«យើងជាបូជាចារ្យ ជាអ្នកកសាងសន្តិភាព»
ប៉ុន្មានថ្ងៃមុន យើងបានបិទស៊ើបអង្កេតមរណសាក្សីសម្រាប់ប្រទេសកម្ពុជា។ ពេលយើងពិចារណាអំពីឆ្មារសាឡាស់ និងសហការីទាំង១១នាក់ យើងឃើញមានលោកអភិបាល បូជាចារ្យ បងស្រី គ្រីស្តបរិស័ទធម្មតា។ យើងមានជនជាតិខ្មែរ ជនជាតិបារាំង និងជនជាតិវៀតណាម។ នេះជាព្រះសហគមន៍ ដែលជាប្រជារាស្ត្ររបស់ព្រះជាម្ចាស់។
នៅថ្ងៃនេះ ខ្ញុំអរព្រះគុណព្រះជាម្ចាស់សម្រាប់វត្តមានលោកពុក បងប្រុស បងស្រី និងគ្រីស្តបរិស័ទជាច្រើនដែលបានមកចូលរួម។ នេះបង្ហាញថា យើងគឺជាប្រជារាស្ត្ររបស់ព្រះជាម្ចាស់ដែលមក ពីគ្រប់ទីកន្លែង នៅក្នុងភូមិភាគ ភ្នំពេញ បាត់ដំបង និងកំពង់ចាម។ យើងជាតំណាងព្រះសហគមន៍របស់យើង បីដូចជាមរណសាក្សី ជាតំណាងព្រះសហគមន៍របស់យើង ដើម្បីចូលរួមអធិស្ឋាន លើកតម្កើងព្រះជាម្ចាស់ សម្រាប់ព្រះអំណោយទានដែលយើងទទួលបានយ៉ាងពិសេសពីព្រះអង្គ គឺជីវិត។
ថ្ងៃនេះជាថ្ងៃលើកទី១៧ ដែលខ្ញុំបានផ្ញើសារទៅលោកឪពុក។ ថ្ងៃនេះយើងចង់និយាយអំពីសន្តិភាព អំពីរបៀបដែលយើងជាបូជាចារ្យ ជាអ្នកបម្រើព្រះសហគមន៍ យើងគឺជាទូតយ៉ាងពិសេសបំផុតសម្រាប់សន្តិភាព។ ប៉ុន្តែខ្ញុំសូមអានអត្ថបទទីមួយដែលយើងស្តាប់អំបាញ់មិញម្តងទៀត៖
«អ្នកក្រុងស៊ីយ៉ូនដែលកាន់ទុក្ខនោះ ទទួលមកុដនៅលើក្បាលជំនួសផេះ ឱ្យគេលាបប្រេង សម្ដែងអំណរ សប្បាយ ជំនួសភាពក្រៀមក្រំ និងកាន់ទុក្ខ ឱ្យគេស្លៀកពាក់យ៉ាងថ្លៃថ្នូរ ជំនួសខោអាវដាច់ រហែក។» (អស៦១,៣)
ពេលយើងនិយាយអំពីទីក្រុងស៊ីយ៉ូន តាមពិតយើងនិយាយអំពីទីក្រុងយេរូសាឡឹម។ ពេល នេះ យើងមើលឃើញគ្រាប់ធ្លាក់ពីមួយថ្ងៃទៅមួយថ្ងៃ នៅក្បែរទីក្រុងយេរូសាឡឹមតែម្ដង។ អត្ថបទនេះ ពោរពេញដោយអត្ថន័យ។ ព្យាការីអេសាយ បានមើលឃើញទុក្ខលំបាករបស់ទីក្រុងយេរូសាឡឹមពីដើម។ ហើយលោកអេសាយបានទទួលព្រះបន្ទូលសន្យា តាមរយៈព្រះជាម្ចាស់ថា បន្តិចទៀតគេនឹងទទួលប្រេងនៃអំណរសប្បាយ នឹងទទួលមកុដពាក់នៅលើក្បាលដែលមិនមែនជាផេះដែលកំពុងមើលឃើញទុក្ខលំបាករាល់ថ្ងៃទេ គេនឹងទទួលអាវថ្មីដើម្បីរស់នៅក្នុងសេចក្តីសុខសាន្តរបស់ព្រះជាម្ចាស់។ នេះគឺជាព្រះបន្ទូលនៃសេចក្តីសង្ឃឹម និងជាព្រះបន្ទូលសម្រាប់សុខសន្តិភាព។
ទី១ លោកឪពុកជាទីស្រឡាញ់ ខ្ញុំគិតថាសម្រាប់យើងដែលជាបូជាចារ្យ ក្នុងឆ្នាំ២០២៥ និង ឆ្នាំ២២២០២៦ នេះ យើងទទួលការត្រាស់ហៅមួយថែមទៀតដ៏ច្បាស់លាស់ គឺទៅជាអ្នកសាងសន្តិភាព ឱ្យយើងទៅជាអ្នកដែលរស់នៅ ធ្វើការងារនិងដើររួមគ្នាជាធ្លុងតែមួយ ជាអង្គតែមួយ (Communion) ដើម្បីធ្វើដំណើរជាមួយគ្នាក្នុងព្រះសហគមន៍ ក្នុងសង្គម និងពិភពលោករបស់យើង ដែលបែកបាក់គ្នា ដែលរងទុក្ខលំបាកនាបច្ចុប្បន្ននេះ ដែលសុខសន្តិភាពកំពុងត្រូវបានបំផ្លាញ។ ពិតមែន បេសកកម្មរបស់យើង គឺប្រទានជីវិត ប្រកាសអំពីសេចក្តីសង្ឃឹម និងសន្តិភាព ជាបេសកកម្មដ៏ពេញលក្ខណៈដែលយើងត្រូវតែបំពេញ។ នៅពេលដែលយើងបានទទួលតែងតាំងជាបូជាចារ្យ ហើយបន្តិចទៀតយើងនឹងប្រកាសពាក្យសច្ចាររបស់យើងសារជាថ្មីនៅមុខព្រះជាម្ចាស់និងព្រះសហគមន៍របស់យើង នៅពេលដែលយើងបានទទួលព្រះវិញ្ញាណដ៏វិសុទ្ធ ពេលនោះពិតមែន យើងបានទទួលអភិសេកដូចព្រះយេស៊ូមានព្រះបន្ទូលថា «ខ្ញុំបានទទួលអភិសេក» នេះគឺដើម្បីប្រកាសដំណឹងល្អដល់ជនក្រីក្រ គឺណែនាំឱ្យមនុស្សខ្វាក់មើលឃើញ មនុស្សដែលជាប់មន្ទីរឃុំឃាំងមានសេរីភាព។ ជីវិតរបស់យើងផ្ទាល់ គឺធ្វើដូចម្តេចដើម្បីឱ្យបងប្អូនរបស់យើងទទួលបានជីវិត។ បន្តិចទៀតនៅក្នុងយប់នៃបុណ្យចម្លង តាមរយៈពិធីជ្រមុជទឹកនៅទូទាំងប្រទេស ដែលមានបេក្ខជនរាប់រយ ដែលបានរៀបចំខ្លួនយូរឆ្នាំពីភ្នំពេញ បាត់ដំបង និងកំពង់ចាម នៅយប់នោះ ពួកគេទទួលអាវថ្មី ដែលជាអាវនៃអំណរសប្បាយ និងណែនាំឱ្យគេទទួលជីវិតដ៏វិសេសនៅក្នុងយប់ដ៏ពិសេសខាងមុខនេះ។
លោកពុកជាទីស្រឡាញ់ នេះជាបេសកកម្មរបស់យើងប្រចាំថ្ងៃ។ ពិតមែន យើងជាបូជាចារ្យ យើងជាអ្នកបម្រើសុខសន្តិភាព ជាអ្នកបម្រើក្នុងធ្លុងតែមួយដោយឯកភាពគ្នានៅក្នុងព្រះសហគមន៍។ ខ្ញុំមើលឃើញយ៉ាងច្បាស់ថា ថ្ងៃនេះរួមជាមួយលោកអភិបាល និងលោកឪពុកទាំងអស់ យើងយល់ថាពិតមែន យើងជាក្រុមបូជាចារ្យដែលជាបងប្អូនលើទឹកដីកម្ពុជា ដើម្បីបម្រើព្រះសហគមន៍កម្ពុជា។ យើងបានរស់នៅក្នុងបទពិសោធន៍នេះ ខណៈពេលហូបបាយ ពេលប្រជុំ និងពេលនិយាយលេងជាមួយគ្នា និងជាពិសេសពេលនេះដែលកំពុងថ្វាយអភិបូជារួមជាមួយលោកអភិបាល។ យើងយល់ថាយើងជាគ្រួសារតែមួយ យើងជាបងប្អូនបង្កើតតែមួយនៅក្នុងអង្គព្រះគ្រីស្ត ដើម្បីបម្រើព្រះសហគមន៍។ លើសពីនេះទៀត ជាអ្វីដែលយើងទទួលនៅក្នុងជីវិតរបស់យើង នៅក្នុងដួងចិត្តរបស់យើង ប៉ុន្តែពីមួយថ្ងៃទៅមួយថ្ងៃ យើងធ្វើដូចម្តេចដើម្បីចែករំលែកជាមួយបងប្អូន ជាមួយក្រុមគ្រួសារបព្វជិត បព្វជិតា ជាមួយ គ្រីស្តបរិស័ទដែលយើងទទួលខុសត្រូវ ដោយធ្វើដំណើរជាមួយគ្នា ដោយស្តាប់គ្នាទៅវិញទៅមក ដោយចែករំលែកគ្នាទៅវិញទៅមក ដោយយល់ចិត្តគ្នាទៅវិញទៅមក និងដោយខិតខំអធិស្ឋានជាមួយគ្នា។ នេះ មិនមែនជាអ្វីដែលយើងចង់ធ្វើឬមិនចង់ធ្វើទេ តែជាកិច្ចការចាំបាច់ដែលយើងត្រូវធ្វើមិនត្រឹមតែជាមួយគ្រួសារបូជាចារ្យរបស់យើងទេ ប៉ុន្តែជាមួយប្រជារាស្ត្រដែលយើងបានទទួលនិងបម្រើពីមួយថ្ងៃទៅមួយថ្ងៃ នៅតាមព្រះសហគមន៍ នៅតាមសាលា កន្លែងធ្វើការ និងគ្រប់ទីកន្លែងនៅក្នុង២៥ខេត្តក្រុងនៅកម្ពុជា។
ទី២ លោកឪពុកជាទីស្រឡាញ់ យើងជាបូជាចារ្យដែលកសាងសុខសន្តិភាព និងជាអំណោយទាននៃសន្តិភាព។ តាមពិត នៅពេលដែលយើងថ្វាយអភិបូជា គ្រប់ពេលវេលា យើងទទួលសន្តិភាពពីព្រះយេស៊ូគ្រីស្ត និងយើងចែកសន្តិភាពនេះ។ នៅពេលដែលយើងបានសូត្រ«ឱព្រះបិតាយើងខ្ញុំ»ចប់ហើយ យើងមានព្រះបន្ទូលរបស់ព្រះយេស៊ូមួយគឺ «ខ្ញុំឱ្យសុខសន្តិភាព គឺសន្តិភាពរបស់ខ្ញុំ» ហើយយើងសូមគ្រីស្តបរិស័ទចែកសន្តិភាពនេះរវាងគ្នានិងគ្នា ដោយមានសញ្ញាមួយយ៉ាងពិសេស។ នៅពេលយើងបញ្ចប់អភិបូជា យើងនិយាយដល់គ្រីស្តបរិស័ទរបស់យើងទាំងអស់ «សូមអញ្ជើញឱ្យបានសុខសាន្ត»។ អភិបូជាជាកំពូល ដើម្បីទទួលបានសន្តិភាពនៅក្នុងដួងចិត្ត។ អភិបូជាជាប្រភព ដើម្បីធ្វើដំណើរនៅក្នុងសង្គមបច្ចុប្បន្ន ដើម្បីផ្តល់សក្ដីភាពនៃសន្តិភាពដែលយើងបានទទួល ហើយសន្តិភាពនេះ គឺទទួលបានពីព្រះយេស៊ូផ្ទាល់ មិនមែនមកពីលោកិយទេ។ យើងជាបូជាចារ្យ ដែលកសាងសុខសន្តិភាពតាមជីវិតរបស់យើងប្រចាំថ្ងៃ ជាពិសេសយើងជាអ្នកដែលសម្រុះសម្រួលគ្រប់ពេលវេលា។ ប៉ុន្តែមិនមែនសម្រុះសម្រួលតាមលោកិយនេះ ដោយគ្រាន់អង្គុយជាមួយគ្នា និងនិយាយជាមួយគ្នាតិចតួច ប៉ុន្តែតាមរយៈអគ្គសញ្ញា និងប្រេងដែលយើងសូមឲ្យព្រះជាម្ចាស់ប្រសិទ្ធពរបន្តិចទៀត។ ប្រេងនៃអគ្គសញ្ញា ជាប្រេងនៃជីវិត។ អគ្គសញ្ញាពិធីជ្រមុជទឹកនិងលាបថ្ងាស អគ្គសញ្ញាសម្រាប់អ្នកជំងឺ អគ្គសញ្ញាដើម្បីតែងតាំង។ ហើយខែក្រោយយើងមានបូជាចារ្យម្នាក់នឹងតែងតាំងអគ្គសញ្ញានៃជីវិត។ ប៉ុន្តែ ប្រេងដែលយើងប្រសិទ្ធពរបន្តិចទៀត គឺប្រេងនេះហៅយើង ដើម្បីឱ្យយើងកសាងសុខសន្តិភាពជាប្រចាំនៅក្នុងព្រះសហគមន៍របស់យើង ដោយនិយាយម្តងហើយម្តងទៀត «សូមស្រឡាញ់គ្នាទៅវិញទៅមក ដូចព្រះយេស៊ូបានស្រឡាញ់យើង»។ សូមស្រឡាញ់ សូមអធិស្ឋានសម្រាប់សត្រូវរបស់ខ្លួន ដើម្បីឱ្យយើងបង្ហាញថា ពិតមែន យើងជាប្រជាជនរបស់ព្រះជាម្ចាស់ ដែលលែងមានសញ្ជាតិ គឺយើងជាគ្រួសារតែមួយនិងជាបងប្អូនគ្នានៅក្នុងអង្គព្រះគ្រីស្ត។ ដូច្នេះ ព្រះបន្ទូលរបស់ព្រះយេស៊ូមិនមែនជាព្រះបន្ទូលដែលយើងត្រូវជ្រើសរើស បើពេញចិត្តនឹងធ្វើតាម បើអន់ចិត្តនឹងមិនស្តាប់នោះទេ។ ព្រះយេស៊ូមានព្រះបន្ទូលថា សូមស្រឡាញ់គ្នាទៅវិញទៅមក ដូចព្រះអង្គបានស្រឡាញ់យើង និងព្រះអង្គថែមទៀត សូមស្រឡាញ់ សូមអធិស្ឋានសម្រាប់សត្រូវ សូមទៅជាអ្នកកសាងសុខសន្តិភាព ដើម្បីទទួលបានសុភមង្គលដ៏ពិតប្រាកដ។
ទី៣ លោកឪពុកជាទីស្រឡាញ់ ឱ្យយើងបន្តធ្វើដំណើររួមជាមួយគ្នា ដោយលាបប្រេងក្រអូបលើដួងចិត្តរបស់យើង ដោយយកចិត្តទុកដាក់ យល់ចិត្តគ្នាទៅវិញទៅមក ដោយអធិស្ឋានទៅព្រះជាម្ចាស់ ដោយដឹងថា នៅពេលយើងទូលអង្វរ ព្រះអង្គឆ្លើយតបនៅថ្ងៃណាមួយ។ នៅកន្លែងណាមានការស្អប់គ្នា មានអំពើហិង្សា យើងត្រូវបង្កើតសុខសន្តិភាព និងបង្កើតភាពសុភាពរាបសារ។ ប្រេងដែលយើងនឹងប្រសិទ្ធពរ មិនមែននិមិត្តរូបទេ ប៉ុន្តែខ្ញុំហ៊ាននិយាយថា វាជាអគ្គសញ្ញានៃសន្តិភាព សម្រាប់ដួងចិត្តយើង សម្រាប់ពិភពលោកយើង ដោយសារប្រេងនេះ ណែនាំឱ្យយើងទទួលសន្តិភាពពីព្រះជាម្ចាស់ដ៏ពិតប្រាកដ។ នៅពេលយើងលាបប្រេង វាមិនត្រឹមតែជាសញ្ញាមួយទេ ពេលយើងដាក់ប្រេងនៅលើថ្ងាសរបស់បងប្អូន យើងដឹងថា ប្រេងនេះ រួមជាមួយព្រះបន្ទូលរបស់ព្រះយេស៊ូ ធ្វើឲ្យមានសមត្ថភាព មានកម្លាំង មានឥទ្ធិពលយ៉ាងជាក់ស្តែង ដើម្បីប្រទានជីវិតនិងសេចក្ដីសុខសាន្តដ៏ពេញលក្ខណៈ ដោយសារជីវិតនិងសេចក្តីសុខសាន្តគឺមកពីព្រះជាម្ចាស់ផ្ទាល់។ នៅពេលនេះយើងមិននិយាយថា លែងមានទុក្ខព្រួយ លែងមានទុក្ខលំបាក ប៉ុន្តែយើងមានតែសេចក្ដីសង្ឃឹម និងសុខសន្តិភាព។
