ព្រះសីហនុ៖ កាលពីថ្ងៃទី៥ ខែកក្កដា ឆ្នាំ២០២៦ ម្សិលមិញនេះ សហគមន៍និយាយភាសាអង់គ្លេសនៅព្រះវិហារសន្តមីកាអែល ក្រុងព្រះសីហនុ បានរៀបចំប្រារព្ធពិធីអគ្គសញ្ញាជ្រមុជទឹក និងលាបថ្ងាស ជូនដល់បេក្ខជនខ្មែរនិងបរទេសចំនួន ១២ រូប ដែលកំពុងរស់នៅ និងបំពេញការងារនៅក្នុងប្រទេសកម្ពុជា នាតំបន់មណ្ឌលសកម្មភាពកំពង់សោម។
ពិធីដ៏មានអត្ថន័យនេះ ត្រូវបានប្រារព្ធឡើងក្រោមអធិបតីភាពដ៏ខ្ពង់ខ្ពស់របស់ លោកអភិបាល សិលា សួន ហង្សលី អភិបាលឧបត្ថម្ភកៈភូមិភាគភ្នំពេញ ដោយមានការចូលរួមពីសំណាក់លោកបូជាចារ្យ ដូនជី ឧបដ្ឋាក ព្រមទាំងគ្រីស្តបរិស័ទទាំងជាតិ និងអន្តរជាតិយ៉ាងច្រើន។
នៅក្នុងពិធីអភិបូជានោះដែរ លោកបូជាចារ្យ គង់ វៀល បានថ្លែងធម្មទេសនាជាភាសាអង់គ្លេស ដោយបានអបអរសាទរ និងលើកទឹកចិត្តយ៉ាងជ្រាលជ្រៅដល់បេក្ខជនទាំង ១២ រូប ចំពោះការសម្រេចចិត្តដ៏អស្ចារ្យក្នុងដំណើរជីវិតជំនឿរបស់ពួកគេ។
លោកបូជាចារ្យបានមានប្រសាសន៍ទៅកាន់បេក្ខជនថា«នេះវាជាដំណើរដ៏អស្ចារ្យសម្រាប់បងប្អូន ដែលមកទីនេះក្នុងប្រទេសកម្ពុជា ហើយបានជួបព្រះគ្រីស្តជាព្រះសង្គ្រោះរបស់បងប្អូន នៅក្នុងទីក្រុងដែលមនុស្សភាគច្រើនរកឃើញតែការបាត់បង់ និងសេចក្តីអស់សង្ឃឹម។»
លោកបូជាចារ្យក៏បានដកស្រង់ព្រះបន្ទូលរបស់ព្រះជាម្ចាស់ ដើម្បីជាកម្លាំងចិត្ត និងជាទីពឹងសម្រាប់ដួងចិត្តដែលកំពុងនឿយហត់ក្នុងជីវិតរស់នៅ ដោយលោកបានបញ្ជាក់យ៉ាងច្បាស់ៗថា៖ «នៅក្នុងដំណឹងល្អ ព្រះយេស៊ូទ្រង់បន្លឺព្រះសូរសៀង ហើយមានបន្ទូលថា៖ “ចូរមករកខ្ញុំ អ្នករាល់គ្នាដែលនឿយហត់ និងមានបន្ទុកធ្ងន់អើយ ខ្ញុំនឹងឲ្យអ្នករាល់គ្នាសម្រាក។ ដ្បិតនឹមរបស់ខ្ញុំស្រួល ហើយបន្ទុកខ្ញុំក៏ស្រាល”។»
លោកបូជាចារ្យរូបនេះបញ្ជាក់ថា ព្រះយេស៊ូយាងចូលក្នុងជីវិតរបស់ពួកគេ មិនមែនដើម្បីគ្រប់គ្រងពួកគេទេ ប៉ុន្តែដើម្បីដោះលែងពួកគេឱ្យមានសេរីភាព។
បន្ថែមពីលើសនេះ លោកបូជាចារ្យបានរំលឹកបេក្ខជនអំពីតម្លៃនៃអំណោយទានទាំងប្រាំពីររបស់ព្រះវិញ្ញាណដ៏វិសុទ្ធ មានដូចជា ប្រាជ្ញា សេចក្តីយល់ដឹង ដំបូន្មាន ភាពក្លាហាន ចំណេះដឹង ភក្តីភាព និងសេចក្តីកោតខ្លាចព្រះជាម្ចាស់។ ហើយអ្វីដែលពួកគេទទួលបានក្នុងថ្ងៃនោះ លោកបានសង្កត់ធ្ងន់ថា «ទាំងនេះមិនមែនជាគ្រឿងលម្អទេ។ ពួកវាជាអាវុធសម្រាប់បំភ្លឺទីក្រុងដែលត្រូវការពន្លឺនៅក្នុងថ្ងៃនេះ។»
លោកបន្ថែមថា ចាប់ពីពេលនេះទៅ ពួកគេមិនមែនរស់នៅក្នុងនាមជាជនរងគ្រោះទេ ប៉ុន្តែក្នុងនាមជាសាក្សីផ្ទាល់អំពីព្រះជាម្ចាស់។ លោកបានជំរុញឲ្យពួកគេ ចេញទៅដោយនាំយកសន្តិភាពរបស់ព្រះយេស៊ូទោះបីត្រូវធ្វើការនៅក្នុងបរិយាកាសដ៏លំបាកដ៏ដោយ។ លោកបានបញ្ជាក់ថា ក្នុងគ្រាលំបាក ព្រះវិញ្ញាណមិនបានយកយើងចេញពីសមរភូមិនោះទេ «ប៉ុន្តែទ្រង់ផ្តល់កម្លាំងឱ្យយើងប្រយុទ្ធតាមរបៀបខុសគ្នា ដោយសេចក្តីពិត ដោយសេចក្តីមេត្តាករុណា និងដោយសេចក្តីស្រឡាញ់ដ៏អត់ធ្មត់។»
លោកដូមីនិក សាវីយ៉ូ ង៉ែត តូនីប បេក្ខជនទទួលអគ្គសញ្ញាលាបថ្ងាសបានឡើងថ្លែងអំណរគុណលោកអភិបាលនិងបូជាចារ្យដែលបានរៀបចំកម្មវិធីនេះ ឲ្យពួកគាត់ក្លាយជាគ្រីស្តបរិស័ទពេញលេញ និងអាចទទួលព្រះពរពីព្រះជាម្ចាស់តាមរយៈព្រះវិញ្ញាណដ៏វិសុទ្ធ ដើម្បីហ៊ានចេញទៅប្រកាសដូចក្រុមគ្រីស្តទូតពីដើម។
តូនីបបានថ្លែងថា «អគ្គសញ្ញាដ៏វិសុទ្ធនេះនឹងជួយយើងខ្ញុំមានភាពរឹងមាំក្នុងជំនឿ ក្លាហានក្នុងការប្រកាសដំណឹងល្អ និងរស់នៅជាសាក្សីរបស់ព្រះគ្រីស្តតាមរយៈការស្រឡាញ់ ការបម្រើ និងការចែករំលែកដល់អ្នកដទៃ»។ លោកក៏បានអរគុណដល់លោកអភិបាល ដែលបានយកចិត្តទុកដាក់អប់រំណែនាំ និងបងប្អូនគ្រីស្តបរិស័ទដែលបានអធិដ្ឋានសម្រាប់ពួកគាត់។
គាត់បានប្តេជ្ញារស់នៅតាមរបៀបការបង្រៀនរបស់ព្រះសហគមន៍និងចូលរួមគ្រប់សកម្មភាពរបស់ព្រះសហគមន៍។
ពិធីបុណ្យនេះបានបញ្ចប់ទៅដោយភាពសប្បាយរីករាយ និងពោរពេញដោយព្រះពរ ដែលនេះជាសញ្ញាដ៏រស់រវើកបង្ហាញពីការរីកចម្រើន និងភាពជាគ្រួសារតែមួយក្នុងព្រះសហគមន៍កាតូលិកនៅក្នុងក្រុងព្រះសីហនុ ក៏ដូចជានៅក្នុងប្រទេសកម្ពុជា៕
ដោយ កែវ កញ្ញា
