទូលថា “បពិត្រព្រះបិតាជាម្ចាស់នៃស្ថានបរមសុខ និងជាម្ចាស់នៃផែនដី ទូលបង្គំសូមលើកតម្កើងព្រះអង្គ ព្រោះព្រះអង្គបានសម្ដែងធម៌មេត្តាករុណា ការអាថ៌កំបាំងនៃព្រះរាជ សេចក្ដីស្រឡាញ់ឲ្យមនុស្សតូចតាចយល់ តែទ្រង់បានលាក់មិនឲ្យអ្នកប្រាជ្ញ និងអ្នកចេះដឹងយល់ទេ”។ ព្រះបន្ទូលសម្រាប់មនុស្សទាំងអស់ ព្រះបន្ទូលដែលយើងបានទទួល ព្រះបន្ទូលដែលយើងបន្តចែករំលែក នេះជាអំណរសប្បាយដែលយើងមាន។ នេះជាព្រះសហគមន៍របស់យើងដែលមានជីវិត យើងមកពីកន្លែងតូច យើងមកពីកន្លែងធំមិនសំខាន់ទេ។ អ្វីដែលសំខាន់ គឺយើងមានសេចក្ដីស្រឡាញ់តែមួយ អំណរសប្បាយតែមួយដែលមកពីព្រះជាម្ចាស់។
យើងបន្តអធិដ្ឋាន អរព្រះគុណព្រះជាម្ចាស់ យើងនឹកដល់លោកអភិបាល អ៊ីវ ដែលបានស្រឡាញ់យើងណាស់ បានជួយច្រើនដើម្បីឲ្យព្រះសហគមន៍នៅតំបន់នេះមានជីវិត។ យើងនឹកឃើញដល់លោកតា វើណេ ដែលធ្វើឲ្យគ្រីស្តបរិស័ទដែលអស់គ្រូគង្វាល អស់រយៈពេលយូរឆ្នាំ ពីឆ្នាំ១៩៧៥ ដល់ឆ្នាំ១៩៩៣-១៩៩៤ បានត្រឡប់មកវិញដើម្បីជួយនៅកំពង់សោម កោះកុង។ យើងមើលឃើញ សេចក្ដីស្រឡាញ់ដែលគេមានមកពីព្រះជាម្ចាស់ ហើយណែនាំឲ្យជីវិតរបស់យើងទៅមុខបន្តទៀត។ បងប្អូនជាទីស្រឡាញ់ យើងអរព្រះគុណព្រះជាម្ចាស់ យើងសូមស្វាគមន៍លោកឪពុកថ្មីរបស់យើងដោយអំណរសប្បាយ ដើម្បីឲ្យយើងទាំងអស់បន្តរស់នៅក្នុងព្រះពន្លឺដែលយើងទទួលពីព្រះជាម្ចាស់ នៅក្នុងវិញ្ញាណនៃសេចក្ដីស្រឡាញ់ដែលព្រះជាម្ចាស់ប្រទាន ដើម្បីកសាងគ្រួសារមួយដែលចេះស្រឡាញ់គ្នាទៅវិញទៅមក។ ទូលអង្វរលោកតា អ៊ីវ លោកតា វើណេ ដែលនៅស្ថានបរមសុខ ដើម្បីជួយថែរក្សាយើងថែមទៀត។ អាម៉ែន៕
+ លោកអភិបាល អូលីវីយ៉េ ជ្មីតហស្លេ
អភិបាលព្រះសហគមន៍កាតូលិកកម្ពុជា
ភូមិភាគភ្នំពេញ
